སྡེ་ཚན་གསུམ་གྱིས་སྲིད་འཛིན་བསྐྱར་གྲོས་ཀྱི་ལྟ་སྐུལ་ཐད་ཁེ་ལས་དང་འབྲེལ་བ་ཡོད་པའི་ཁྲིམས་སྒྱུར་གཙོ་གནད་ཁ་གསལ་བཟོས་ཏེ།
ཁེ་ལས་དང་འབྲེལ་བ་ཡོད་པའི་དངུལ་ཆད་ཀྱི་མངོན་གསལ་དོད་པའི་གནད་དོན་བཅོས་སྐྱོང་ལ་ཤུགས་སྣོན་བརྒྱབ་པ།
ཉེ་ཆར་ཁྲིམས་འཛིན་པུའུ་ཡིས་རྒྱལ་ཁབ་འཕེལ་སྒྱུར་ཨུ་ལྷན་དང་རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་དང་མཉམ་དུ《སྲིད་འཛིན་བསྐྱར་གྲོས་ཀྱི་ལྟ་སྐུལ་འགན་ནུས་སྔར་བས་བཏོན་ནས་ཁེ་ལས་དང་འབྲེལ་བ་ཡོད་པའི་སྲིད་འཛིན་ཁྲིམས་སྒྱུར་ཚད་ལྡན་དུ་གཏོང་བའི་སྐོར་གྱི་མཛུབ་ཁྲིད་བསམ་འཆར》དང《སྲིད་འཛིན་བསྐྱར་གྲོས་ཀྱི་ལྟ་སྐུལ་ཐད་ཁེ་ལས་དང་འབྲེལ་བ་ཡོད་པའི་སྲིད་འཛིན་ཁྲིམས་སྒྱུར་ཚད་ལྡན་དུ་གཏོང་བའི་དཔེ་མཚོན་གྱོད་དཔེ》བཀྲམ་པ་རེད། བསམ་འཆར་ནང་ཁེ་ལས་དང་འབྲེལ་བ་ཡོད་པའི་སྲིད་འཛིན་ཁྲིམས་སྒྱུར་གྱི་ཆེད་དོན་བྱ་སྤྱོད་ཚད་ལྡན་དུ་གཏོང་བ་དང་དམངས་གཉེར་དཔལ་འབྱོར་སྐུལ་འདེད་བཅའ་ཁྲིམས་ཀྱི་འབྲེལ་ཡོད་བཀོད་སྒྲིག་བླང་བྱ་ལག་བསྟར་དོན་འཁྱོལ་དང་ཟུང་འབྲེལ་བྱས་ཏེ། སྲིད་འཛིན་བསྐྱར་གྲོས་ཀྱི་ལྟ་སྐུལ་ཐད་ཁེ་ལས་དང་འབྲེལ་བ་ཡོད་པའི་ཁྲིམས་སྒྱུར་གཙོ་གནད་ཁ་གསལ་བཟོ་བ་སོགས་ཀྱི་ཐད་ནས་ཞིབ་ཕྲའི་བྱེད་ཐབས་ཁག་22བཏོན་ཡོད་པ་རེད།
བསམ་འཆར་ནང་ད་དུང་ཁེ་ལས་དང་འབྲེལ་བ་ཡོད་པའི་དངུལ་ཆད་ཀྱི་མངོན་གསལ་དོད་པའི་གནད་དོན་བཅོས་སྐྱོང་བྱེད་ཤུགས་ཆེ་རུ་གཏོང་བ་དང་། དངུལ་འབོར་ཆེ་བའི་ཆད་པ་ནན་གཅོད་དང་། ཁྲིམས་ཚད་མི་ལོན་པའི་ཆད་གཅོད། ཡུལ་གཞན་དུ་ཁྲིམས་སྒྱུར་སོགས་ཀྱི་གནས་ཚུལ་ལ་ཞིབ་བཤེར་དང་ཞིབ་དཔྱད་བྱེད་པར་མཐོང་ཆེན་དང་། ནོར་འཁྲུལ་ཆུང་ངུར་དངུལ་ཆད་ལྕི་པོ་གཅོད་པ་དང་། དངུལ་ཆད་ཀྱིས་དོ་དམ་ཚབ་བྱེད་པ། དངུལ་ཆད་ལ་བརྟེན་ནས་ཡོང་འབབ་གསོག་པ་སོགས་ཀྱི་མངོན་གསལ་དོད་པའི་གནད་དོན་ཡོ་བསྲང་བྱ་རྒྱུ་ཡིན་པ་རེད། དེ་དང་ཆབས་ཅིག་ཁེ་ལས་དང་འབྲེལ་བ་ཡོད་པའི་སྲིད་དོན་གྱི་ཡིད་རྟོན་མེད་རིགས་ལ་ལྟ་སྐུལ་བྱེད་ཤུགས་ཆེ་རུ་བཏང་ནས་སྲིད་འཛིན་ལས་ཁུངས་ཀྱིས་བཅའ་ཁྲིམས་དང་གན་རྒྱ་གཞིར་བཟུང་། སྲིད་འཛིན་གྲོས་མཐུན་ལག་ལེན་མི་བསྟར་བ་དང་སྲིད་འཛིན་གྱི་ཁས་ལེན་གང་འདོད་དུ་སྒྱུར་བ་སོགས་ཡིད་རྟོན་མེད་པའི་བྱེད་སྤྱོད་དུས་ཐོག་ཏུ་ཡོ་བསྲང་བྱས་ཏེ། འབྲེལ་ཡོད་ཁེ་ལས་ཀྱི་བློས་འཁེལ་ཚད་དང་ཁེ་ཕན་སོགས་ཁྲིམས་མཐུན་ཁེ་དབང་ཁག་ཁྲིམས་ལྟར་སྲུང་སྐྱོང་བྱེད་དགོས་པའི་བླང་བྱ་བཏོན་ཡོད། ཁྲིམས་ལྟར་ཁེ་ལས་དང་འབྲེལ་བ་ཡོད་པའི་དོ་དམ་ཁྱབ་ཁོངས་ཀྱི་གྱོད་གཞི་ཐག་གཅོད་བྱེད་པའི་ཐད་ཁེ་ལས་ཀྱི་ཐོན་སྐྱེད་གཉེར་སྐྱོང་དང་འབྲེལ་བ་དམ་ཟབ་ཡོད་པའི་སྲིད་འཛིན་ཆད་གཅོད་དང་། སྲིད་འཛིན་ཆོག་འཐུས། སྲིད་འཛིན་བསྡུ་ལེན་སོགས་སྲིད་འཛིན་བྱ་སྤྱོད་ལ་དོ་སྣང་ཆེན་པོ་བྱེད་པ་དང་སྲིད་འཛིན་བསྐྱར་གྲོས་ཀྱི་རྐྱང་དཔེར་ལྟ་སྐུལ་བྱེད་ཤུགས་ཆེ་རུ་བཏང་སྟེ། ཁེ་ལས་ཀྱི་ཁྲིམས་མཐུན་ཁེ་དབང་ལ་གནོད་འཚེ་གཏོང་བའི་ཁྲིམས་འགལ་ངམ་ཡང་ན་ཚུལ་མིན་གྱི་སྲིད་འཛིན་བྱེད་སྤྱོད་ཡོ་བསྲང་མཐའ་གཅིག་ཏུ་བྱེད་དགོས་པའི་བླང་བྱ་བཏོན་ཡོད།
འབྲེལ་ཡོད་གསར་འགྱུར།