ཉེ་ཆར། གསར་འགོད་པར་རང་སྐྱོང་ལྗོངས་ཚོང་དོན་ཐིང་ནས་ཤེས་རྟོགས་བྱུང་བར། འདི་ལོ་ཚུན་དུ་ལྗོངས་ཡོངས་ཀྱི་ཚོང་དོན་སྡེ་ཚན་གྱིས་བྱ་ཐབས་ནུས་ལྡན་རབ་དང་རིམ་པ་སྤྱད་དེ་འཛད་སྤྱོད་ལ་སྐུལ་སྤེལ་དང་ལྗོངས་ཡོངས་ཀྱི་འཛད་སྤྱོད་ཁྲོམ་རའི་འཕར་ཚད་རྒྱུན་མཐུད་བརྟན་པོ་ཡོང་བར་སྐུལ་འདེད་བཏང་ནས་དཔལ་འབྱོར་འཕེལ་རྒྱས་ལ་སྒུལ་ཤུགས་གསར་པ་བསྣན་པས། ལོ་སྟོད་དུ་ལྗོངས་ཡོངས་ཀྱི་སྤྱི་ཚོགས་འཛད་ཟོག་སིལ་ཚོང་དངུལ་འབོར་སྒོར་དུང་ཕྱུར་457.6ཟིན་པ་དེ་དུས་མཚུངས་ལས་5.5%འཕར་ནས་ན་ནིང་གི་དུས་མཚུངས་ལས་བརྒྱ་ཆའི་གྲངས་1.7མཐོ་རུ་ཕྱིན་ཏེ། གྲོང་ཁྱེར་གྱི་ཚོང་ར་ནས་གྲོང་གསེབ་ཀྱི་ཚོང་འདུས་བར་དང་། དྲ་ཐོག་ལས་སྟེགས་ནས་དྲ་ཕྱིའི་ཚོང་ཁང་བར་ས་མཐོའི་ས་གཞི་ཆེན་པོའི་གང་སར་འཛད་སྤྱོད་ཀྱི་གསོན་ཤུགས་ཟམ་མི་ཆད་པར་འཕེལ་བཞིན་ཡོད།

འཛད་སྤྱོད་ཀྱི་གྲུབ་ཆ་ནས་བལྟས་ཚེ། བཟའ་བཏུང་གི་ཡོང་འབབ་དང་ཚོང་ཟོག་སིལ་ཚོང་བྱེད་ཚད་གང་མགྱོགས་འཕར་བའི་རྣམ་པ་མངོན་ཏེ་དུས་མཚུངས་ལས་7.4%དང་5.4%སོ་སོར་འཕར་བའི་ཁྲོད། བཅད་གྲངས་ཡན་གྱི་བཟའ་བཏུང་ཡོང་འབབ་དང་ཚོང་ཟོག་སིལ་ཚོང་འཕར་ཚད་15.5%དང་8.7%ཟིན་ནས་རང་ལྗོངས་ཀྱི་འཛད་སྤྱོད་ཁྲོམ་རའི་འཕར་ཚད་ཀྱི་མཉེན་ཆ་གང་ལེགས་མངོན་ཡོད།

