དབྱར་གཞུང་གི་བོད་ཀྱི་ས་གནས་ཁག་ཏུ་འཛུགས་སྐྲུན་གྱི་ཚ་རླབས་སྣ་ཚོགས་འཕྱུར་བཞིན་ཡོད།

མ་འཇོག་ནི་དཔལ་འབྱོར་འཕར་བར་སྐུལ་ཁྲིད་བྱེད་པའི་སྟོབས་ཤུགས་གལ་ཆེན་གྱི་གྲས་ཤིག་རེད། ད་ལོ་ཚུན་དུ། ལྗོངས་ཡོངས་ཀྱི་གོང་འོག་ཚང་མས་འཕེལ་རྒྱས་ཀྱི་གོ་སྐབས་དམ་འཛིན་གྱིས་གཙོ་གནད་རྣམ་གྲངས་དམ་འཛིན་བྱ་གཞིར་བྱས་ཏེ་ནུས་ལྡན་གྱི་མ་འཇོག་མུ་མཐུད་རྒྱ་ཆེར་གཏོང་བ་དང་། གཞིས་རྩེའི་དིང་རི་རྫོང་གི་ས་ཡོམ་གྱི་གེགས་རྗེས་སླར་གསོ་བསྐྱར་སྐྲུན་སོགས་ཀྱི་རྣམ་གྲངས་ལ་གོ་རིམ་ལྡན་པའི་ངང་སྐུལ་འདེད་བཏང་སྟེ། མ་འཇོག་བྱེད་ཚད་འཕར་མགྱོགས་པོ་ཡོང་བར་བྱས་ཡོད། གྲངས་གཞི་ལས་མངོན་པར། ད་ལོའི་ལོ་སྟོད་དུ། ལྗོངས་ཡོངས་ཀྱི་གཏན་འཇགས་རྒྱུ་ནོར་ལ་མ་འཇོག་བྱེད་ཚད་དུས་མཚུངས་ལས་24.8%འཕར་བ་དང་འཕར་ཚད་རྒྱལ་ཡོངས་ཀྱི་ཆ་སྙོམས་ཆུ་ཚད་ལས་བརྒྱ་ཆའི་གྲངས་22.0གྱིས་མཐོ་བ་ཡོད། ནུས་རྒྱུ་གཙང་མ་དང་། རིག་གནས་དང་ཡུལ་སྐོར། ཁྱད་ལྡན་ཞིང་འབྲོག་ལས་སོགས་འཐབ་ཇུས་རང་བཞིན་གྱི་ཐོན་ལས་དག་མ་འཇོག་བྱ་ཡུལ་གཙོ་བོར་གྱུར་ནས། ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་ཆེན་པོ་བསྣན་ཡོད།

འཕེལ་རྒྱས་ཀྱི་རྨང་གཞི་བརྟན་པོ་བཙུགས་པ།

ཟླ་8ཚེས་1ཉིན། ལྷ་ས་མཐུན་སྒྲིལ་སྤྱི་གླིང་དང་ཕོ་བྲང་པོ་ཏ་ལ་བསྐོར་བའི་ཆུ་རྒྱུད་སྐྱེ་ཁམས་ཁུལ་ལྕགས་པོ་རིའི་ཁོར་ཡུག་བཅོས་སྒྲིག་ལས་གྲྭའི་རྣམ་གྲངས་དངོས་སུ་ལེགས་གྲུབ་བྱུང་ནས་དམངས་ཚོགས་ལ་སྒོ་ཕྱེ་བ་རེད། ལྷ་ས་གྲོང་ཁྱེར་གྱི་ལྟེ་བའི་གྲོང་ཁུལ་གྱི་ཆུ་རྒྱུད་སྐྱེ་ཁམས་བཅོས་སྐྱོང་ལས་གྲྭའི་གྲུབ་ཆ་ཞིག་ཡིན་པའི་རྣམ་གྲངས་དེར་ཁྱོན་མ་དངུལ་སྒོར་དུང་ཕྱུར་1.28བཏང་ཡོད། ད་ཆ་དེ་རི་ཆུ་ཡོད་པའི་གྲོང་ཁྱེར་གྱི་ལྟེ་བའི་སྐྱེ་ཁམས་ལྗང་མདོག་བར་ཁྱམས་ཤིག་ཏུ་གྱུར་ནས་གྲོང་མི་དང་ཡུལ་སྐོར་བར་སྤྲོ་གསེང་དང་ཡུལ་ལྗོངས་ལ་མྱོང་རོལ་བྱེད་ས་ཡག་པོ་ཞིག་ཆགས་ཡོད།

