བོད་ཀྱི་རྨང་གཞིའི་སྒྲིག་བཀོད་ཟམ་མི་ཆད་པར་འཐུས་སྒོ་ཚང་དུ་ཕྱིན་པ་དང་བསྟུན་ནས་2024ལོའི་ལོ་མཇུག་ཏུ་བོད་ཀྱི་གཞུང་ལམ་ཐོག་རླངས་འཁོར་ཤར་གཏོང་ཐུབ་པའི་སྤྱིའི་ལམ་ཐག་དང་ལྕཌ་ལམ་གཉེར་སྐྱོང་གི་ལམ་ཐག་སྤྱི་ལེ་ཁྲི་12.49དང་སྤྱི་ལེ་1359སོ་སོར་ཟིན་ཡོད། འདི་ནི་2025ལོའི་ཟླ་8ཚེས་6ཉིན་པར་བརྒྱབ་པའི་བོད་རང་སྐྱོང་ལྗོངས་ཆབ་མདོ་གྲོང་ཁྱེར་དཔལ་འབར་རྫོང་གི་གཞུང་ལམ་ཡིན་པ།

བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60ཡི་རིང་། གངས་ལྗོངས་ས་མཐོར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཞིང་། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་བོད་ཀྱི་ལས་དོན་ལ་ཚད་མཐོའི་མཐོང་ཆེན་གནང་བ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ཀྱི་ལས་དོན་ལ་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་ཐེངས་མང་གནང་བ། དུས་རབས་གསར་པའི་ཏང་གི་བོད་སྐྱོང་མཛད་ཇུས་གཏན་འཁེལ་གནང་བ། བོད་ལྗོངས་འཕེལ་རྒྱས་ཡག་ཤོས་དང་། འགྱུར་ལྡོག་ཆེ་ཤོས། མང་ཚོགས་ལ་ཕན་པ་དངོས་ཐོབ་མང་ཤོས་བཅས་ཀྱི་ལོ་རྒྱུས་ཀྱི་དུས་སྐབས་ལ་སླེབས་པར་ཁྲིད་སྟོན་གནང་སྟེ། བོད་ཀྱི་བྱ་གཞག་ཁག་ཕྱོགས་ཡོངས་ནས་ཡར་རྒྱས་དང་ལོ་རྒྱུས་རང་བཞིན་གྱི་གྲུབ་འབྲས་ཐོབ་པར་སྐུལ་འདེད་བཏང་ཡོད།

ད་ཆ། བོད་ཀྱི་མི་རིགས་ཁག་གི་མང་ཚོགས་ཀྱི་བདེ་འཇགས་ཐད་བློ་ཡིད་ཚིམ་ཚད་99%ཡན་རྒྱུན་འཁྱོངས་ཐུབ་པ་དང་། དཔལ་འབྱོར་དམིགས་ཚད་གཙོ་བོའི་འཕར་ཚད་ལོ་མང་བསྟུད་མར་རྒྱལ་ཡོངས་ཀྱི་མདུན་གྲལ་དུ་སླེབས་པ། རང་སྐྱོང་ལྗོངས་ཀྱི་རྒྱལ་ཁབ་ཀྱི་ས་ཆ་50%ཡན་སྐྱེ་ཁམས་སྲུང་སྐྱོང་དམར་ཐིག་ནང་བཅུག་པ། མཐའ་མཚམས་གྲོང་ཚོའི་རྨང་གཞིའི་སྒྲིག་བཀོད་མངོན་གསལ་དོད་པོས་ལེགས་སུ་ཕྱིན་པ། ཐོན་ལས་རིགས་སྣ་ཚོགས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ཡོད།