ས་ཁོངས་ཀྱི་ཁྱབ་ཚུལ་ནས་བལྟས་ཚེ། རང་སྐྱོང་ལྗོངས་ཀྱི་ལྟེ་བའི་གྲོང་ཁྱེར་ལྷ་སས་འཛད་སྤྱོད་སྣེ་ཁྲིད་ཀྱི་ནུས་པ་མངོན་གསལ་དོད་པོ་བཏོན་པར། ལོ་སྟོད་དུ་སྤྱི་ཚོགས་ཀྱི་འཛད་ཟོག་སིལ་ཚོང་བསྡོམས་འབོར་གྱིས་ལྗོངས་ཡོངས་ཀྱི་བསྡོམས་འབོར་གྱི་བཅུ་ཆ་ལྔ་ལྷག་ཙམ་བཟུང་ཡོད། གཞིས་རྩེ་དང་མངའ་རིས་སོགས་གྲོང་ཁྱེར(ས་ཁུལ)གྱི་སྤྱི་ཚོགས་འཛད་ཟོག་སིལ་ཚོང་བསྡོམས་འབོར་གྱི་འཕར་ཚད་7%ཡན་རྒྱུན་འཁྱོངས་ཐུབ་ཡོད། གླེང་རིན་ཡོད་པ་ཞིག་ནི། རྫོང་ཁོངས་དང་གྲོང་གསེབ་ཀྱི་འཛད་སྤྱོད་ཁྲོམ་རར་ཡང་བཀྲག་མདངས་འཚེར་ས་མངོན་པ་དེ་ཡིན། དེའང་གྲོང་གསེབ་ཀྱི་རྨང་གཞིའི་སྒྲིག་བཀོད་ཟམ་མི་ཆད་པར་འཐུས་སྒོ་ཚང་དུ་སོང་བ་དང་། ཟོག་འགྲུལ་དྲ་རྒྱ་རྒྱུན་ཆད་མེད་པར་སྣུར་སྲིང་བྱུང་བ་དང་སྦྲགས་གྲོང་གསེབ་ཀྱི་འཛད་ཟོག་སིལ་ཚོང་བྱེད་ཚད་དུས་མཚུངས་ལས་11%འཕར་ཏེ། འཕར་ཚད་གྲོང་ཁྱེར་དང་གྲོང་རྡལ་གྱི་བརྒྱ་ཆའི་གྲངས་6.6%ལས་མཐོ་བ་ཡོད། ཞིང་འབྲོག་པ་སྔར་ལས་མང་བས་རང་ཁྱིམ་གྱི་སྒོ་རྩ་ནས་ཚོང་ཟོག་སྣ་ཚོགས་ཉོ་ཆོག་པ་དང་གྲོང་ཁྱེར་དང་གྲོང་གསེབ་དབར་གྱི་འཛད་སྤྱོད་ཧེ་བག་ཆུང་དུ་འགྲོ་བཞིན་ཡོད།

གཙོ་གནད་ཚོང་ཟོག་འཛད་སྤྱོད་ནས་བལྟས་ཚེ། ཟས་གོས་སྤྱོད་གསུམ་སོགས་གཞི་རྩའི་འཚོ་བའི་མཁོ་ཆས་ཚོང་ཟོག་འཛད་སྤྱོད་རྒྱུན་མཐུད་བརྟན་པོ་འཕར་བའི་ཁྲོད། བཅད་གྲངས་ཡན་གྱི་འབྲུ་སྣུམ་རིགས་ཀྱི་ཚོང་ཟོག་སིལ་ཚོང་བྱེད་ཚད་དུས་མཚུངས་ལས་17%འཕར་བ་དང་། གསེར་དངུལ་མུ་ཏིག་རིགས་ཀྱི་ཚོང་ཟོག་སིལ་ཚོང་བྱེད་ཚད་དུས་མཚུངས་ལས་62.4%འཕར་བ། མཛེས་རྫས་རིགས་170.2%འཕར་བ་བཅས་ལས། འཚོ་བའི་སྤུས་ཚད་ལ་དད་འདོད་ཆེ་བའི་འཛད་སྤྱོད་པའི་དགོས་མཁོ་རྒྱུན་ཆད་མེད་པར་ཆེ་རུ་འགྲོ་བ་མངོན་ཡོད།

