ཉེ་ཆར་གསར་འགོད་པས་རྒྱལ་ཁབ་དྲ་འཕྲིན་གཞུང་དོན་ཁང་ནས་ཤེས་རྟོགས་བྱས་པར། དྲ་རྒྱའི་ཁྱབ་སྤེལ་སྒྲིག་ལམ་སྔར་བས་ཚད་ལྡན་དུ་གཏོང་བ་དང་དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ངོས་འཛིན་ཐུབ་ཚད་མཐོ་རུ་གཏོང་ཆེད། འདི་ལོ་ཚུན་དུ། རྒྱལ་ཁབ་དྲ་འཕྲིན་གཞུང་དོན་ཁང་གིས་དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི“འཐུས་མཆན་མཚོན་རྟགས་སྟོན་པའི”འདུ་འགོད་ལ་སྐུལ་འདེད་གཏིང་ཟབ་བཏང་སྟེ། ས་གནས་དྲ་འཕྲིན་གཞུང་དོན་ཁང་ལ་ཞིབ་མཆན་གྱི་སྤུས་འབྲས་ལེགས་སུ་གཏོང་རྒྱུའི་བཀོད་སྒྲིག་དང་མཛུབ་སྟོན་བྱེད་པ་དང་། དྲ་སྦྲེལ་གསར་འགྱུར་ཆ་འཕྲིན་ཁྱབ་སྤེལ་ལས་སྟེགས་ཀྱི་ཞབས་ཞུའི་ཐོབ་ཐང་མཁོ་འདོན་གྱི་ཆོག་མཆན་ཐོབ་པའི་དྲ་ཚིགས་ལས་སྟེགས་ཁག་15ལ་རྒྱུད་ཁོངས་རྩོལ་ནུས་ལེགས་སུ་དང་འཐུས་སྒོ་ཚང་དུ་གཏོང་རྒྱུར་སྐུལ་མ་གཏོང་བ། ཞབས་ཞུའི་ཐོབ་ཐང་ཞིབ་བཤེར་བྱེད་ཤུགས་ཆེ་རུ་གཏོང་བ་བཅས་བྱས་ནས། དྲ་སྦྲེལ་གསར་འགྱུར་ཆ་འཕྲིན་ཞབས་ཞུ་མཁོ་འདོན་གྱི་ཆོག་མཆན་ཐོབ་པའི་སྤྱི་སྟེགས་ཨང་རྟགས་ལ“V”ཅན་མཚོན་རྟགས་དམར་པོ་གཅིག་གྱུར་ཐོག་བསྣན་པས། ཡིག་རིས་དང་། སྐད་ལམ། ཐད་གཏོང་། བརྙན་ཐུང་སོགས་ནང་དོན་ལ་གཞི་རྩའི་ཆར་ཁྱབ་ཐུབ་པ་བྱུང་ཡོད། ཟླ་7ཚེས་25ཉིན་བར། སྤྱི་སྟེགས་ཨང་རྟགས་13516ལ“V”ཅན་མཚོན་རྟགས་དམར་པོ་བཀོད་ཡོད་པ་མ་ཟད། ཞབས་ཞུའི་བྱེད་པོའི་མིང་དང་། འཐུས་མཆན་ལག་ཁྱེར་ཨང་གྲངས། ཞབས་ཞུའི་རིགས་བཅས་གསལ་སྟོན་བྱས་ཡོད། དྲ་ཚིགས་དང་ལས་སྟེགས་སོགས་4401གིས་ཞབས་ཞུའི་རྣམ་པའི་ཆོག་འཐུས་ཆ་འཕྲིན་གསལ་སྟོན་བྱས་པ་རེད།

གོམ་སྟབས་རྗེས་མར་རྒྱལ་ཁབ་དྲ་འཕྲིན་གཞུང་དོན་ཁང་གིས་གསར་འགྱུར་ཆ་འཕྲིན་རྫུན་མ་རྩོམ་སྒྲིག་ཁྱབ་སྤེལ་བྱེད་པ་དང་། གསར་འགྱུར་སྨྱན་སྦྱོར་ལ་རྫུས་པ་དང་འདྲ་བཟོ་བྱེད་པ། དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ཆོག་འཐུས་ཐོབ་ཐང་བོགས་མར་གཏོང་བ་དང་ནང་བཤུག་གཏོང་བ་སོགས་ཀྱི་གནད་དོན་ལ་བཅོས་སྒྲིག་ཤུགས་ཆེན་བྱས་ཏེ། གླེང་ཕྱོགས་ལྟ་སྐུལ་བྱེད་པར་ཁ་གཡར་ཏེ་ཁྲིམས་འགལ་ངང་ཁེ་ཕན་དོན་གཉེར་བྱེད་པ་དང་ཚོང་གཉེར་དྲ་རྒྱའི་ཁོར་ཡུག་ལ་གཏོར་བཤིག་གཏོང་བའི་བྱེད་སྤྱོད་ལ་རྡུང་རྡེག་ཚ་ནན་བཏང་ནས་དྲ་རྒྱའི་བར་སྟོང་གཙང་མ་ཞིག་ཧུར་ཐག་གཏོད་རྒྱུ་ཡིན་པ་རེད།