ཉེ་ཆར། བོད་རང་སྐྱོང་ལྗོངས་རླུང་འཕྲིན་བརྙན་འཕྲིན་ཅུས་ཀྱིས་གཙོ་གཉེར་བྱས་པའི“རྟེན་འབྲེལ་ཆེ་མོ་བསུ། ཏང་གི་དྲིན་ལ་བསྟོད། མཉམ་དུ་འབད་འབུངས་བྱེད། རླུང་འཕྲིན་བརྙན་འཕྲིན་གྱིས་དམངས་ལ་ཕན་འདོགས་པ་དང་དུད་ཚང་ཁྲི་སྟོང་མང་པོར་ཞབས་འདེགས་ཞུ་བའི”རླུང་འཕྲིན་བརྙན་འཕྲིན་གྱི་དམངས་ཕན་ཞབས་ཞུའི་བྱེད་སྒོ་ལྷ་སར་སྤེལ་འགོ་ཚུགས་པ་རེད།

ད་ཐེངས་ཀྱི་བྱེད་སྒོའི་དུས་ཡུན་ཟླ་བ་གཉིས་ཡིན་པ་དང་། རླུང་འཕྲིན་བརྙན་འཕྲིན་གྱི་དམངས་ཕན་ཞབས་ཞུ་གཅིག་སྡུད་དཔེ་སྟོན་དང་། སྲིད་གཞུང་གིས་དམིགས་བསལ་ཚོགས་སྤྱིར་སྐུད་ཡོད་བརྙན་འཕྲིན་ཉོ་བའི་ཞབས་ཞུ། རིན་མེད་ངང་ལྟ་ཉན་ལེ་ཚན་འགྲེམས་གཏོང་། དུད་ཚང་དུ་བསྐྱོད་དེ་རླུང་འཕྲིན་བརྙན་འཕྲིན་གྱི་ཞབས་འདེགས་ཞུ་བ། རླུང་འཕྲིན་བརྙན་འཕྲིན་གྱི་དམིགས་བསལ་གཟིགས་སྐྱོང་འཛད་སྤྱོད། གསལ་བ་དང་ཆེས་གསལ་བའི་འཕྲིན་ལམ་སྒྱུར་སྒམ་ཁྱབ་གདལ་གཏོང་བ། རིག་ནུས་རླུང་འཕྲིན་བརྙན་འཕྲིན་གྱིས་གྲོང་གསེབ་དར་རྒྱས་ལ་ཞབས་འདེགས་ཞུ་བ་བཅས་ཀྱི་བྱེད་སྒོ་ཁག་7སྤེལ་རྒྱུ་ཡིན་པ་དེ་ལྗོངས་ཡོངས་ཀྱི་ས་ཁུལ་དང་གྲོང་ཁྱེར་7ལ་མཉམ་དུ་སྤེལ་རྒྱུ་རེད།

ད་ཐེངས་ཀྱི་བྱེད་སྒོའི་ནང་དོན་གྱི་གྲས་ཤིག་ཡིན་པའི་དམིགས་བསལ་ཚོགས་སྤྱིར་སྐུད་ཡོད་བརྙན་འཕྲིན་གྱི་རིན་པ་ཆག་ཡང་དང་རྩ་ཆག་གཏོང་བའི་ཞབས་ཞུ་ནི་རླུང་འཕྲིན་བརྙན་འཕྲིན་གྱི་སྤྱི་པའི་ཞབས་ཞུ་འདྲ་མཉམ་ཅན་དུ་འགྱུར་བར་སྐུལ་འདེད་གཏོང་བའི་བྱེད་ཐབས་གལ་ཆེན་ཞིག་ཡིན་པ་དང་། བོད་ཡོངས་ཀྱི་རྫོང(གྲོང་ཁྱེར་དང་ཆུས)74ཡིས་བྱ་ཐབས་སྣ་ཚོགས་སྤྱད་དེ་དམིགས་བསལ་ཚོགས་སྤྱིར་རིན་མེད་དམ་ཡང་ན་རིན་པ་མང་པོ་མི་བསྡུ་བར་སྐུད་ཡོད་བརྙན་འཕྲིན་ལྟ་ཉན་ཞབས་ཞུ་མཁོ་འདོན་བྱ་རྒྱུ་རེད།