བོད་ཀྱི་ནས་ཀྱི་ཐོན་ལས་འཕེལ་རྒྱས་ཚོགས་ཆེན་སྐབས་དང་པོར་གྲུབ་འབྲས་གཡུར་དུ་ཟ་བ་ཐོབ་པ།
གཙོ་གནད་རྣམ་གྲངས་10ལ་གཅིག་སྡུད་གན་རྒྱ་བཞག་སྟེ་ནས་ཀྱི་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱས་པ།
བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཉེ་ཆར། བོད་ཀྱི་ནས་ཀྱི་ཐོན་ལས་འཕེལ་རྒྱས་ཚོགས་ཆེན་སྐབས་དང་པོ་ལྷ་སར་འཚོགས་ཤིང་། ཚོགས་ཆེན་རིང་གཉེར་བའི་ས་མཐོའི་ཁྱད་ལྡན་ཞིང་འབྲོག་ཐོན་ལས་ཀྱི་ཚོང་འགུགས་མ་འདྲེན་གྱི་གན་རྒྱ་འཇོག་པའི་མཛད་སྒོའི་ཐོག ནས་ཀྱི་ཐོན་ལས་ཀྱི་འཁོར་འབྲེལ་ཧྲིལ་པོ་ཚུད་པའི་གཙོ་གནད་རྣམ་གྲངས་ཁག་གཅིག་ལ་གཅིག་སྡུད་གན་རྒྱ་བཞག་ནས། བོད་ཀྱི་ནས་ཀྱི་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་ཆེན་པོ་བསྣན་ཡོད།
ད་ཐེངས་ཀྱི་གན་རྒྱས་ནས་ཀྱི་ཐོན་ལས་ཀྱི“ལས་སྣོན་ཞིབ་ཚགས་ཚད་བརྒལ་དང་། ཐོན་ཚོང་ཐབས་ལམ་རྒྱ་སྐྱེད། ས་ཁོངས་མཐུན་སྦྱོར་འཕེལ་རྒྱས”བཅས་ཀྱི་ཁ་ཕྱོགས་གཙོ་བོ་ཆེན་པོ་གསུམ་ལ་དམ་པོར་དམིགས་ཐོག་ཆུ་ཤུར་རྫོང་དང་། སྟག་རྩེ་ཆུས། ལྷུན་གྲུབ་རྫོང་། བསམ་གྲུབ་རྩེ་ཆུས། ལྷུན་རྩེ་རྫོང་། རྒྱལ་རྩེ་རྫོང་བཅས་ཀྱི་མི་དམངས་སྲིད་གཞུང་གིས་བོད་ཀྱི་ནས་ཀྱི་ལས་སྣོན་བྱེད་མཁན་སྣེ་ཁྲིད་ཁེ་ལས་མང་པོ་དང་མཉམ་དུ་ནས་ཀྱི་དཔེ་སྟོན་ཐོན་ལས་གླིང་འཛུགས་སྐྲུན་དང་། ཐོན་སྐྱེད་ལས་སྣོན། ཐོན་ཚོང་སྦྲེལ་མཐུད་སོགས་ཁྱབ་ཁོངས་མང་པོ་དང་འབྲེལ་བའི་གཙོ་གནད་རྣམ་གྲངས་10ཡི་མཉམ་ལས་གྲོས་མཐུན་བཞག་པ་རེད། རྣམ་གྲངས་ལག་ལེན་བསྟར་རྗེས་ནས་ཀྱི་ཐོན་ལས་འཁོར་འབྲེལ་སྔར་བས་འཐུས་སྒོ་ཚང་དུ་ཕྱིན་ནས། ཐོན་ལས་ལེགས་བསྡུས་ཅན་དང་། སྤུས་རྟགས་ཅན། རྩེར་སོན་ཅན་བཅས་ཀྱི་འཕེལ་རྒྱས་ལ་སྐུལ་འདེད་ཐེབས་རྒྱུ་རེད།
བོད་ཀྱི་ནས་ཀྱི་ཐོན་ལས་གཉེར་ནས་ལོ་18ཕྱིན་པའི་བོད་ལྗོངས་ཆེས་བྲིན་ནས་བདེ་ཐང་ཚན་རྩལ་ཚད་ཡོད་ཀུང་སི་དང་པེ་ཅིང་ཤིན་ཧྥ་ཏི་ལེན་ཡུས་ཚོང་དོན་ཚད་ཡོད་ཀུང་སི་དང་ལྷུན་གྲུབ་རྫོང་མི་དམངས་སྲིད་གཞུང་དབར་གྱི་མཉམ་ལས་ལ་ཀུན་གྱིས་དོ་སྣང་བྱེད་ཀྱི་ཡོད། ཐེངས་འདིའི་མཉམ་ལས་ཀྱིས་ལས་སྣོན་གཏིང་ཟབ་བྱས་པའི་ནས་ཀྱི་ཐོན་རྫས་ཞིབ་སྤེལ་དང་། རྒྱལ་ཡོངས་རང་བཞིན་གྱི་ཁྲོམ་རའི་ཐབས་ལམ་རྒྱ་སྐྱེད། དེ་བཞིན་འཁོར་འབྲེལ་ཧྲིལ་པོ་མཐུན་སྦྱོར་རིམ་སྤོར་བཅས་ལ་དམིགས་ཡོད། འདི་ནི་བོད་ཀྱི་ཁེ་ལས་ཀྱི་ལེགས་ཆ་གསབ་རེས་བྱེད་པ་དང་ཐོན་ལས་རིམ་སྤོར་ལ་མཉམ་དུ་སྐུལ་འདེད་གཏོང་བའི་ལག་ལེན་གསོན་ཉམས་ལྡན་པ་ཞིག་རེད།
འབྲེལ་ཡོད་གསར་འགྱུར།