ཚེས་3ཉིན། གསར་འགོད་པར་འབྲེལ་ཡོད་སྡེ་ཚན་ནས་ཤེས་རྟོགས་བྱུང་བར། 2025ལོའི་ཀྲུང་གོའི་བོད་ལྗོངས་ཀྱི་ཧི་མ་ལ་ཡ་བརྒལ་བའི་རྒྱལ་སྤྱིའི་གཞུང་ལམ་རྐང་འཁོར་མཐར་ཟད་འགྲན་བསྡུར་སྐབས་དྲུག་པ་ཟླ་8ཚེས་6ཉིན་ལྷ་སར་གཟབ་རྒྱས་ངང་འགོ་འཛུགས་རྒྱུ་རེད།

སྐབས་འདིའི་འགྲན་བསྡུར་དེ་རྒྱལ་སྤྱིའི་རྐང་འཁོར་མནའ་འབྲེལ་ལས་རིགས་ཀྱི་སྐྱེས་པའི་རྩེ་ཕུད་2.1རིམ་པའི་ལས་རིགས་ཀྱི་མུ་འབྲེལ་འགྲན་བསྡུར་ལ་རིམ་པ་སྤར་ཡོད་པ་དང་། “གཞུང་ལམ་མཛེས་ཤོས་སུ་རྐང་འཁོར་བཞོན། ཧི་མ་ལ་ཡར་བརྩེ་བ་འཆང”ཞེས་པ་འབོད་ཚིག་ཏུ་བྱས་ཏེ། གོ་ལ་ཧྲིལ་པོའི་རྐང་འཁོར་བཞོན་པར་དགའ་མཁན་ཚོར་རྩེར་སོན་གྱི་རྩལ་འགྲན་དང་མིག་གི་སྟོན་མོ་གཟབ་རྒྱས་ཤིག་གཤོམ་རྒྱུ་རེད། འགྲན་བསྡུར་གྱི་དུས་ཡུན་ཉིན་5ཡིན་པ་དང་དེར་འགྲན་དུམ་ཁག་4བཀོད་སྒྲིག་བྱས་པར་ཁྱོན་ལམ་ཐག་སྤྱི་ལེ་420.58ཡོད་པ་རེད། ཟླ་8ཚེས་6ཉིན། ལྷ་སའི་ཕོ་བྲང་པོ་ཏ་ལའི་ཐང་ཆེན་དུ་འགོ་ཚུགས་མཛད་སྒོ་གཉེར་རྒྱུ་དང་། ས་ཚིགས་དང་པོ་ཟླ་8ཚེས་7ཉིན་ཉིང་ཁྲིར་འགོ་བཙུགས་རྗེས། ལྷོ་ཁ་དང་། ལྷ་ས། གཞིས་རྩེ་བཅས་སུ་བསྐྱོད་རྒྱུ་དང་། ལམ་བར་ནས་བོད་ཀྱི་མཛེས་ལྗོངས་དང་མི་ཆོས་རིག་གནས་ཀྱི་ཉམས་འགྱུར་གསལ་པོ་མཐོང་ཐུབ་རྒྱུ་རེད།

ད་ཐེངས་ཀྱི་འགྲན་བསྡུར་གྱིས་ཆུ་ཚད་མཐོ་བའི་རྐང་འཁོར་རུ་ཁག་17འགྲན་བསྡུར་ལ་ཞུགས་རྒྱུའི་ཡིད་དབང་བཀུག་པའི་ནང་། ＵＣＩཀྲོའུ་ཅི་ལས་རིགས་རུ་ཁག་3དང་། ＵＣＩརྒྱལ་ཕྱིའི་ཀྲོའུ་ཅི་རུ་ཁག་4ＵＣＩརྒྱལ་ནང་གི་ཀྲོའུ་ཅི་རུ་ཁག་9བཅས་དང་། དེ་བཞིན་ཨུ་ཟ་བྷེ་ཁི་སི་ཐན་རྒྱལ་ཁབ་རུ་ཁག་བཅས་ཚུད་ཡོད་ཅིང་། རུ་ཁག་རྩེ་གྲ་དག་ལྷན་དུ་འཛོམས་པ་ལས་འགྲན་བསྡུར་གྱི་རྩལ་འགྲན་ཆུ་ཚད་མཐོ་རུ་དང་རྒྱལ་སྤྱིའི་ཤུགས་རྐྱེན་ཐེབས་ནུས་ཆེ་རུ་ཤུགས་ཆེན་ཕྱིན་ཡོད་པ་རེད།