མི་རིགས་མཐུན་སྒྲིལ་ལ་སྲུང་སྐྱོང་ཏན་ཏིག་བྱས་པ།

དུས་རབས་གསར་པ་ཤར་ཚུན། བོད་ཀྱི་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་རྒྱུན་མཐུད་ཟབ་ཏུ་ཕྱིན་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཟམ་མི་ཆད་པར་བརྟན་དུ་ཕྱིན་པ། སྤྱི་ཚོགས་ཀྱི་སྤྱི་ཡོངས་རྒྱུན་མཐུད་བརྟན་ལྷིང་བཅས་བྱུང་སྟེ། ལག་གདང་སྦྲེལ་ནས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་གྱི་རྨང་གཞི་ཉིན་བཞིན་བརྟན་དུ་ཕྱིན་ཡོད།

ལག་གདང་སྦྲེལ་ནས་མཐུན་སྒྲིལ་གྱི་དྲོ་སྐྱིད་ཚོར་བ། ཀྲང་ཀྲན་ཆུན་ནི་ཧྲའན་ཤིས་བ་ཡིན་ཞིང་། 2017ལོར་མངའ་རིས་ས་ཁུལ་སྒར་རྫོང་དུ་ལས་ཀར་སླེབས་པ་ནས་བཟུང་། ས་གནས་དེ་གའི་མང་ཚོགས་ལ་སྡོང་ཕྲུག་འདེབས་འཛུགས་སོགས་ཀྱི་ཆེད་ལས་ལག་རྩལ་དམར་ཁྲིད་བྱས་ཡོད།

འཆད་སྟེགས་ཤིག་ནས་མཐུན་སྒྲིལ་གྱི་མཐོ་ཚད་མཚོན། སུང་ཡུས་ཀང་ནི་ཧོ་ནན་བ་ཡིན་ཞིང་། ཁོང་གིས་ལྷ་ས་གྲོང་ཁྱེར་མལ་གྲོ་གུང་དཀར་རྫོང་རུ་ཐོག་ཤང་ལྟེ་བའི་སློབ་ཆུང་དུ་བགྲང་བྱ་28རིང་སློབ་ཁྲིད་ལས་ལ་གཞོལ་ནས་ཕྲུ་གུ་ཚོར་མིག་རྒྱང་གསར་པ་ཕྱེ་ཡོད།

སྣམ་བུབས་གཅིག་ལས་མཐུན་སྒྲིལ་གྱི་ཕུགས་འདུན་མཚོན། ཧྲང་ཧའེ་ཡི་བོད་སྐྱོར་སྟོབས་ཤུགས་ཀྱི་རྒྱབ་སྐྱོར་འོག གཞིས་རྩེ་གྲོང་ཁྱེར་རྒྱལ་རྩེ་རྫོང་དཔལ་འབྱོར་ལྷུན་པོ་གྲོང་ཚོར“ཨ་ཅག་སྐལ་བཟང”བཟོ་ཁང་བཙུགས་ནས་ས་གནས་དེ་གའི་བུད་མེད་30ཙམ་ཁྱིམ་གྱི་སྒོ་ཁར་ལས་ཞུགས་ཐུབ་པ་ལ་སོགས་རེད།

མིག་སྔའི་བར། བོད་ནས་མཉམ་སྡེབ་154དང་མི་204ལ“རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་བའི”མཚན་སྙན་ཐོབ་པ་དང་། གྲོང་ཁྱེར(ས་ཁུལ)7ཚང་མ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་གྲོང་ཁྱེར(ས་ཁུལ)ལ་འཛུགས་གཏོད་བྱས་པ། རྫོང(ཆུས་དང་གྲོང་ཁྱེར)30རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་རྫོང(ཆུས་དང་གྲོང་ཁྱེར)ལ་འཛུགས་གཏོད་བྱས་པ། ཚན་པ་54ལ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ཚན་པའི་མིང་བཏགས་ཡོད།

