ཆབ་མདོ་དང་ཡུལ་ཤུལ་གྱིས་ས་ཁོངས་གནམ་གཤིས་མཐུན་སྦྱོར་འཕེལ་རྒྱས་ལ་མཉམ་དུ་སྐུལ་འདེད་བཏང་བ།
ཉེ་ཆར། ཆབ་མདོ་གྲོང་ཁྱེར་གནམ་གཤིས་ཅུས་དང་མཚོ་སྔོན་ཡུལ་ཤུལ་ཀྲོའུ་གནམ་གཤིས་ཅུས་ཀྱིས་གནམ་གཤིས་སྤུས་ཚད་མཐོ་བའི་འཕེལ་རྒྱས་ལ་མཉམ་དུ་སྐུལ་འདེད་གཏོང་རྒྱུའི་མཉམ་ལས་སྒྲོམ་གཞིའི་གྲོས་མཐུན་དངོས་སུ་བཞག་པ་རེད།
གྲོས་མཐུན་ནང་། ཕྱོགས་གཉིས་པོས“ཆ་འཕྲིན་མཉམ་སྤྱོད་དང་། མཐུན་སྦྱོར་གྲོས་མོལ། མཉམ་འབྲེལ་སྔོན་བརྡ། འཕྲལ་སྡོམ་མཉམ་འགུལ”བཅས་ལ་གཙོ་གནད་དུ་དམིགས་ཏེ་མཉམ་ལས་བྱ་རྒྱུ་ཡིན་ཞེས་གསལ་པོར་བཏོན་ཡོད། དེའི་ནང་གནམ་གཤིས་ལྟ་ཞིབ་ཚད་ལེན་དྲ་རྒྱ་འཛུགས་སྐྱོང་དང་། གནམ་གཤིས་གནོད་འཚེ་མཉམ་འགོག་མཉམ་སྡོམ། གནམ་གཤིས་ཞབས་ཞུའི་ནུས་པ་ཆེར་གཏོང་། ཐོན་ཁུངས་མཉམ་སྤྱོད་དང་ཤེས་ལྡན་པའི་སྤེལ་རེས་སོགས་འགག་རྩའི་ཁྱབ་ཁོངས་མང་པོ་ཚུད་ཡོད།
གྲོས་མཐུན་འཇོག་པའི་མཛད་སྒོར་ས་གནས་གཉིས་ཀྱི་འབྲེལ་ཡོད་འགན་འཁུར་བས། ཆབ་མདོ་དང་ཡུལ་ཤུལ་གཉིས་བར་ཐག་ཉེ་པོ་ཡོད་པས་གནམ་གཤིས་ལས་དོན་ཐད་འབྲེལ་བ་དམ་ཟབ་ཡོད། ད་ཐེངས་ཀྱི་མཉམ་ལས་ནི་ས་གནས་གཉིས་ཀྱི་གནམ་གཤིས་བྱ་གཞག་མཐུན་སྦྱོར་འཕེལ་རྒྱས་གཏོང་བའི་འགོ་ཚུགས་ས་གསར་པ་ཞིག་རེད། དེ་ཐོག་ནས་ཕྱོགས་གཉིས་པོས་གནམ་གཤིས་ཀྱི་གནོད་འཚེ་སྔོན་འགོག་དང་ཉུང་གཏོང་གི་འགོག་སྲུང་འཛིང་རགས་དང་པོ་བརྟན་པོ་འཛུགས་རྒྱུ་ཡིན་པ་མཚོན་ཡོད། ཐོན་ཁུངས་མཉམ་སྤྱོད་དང་། ཆ་འཕྲིན་འབྲེལ་མཐུད། ལེགས་ཆ་གསབ་རེས་བཅས་བརྒྱུད། ས་ཁོངས་ཀྱི་གནམ་གཤིས་ཞབས་ཞུའི་ཆུ་ཚད་ཐུན་མོང་ཐོག་མཐོ་རུ་བཏང་ནས། ས་གནས་གཉིས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་གནམ་གཤིས་ཀྱི་འགན་ལེན་དེ་བས་བརྟན་པོ་མཁོ་འདོན་བྱ་རྒྱུ་རེད་ཅེས་བཤད།
འབྲེལ་ཡོད་གསར་འགྱུར།