ཚེས་18ཉིན་གྱི་སྔ་དྲོར། གསར་འགོད་པར་བོད་རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་དོན་ཁང་གིས་གཉེར་བའི“བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བའི”བརྗོད་དོན་གཙོ་བོ་རབ་དང་རིམ་པའི་གསར་འགྱུར་ཡོངས་བསྒྲགས་ཚོགས་འདུ་ཐེངས་བཅུ་དགུ་པ་ནས་ཤེས་རྟོགས་བྱུང་བར། 2025ལོའི་ལོ་འགོའི་སྔོན་རྩིས་ལྟར་ན་མ་དངུལ་སྒོར་དུང་ཕྱུར་148བཏང་སྟེ། དམངས་འཚོའི་བྱ་བ་དངོས་ཁག་28སྒྲུབ་རྩིས་ཡོད་པར། དེའི་རྨང་གཞིའི་ཐོག་བོད་རང་སྐྱོང་ལྗོངས་ཀྱིས་སྔོན་རྩིས་ལྟར་ན་མ་དངུལ་སྒོར་དུང་ཕྱུར་20མང་དུ་བཏང་ནས་དམངས་འཚོའི་བྱ་བ་དངོས་ཁག་10གསར་སྣོན་བྱས་ནས་ལག་བསྟར་བྱེད་རྒྱུ་རེད། དེ་ནི་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་ཐག་གཅོད་དེ་བས་ཡག་པོ་བྱེད་པའི་བྱེད་ཐབས་ཤིག་ཡིན་པ་མ་ཟད། བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བར་རྟེན་འབྲེལ་ཞུ་བའི་དམངས་འཚོའི་ལག་རྟཌ་ལྗིད་ཏིག་ཏིག་ཅིག་ཀྱང་རེད།

ཤེས་རྟོགས་བྱུང་བར་གཞིགས་ན། ད་ཐེངས་གསར་སྣོན་བྱས་པའི་དམངས་འཚོའི་བྱ་བ་དངོས་ཁག་10པོ་དག་ཁོངས་མང་པོར་ཁྱབ་པ་སྟེ། བྱ་བ་དངོས་དང་པོ་ནི་ཕྲུ་གུ་དམར་འབྱར་རིན་པ་མི་དགོས་པར་སྨན་བཅོས་འགན་བཅོལ་ལ་ཞུགས་པའི་ལམ་སྲོལ་བཟོ་རྒྱུ་ཡིན་པ་དང་། གཉིས་པ་ནི་ལོ་0ནས་ལོ་3བར་གྱི་བུ་གསོའི་ཁ་གསབ་ལམ་སྲོལ་བཟོ་རྒྱུ་ཡིན་པ། གསུམ་པ་ནི་ཕྲུ་གུའི“སོར་བདག་གཅེས”ཀྱི་གཅེས་སྐྱོང་ལམ་སྲོལ་བཟོ་རྒྱུ་ཡིན་པ། བཞི་པ་ནི་ཡོང་འབབ་དམའ་བའི་དཀའ་ངལ་ཡོད་པའི་ཁྱིམ་ཚང་ལ་དྲོད་ལེན་ཁ་གསབ་སྤྲོད་པའི་ལམ་སྲོལ་བཟོ་རྒྱུ་ཡིན་པ། ལྔ་པ་ནི་བསྐུར་མ་སྐུར་སྐྱེལ་གྱི་ཞིང་ཕན་ཁ་གསབ་ལམ་སྲོལ་བཟོ་རྒྱུ་ཡིན་པ། དྲུག་པ་ནི་མང་ཚོགས་ཀྱི་མི་ལུས་ཀྱི་ཐོལ་བྱུང་རྨས་སྐྱོན་འགན་བཅོལ་གྱི་འཇལ་སྤྲོད་ཚད་གཞི་མཐོ་རུ་གཏོང་རྒྱུ་ཡིན་པ། བདུན་པ་ནི་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་རྒན་གསོའི་འགན་བཅོལ་གྱི་རྨང་གཞིའི་རྒན་གསོའི་དངུལ་གྱི་ཚད་གཞི་མཐོ་རུ་གཏོང་རྒྱུ་ཡིན་པ། བརྒྱད་པ་ནི་ས་བབ་མཐོ་བའི་ས་ཁུལ་གྱི་ལས་བྱེད་པ་དང་ལས་བཟོའི་གཟུགས་པོར་བརྟག་དཔྱད་དང་དྲོད་ལེན་ཁ་གསབ་ཀྱི་ཚད་གཞི་མཐོ་རུ་གཏོང་རྒྱུ་ཡིན་པ། དགུ་པ་ནི་དཀའ་ངལ་ཡོད་པའི་མང་ཚོགས་ལ་ཐེངས་གཅིག་རང་བཞིན་གྱི་འཚོ་བའི་ཁ་གསབ་དང་འཛད་སྤྱོད་འཛིན་ཤོག་སྤྲོད་རྒྱུ་ཡིན་པ། བཅུ་པ་ནི་དམིགས་བསལ་ལེགས་སྐྱེས་འབུལ་མཁན་ལ་ཐེངས་གཅིག་རང་བཞིན་གྱི་འཚོ་བའི་ཁ་གསབ་སྤྲོད་རྒྱུ་བཅས་རེད།

ཤེས་རྟོགས་བྱུང་བར་གཞིགས་ན། གོམ་སྟབས་རྗེས་མར། ནོར་སྲིད་པུས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་ཀའི་བླང་བྱ་མཐའ་གཅིག་ཏུ་ལག་བསྟར་བྱས་ཏེ། ས་གནས་ཁག་དང་སྡེ་ཚན་ཁག་དང་མཉམ་དུ་དམངས་འཚོའི་བྱ་བ་དངོས་ཁག་10པོའི་དོན་འཁྱོལ་ལ་སྐུལ་འདེད་མགྱོགས་པོ་བཏང་ནས། ལྗོངས་ཡོངས་ཀྱི་མི་དམངས་ལ་བཞག་པའི་ཁས་ལེན་དོན་ཐོག་ཏུ་འཁྱོལ་བར་བྱས་ཏེ། དམངས་འཚོའི་བདེ་རྩས་མང་ཚོགས་དེ་བས་མང་བར་ཕན་པ་ཐོབ་པར་བྱེད་རྒྱུ་རེད།