ཉིན་ཤས་གོང་། གསར་འགོད་པར་ལྷ་ས་འགག་སྒོ་ལས་ཁུངས་ནས་ཤེས་རྟོགས་བྱུང་བར། འདི་ལོའི་ཟླ་བ་དང་པོ་ནས་བདུན་པའི་བར། རང་ལྗོངས་ཀྱི་དངོས་ཟོག་ཚོང་དོན་ཕྱིར་གཏོང་ནང་འདྲེན་གྱི་རིན་ཐང་བསྡོམས་འབོར་སྒོར་དུང་ཕྱུར་49.05ཟིན་པ་དེ་དུས་མཚུངས་ལས་12.6%འཕར་ནས་འཕར་ཚད་རྒྱལ་ཡོངས་ཀྱི་ཆ་སྙོམས་ཆུ་ཚད་ལས་མཐོ་བ་ཡོད། དེའི་ནང་ཕྱིར་གཏོང་སྒོར་དུང་ཕྱུར་41.51ཟིན་ནས་13.5%འཕར་བ་དང་ནང་འདྲེན་སྒོར་དུང་ཕྱུར་7.54ཟིན་ནས་7.9%འཕར་ཡོད།

ཟླ་3པར། འདི་ལོའི་ཨེ་ཤེ་ཡ་ལྷོ་མའི་དུས་གཏན་མེ་འཁོར་ཐོག་མ་དེ་གཞིས་རྩེ་རྒྱལ་སྤྱིའི་སྐམ་སའི་གྲུ་ཁར་བདེ་བླག་ངང་སྒོ་ཁྲལ་སྙན་སེང་ཞུས་ནས་རྒྱལ་མཚམས་སྒྲོལ་ཚུན། “ལྕགས་ལམ་དང་གཞུང་ལམ་མཉམ་འདྲེན”གྱི་རྣམ་པ་ཉིན་རེ་བཞིན་འཐུས་སྒོ་ཚང་དུ་ཕྱིན་པ་དང་ནུས་རྒྱུ་གསར་པའི་རླངས་འཁོར་སོགས་དངོས་ཟོག་བགྲོད་ལམ་དེ་བརྒྱུད་ནེ་པ་ལར་རྒྱུན་ཆད་མེད་པར་དབོར་བཞིན་ཡོད།

ལྷ་ས་འགག་སྒོ་ལས་ཁུངས་ཕྱོགས་བསྡུས་ལས་སྒོ་ཁྲུའུ་དང་པོའི་ཁྲུའུ་ཀྲང་བསྟན་འཛིན་གྱིས“ང་ཚོས‘སྐམ་སའི་གྲུ་ཁའི་ཡིག་ཐོག་སྙན་ཞུ་དང་། གཏོགས་ཁོངས་དཔྱད་བཤེར། འགག་སྒོ་ཤར་བགྲོད’བཅས་ཀྱི་འགག་སྒོ་སྒྲོལ་བའི་རྣམ་པ་གསར་གཏོད་ངང་བཏོན་པས། སྐྱིད་གྲོང་དང་འགྲམ་སོགས་མཐའ་མཚམས་འགག་སྒོའི་ཁུལ་གནས་ཀྱི་ལེགས་ཆ་བགྲོད་ལམ་གྱི་ལེགས་ཆར་འགྱུར་བཞིན་ཡོད། ལྷ་ས་འགག་སྒོས“རྒྱུད་གཅིག་ལམ་གཅིག”དང་དུས་རབས་གསར་པའི་ནུབ་རྒྱུད་ཐོན་འབྱེད་ཆེ་མོའི་འཐབ་ཇུས་ནང་མཉམ་འདྲེས་གཏིང་ཟབ་བྱས་ནས། བོད་ཀྱིས་ཨེ་ཤེ་ཡ་ལྷོ་མར་སྒོ་དབྱེ་བའི་བགྲོད་ལམ་གལ་ཆེན་སྐྲུན་པར་སྐུལ་འདེད་གཏོང་བཞིན་ཡོད་ཅེས་བཤད།