ཉེ་ཆར། མངའ་རིས་ས་ཁུལ་ཀྲུང་ཆུའི་བདེ་སྐྱིད་ཆུ་བོ་དང་མཚེའུ་ཡི་འཛུགས་སྐྲུན་རྣམ་གྲངས་ལེགས་གྲུབ་བྱུང་ནས་ཞིབ་བཤེར་རྩིས་ལེན་བདེ་བླག་ངང་ཐོབ་ཡོད། རྣམ་གྲངས་དེར་ཆུ་བོ་དང་མཚེའུ་ཡི་མ་ལག་བཅོས་སྐྱོང་དང་། དོ་དམ་སྲུང་སྐྱོང་ནུས་པ་ཆེར་གཏོང་། དེ་བཞིན་འབབ་རྒྱུད་ས་ཁོངས་འཕེལ་རྒྱས་གཏོང་རྒྱུར་རམ་འདེགས་བཅས་ཕྱོགས་གསུམ་གྱི་འཛུགས་སྐྲུན་ནང་དོན་ཁག་15ཚུད་ཡོད་པ་རེད། རྣམ་གྲངས་དེ་བསྐྲུན་ཟིན་རྗེས་ཆུ་འགོག་བདེ་སྲུང་ནུས་པ་དང་རིག་ནུས་ཅན་གྱི་དོ་དམ་སྲུང་སྐྱོང་ཆུ་ཚད་མངོན་གསལ་དོད་པོས་མཐོ་རུ་འགྲོ་རྒྱུ་དང་ཆུ་བོའི་ཆུ་སྤུས་རྒྱུན་མཐུད་ལེགས་སུ་འགྲོ་རྒྱུ་རེད།འཕེལ་རྒྱས་ནི་ལས་འགན་ཨང་དང་པོ་དང་རྣམ་གྲངས་ནི་འདེགས་སྐྱོར་ཨང་དང་པོ་ཡིན། ཉེ་བའི་ལོ་ཤས་རིང་། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཚད་མཐོའི་སྐུལ་འདེད་དང་བཀོད་གཏོང་བཀོད་སྒྲིག་བྱས་པ་དང་། ས་གནས་ཁག་དང་སྡེ་ཚན་ཁག་གིས་དོན་འཁྱོལ་ལ་དམ་འཛིན་ནན་པོ་བྱས་ཏེ་ནུས་ལྡན་གྱི་མ་འཇོག་རྒྱུན་མཐུད་རྒྱ་ཆེར་གཏོང་བ་དང་རྣམ་གྲངས་འཛུགས་སྐྲུན་ལ་སྐུལ་འདེད་བཏང་ཡོད། ལོ་སྟོད་དུ། ལྗོངས་ཡོངས་ཀྱི་འཆར་གཞི་ལྟར་མ་དངུལ་སྒོར་དུང་ཕྱུར་དང་དེ་ཡན་བཏང་ནས་སྐྲུན་བཞིན་པའི་རྣམ་གྲངས་ཁག་557ཟིན་པས་མ་འཇོག་བྱེད་ཚད་དེ་མ་འཇོག་ཡོངས་ཀྱི་72.8%ཟིན་ནས་དུས་མཚུངས་ལས་45.4%འཕར་བ་དང་། ལྗོངས་ཡོངས་སུ་གསར་དུ་ལས་འགོ་ཚུགས་པའི་རྣམ་གྲངས་ཁག་1462ཡོད་པ་དང་མ་དངུལ་གཏོང་ཚད་21.2%འཕར་ཏེ་མ་དངུལ་གཏོང་ཚད་བརྒྱ་ཆའི་གྲངས་7.5འཕར་རྒྱུར་སྐུལ་ཁྲིད་བྱས་པ། ལྗོངས་ཡོངས་ཀྱི་གཙོ་གནད་རྣམ་གྲངས་འཛུགས་སྐྲུན་ལ་མ་དངུལ་སྒོར་དུང་ཕྱུར་930བཏང་བ་དེ་དུས་མཚུངས་ལས་27.4%འཕར་ཡོད།