ཁ་གཏད་བོད་སྐྱོར་མ་ལག་རིམ་བཞིན་འཐུས་སྒོ་ཚང་དུ་ཕྱིན་ནས་མི་རིགས་མཐུན་སྒྲིལ་སྲ་བརྟན་དུ་གཏོང་བའི་འབྲེལ་ཐག་གལ་ཆེན་དུ་གྱུར་ཡོད། ཁག་ཐེངས་11ལ་བགོས་ནས་ལས་བྱེད་ཤེས་ལྡན་པ་སྣ་ཚོགས་ཁྲི་1.4ལྷག་ཙམ་བོད་དུ་ལས་ཀར་སླེབས་པ་དང་། རིམ་རྩིས་བརྒྱབ་ན། མ་དངུལ་སྒོར་དུང་ཕྱུར་643བཏང་ནས་བོད་སྐྱོར་རྣམ་གྲངས་ཁག་8204ལག་བསྟར་བྱས་པ་རེད།

ལྷ་སར་ཅང་སུའུ་ཡི་བོད་སྐྱོར་ལས་བྱེད་པས་འབྲི་གཡག་གི་རྒྱུད་བཟང་ནང་འདྲེན་བྱས་ནས། བཤས་གཏོང་བའི་དུས་འཁོར་ལོ་3ཐུང་དུ་བཏང་སྟེ་གསོ་ཚགས་དུད་ཚང་གི་ལོ་རེའི་ཆ་སྙོམས་ཡོང་འབབ་སྒོར་ཁྲི་2ཡན་འཕར་རྒྱུར་སྐུལ་ཁྲིད་བྱས་པ་དང་། ཆབ་མདོར་ཧྥུའུ་ཅན་གྱི་བོད་སྐྱོར་ལས་བྱེད་པས་སྟར་ཁའི་སྣུམ་གྱི་ཐོན་ལས་རིམ་སྤོར་ལ་སྐུལ་འདེད་བཏང་སྟེ་ཞིང་འབྲོག་མང་ཚོགས་90ཁྱིམ་གྱི་སྒོ་འགྲམ་དུ་ལས་ཞུགས་ཐུབ་པ། མངའ་རིས་སུ་ཧྲའན་ཤིས་ཀྱི་དགེ་རྒན་གྲགས་ཅན་བརྒྱ་མངའ་རིས་ཀྱི་རྫོང་7ལ་སློབ་ཁྲིད་བྱེད་པར་བསྐྱོད་པ་དང་མངའ་རིས་ཀྱི་དགེ་སློབ་800ལྷག་ཙམ་ཧྲའན་ཤིས་སུ་ཞིབ་སྦྱོང་བྱེད་པར་བསྐྱོད་ཡོད།

མི་རིགས་ཁག་གི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཆེ་རུ་ཕྱིན་པ།

“རྒས་དུས་འཚོ་རྟེན་ཡོད་པ”དང“བྱིས་དུས་སྐྱོང་མཁན་ཡོད་པ”ནི་བོད་ཀྱིས་དམངས་འཚོ་ལེགས་སུ་གཏོང་བ་དང་མི་དམངས་ཀྱི་བདེ་རྩ་ཆེ་རུ་བཏང་བའི་བསྡུས་རིས་ཤིག་ཡིན་ཞིང་། ཉེ་བའི་ལོ་ཤས་རིང་། བོད་ཀྱིས་ནོར་སྲིད་ཡོང་འབབ་ཀྱི་80%ཡན་དམངས་འཚོའི་ཁྱབ་ཁོངས་སུ་གཏོང་རྒྱུ་མཐའ་འཁྱོངས་བྱས་ནས། སློབ་གསོ་དང་། སྨན་བཅོས། རྒན་གསོ་སོགས་ཁྱབ་ཁོངས་མང་པོར་ཁྱབ་པའི་འགན་སྲུང་མ་ལག་བཙུགས་ཏེ་མི་རིགས་ཁག་གི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་མཐུད་ཆེ་རུ་བཏང་ཡོད།

