ཉེ་ཆར། ལྷ་ས་གྲོང་ཁྱེར་འདམ་གཞུང་རྫོང་གིས་2025ལོའི་ཟླ་7ཚེས་10ཉིན་འཛམ་གླིང་གི་ཁེ་ལུང་བེའུ་ཐོག་མ་འདམ་གཞུང་རྫོང་དུ་བདེ་བླག་ངང་བཙས་པ་ཁྱབ་བསྒྲགས་བྱས་པ་རེད། ཚན་རྩལ་གྲུབ་འབྲས་གལ་ཆེན་དེས་ས་བབ་མཐོ་བའི་ས་ཁུལ་གྱི་སྲོག་ཆགས་ཀྱི་ཁེ་ལུང་ལག་རྩལ་ལ་ལོ་རྒྱུས་རང་བཞིན་གྱི་ཚད་བརྒལ་བྱུང་བ་མཚོན་པ་དང་། སྟོངས་ལ་ཉེ་བའི་འབྲི་གཡག་གི་རྒྱུད་སྤུས་ཐོན་ཁུངས་ལ་སྲུང་སྐྱོང་དང་ས་མཐོའི་ཕྱུགས་ལས་རིམ་སྤོར་ལ་སྐུལ་འདེད་གཏོང་བར་ལག་རྩལ་གྱི་ཐབས་ལམ་གསར་པ་མཁོ་འདོན་བྱས་ཡོད།

ཉིན་དེའི་གསར་འགྱུར་ཡོངས་བསྒྲགས་ཚོགས་འདུ་མ་འཚོག་གོང་ཚོགས་འདུར་ཞུགས་མཁན་རྣམས་འདམ་གཞུང་རྫོང་དུ་ཡོད་པའི་འབྲི་གཡག་གི་རྒྱུད་བཟང་གསོ་སྤེལ་རྟེན་གཞིར(ད་ལྟ་བོད་ལྗོངས་འབྲོང་ཁམ་པ་གསོ་སྤེལ་ཞིབ་འཇུག་རྟེན་གཞིར་རིམ་སྤོར་བྱས་ཡོད)ས་གནས་ས་ཐོག་ཏུ་ལྟ་སྐོར་བྱས་ནས་བདེ་ཐང་ངང་འཚར་ལོངས་བྱུང་བཞིན་པའི་ཁེ་ལུང་བེའུ་དང་བེའུ་སྦྲུམ་པའི་འབྲི་མོར་ཐག་ཉེ་ས་ནས་ལྟ་ཞིབ་བྱས་པ་རེད།

རྣམ་གྲངས་དེ་འགོ་ཚུགས་དོན་ནི་བོད་ས་ཁུལ་ལ་འཕྲད་པའི་དམངས་འཚོའི་གནད་དོན་དངོས་ཐག་གཅོད་བྱ་ཆེད་རེད། བོད་ལྗོངས་ནི་འབྲོག་ལས་ཀྱི་ཁུལ་ཁོངས་གལ་ཆེན་ཞིག་ཡིན་རུང་ཡུལ་དེ་གའི་འབྲི་གཡག་བཤས་གཏོང་ཚད་ཉུང་བས་ལོ་ལྟར་ཞིང་ཆེན་གཞན་ནས་ཚགས་ཤ་འབོར་ཆེན་ནང་འདྲེན་བྱེད་དགོས་ཀྱི་ཡོད། དཀའ་ངལ་དེ་སེལ་ཆེད། ཚན་ཞིབ་སྟོབས་ཤུགས་ཀྱིས་མཉམ་དུ་འགག་སྒྲོལ་བྱས་པར་ས་གནས་ཀྱི་སྲིད་ཇུས་དང་། མ་རྩ། རྨང་གཞིའི་སྒྲིག་བཀོད་འཛུགས་སྐྲུན་བཅས་ཀྱི་ཕྱོགས་ཡོངས་ཀྱི་རྒྱབ་སྐྱོར་ཐོབ་ཡོད། 2023ལོར་ལག་རྩལ་ཚོགས་པས་རྫོང་ཡོངས་ཀྱི་རྒྱུད་བཟང་འབྲི་གཡག་ཆིག་སྟོང་ལྷག་ཙམ་གྱི་རྒྱུད་གཞི་དཔེ་ལེན་ལེགས་སྒྲུབ་བྱས་ནས་རྗེས་མཐུད་ཀྱི་རྒྱུད་བཟང་ལེགས་འདེམས་བྱེད་པར་གྲངས་གཞིའི་རྨང་གཞི་གལ་ཆེན་བཏིང་ཡོད།

ངོ་སྤྲོད་བྱས་པར་གཞིགས་ན། འཛམ་གླིང་གི་ཁེ་ལུང་བེའུ་ཐོག་མ་དེ་ནི་ས་མཐོའི་ཕྱུགས་ལས་ཁྱབ་ཁོངས་ཀྱི་ལམ་ཚད་རྡོ་རིང་ལྟ་བུའི་ཚན་རྩལ་གྲུབ་འབྲས་ཤིག་ཡིན་ཞིང་། དེས་དམིགས་བསལ་ཁོར་ཡུག་འོག་སྐྱེ་དངོས་ལག་རྩལ་ཐད་ཚད་བརྒལ་བྱེད་པའི་ནུས་པ་མངོན་པ་མ་ཟད། རྒྱུད་པ་དཀོན་པའི་གནད་དོན་ཐག་གཅོད་དང་ས་མཐོའི་ཁྱད་ལྡན་འབྲོག་ལས་ཀྱི་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་བཏང་ནས་འབྲོག་པའི་བདེ་རྩར་འགན་ལེན་བྱེད་པར་ལམ་བུ་གསར་པ་བཏོད་ཡོད།