ད་ལོ་ཚུན་དུ། གཞིས་རྩེ་གྲོང་ཁྱེར་སྐྱེ་ཁམས་ཁོར་ཡུག་ཅུས་ཀྱིས“སྙིགས་མེད་གྲོང་ཁྱེར”འཛུགས་སྐྲུན་བྱེད་རྒྱུ་དམ་འཛིན་བྱ་གཞིར་བྱེད་པ་དང་སྙིགས་རོ་རིགས་ལྔ་ཐོན་ཁུངས་ཅན་དུ་བེད་སྤྱོད་བྱེད་པའི་ཆུ་ཚད་མཐོར་གཏོང་ལ་སྐུལ་འདེད་གཏོང་རྒྱུ་འགོ་ཚུགས་སར་བྱས་ཏེ། ས་གཙང་སྲུང་སྐྱོང་དམག་འཐབ་མུ་མཐུད་གཏིང་ཟབ་བརྒྱབ་ནས་ས་རྒྱུའི་སྦགས་བཙོག་འགོག་བཅོས་ལས་དོན་ལ་སྐུལ་འདེད་བརྟན་པོ་བཏང་བར་དགེ་མཚན་ལྡན་པའི་ཕན་འབྲས་ཐོབ་པ་རེད།

ས་རྒྱུའི་སྦགས་བཙོག་འགོག་བཅོས་ཀྱི་འགག་སྒྲོལ་ལས་འགན་དོན་འཁྱོལ་བྱེད་པའི་ཐད། གཞིས་རྩེ་གྲོང་ཁྱེར་སྐྱེ་ཁམས་ཁོར་ཡུག་ཅུས་ཀྱིས“སྡོད་གནས་གཅིག་དང་སྤྱི་སྤྱོད་གཉིས”ཀྱི་འཛུགས་སྐྲུན་ས་ཆའི་ས་རྒྱུའི་སྦགས་བཙོག་གནས་ཚུལ་ལ་ཞིབ་དཔྱད་གཏིང་ཟབ་བྱས་ནས། གྲོང་ཁྱེར་ཡོངས་ཀྱི་གཙོ་གནད་ལས་གྲྭའི་རྣམ་གྲངས་ལ་འགན་སྲུང་ནུས་ལྡན་བྱས་ཡོད། མིག་སྔའི་བར་རིམ་རྩིས་བརྒྱབ་ན་འཛུགས་སྐྲུན་ས་ཆའི་ཞིབ་དཔྱད་འབྲས་བུ་204བཏོན་པར། གཙོ་གནད་འཛུགས་སྐྲུན་ས་ཆ་བདེ་འཇགས་ངང་སྤྱོད་ཚད་100%ཟིན་པ་དང་འཛུགས་སྐྲུན་ས་ཆའི་ཁྲིམས་འགལ་སྒྲིག་འགལ་ལ་གྲལ་བཤེར་བྱེད་ཚད་100%ཟིན་པའི་འགན་ལེན་ཐུབ་ཡོད།

“སྙིགས་མེད་གྲོང་ཁྱེར”འཛུགས་སྐྲུན་ལས་དོན་ལ་སྐུལ་འདེད་ཏན་ཏིག་གཏོང་རིང་། ཅུས་དེས་གཞིས་རྩེའི་དོན་དངོས་དང་ཟུང་འབྲེལ་གྱིས་གྲོང་ཁྱེར་ཡོངས་ཀྱི་སྙིགས་རོ་རིགས་ལྔ་ཐོན་ཁུངས་ཅན་དུ་བེད་སྤྱོད་བྱེད་སྟངས་ལ་བརྟག་ཞིབ་གཏིང་ཟབ་བྱས་ནས། ཐོན་ཁུངས་ཅན་གྱི་བེད་སྤྱོད་རྣམ་གྲངས་གང་མགྱོགས་ལག་ལེན་བསྟར་རྒྱུར་སྐུལ་འདེད་ཧུར་ཐག་བཏང་བ་རེད། 2024ལོའི་རྒྱལ་ཁབ་ཀྱི“སྙིགས་མེད་གྲོང་ཁྱེར”གྱི་འཛུགས་སྐྲུན་འཕེལ་རིམ་ལ་གདེང་འཇོག་དང་དུས་ཚིགས་དང་པོའི་བཀོད་གཏོང་ལས་དོན་དུས་ཐོག་ཏུ་ལེགས་གྲུབ་བྱུང་བ་དང་།“སྙིགས་མེད་ཞིང་ཁ”དང“སྙིགས་མེད་འཁྱགས་རོམ”གྱི་འཛུགས་གཏོད་དམིགས་ཚད་བཟོས་ནས་བཀྲམ་པ། གྲོང་ཁྱེར་ཡོངས་ཀྱི་2025ལོའི་ཁག་དང་པོའི“སྙིགས་མེད་ཕྲ་ཕུང”འཛུགས་གཏོད་རེ་ཞུ་240བདག་སྤྲོད་བྱས་པ་བཅས་མིག་སྔར་འབྲེལ་ཡོད་ལས་དོན་གྱི་དཔྱད་གཞིར་དཔྱད་ཞིབ་དང་ས་གནས་ས་ཐོག་ཏུ་བསྐྱར་ཞིབ་བྱེད་པའི་ལས་དོན་བདེ་བླག་ངང་ལེགས་གྲུབ་ཟིན་ཡོད་པ་རེད།