2006ལོ་ནས་2024ལོ་བར། ཀྲུང་དབྱང་དང་བོད་ཀྱིས་རིམ་རྩིས་བརྒྱབ་ན་ཁ་གསབ་མ་དངུལ་སྒོར་དུང་ཕྱུར་372.63བཏང་སྟེ་འགན་སྲུང་རང་བཞིན་གྱི་སྡོད་ཁང་མཁོ་སྤྲོད་རྒྱུན་ཆད་མེད་པར་མང་དུ་བཏང་ཡོད།

2014ལོ་ནས་2024ལོ་བར་བོད་ཀྱིས་རིམ་རྩིས་བརྒྱབ་ན་ནོར་སྲིད་རང་བཞིན་གྱི་སློབ་གསོའི་གྲོན་དངུལ་སྒོར་དུང་ཕྱུར་3000ལྷག་ཙམ་བཏང་བ་མ་ཟད། ལོ་15ཡི་གཞུང་གྲོན་སློབ་གསོ་སྔོན་ལ་ལག་ལེན་བསྟར་ཡོད།

2024ལོའི་བར། བོད་ལ་སྨན་བཅོས་འཕྲོད་བསྟེན་སྒྲིག་གཞི་ཁྱོན་7200ལྷག་ཙམ་ཡོད་པ་དང་། རང་སྐྱོང་ལྗོངས་དང་། ས་ཁུལ(གྲོང་ཁྱེར) རྫོང(ཆུས་དང་གྲོང་ཁྱེར) ཤང(གྲོང་རྡལ) གྲོང་ཚོ(སྡེ་ཁུལ)བཅས་རིམ་ལྔའི་འཕྲོད་བསྟེན་བདེ་ཐང་ཞབས་ཞུའི་དྲ་རྒྱ་གཞི་རྩའི་ཆ་ནས་བསྐྲུན་པ། མི་རེའི་ཆ་སྙོམས་སྔོན་དཔག་ཚེ་ཚད་ལོ་72.5བར་རིང་དུ་ཕྱིན་པ་རེད།

ལོ་ངོ་60ཡི་འཕེལ་རྒྱས་བརྒྱུད་རིམ་ཁྲོད་དུ་བོད་རང་སྐྱོང་ལྗོངས་ཀྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་སྟོང་དང་པོ་ཟིན་པར་ལོ་50འགོར་མོད། འོན་ཀྱང་སྒོར་དུང་ཕྱུར་སྟོང་གཉིས་པ་ཟིན་པར་ལོ་6ལས་འགོར་མེད”ཟླ་8ཚེས་5ཉིན། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས་འཚོགས་པའི་གསར་འགྱུར་ཡོངས་བསྒྲགས་ཚོགས་འདུའི་ཐོག་བོད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ད་ལོར་བོད་རང་སྐྱོང་ལྗོངས་ཀྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་3000ལས་བརྒལ་ནས་སྒོར་དུང་ཕྱུར་སྟོང་གསུམ་པའི་དམིགས་ཚད་ལེགས་སྒྲུབ་ཐུབ་རེ་ཡོད་ཅེས་གསུངས་པ་རེད།

སྐྱེ་ཁམས་ཁོར་ཡུག་སྲུང་སྐྱོང་ཡག་པོ་བྱས་པ།

ལྷོ་ཁ་གྲོང་ཁྱེར་ལྷུན་རྩེ་རྫོང་གི་གླ་ཚེར་ནགས་ཚལ་སྐྱེ་ཁམས་སྤྱི་གླིང་དུ་འཆམ་འཆམ་བྱེད་སྐབས་གང་སར་རི་སྐྱེས་འདབ་ཆགས་རྩེད་འཇོར་རོལ་བཞིན་པ་མཐོང་ཐུབ། མང་མཚོ་གྲོང་ཚོའི་ཡུལ་མི་བསོད་ནམས་ལྷ་རྒྱལ་ཕྲུ་གུ་ཁྲིད་ནས་དེ་གར་འཆམ་འཆམ་དུ་འགྲོ་བར་དགའ་པོ་ཡོད་པ་རེད།