འཕེལ་རྒྱས་ཀྱི་སྒུལ་ཤུགས་མངོན་པར་བྱས་པ།

2020ལོར་བོད་ལྗོངས་ཧུང་ནུང་ལྷོ་ཁར་བཙུགས་པ་དེ་ནི་ཧུའུ་པེ་ཞིང་ཆེན་གྱི་ཐོན་ལས་བོད་སྐྱོར་གྱི་གཙོ་གནད་རྣམ་གྲངས་ཤིག་རེད། གན་རྒྱ་འཇོག་པ་དང་འཛུགས་སྐྲུན་བྱེད་འགོ་ཚུགས་པ་ནས་རིག་ནུས་ཅན་གྱི་གསོ་ཚགས་དང་ལག་རྩལ་གསར་གཏོད་བར་དང་དེ་ནས་གསོ་ཚགས་ཀྱི་འདུ་ཤེས་བསླབ་པའི་བར་དུས་ཐུང་ལོ་ལྔའི་ནང་ཀུང་སི་དེས་བོད་ཀྱི་སྒོ་ང་མཁོ་སྤྲོད་ཕུན་སུམ་ཚོགས་སུ་བཏང་བ་མ་ཟད། ས་གནས་དེ་གའི་ཐོན་ལས་འཕེལ་རྒྱས་ལ་སྒུལ་ཤུགས་གསར་པའང་བསྣན་ཡོད། ཉེ་ཆར། ཀུང་སི་དེའི་བྱ་མོ་གསོ་ཚགས་ར་བར་དུས་ཐེངས་གཉིས་པའི་རྣམ་གྲངས་དངོས་སུ་ཐོན་སྐྱེད་བྱེད་འགོ་ཚུགས་ནས་ཉིན་རེར་སྒོ་ང་སོས་པ་ཁྲི་150ལྷག་ཙམ་ཐོན་གྱི་ཡོད།

བོད་ལྗོངས་ཧུང་ནུང་གི་འཕེལ་རྒྱས་ནི་དཔེ་མཚོན་རྐྱང་པ་ཞིག་མ་ཡིན། ཕག་རིའི་འབྲི་གཡག་དང་། གམ་པའི་ལུག ལྷུན་རྩེའི་ནས་ནག་སོགས་ས་མཐོའི་ཁྱད་ལྡན་ཞིང་འབྲོག་ལས་ཀྱི་ལེགས་ཆ་སྔར་བཞིན་མངོན་གསལ་དོད་དུ་འགྲོ་བཞིན་ཡོད། ཉེ་བའི་ལོ་ཤས་རིང་། བོད་ཀྱིས་ཐོན་ཁུངས་ཀྱི་ལེགས་ཆར་གཞིས་ཚུགས་ནས་ནུས་ལྡན་གྱི་མ་འཇོག་བྱེད་རྒྱ་ཆེ་རུ་གཏོང་བ་དང་། མ་འཇོག་གི་ཕན་འབྲས་ཆེ་རུ་གཏོང་བ། ཁྱད་ལྡན་ཐོན་ལས་ཀྱི་ཟུར་བསྣན་རིན་ཐང་མཐོ་བ་དང་། ལྗང་མདོག་ཅན། མཉམ་འདྲེས་ཅན་བཅས་ཀྱི་ཕྱོགས་སུ་རིམ་སྤོར་བྱ་རྒྱུར་སྐུལ་འདེད་བཏང་སྟེ་ས་མཐོའི་དཔལ་འབྱོར་ལ་སྒུལ་ཤུགས་གལ་ཆེན་བསྣན་ཡོད། གྲངས་གཞི་ལས་མངོན་པར། ད་ལོའི་ལོ་སྟོད་དུ་ཐོན་ལས་དང་པོར་མ་འཇོག་བྱེད་ཚད་དུས་མཚུངས་ལས་57.4%འཕར་ནས་མ་འཇོག་བྱེད་ཚད་བརྒྱ་ཆའི་གྲངས་4.1འཕར་བར་སྐུལ་ཁྲིད་བྱས་ཡོད།

ལྗང་མདོག་འཕེལ་རྒྱས་ཀྱི་ཕན་འབྲས་ཆེ་རུ་ཕྱིན་པ།

བོད་ལ་ཆུ་དང་། རླུང་། འོད། ཚ་དྲོད་སོགས་ཀྱི་ནུས་རྒྱུ་གཙང་མ་ཕུན་སུམ་ཚོགས་པ་དང་། ཐོན་ཁུངས་ལེགས་ཆ་ཆེ་བ། གསར་སྤེལ་གྱི་མངོན་མེད་སྟོབས་ཤུགས་ཧ་ཅང་ཆེ་བ་བཅས་ཡོད་པས་མདུན་ལམ་་ཧ་ཅང་ཡག་པོ་ཡོད། ཉེ་བའི་ལོ་ཤས་རིང་། བོད་ཀྱིས་ཐུན་མོང་མ་ཡིན་པའི་ཐོན་ཁུངས་ཀྱི་ལེགས་ཆར་གཞི་ཚུགས་ཏེ། ཆུ་གློག་དང་། འོད་ཤུགས། རླུང་གློག་སོགས་ནུས་རྒྱུ་གཙང་མ་འཕེལ་རྒྱས་ཤུགས་ཆེན་བཏང་ནས་རྒྱལ་ཁབ་ཀྱི་ནུས་རྒྱུ་གཙང་མའི་རྟེན་གཞི་སྐྲུན་མགྱོགས་སུ་བཏང་ཡོད།

