ཉེ་ཆར། གསར་འགོད་པར་རང་སྐྱོང་ལྗོངས་ཆུ་བེད་ཐིང་ནས་ཤེས་རྟོགས་བྱུང་བར། ད་ལོའི་ལོ་སྟོད་དུ། ལྗོངས་ཡོངས་ཀྱི་ཆུ་བེད་ལ་མ་དངུལ་སྒོར་དུང་ཕྱུར་65.07བཏང་ནས་ལོ་འཁོར་གྱི་དམིགས་ཚད་ལས་འགན་65%ལེགས་སྒྲུབ་བྱས་པའི་ནང་། “གཙོ་གཉིས”ཀྱི་ཆུ་བེད་འཛུགས་སྐྲུན་རྣམ་གྲངས་ལ་སྒོར་དུང་ཕྱུར་8.44(བར་རྩེའི་ཆུ་བེད་ལྟེ་བའི་ཁུལ་ལ་སྒོར་དུང་ཕྱུར་4.0དང་ཕུ་མདོའི་ཆུ་འདྲེན་ལ་སྒོར་དུང་ཕྱུར་4.44)བཏང་ཡོད། གཙོ་གནད་ཆུ་བེད་འཛུགས་སྐྲུན་རྣམ་གྲངས་ལ་རིམ་རྩིས་བརྒྱབ་ན་སྒོར་དུང་ཕྱུར་22.68བཏང་བར། མ་འཇོག་ལེགས་སྒྲུབ་ཐུབ་ཚད་53%ཟིན་ཏེ“ལས་ཡུན་ཕྱེད་ཀར་ལས་འགན་ཕྱེད་ཀ་ཚར་བའི”དམིགས་ཚད་མངོན་འགྱུར་ཐུབ་ཡོད།

ཤེས་རྟོགས་བྱུང་བར་གཞིགས་ན། མིག་སྔར། རང་ལྗོངས་ཀྱི་གཙོ་གནད་ཆུ་བེད་རྣམ་གྲངས་ཁག་162ཁྲོད་ནས་རྣམ་གྲངས་ཁག་147ལས་འགོ་ཚུགས་པའམ་བསྐྱར་ཚུགས་ཐུབ་ནས་ལས་འགོ་ཚུགས་པ་དང་བསྐྱར་ཚུགས་ཐུབ་ཚད་90.7%ཟིན་ཡོད། བར་རྩེ་ཆུ་བེད་ལྟེ་བའི་ཁུལ་དང་། ཕུ་མདོའི་ཆུ་འདྲེན། མེ་འབར་ཐང་ཆུ་མཛོད་ལས་གྲྭ་བཅས་ཀྱི་འཕེལ་རིམ་བདེ་བླག་བྱུང་བ་དང་། གངས་ཁྲོ་ཆུ་མཛོད་ཀྱི་ཆུ་བདེ་བླག་བཀག་པ། གདོང་དཀར་ཆུ་མཛོད་ལས་གྲྭ་སྐྲུན་འགོ་ཚུགས་པ། ལྷ་ས་སྐྱིད་ཆུའི(མཉེས་ཐང་གི་སྨད་རྒྱུད་དུམ་བུ)གྲམ་ཐང་སྐྱེ་ཁམས་ཕྱོགས་བསྡུས་བཅོས་སྐྱོང་ལས་གྲྭ་བཅས(ཤར་གཏོང་གསུམ་དང་ཁོད་སྙོམས་གཅིག)ལས་འགོ་ཚུགས་ཡོད། གྲོ་མོའི་ཆུའི་སྐྱེ་ཁམས་བཅོས་སྐྱོང་ལས་གྲྭའི་ལག་བསྟར་ཆོག་འཐུས་ཞིབ་འཇུག་དང་ཐོག་མའི་ཇུས་འགོད་གཉིས་ཀར་ཞིབ་མཆན་ཐོབ་ཡོད། སང་ཏེ་ལས་གྲྭའི་ལག་བསྟར་ཆོག་འཐུས་སྙན་ཞུའི་ཞིབ་མཆན་ལེགས་སྒྲུབ་བྱས་པ་དང་། སང་ཏེ་ལས་གྲྭའི་དུས་འགོའི་ལས་འགན་དང་། འགན་འཁྲི། དུས་བཅད་བཅས་ཁ་གསལ་བྱུང་ནས་ལས་གྲྭ་དེ་ད་ལོ་ལས་འགོ་འཛུགས་རྒྱུ་རེད། ཅིན་ལུང་ཟངས་གཏེར་ཆུ་མཁོ་འདོན་ལས་གྲྭའི་མངའ་རིས་ཀྱི“གཙང་པོ་གསུམ་དང་མཚོ་གཅིག”རྒྱུག་ཁུལ་གྱི་ཕྱོགས་བསྡུས་འཆར་འགོད་དང་ལས་གྲྭའི་ས་ཆུ་སྲུང་འཛིན་གྱི་ཇུས་གཞི་དང་ཆུའི་ཐོན་ཁུངས་རིགས་པས་ཁུངས་སྐྱེལ་དང་ཞིབ་དཔྱད་ལེགས་སྒྲུབ་བྱས་ནས་ལེགས་ཆའི་ཐོན་ལས་འཕེལ་རྒྱས་ལ་ཆུ་མཁོ་འདོན་འགན་ལེན་ཡག་པོ་ཐུབ་ཆེད་རྨང་གཞི་བརྟན་པོ་བཏིང་ཡོད།

གཞན་ཡང་། རང་ལྗོངས་ཀྱིས《བོད་རང་སྐྱོང་ལྗོངས་ཀྱི“ལོ་ལྔ་ཚན་བཅོ་ལྔ་པའི”ཆུའི་བདེ་འཇགས་འགན་ལེན་འཆར་འགོད(མ་ཟིན)》 ལེགས་སྒྲུབ་བྱས་ནས་ཆུ་བེད་རྣམ་གྲངས་གལ་ཆེན་30ལེགས་གཏོང་འདེམས་སྒྲུག་བྱས་ཡོད།