ཉེ་ཆར། བོད་རང་སྐྱོང་ལྗོངས་སྨན་རྩིས་ཁང(བོད་རང་སྐྱོང་ལྗོངས་བོད་སྨན་ཞིབ་འཇུག་ཁང)གི་པགས་ནད་དང་གྱུར་དུག་ནད་ཐོག་ཚན་ཁག་དངོས་སུ་སྒོ་བྱང་བཀལ་ནས་བཙུགས་ཡོད་པ་རེད།

རང་སྐྱོང་ལྗོངས་སྨན་རྩིས་ཁང་གི་འབྲེལ་ཡོད་འགན་འཁུར་བས། པགས་ནད་དང་གྱུར་དུག་ནད་ཐོག་ཚན་ཁག་བཙུགས་ཐུབ་པ་དེ་ནི་སྨན་ཁང་གི་འབྲེལ་ཡོད་རིགས་གཅིག་མཁས་ཅན་གྱིས་ཡུན་རིང་འཚོལ་ཞིབ་བྱས་ནས་གྲུབ་པའི་གནད་ལ་འཁེལ་བ་དང་། བརྒྱུད་རིམ་ལྡན་པ། རང་གཤིས་ཅན་བཅས་ཀྱི་ཁྱད་ཆོས་ལྡན་པའི་ནད་བརྟག་སྨན་བཅོས་ནུས་པ་ལས་བྱུང་བ་ཞིག་རེད། བྱ་ཐབས་དེ་ནི་རྒྱ་ཆེའི་ནད་པའི་ནད་གཞི་དེ་རིགས་ཀྱི་གནད་ལ་འཁེལ་ཞིང་ཕན་ནུས་ཆེ་བའི་སྨན་བཅོས་ཞབས་ཞུའི་དགོས་མཁོ་སྐོང་ཆེད་རེད་ལ། རྒྱལ་ཁབ་ཀྲུང་ལུགས་གསོ་རིག་ལྟེ་གནས(བོད་སྨན)ཀྱི་དགེ་མཚན་ལྡན་པའི་ནད་རིགས་འཛུགས་སྐྱོང་གི་ལས་འགན་ལེགས་གྲུབ་བྱ་ཆེད་ཀྱང་ཡིན་པས། སྨན་ཁང་གི་སྔར་ཡོད་ཀྱི་དགེ་མཚན་ལྡན་པའི་རིག་ཚན་ཆེད་ཚན་གྱི་རིམ་སྤོར་གལ་ཆེན་དང་གནད་སྨིན་བཀོད་སྒྲིག་གལ་ཆེན་ཞིག་ཡིན་པ་མ་ཟད། སྨན་ཁང་གིས་ཆེད་ཚན་ཅན་འཛུགས་སྐྲུན་ཐད་གོམ་པ་བརྟན་པོ་སྤོས་པའང་མཚོན་གྱི་ཡོད་ཅེས་བརྗོད་པ་རེད།