ཟླ་8ཚེས་11ཉིན། གསར་འགོད་པར་2025ལོའི་ནག་ཆུ་གྲོང་ཁྱེར་གྱི་ལོ་སྟོད་ཀྱི་དཔལ་འབྱོར་འཁོར་རྒྱུག་གནས་ཚུལ་གསར་འགྱུར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱུང་བར། 2025ལོའི་ལོ་སྟོད་དུ། ནག་ཆུ་གྲོང་ཁྱེར་གྱི་དཔལ་འབྱོར་འཁོར་རྒྱུག་བརྟན་པོ་རྒྱུན་འཁྱོངས་ཐུབ་ནས། སྤུས་ཚད་མཐོ་བའི་འཕེལ་རྒྱས་ལ་འཕེལ་རིམ་གསར་པ་བྱུང་ཡོད། གཅིག་གྱུར་ཞིབ་རྩིས་ལ་གཞིགས་ན། གྲོང་ཁྱེར་ཡོངས་ཀྱི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར(GDP)སྒོར་དུང་ཕྱུར་117.93ཟིན་པ་དེ་གཏན་ཆགས་རིན་གོང་ལྟར་བརྩིས་ན་དུས་མཚུངས་ལས་7%འཕར་བ་དང་། འཕར་ཚད་ལྗོངས་ཡོངས་ཀྱི་ཨང་བཞི་པར་སླེབས་ནས། ལོ་ཧྲིལ་པོའི་འཕེལ་རྒྱས་དམིགས་ཚད་མངོན་འགྱུར་ཡོང་བར་རྨང་གཞི་བརྟན་པོ་བཏིང་ཡོད་པ་རེད།

ནག་ཆུ་གྲོང་ཁྱེར་གྱི་ཐོན་ལས་འཕེལ་རྒྱས་ཀྱི་འདེགས་སྐྱོར་བརྟན་པོ་བྱུང་ནས་སྒུལ་ནུས་རྒྱུན་མཐུད་ཆེ་རུ་ཕྱིན་ཡོད། གྲོང་གསེབ་ཀྱི་དཔལ་འབྱོར་འཕེལ་ཕྱོགས་ཡག་པོ་ཡོད་ཅིང་། ཞིང་ནགས་འབྲོག་ཉ་བཅས་ལས་རིགས་ཀྱི་ཐོན་རྫས་རིན་ཐང་བསྡོམས་འབོར་སྒོར་དུང་ཕྱུར་16.44ཟིན་པ་དེ་དུས་མཚུངས་ལས་5.6%འཕར་ཡོད་པ་རེད།

ནག་ཆུ་གྲོང་ཁྱེར་གྱི་སྤྱི་ཚོགས་འཛད་ཟོག་སིལ་ཚོང་དངུལ་འབོར་སྒོར་དུང་ཕྱུར་17.9བྱུང་བ་དེ་དུས་མཚུངས་ལས་5.4%འཕར་ཡོད། ཡུལ་སྐོར་ཁྲོམ་ར་སླར་གསོ་མགྱོགས་པོ་བྱུང་ཞིང་། རིམ་རྩིས་བརྒྱབ་ན། རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་104.28ལ་སྣེ་ལེན་ཞུས་པ་དེ་དུས་མཚུངས་ལས་24.4%འཕར་བ་དང་། ཡུལ་སྐོར་ཡོང་འབབ་བསྡོམས་འབོར་སྒོར་དུང་ཕྱུར་3.49བྱུང་ནས་29.7%འཕར་ཡོད་པ་རེད།

གྲོང་མིའི་ཡོང་འབབ་བརྟན་པོ་འཕར་བ་དང་། གྲོང་ཁྱེར་དང་གྲོང་གསེབ་ཀྱི་འཕར་ཚུལ་བཟང་པོ་ཡོད་ཅིང་། གྲོང་ཁྱེར་ཡོངས་ཀྱི་གྲོང་གསེབ་ཀྱི་ཡུལ་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་6040ཟིན་པ་དེ་དུས་མཚུངས་ལས་7.9%འཕར་བ་དང་། གྲོང་ཁྱེར་དང་གྲོང་རྡལ་གྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་28199ཟིན་པ་དེ་དུས་མཚུངས་ལས་6.4%འཕར་ཡོད་པ་རེད།