“བྱེ་བཅོས་མ་བྱས་གོང་ལྷགས་པ་ཆེན་པོ་བརྒྱབ་ཚེ་ཞིང་ཁར་བྱེ་མས་ཁེངས་པ་དང་ཁང་པའི་མཐའ་འཁོར་དུ་བྱེ་མ་ཕུང་གསོག་ཐེབས་ཀྱི་ཡོད”གཉལ་གཞུང་ཆུའི་འགྲམ་དུ་གླ་ཚེར་འདེབས་མཁན་ཁག་དང་པོ་ཡིན་པའི་ལོ་77ལ་སླེབས་པའི་བསོད་ནམས་ལྷ་རྒྱལ་གྱིས་ས་གཞི་འདིའི་འགྱུར་ལྡོག་ལ་བདེན་དཔང་བྱས་ཏེ“གླ་ཚེར་བཏབ་ན་བྱེ་རླུང་འགོག་ཐུབ་པ་མ་ཟད། ཁང་པའི་རྒྱབ་མདུན་ཚང་མ་སྔོ་ཐིང་ཐིང་དུ་གྱུར་གྱི་འདུག”ཅེས་བཤད།

དུས་རབས་20པའི་ལོ་རབས་60པ་ནས་བཟུང་ལྷུན་རྩེ་བ་མི་རབས་ནས་མི་རབས་ཀྱིས་གླ་ཚེར་བཏབ་ནས་བྱེ་རླུང་བཀག་པས། བྱེ་རླུང་ལྡང་བའི་གྲམ་ཐང་དེ་སྔོ་ལྗང་གིས་བརྒྱན་པའི་ལྗང་མདོག་སྲུང་བཅད་དུ་གྱུར་ནས་ས་མཐོའི་བྱེ་འགོག་བྱེ་བཅོས་ཀྱི་ངོ་མཚར་བཏོད་ཡོད།

ཉེ་བའི་ལོ་ཤས་རིང་། བོད་ཀྱིས་རི་ཆུ་ནགས་ཞིང་དང་མཚོ་རྩྭ་བྱེ་འཁྱགས་གཞི་གཅིག་ཅན་གྱི་སྲུང་སྐྱོང་དང་བརྒྱུད་རིམ་ལྡན་པའི་བཅོས་སྐྱོང་མཐའ་འཁྱོངས་བྱས་ནས་རྒྱལ་ཁབ་ས་ཆ་སྔོ་འགྱུར་བྱ་སྤྱོད་ལ་སྐུལ་འདེད་གཏིང་ཟབ་བཏང་ཡོད། 2021ལོ་ནས་2024ལོ་བར་བོད་དུ་རྩྭ་ཐང་གི་ཕྱོགས་བསྡུས་སྔོ་ཁེབས་ཁྱབ་ཚད་48.02%ནས་48.07%བར་ཆེ་རུ་ཕྱིན་པ་དང་ནགས་ཚལ་ཁྱབ་ཚད་12.31%ལ་བརྟན་པོར་གནས་ཡོད།

“སྔོན་ཆད་ལུག་གཅིག་ལ་རྒྱ་མ་60ཡང་ཟིན་གྱི་མེད་པ་ནས་ད་ཆ་ལུག་གཅིག་ཁོ་ནར་རྒྱ་མ་100ལྷག་ཙམ་ཡོད”ཅེས་གཞིས་རྩེ་གྲོང་ཁྱེར་ཁང་དམར་རྫོང་གི་འབྲོག་པ་དགྲ་འདུལ་གྱིས་སྤོབས་པ་ཆེན་པོས་བཤད།