ས་མཐོའི་ཁྱད་ལྡན་ཐོན་རྫས་ཕྱིར་གཏོང་བྱ་རྒྱུ་དེ་བཀྲག་མདངས་འཚེར་ས་གསར་པ་ཞིག་ཏུ་གྱུར་ཡོད་ཅིང་། ལྷ་ས་འགག་སྒོས་བོད་ཀྱི་རྒྱལ་ཁབ་ཀྱི་གཏེར་ཆུའི་ཞིབ་དཔྱད་ཚད་ལེན་ཚོད་ལྟ་ཁང་དང་པོ་འཛུགས་རྒྱུའི་རེ་ཞུ་ཧུར་ཐག་བྱས་ནས། བོད་ཀྱི་བལ་དང་ཁུ་ལུ་དང་བོད་ཀྱི་ཆུ་བཟང་སོགས་ཁྱད་ལྡན་ཐོན་རྫས་དེ་དག་གི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་ལ་བརྟེན་ནས་རྒྱལ་སྤྱིའི་ཁྲོམ་རའི་དགའ་བསུ་ཐོབ་བཞིན་ཡོད་ལ། ཉིང་ཁྲིའི་ཀུ་ཤུ་སོགས་རང་ཡུལ་གྱི་ཐོན་རྫས་རིགས་དྲུག་ཕྱིར་གཏོང་ཐེངས་དང་པོ་བྱས་པ་རེད། དེ་དང་ཆབས་ཅིག་ལྷ་ས་འགག་སྒོས་ཁྱད་ལྡན་ཞིང་ལས་ཐོན་རྫས་27ལ་རྒྱལ་ཁབ་ཀྱི་ས་ཁམས་མཚོན་རྟགས་ཀྱི་ཁས་ལེན་དཔང་འདོན་ཐོབ་པར་སྐུལ་འདེད་བཏང་བ་དང་། ས་གནས་དེ་གའི་ཁེ་ལས་3ལ་AEOམཐོ་རིམ་ཁས་ལེན་དཔང་འདོན་ཐོབ་པར་རོགས་རམ་བྱས་ཡོད།

ས་ཁོངས་བཀོད་སྒྲིག་ཐད་ལྷ་ས་གྲོང་ཁྱེར་གྱིས་ཕྱིར་གཏོང་ནང་འདྲེན་སྒོར་དུང་ཕྱུར་29.15བྱས་པ་དེས་ལྗོངས་ཡོངས་ཀྱི་ཕྱི་ཕྱོགས་ཚོང་དོན་རིན་ཐང་བསྡོམས་འབོར་གྱི་59.4%ཟིན་པ་དང་། གཞིས་རྩེ་གྲོང་ཁྱེར་གྱིས་ཕྱིར་གཏོང་ནང་འདྲེན་སྒོར་དུང་ཕྱུར་19.52བྱས་པ་དེས་39.8%ཟིན་ཡོད། ལྷ་ས་འགག་སྒོས་ཁྲེང་ཏུའུ་དང་ཁྲུང་ཆིང་ས་ཁུལ་གྱི་གྲོང་ཁྱེར་གཉིས་ཀྱི་དཔལ་འབྱོར་ཁུལ་དང་ནུབ་རྒྱུད་སྐམ་མཚོའི་བགྲོད་ལམ་གསར་པ་དང་འབྲེལ་མཐུད་ཧུར་ཐག་བྱས་ཏེ། “ཁེ་ལས་རེར་ཐབས་ཇུས་རེ”བཟོ་བའི་ཕན་བདེ་ལོངས་སྤྱོད་ཀྱི་ཇུས་གཞི་ལག་བསྟར་བྱས་ནས་ཞིང་ལས་ཐོན་རྫས་གསར་པ་དང་ནུས་རྒྱུ་གསར་པའི་རླངས་འཁོར་སོགས་ཀྱི་ཐོན་རྫས་ཕྱིར་གཏོང་བྱེད་རྒྱ་ཆེ་རུ་གཏོང་བར་རམ་འདེགས་བྱེད་བཞིན་ཡོད།