ཉེ་ཆར། གསར་འགོད་པར་ནག་ཆུ་གྲོང་ཁྱེར་འཕེལ་རྒྱས་དང་སྒྱུར་བཅོས་ཨུ་ཡོན་ལྷན་ཁང་ནས་ཤེས་རྟོགས་བྱུང་བར། 2025ལོའི་ལོ་སྟོད་དུ། གྲོང་ཁྱེར་ཡོངས་ཀྱིས་ཐོན་ཁུངས་ཀྱི་ལེགས་ཆར་དམ་འཛིན་དང་ཐོན་ལས་རིམ་སྤོར་ལ་དམ་པོར་དམིགས་པར་བརྟེན། ནུས་རྒྱུ་གཙང་མ་དང་། བོད་སྨན་ཐོན་ལས། རིག་གནས་དང་ཡུལ་སྐོར་མཉམ་འདྲེས། ས་མཐོའི་ཞིང་འབྲོག་ལས་བཅས་མཉམ་དུ་འཕེལ་རྒྱས་ཕྱིན་ནས། སྤྱི་འབོར་འཕར་བ་དང་སྤུས་འབྲས་གཉིས་ཀ་ཡག་པོ་བྱུང་བའི་རྣམ་པ་བཟང་པོ་མངོན་ཡོད།

ངོ་སྤྲོད་བྱས་པར་གཞིགས་ན། ནག་ཆུ་གྲོང་ཁྱེར་གྱིས་ཐུན་མོང་མ་ཡིན་པའི་མཛེས་ལྗོངས་ལ་བརྟེན་པས་ནུས་རྒྱུ་གཙང་མའི་ཐོན་ལས་འཕེལ་རྒྱས་མྱུར་པོ་ཕྱིན་ཡོད། ལོ་སྟོད་དུ། སྤྱི་ཚོགས་ཡོངས་སུ་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་5.99ཟིན་པ་དེ་དུས་མཚུངས་ལས་19.64%འཕར་ནས། ནུས་རྒྱུའི་འཛད་སྤྱོད་ཀྱི་གསོན་ཤུགས་མངོན་གསལ་དོད་པོས་འཕེལ་བ་དང་། ནུས་རྒྱུ་གཙང་མས་དྲ་ཐོག་ཏུ་གློག་གཏོང་ཚད་ཆན་ཝ་ཆུ་ཚོད་དུང་ཕྱུར་4.71ཟིན་ཏེ་དུས་མཚུངས་ལས་46.03%འཕར་ནས་ལྗང་གློག་ཕྱིར་གཏོང་དང་ས་གནས་དེ་གས་གློག་སྤྱོད་པའི་དབར་འཁོར་རྒྱུག་བཟང་པོ་ཞིག་ཆགས་ཡོད། གློག་ཤུགས་ཀྱི་སྒྲིག་སྦྱོར་འཕྲུལ་འཁོར་སྐྲུན་པའི་གོམ་སྟབས་མགྱོགས་སུ་གཅིག་མཚུངས་ཕྱིན་ནས་གློག་གཏོང་ཚད་ཆན་ཝ་ཁྲི་127.68ཟིན་པའི་སྒྲིག་སྦྱོར་འཕྲུལ་འཁོར་བསྐྲུན་ཟིན་པ་དང་ཆན་ཝ་ཁྲི་120ཟིན་པའི་སྒྲིག་སྦྱོར་འཕྲུལ་འཁོར་སྐྲུན་བཞིན་ཡོད་པས“ནུབ་གློག་ཤར་འདྲེན”གྱི་མཚམས་ཚིགས་གལ་ཆེན་གཏོད་རྒྱུར་རྨང་གཞི་བརྟན་པོ་བཏིང་ཡོད།

“སྐྱེ་ཁམས་དང་རིག་གནས་ཟུང་འབྲེལ”དམ་འཛིན་བྱ་གཞིར་བྱས་ཏེ། ནག་ཆུ་གྲོང་ཁྱེར་གྱི་རིག་གནས་ཡུལ་སྐོར་ཐོན་ལས་ལ་གསོན་ཤུགས་ཆེན་པོ་རྒྱས་ཡོད། ལོ་སྟོད་དུ་གྲོང་ཁྱེར་ཡོངས་ཀྱིས་ཡུལ་སྐོར་བ་མི་ཐེངས་ཁྲི་104ལ་སྣེ་ལེན་ཞུས་པ་དེ་དུས་མཚུངས་ལས་24.06%འཕར་བ་དང་། ཡུལ་སྐོར་གྱི་འགྲོ་གྲོན་ལ་སྒོར་དུང་ཕྱུར་3.5ཟིན་པ་དེ་དུས་མཚུངས་ལས་30.68%འཕར་བ། རིག་གནས་ཀྱི་ཐོན་རྫས་རིན་ཐང་སྒོར་དུང་ཕྱུར་2.9ཟིན་པ་དེ་དུས་མཚུངས་ལས་33.49%འཕར་ཡོད། རྩྭ་ཐང་གི་ཡུལ་སྲོལ་གོམས་འདྲིས་དང་། དམངས་སྲོལ་རིག་གནས། སྐྱེ་ཁམས་ཡུལ་སྐོར་བཅས་མཉམ་འདྲེས་གཏིང་ཟབ་བྱུང་སྟེ་འཛད་སྤྱོད་རིམ་སྤོར་ལ་སྐུལ་ཁྲིད་ཐུབ་པ་མ་ཟད། མི་རྣམས་ལ“ནག་ཆུའི་བག་ཆགས”ཟབ་མོ་འཇོག་ཐུབ་པའང་བྱུང་ཡོད།

“སྤུས་ལེགས་དང་། ནུས་ཆེ། སྐྱེ་ཁམས”བཅས་ཀྱི་ངེས་གནས་ལ་དམིགས་པས། ནག་ཆུ་གྲོང་ཁྱེར་གྱི་ས་མཐོའི་ཁྱད་ལྡན་ཞིང་འབྲོག་ལས་ལ་སྤུས་འབྲས་ལེགས་གཉེར་བྱུང་ཡོད། ལོ་སྟོད་དུ་འོ་མ་ཐོན་ཚད་ཏུན་ཁྲི་3.64ཟིན་པ་དེ་དུས་མཚུངས་ལས་14.62%འཕར་བ་དང་། ཤའི་ཐོན་ཚད་ཏུན་ཁྲི་0.49ཟིན་པ་དེ་དུས་མཚུངས་ལས་21.76%འཕར་ནས་འབྲོག་ལས་ཐོན་རྫས་ཀྱི་མཁོ་སྤྲོད་ནུས་པ་ཟམ་མི་ཆད་པར་ཆེ་རུ་ཕྱིན་ཏེ་ཕྱུགས་ཟོག་གསོན་ཚད་95.69%དང་བཤས་གཏོང་ཚད་མགོ་གྲངས་ཁྲི་5.5ཟིན་ནས་གསོ་ཚགས་ཀྱི་ཕན་འབྲས་དང་སྐྱེ་ཁམས་སྲུང་སྐྱོང་གཉིས་ཀར་སྐུལ་མ་ཐེབས་ཏེ། གྲོང་གསེབ་དར་རྒྱས་ཀྱི་ཐོན་ལས་ཀྱི་རྨང་གཞི་བརྟན་དུ་ཕྱིན་ཡོད་པ་རེད།