འགྱུར་ལྡོག་དེ་ནི་མཐོ་གྲང་འབྲོག་ཁུལ་དུ་མི་ཐབས་རྩྭ་འདེབས་ལག་རྩལ་ཁྱབ་གདལ་བཏང་བ་ལས་བྱུང་བ་དང་། རྩྭ་ར་ཞན་འགྱུར་གྱི་གནད་དོན་ནུས་ལྡན་བསལ་ཏེ། ཐར་ཐོར་དུ་ཆགས་པའི་རྩྭ་ཁ་དམའ་བའི་རྩྭ་ར་དེ་ཡུག་སྦྲེལ་གྱི་ཐོན་འབབ་མཐོ་བའི་རྩྭ་རར་བསྒྱུར་བར་བརྟེན་རྩྭ་ཐང་གི་སྐྱེ་ཁམས་སྲུང་སྐྱོང་དང་དེང་རབས་འབྲོག་ལས་འཕེལ་རྒྱས་གཉིས་ཁེ་བྱུང་བ་རེད།

“མིག་སྔར་མཉམ་ལས་ཁང་གི་འདེབས་འཛུགས་དང་། གསོ་ཚགས། ལས་སྣོན་བཅས་གཞི་གཅིག་ཅན་གྱི་ཐོན་སྐྱེད་རིན་ཐང་བསྡོམས་འབོར་སྒོར་ཁྲི་700ཙམ་ཟིན་ནས། མང་ཚོགས་300ལྷག་ཙམ་ཁྱིམ་གྱི་སྒོ་རྩར་ལས་ཞུགས་ཐུབ་པར་ལོའི་ཡོང་འབབ་སྒོར་ཁྲི་160ལྷག་ཙམ་ཟིན་པ་དང་མང་ཚོགས་ལ་བགོ་འགྲེམས་སྒོར་ཁྲི་60ལྷག་ཙམ་བྱུང་ཡོད”ཅེས་ཁང་དམར་རྫོང་ཉིང་རུ་སྟོད་ཤང་གི་ཤང་ཀྲང་ཀརྨ་བསྟན་དར་གྱིས་ངོ་སྤྲོད་བྱས།

དར་རྒྱས་དང་བརྟན་ལྷིང་གི་མེས་རྒྱལ་གྱི་མཐའ་མཚམས་འཛུགས་སྐྲུན་བྱས་པ།

ལྷུན་རྩེ་རྫོང་ཡུལ་སྨད་ཤང་དུ་དེ་སྔ་བགྲེས་སོང་སངས་རྒྱས་ཆོས་པ་དང་ཁོང་གི་བུ་མོ་སྒྲོལ་དཀར་དང་གཡང་འཛོམས་བཅས་མི་གསུམ་རང་ལས་མེད་པ་དང་ཁོང་ཚོས་ཡངས་ཤིང་རྒྱ་ཆེ་བའི་རྒྱལ་ཁབ་ཀྱི་ས་ཆ་དེ་བརྟན་སྲུང་བྱེད་ཀྱི་ཡོད། “གལ་ཏེ་ང་ཚོ་དེ་ནས་བྲལ་ན་རྒྱལ་ཁབ་ཀྱི་ས་ཆ་དེ་སྲུང་མཁན་མེད། རྐང་འོག་གི་ས་ཆ་ཡག་པོ་བསྲུངས་བ་ནི་སྲོག་རྩ་སྲུང་སྐྱོབ་བྱེད་པ་ཞིག་རེད”ཅེས་གཡང་འཛོམས་ཀྱིས་ད་ལྟའང་ཕའི་སྐད་ཆ་སེམས་ལ་བརྟན་པོར་ངེས་ཀྱི་ཡོད།

ད་ཆ་ཡུལ་སྨད་ཤང་དུ་སྡོད་ཁང་གསར་པ་བསྐྲུན་པ་དང་། འགྲོ་ལམ་ཤར་གཏོང་ཐུབ་པ། ཆུ་དང་། གློག དྲ་རྒྱ་བཅས་ཤང་ཡོངས་ལ་ཁྱབ་ཡོད། དེ་སྔའི“མི་གསུམ་ཤང”དེར་ད་ཆ་དུད་ཚང་67དང་མི་253ཡོད། “འགྲོ་ལམ་དང་གློག་ཤར་གཏོང་ཐུབ་པས་གཞོན་ནུ་རྣམས་ཀྱང་ཚུར་ལོག་འདོད་བྱེད་ཀྱི་འདུག”ཅེས་གཡང་འཛོམས་ཀྱིས་དགའ་ཚོར་ཆེན་པོས་བཤད།