ཆབ་མདོ་གྲོང་ཁྱེར་དཔའ་ཤོད་རྫོང་སྤོམ་མདའ་གྲོང་རྡལ་དུ་གནས་པའི་ཏ་ཐང་དཔའ་ཤོད་རླུང་གློག་རྣམ་གྲངས་ཀྱི་ཆ་སྙོམས་ས་བབ་སྨི་5050དང་། བརྙན་ལེན་འཕྲུལ་ཆས་ཀྱི་མཐོ་ཚད་མཐོ་ཤོས་ས་བབ་སྨི་5200 འཕྲུལ་ཚང་གི་མཐོ་ཚད་མཐོ་ཤོས་སྨི་5305བཅས་ཟིན་ཡོད། རྣམ་གྲངས་དེར་ཁྱོན་ཀྲའོ་ཝ་5ཡི་མཉམ་འགུལ་རླུང་ཤུགས་གློག་འདོན་འཕྲུལ་ཚན་20སྒྲིག་སྦྱོར་བྱས་ཏེ་གློག་འདོན་འཕྲུལ་འཁོར་ནས་གློག་འདོན་ཚད་ཀྲའོ་ཝ་100ཟིན་པ་དང་ན་ནིང་གི་ཟླ་10པའི་ཟླ་མཇུག་ཏུ་དྲ་སྦྲེལ་གློག་འདོན་ཐོབ་ནས་ལོ་ལྟར་ནུས་རྒྱུ་གཙང་མ་ཆུ་ཚོད་ཆན་ཝ་དུང་ཕྱུར་2.23ཡན་གསར་འཕར་བྱུང་ཡོད།

ཕྱོགས་གཞན་ཞིག་ནས་ས་བབ་སྨི་4650ཟིན་པའི་གདང་ལའི་རི་མཐོ་ཁུལ་དུ་བོད་ཀྱི་ལྕོག་དབྱིབས་རྣམ་པའི་ཚ་འོད་གློག་ཁང་དང་པོ་སྟེ་བོད་ལྗོངས་ཁའེ་ཐོའུ་ཨ་མདོ་རྫོང་ཐུའུ་ཧྲོའོ་ཀྲའོ་ཝ་100ཟིན་པའི་ལྕོག་དབྱིབས་རྣམ་པའི་ཚ་འོད་གློག་ཁང་རྣམ་གྲངས་ཚ་ཚ་འུར་འུར་ངང་སྐྲུན་བཞིན་ཡོད། རྣམ་གྲངས་བསྐྲུན་ཟིན་རྗེས། སྔོན་དཔག་བྱས་ན་ལོ་རེའི་ཆ་སྙོམས་གློག་འདོན་ཚད་ཆུ་ཚོད་ཆན་ཝ་དུང་ཕྱུར་2.6ཟིན་རྒྱུ་དང་ལོ་རེར་ཚད་ལྡན་རྡོ་སོལ་ཏུན་ཁྲི་6གྲོན་ཆུང་དང་དབྱང་གཉིས་ཐཱན་འགྱུར་ཕྱིར་འབུད་ཚད་ཏུན་ཁྲི་16.5ཉུང་དུ་བཏང་ནས་ཨ་མདོ་རྫོང་དང་དེ་བཞིན་མཐའ་འཁོར་ས་ཁུལ་ལ་བློས་འགེལ་ཆོག་པའི་གློག་ཤུགས་གཙང་མ་མཁོ་འདོན་ཐུབ་རྒྱུ་རེད།

མིག་སྔར། བོད་ཀྱི་ནུས་རྒྱུ་གཙང་མ་འཕེལ་རྒྱས་མགྱོགས་སུ་ཤུགས་ཆེན་ཕྱིན་ནས་ཆུ་གློག་དང་། འོད་ཤུགས། རླུང་གློག་བཅས་ཀྱི་རྣམ་གྲངས་ཆེ་གྲས་བསྐྲུན་ཟིན་པ་ཕུད། རྣམ་གྲངས་གསར་པ་རབ་དང་རིམ་པ་ཁག་གི་འཆར་འགོད་དང་འཛུགས་སྐྲུན་ཡང་བྱེད་བཞིན་ཡོད། ནུས་རྒྱུ་གཙང་མའི་རྣམ་གྲངས་དེ་བས་མང་བ་ལག་ལེན་བསྟར་བ་དང་བསྟུན་ཏེ། སྐྱེ་ཁམས་སྲུང་བཅད་ཀྱི་ནུས་པ་སྔར་བས་ཆེ་རུ་ཕྱིན་ནས་བོད་ཀྱི་སྤུས་ཚད་མཐོ་བའི་འཕེལ་རྒྱས་ལ་ལྗང་མདོག་གི་སྒུལ་ཤུགས་བསྣན་ཡོད།