2025ལོའི་ཟླ་1ཚེས་1ཉིན་ནས་བཟུང་། ཕྲུ་གུ་དང་པོ་དང་། གཉིས་པ། གསུམ་པ་བཅས་གང་ཡིན་རུང་ལོ་3ལ་མ་སླེབས་བར་ལོ་ལྟར་ཁ་གསབ་དངུལ་སྒོར་3600ལེན་ཆོག་གི་ཡོད་པས། ཁྱིམ་ཚང་མང་པོ་ཞིག་གིས་རྒྱལ་ཡོངས་རང་བཞིན་དང་ཀུན་ཕན་རྣམ་པའི་དཔལ་འབྱོར་ཁ་གསབ་འདི་ལོངས་སྤྱོད་བྱེད་ཆོག

ཡིན་ནའང་ཉེ་ཆར་ཁ་བསླུས་རྒྱག་མཁན་གྱིས་བུ་གསོའི་ཁ་གསབ་དངུལ་སྤྲོད་པའི་སྐབས་དང་བསྟུན་ནས་གློག་འཕྲིན་དྲ་རྒྱའི་ཁ་བསླུས་རྒྱག་གི་ཡོད། 

ཡུན་ནན་ཀྲའོ་ཐུང་གྲོང་ཁྱེར་ཀྲའོ་དབྱང་ཆུས་ཀྱི་ཉེན་རྟོག་ཕྱོགས་ཀྱིས་གནས་ཚུལ་སྤེལ་བར་ལྟར་ན། ཟླ་8ཚེས་4ཉིན་མང་ཚོགས་ཀྱི་ཉེན་དོན་སྙན་སེང་ཞིག་འབྱོར་བར། རང་ཉིད་ཀྱི་སྐད་འཕྲིན་ནང“བུ་གསོའི་ཁ་གསབ་དངུལ”ལེན་པའི་བརྡ་ཐོ་ཞིག་འབྱོར་བྱུང་། བརྡ་ཐོའི་ནང་དུས་བཀག་ལྟར་ལེན་དགོས་པའི་རེ་བ་བཏོན་འདུག་ལ། དྲ་ཚུགས་ཀྱང་མཉམ་དུ་བསྐུར་འདུག ངས་དྲ་ཚུགས་དེ་མནན་རྗེས་གཞི་ནས་མགོ་སྐོར་ཐེབས་པ་ཤེས་བྱུང་ཞེས་བཤད།  

གཞན་ཡང་། ཁ་བསླུས་རྒྱག་མཁན་གྱིས་བརྡ་ཐོ་རྫུན་མ་བསྐུར་ནས། གནོད་འཚེ་ཕོག་མཁན་ལ་རྩ་གཉིས་ཨང་རྟགས་བཤེར་དུ་བཅུག་སྟེ་མི་སྒེར་གྱི་ཆ་འཕྲིན་དང་དངུལ་ཁང་གཱ་ཡི་དཔྱད་གཞི་འབྲི་རུ་འཇུག་གི་ཡོད། དེ་རྗེས“ཀྲུང་གོ་དངུལ་འབྲེལ”ཟེར་བ་ནས་བསྐུར་ཡོང་བའི་ར་སྤྲོད་ཨང་གྲངས་ཤིག་འབྱོར་སྲིད། གལ་སྲིད་སྐབས་དེར་ར་སྤྲོད་ཨང་གྲངས་དེ་བླུགས་པ་ཡིན་ན་གཱ་ནང་གི་དངུལ་ཚང་མ་འཐེན་འགྲོ་གི་ཡོད། དོན་དུ་འཕྲིན་ཐུང་གི་ར་སྤྲོད་ཨང་གྲངས་དེ་ནི་ཁ་བསླུས་རྒྱག་མཁན་གྱིས་དྲ་ཚུགས་རྫུན་མ་ནས་བསྐུར་ཡོང་བ་ཞིག་ཡིན་ཞིང་། གཞུང་ཕྱོགས་ཀྱི་བརྡ་ཐོ་ཟེར་བ་དེ་ཡང་ཁ་བསླུས་རྒྱག་ཐབས་ཤིག་ཡིན་པ་དང་། ཁ་བསླུས་རྒྱག་མཁན་གྱིས་གཞུང་ཕྱོགས་ནས་བཏང་བའི་འཕྲིན་ཐུང་ཡིན་ཁུལ་བྱེད་ཀྱི་ཡོད། 

ཚང་མས་ཤེས་དགོས་པ་ཞིག་ལ། ལས་ཀའི་འཆར་གཞི་གཞིར་བཟུང་། ས་ཆ་ཁག་ལ་ཟླ་8པའི་ཟླ་སྨད་ནས་རིམ་བཞིན་བུ་གསོའི་ཁ་གསབ་དངུལ་རེ་ཞུ་བྱེད་ཆོག་པ་དང་། ཟླ་8ཚེས་31ཉིན་གོང་བུ་གསོའི་ཁ་གསབ་དངུལ་ས་ཆ་ཚང་མ་ནས་རེ་ཞུ་བྱེད་ཆོག་གི་ཡོད། ཡིན་ནའང་། མིག་སྔར་ས་ཆ་ཚང་མར་དྲ་ཐོག་ནས་བུ་གསོའི་ཁ་གསབ་དངུལ་རེ་ཞུ་བྱེད་པའི་ཐབས་ལམ་ཤར་གཏོང་བྱས་མེད་པ་རེད།