ཁོངས་གཏོགས་ཁུལ་གྱི་ལས་སྒུག་བུད་མེད་ཀྱི་ལས་རིགས་རྩལ་ནུས་སྔར་བས་ཆེ་རུ་གཏོང་བ་དང་། ལས་ཞུགས་གསར་གཏོད་ཀྱི་ཐབས་ལམ་རྒྱ་ཆེར་གཏོང་བ། ཏང་འཛུགས་སྐྱོང་གི་སྣེ་ཁྲིད་ནུས་པ་འདོན་སྤེལ་གང་ལེགས་བྱེད་པ་བཅས་ཀྱི་ཆེད། ཉེ་ཆར། ཉིང་ཁྲི་གྲོང་ཁྱེར་བྲག་ཡིབ་ཆུས་ཀྱི་བུད་མེད་མཉམ་འབྲེལ་ལྷན་ཚོགས་དང་པད་མ་སྒང་ཁྲོམ་གཞུང་ཉི་ཁྲི་སྡེ་ཁུལ་ཏང་ཨུད་ཀྱིས་མཉམ་དུ“ཨ་ཅག་སློབ་ཁང་དང་སྡེ་ཁུལ་གྱི་བཟོ་ཁང་ཟུང་འབྲེལ”གྱི་བུད་མེད་ཀྱི་སྦ་ལན་སླ་བའི་གསོ་སྦྱོང་འཛིན་གྲྭ་གཉེར་བ་རེད།

ངོ་སྤྲོད་བྱས་པར་གཞིགས་ན། ཉི་ཁྲི་སྡེ་ཁུལ་ཏང་ཨུད་ཀྱིས་དུས་འགོར་འདྲི་རྩད་བརྟག་ཞིབ་བྱས་པ་བརྒྱུད། ལས་སྒུག་བུད་མེད་མང་ཚོགས་ཀྱི་ལས་ཞུགས་ཀྱི་དགོས་མཁོ་དང་དཀའ་ངལ་དངོས་ཤེས་རྟོགས་གཏིང་ཟབ་བྱས་ཏེ་ས་གནས་དེ་གའི་ལག་ཤེས་ཐོན་ལས་འཕེལ་རྒྱས་གནས་ཚུལ་དང་ཟུང་འབྲེལ་བྱས་ཏེ“ཨ་ཅག་སློབ་ཁང་དང་སྡེ་ཁུལ་གྱི་བཟོ་ཁང་ཟུང་འབྲེལ”གྱི་བྱེད་སྟངས་གསར་གཏོད་བྱས་ཡོད། “གསོ་སྦྱོང་དང་། ལག་ལེན། ལས་ཞུགས་བཅས་ཟུང་འབྲེལ”གྱི་གཞི་གཅིག་ཅན་གྱི་རྣམ་པར་བརྟེན་ནས་ལས་སྒུག་བུད་མེད་ལ་སློབ་སྦྱོང་འཚར་ལོངས་དང་འབབ་འཕར་ལས་སྟེགས་བསྐྲུན་ཡོད། གསོ་སྦྱོང་བྱེད་རིང་། ལས་རིགས་ཀྱི་ཉམས་མྱོང་ཕུན་སུམ་ཚོགས་པའི་ལག་ཤེས་འཆད་ཁྲིད་དགེ་རྒན་གདན་དྲངས་ནས་རྨང་གཞིའི་སྦ་ལན་སླ་སྟངས་དང་། རི་མོ་རྒྱག་སྟངས། ཐོན་རྫས་བཟོ་བ་སོགས་ལ་དམིགས་ཏེ་སློབ་ཁྲིད་གོ་རིམ་ལྡན་པ་བྱས་ནས་སློབ་མ་ཚོ་རྨང་གཞི་ཙམ་ཤེས་པ་ནས་ལག་རྩལ་བྱང་ཆུབ་པའི་ལག་ཤེས་བཟོ་རྩལ་པ་ཞིག་ཏུ་འཚར་ལོངས་ཡོང་བར་འགན་ལེན་བྱས་ཡོད།