“དམངས་སྲོལ་གནས་ཚང་ཨང་5པ་མངགས་ཟིན་པའི་གྲོགས་པོ་ལགས། ངས་དགྱེ་གླིང་དུ་ཁྱེད་རང་སྒུག་ནས་ཡོད”མེ་ཏོག་རྫོང་དགའ་ལྡན་ཤང་དགྱེ་གླིང་གྲོང་ཚོའི་90ནང་སྐྱེས་ཀྱི་མོན་པ་རིགས་ཀྱི་བུ་མོ་རིན་ཆེན་མཚོ་མོས་ཐད་གཏོང་ནས་སེམས་རྩ་འཁོལ་པོས་རང་ཁྱིམ་གྱི་དམངས་སྲོལ་གནས་ཚང་ངོ་སྤྲོད་བྱེད་བཞིན་ཡོད།

2024ལོར་མེ་ཏོག་རྫོང་དུ་ཡུལ་སྐོར་བ་མི་ཐེངས་ཁྲི་60ཟིན་པ་དེས་རྫོང་ཡོངས་ཀྱི་མི་འབོར་གྱི་ལྡབ་40ལྷག་ཙམ་ཟིན་ཡོད།

དགྱེ་གླིང་གྲོང་ཚོའི་གྲོང་ཚོ་ཨུ་ལྷན་གྱི་ཀྲུའུ་རེན་རྡོ་རྗེ་ཕུན་ཚོགས་ཀྱིས། འགྲོ་ལམ་ཤར་གཏོང་ཐུབ་པས། ད་ཆ་ཁྱིམ་ཚང་ཚང་མས་ཡུལ་སྐོར་ལས་རིགས་གཉེར་གྱི་ཡོད། གྲོང་ཚོ་ཡོངས་ཀྱི་དུད་ཚང་28ཀྱི་ནང་ནས་ཕྱེད་ཀ་ཙམ་གྱིས་དམངས་སྲོལ་གནས་ཚང་གཉེར་བ་མ་ཟད། ད་དུང་ལྷན་སྦྱར་ཟ་ཁང་8ཡོད་པ་དང་ན་ནིང་ཡུལ་སྐོར་ཡོང་འབབ་སྒོར་ཁྲི་90ལྷག་ཙམ་ཟིན་ཡོད་ཅེས་ངོ་སྤྲོད་བྱས།

ལོ་ངོ་60ཡི་རིང་བོད་ཀྱིས་མཐའ་སྟོབས་ཀྱི་དོན་ཆེན་དེར་རྒྱུན་མཐུད་དམ་འཛིན་གཏིང་ཟབ་བྱས་ཏེ་སྡོད་ཁང་དང་། འཐུང་ཆུ། གློག་སྤྱོད། འཕྲིན་གཏོང་སོགས་རྨང་གཞིའི་སྒྲིག་བཀོད་ཀྱི་ཞན་ཆ་སེལ་བ་དང་། སློབ་གསོ་སྨན་བཅོས་ཀྱི་ཐོན་ཁུངས་གཞི་རིམ་ལ་ཕྱོགས་པས། མང་ཚོགས་ཀྱི་ཐོན་སྐྱེད་དང་འཚོ་བའི་ཆ་རྐྱེན་མངོན་གསལ་དོད་པོས་ལེགས་སུ་ཕྱིན་ཏེ། “གཞིས་ཆགས་ཐུབ་པ་དང་འཕེལ་རྒྱས་ཡོང་བའི”རྨང་གཞི་ཉིན་རེ་བཞིན་སྲ་བརྟན་དུ་སོང་ཡོད།