ད་ལོ་ཚུན། བོད་ལྗོངས་མངའ་རིས་ས་ཁུལ་གྱིས་ཞིང་འབྲོག་པ་དང་། མཐོ་སློབ་སློབ་ཐོན་སློབ་མ། ལས་ཞུགས་དཀའ་ངལ་ཡོད་པའི་མི་སོགས་གཙོ་གནད་ཚོགས་སྤྱིར་དམིགས་ཏེ། ལས་རིགས་རྩལ་ནུས་གསོ་སྦྱོང་བྱེད་ཤུགས་ཆེ་རུ་གཏོང་བ་དང་། ལས་ཞུགས་ལས་སྟེགས་གཏོད་པ། ལས་ཞུགས་ཞབས་ཞུ་ལེགས་སུ་གཏོང་བ་སོགས་ཀྱི་བྱ་ཐབས་བརྒྱུད། ལས་ཞུགས་ལས་དོན་སྤུས་འབྲས་ལེགས་གཉེར་ཡོང་བར་ནུས་ཤུགས་ཡོད་རྒུས་སྐུལ་འདེད་བཏང་བ་རེད།

ཞིང་འབྲོག་པ་གནས་སྒྱུར་ལས་ཞུགས་བྱེད་པའི་རྣམ་པ་ཡག་པོ་ཡོད་ཅིང་། གསོ་སྦྱོང་དང་རྣམ་གྲངས་ཟུང་འབྲེལ་གྱི་སྐུལ་འདེད་འོག བོད་ལྗོངས་མངའ་རིས་ས་ཁུལ་གྱིས་ཞིང་འབྲོག་པ་ལས་ཞུགས་འབབ་འཕར་ཡོང་བར་སྐུལ་འདེད་ཏན་ཏིག་བཏང་ཡོད། མིག་སྔའི་བར། མི་2143ལ་ལས་རིགས་རྩལ་ནུས་གསོ་སྦྱོང་ཐེངས་48བྱས་པ་དང་སྦྲགས། རྣམ་གྲངས་སྐུལ་ཁྲིད་དམ་འཛིན་བྱ་གཞིར་བྱས་ཏེ། ཆེད་དོན་བརྟག་ཞིབ་ཐེངས་3དང་། ཞིང་འབྲོག་པ་ས་ཁོངས་བརྒལ་ནས་གནས་སྒྱུར་ལས་ཞུགས་བྱེད་པའི་ཁ་གསབ་སྲིད་ཇུས་འཐུས་སྒོ་ཚང་དུ་གཏོང་བ། ལས་འགོ་གསར་འཛུགས་དང་བསྐྱར་འཛུགས་ལས་གྲྭ་ཁག་161ལ་བརྟེན་ནས་ཞིང་འབྲོག་པ་3638ལས་ཞུགས་ཐུབ་པ་བཅས་བྱས་པས། ངལ་ལས་ཡོང་འབབ་སྒོར་ཁྲི་2307.83མངོན་འགྱུར་ཐུབ་ཡོད།

བོད་ལྗོངས་མངའ་རིས་ས་ཁུལ་གྱིས་ད་དུང《མངའ་རིས་ས་ཁུལ་གྱི་2025ལོའི་ཞིང་འབྲོག་པ་གནས་སྒྱུར་ལས་ཞུགས་ལས་དོན་འཆར་གཞི》བཀྲམ་སྟེ། སྒོར་ཁྲི་400མན་གྱི་རྣམ་གྲངས་ཞིང་འབྲོག་པའི་ཨར་སྐྲུན་ཁེ་ལས་ལ་སྤྲད་དེ་ལག་བསྟར་བྱ་རྒྱུར་སྐུལ་འདེད་བཏང་བ་དང་། སྒྲིག་འཛུགས་ཡོད་པའི་གནས་སྒྱུར་ལས་ཞུགས་སྲིད་ཇུས་དྲིལ་བསྒྲགས་བྱེད་ཤུགས་ཆེ་རུ་བཏང་བས། རིམ་རྩིས་བརྒྱབ་ན་ཞིང་འབྲོག་པ་2145ལས་ཞུགས་ཐུབ་པར་བྱས་ཡོད།