འདི་ནི་ས་གནས་དེ་གའི་དམངས་ཚོགས་ཀྱིས་རི་མོའི་འགྲེམས་སྟོན་ལ་ལྟ་བཞིན་པ།

ཀ་ཏ་མན་རྡུ་ནས་གནས་ཚུལ་སྤེལ་བར་གཞིགས་ན། དར་གོས་ལམ་བུའི་གྲོང་ཁྱེར་མནའ་འབྲེལ་དང་། ནེ་པ་ལ་རྒྱལ་ཁབ་མཛེས་རྩལ་ཁང་། ནེ་པ་ལའི་ཀྲུང་གོའི་རིག་གནས་ལྟེ་གནས་བཅས་ཀྱིས་མཉམ་འབྲེལ་ཐོག་གཙོ་གཉེར་བྱས་པའི་ཀྲུང་ནེའི་དབར་ཕྱི་འབྲེལ་བཙུགས་ནས་ལོ་ངོ་70འཁོར་བར་རྟེན་འབྲེལ་ཞུ་བའི་རི་མོའི་འགྲེམས་སྟོན་ཉིན་ཤས་གོང་ནེ་པ་ལའི་རྒྱལ་ས་ཀ་ཏ་མན་རྡུ་རུ་འགོ་ཚུགས་པ་རེད། རྒྱལ་ཁབ་གཉིས་ཀྱི་ལས་རིགས་ཁག་གི་འཐུས་མི་200ཙམ་འགོ་ཚུགས་མཛད་སྒོར་ཞུགས་པ་རེད།

རི་མོའི་འགྲེམས་སྟོན་དེ“དར་གོས་ལམ་བུའི་ཉམས་འགྱུར་གསར་པ། སྒྱུ་རྩལ་བརྩམས་ཆོས་ཀྱིས་སེམས་པ་གཅིག་ཏུ་འབྲེལ”ཞེས་པ་བརྗོད་དོན་གཙོ་བོར་བྱས་ནས་དུས་ཡུན་གཟའ་འཁོར་གཉིས་ནང་ཀྲུང་གོ་དང་ནེ་པ་ལའི་རྒྱལ་ཁབ་གཉིས་ཀྱི་སྒྱུ་རྩལ་མཁས་ཅན་60ཙམ་གྱི་བརྩམས་ཆོས་བརྒྱ་ལྷག་ཙམ་འགྲེམས་སྟོན་བྱས་ཡོད།