འཛད་སྤྱོད་སྐུལ་འདེད་ལས་ཕན་འབྲས་མངོན་གསལ་དོད་པོ་ཐོན་པ་དང་། སྲིད་ཇུས་ཀྱི་འདེགས་སྐྱོར་ནུས་པ་ཐོན་ནས་ཁྱད་ལྡན་འཛད་སྤྱོད་བྱེད་མང་དུ་ཕྱིན་ཞིང་། རང་སྐྱོང་ལྗོངས་ཀྱིས་སྡེ་ཚན་དབར་མཉམ་ལས་དང་། གོང་འོག་མཉམ་འགུལ། སྲིད་གཞུང་དང་ཁེ་ལས་ཕན་ཚུན་གཞོགས་འདེགས་བཅས་བྱེད་པའི་རྩ་དོན་མཐའ་འཁྱོངས་བྱས་ཏེ། འཛད་སྤྱོད་ཤུགས་ཆེར་གཏོང་བའི་ཆེད་དོན་བྱ་སྤྱོད་ལ་སྐུལ་འདེད་ཏན་ཏིག་བཏང་ཡོད། འཛད་ཟོག་རྙིང་པ་གསར་པར་བརྗེ་ཤུགས་ཆེ་རུ་གཏོང་བར་རླངས་འཁོར་དང་། ཁྱིམ་སྤྱོད་གློག་ཆས། ཁྱིམ་ཚང་མཛེས་བཟོ་དང་ཐབ་ཚང་གསང་སྤྱོད་གསར་བརྗེ། 3Ｃགྲངས་འཛིན། གློག་སྒུལ་སྦག་སྦག་སོགས་ཁྱབ་ཁོངས་མང་པོ་ཚུད་ཡོད། “བདེ་སྐྱིད་ལྡན་པའི་བོད་ལྗོངས། འཚོ་བར་ཕན་འདོགས་པའི”རིམ་སྤེལ་བྱེད་སྒོ་མུ་མཐུད་སྤེལ་ནས། ལོ་སྟོད་དུ་འཛད་སྤྱོད་ལ་སྐུལ་འདེད་གཏོང་བའི་རིམ་སྤེལ་བྱེད་སྒོ་སྣ་ཚོགས་ཐེངས་200ལྷག་ཙམ་སྤེལ་བ་ལས། འཛད་སྤྱོད་ཁྲོམ་རའི་གསོན་ཤུགས་ནུས་ལྡན་འཕེལ་ཞིང་། བསྡོམས་རྩིས་ལ་གཞིགས་ན། ལོ་སྟོད་དུ་ལྗོངས་ཡོངས་སུ་ཁྱོན་ཁ་གསབ་མ་དངུལ་སྒོར་དུང་ཕྱུར་6.4སྤྲད་དེ་ཐར་ཀར་འཛད་སྤྱོད་སྒོར་དུང་ཕྱུར་47.8འཕར་བར་སྐུལ་ཁྲིད་ཐུབ་ནས་མ་དངུལ་ཁ་གསབ་སྤྲོད་པའི་ཕན་འབྲས་གང་ལེགས་མངོན་ཡོད།

འཛད་སྤྱོད་བྱེད་སྟངས་གསར་པ་ཡར་ངོའི་ཟླ་ལྟར་མང་དུ་ཕྱིན་ཡོད། གྲངས་འཛིན་འཛད་སྤྱོད་ཚུགས་གནས་མཐོ་བའི་འཕེལ་རྒྱས་ཀྱི་ཆུ་ཚད་རྒྱུན་འཁྱོངས་ཐུབ་སྟེ། འདི་ལོའི་ལོ་སྟོད་དུ་རང་ལྗོངས་ཀྱིས་སྤྱི་པའི་དྲ་རྒྱ་བརྒྱུད་ཚོང་ཟོག་སིལ་ཚོང་བྱེད་ཚད་42%འཕར་ནས་དྲ་ཐོག་ཏུ་འཛད་ཟོག་སིལ་ཚོང་བྱེད་ཚད་བརྒྱ་ཆའི་གྲངས་3.6འཕར་བར་སྐུལ་ཁྲིད་ཐུབ་སྟེ། གྲངས་འཛིན་དཔལ་འབྱོར་དང་འཛད་སྤྱོད་ཁྲོམ་ར་མཉམ་འདྲེས་རྒྱུན་ཆད་མེད་པར་ཟབ་ཏུ་ཕྱིན་ཡོད། དྲ་ཚོང་ལས་སྟེགས་ཆེན་པོ་ཁག་གིས་བོད་ཀྱི་ཁྲོམ་རར་མ་འཇོག་བྱེད་ཚད་གཅིག་མཇུག་གཉིས་མཐུད་ངང་མང་དུ་བཏང་བས། མཛོད་ཉར་དང་ཟོག་འགྲུལ་གྱི་བཀོད་པ་ལེགས་སུ་ཕྱིན་ཞིང་། མིག་སྔར། ལྷ་ས་གྲོང་ཁྱེར་དུ་དྲ་ཚོང་མཛོད་ཁང་ལྟེ་གནས་མང་པོ་བསྐྲུན་ཡོད་པས། ཚོང་ཟོག་ཁག་གཅིག་ཉིན་དེ་རང་ངམ་ཡང་ན་ཉིན་གཉིས་པར་འབྱོར་གྱི་ཡོད་པ་རེད།