ཉེ་ཆར། གཞིས་རྩེ་གྲོང་ཁྱེར་འབྲོང་པ་རྫོང་རིན་ཐོར་ཤང་ཁང་དམར་གྲོང་ཚོའི་ཚོགས་ཆུང་གཉིས་པའི་མང་ཚོགས་ཀྱི་འཐུས་མིས“བརྩེ་སེམས་ཟབ་མོས་དམངས་ཀྱི་སེམས་ཁྲལ་སེལ། མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ”ཞེས་པའི་གོས་དར་གཞིས་རྩེ་གྲོང་ཁྱེར་ལེགས་རྩེ་རྒྱལ་མཚམས་འཛུལ་སྒྲོལ་མཐའ་མཚམས་ཞིབ་བཤེར་ས་ཚིགས་སུ་སྤྲད་ནས་ཞིབ་བཤེར་ས་ཚིགས་ཀྱིས་དམངས་ཀྱི་སེམས་ཁྲལ་སེལ་བ་དང་། མི་རིགས་མཐུན་སྒྲིལ་སྲ་བརྟན། མཐའ་མཚམས་བདེ་འཇགས་བརྟན་ལྷིང་སྲུང་སྐྱོང་། བཅའ་སྡོད་ཁུལ་གྱི་དཔལ་འབྱོར་འཕེལ་རྒྱས་ལ་ཞབས་འདེགས་ཞུ་བ་སོགས་ཀྱི་ལས་དོན་བསྒྲུབས་པར་ཐུགས་རྗེ་ཆེ་ཞུས་པ་རེད།

དུས་ཡུན་རིང་པོར་ལེགས་རྩེ་མཐའ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་ཀྱིས་ཐོག་མཐའ་བར་གསུམ་དུ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ཏེ་མང་ཚོགས་ལ་ཞབས་འདེགས་ཞུ་བའི་ལས་དོན་དེ་འགོ་འཛུགས་ས་དང་དོན་ལ་བབས་སར་བརྩིས་པ་དང་འབྲེལ། “འགལ་བའི་ཉེན་ཁ་སེལ་བ་དང་སྤྱི་ཚོགས་བརྟན་ལྷིང་སྲུང་སྐྱོང”གི་ཆེད་དོན་བྱ་སྤྱོད་དང“ངས་མང་ཚོགས་ལ་བྱ་བ་དངོས་སྒྲུབ་པ”དང“ཉེན་རྟོག་པ་ཁྲི་བརྒྱ་ཁྱིམ་ཚང་ཁྲི་སྟོང་ལ་སྐྱོད་པ”སོགས་ཀྱི་བྱེད་སྒོར་དམིགས་ནས་འཚམས་འདྲི་བྱེད་པ་དང་། སྙིང་གཏམ་གླེང་བ། བསམ་འཆར་བསྡུ་ལེན། འགལ་བ་སེལ་བ་སོགས་ཀྱི་བྱེད་ཐབས་ཐོག་ནས་བཅའ་སྡོད་མང་ཚོགས་ཀྱི་འདུན་པ་དང་། འཚོ་བའི་དགོས་མཁོ། དཀའ་ངལ་དངོས་བཅས་ཕྱོགས་ཡོངས་ནས་ཤེས་རྟོགས་བྱས་པ་རེད། གནས་གཏན་འཁེལ་གྱི་རོགས་རམ་ལམ་སྲོལ་བཙུགས་པ་དང་ཉེན་ཁ་བསལ་ནས་གང་ཐུབ་ཅི་ཐུབ་ཀྱིས་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་དང་འགལ་བ་རྩོད་གཞི་སྣ་ཚོགས་ཐག་གཅོད་བྱས་ཡོད།

ལེགས་རྩེ་རྒྱལ་མཚམས་འཛུལ་སྒྲོལ་མཐའ་མཚམས་ཞིབ་བཤེར་ས་ཚིགས་ཀྱིས་དམངས་ཕན་གྱི་ཆུ་ལེན་ས་དང་། མྱུར་སྐྱེལ་ས་ཚིགས། འཁྲུ་ཁང་། གློག་བརྙན་ཁང་། སྐྲ་བཞར་ཁང་། ལུས་སྦྱོང་ཁང་སོགས་དམངས་ཕན་ཞབས་ཞུའི་སྒྲིག་བཀོད་རབ་དང་རིམ་པ་བཙུགས་ཤིང་མཐུས་སྒོ་ཚང་དུ་བཏང་སྟེ་བཅའ་སྡོད་མང་ཚོགས་ལ་རིན་མི་དགོས་པར་འཚོ་བའི་ཞབས་ཞུ་མཁོ་འདོན་དང་བཅའ་སྡོད་མང་ཚོགས་ཀྱི་འཚོ་བའི་དགོས་མཁོ་དང་ཕུན་སུམ་ཚོགས་པའི་བསམ་པའི་རིག་གནས་ཀྱི་འཚོ་བའི་དགོས་མཁོ་བསྐངས་ཡོད། ད་དུང་འོས་འགན་སྨན་བཅོས་དང་། བཅའ་ཁྲིམས་བློ་འདྲི། ལག་ཁྱེར་པར་རྒྱག་པ་སོགས་བྱེད་ཐབས་སྣ་ཚོགས་ཀྱི་དམངས་ཕན་ཞབས་ཞུའི་བྱེད་སྒོ་བརྒྱུད་མཐའ་མཚམས་ཉེན་རྟོག་པ་དང་མང་ཚོགས་ཀྱི་འབྲེལ་བ་ཟབ་ཏུ་ཕྱིན་པ་དང་། “མི་རིགས་མཐུན་སྒྲིལ་ཁྱིམ་ཚང་གཅིག་ལྟར་གྱི་བརྩེ་བའི”རྣམ་པ་ཟབ་མོ་བཏོད་པ་མ་ཟད། བཅའ་སྡོད་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཟབ་ཏུ་ཕྱིན་ཏེ་འགག་སྒོའི་མཐའ་མཚམས་དར་རྒྱས་དང་འཕེལ་རྒྱས་ལ་ཕྱོགས་ཡོངས་ནས་སྐུལ་འདེད་ཐེབས་ཡོད།

ས་ཚིགས་ཀྱི་འགོ་ཁྲིད་ཚན་ཁག་གིས་གོས་དར་དེ་ཉིད་གཟི་བརྗིད་ཁང་གི་མངོན་གསལ་དོད་ཤོས་སར་བཀལ། ས་ཚིགས་ཏང་ཨུད་ཀྱི་ཧྲུའུ་ཅི་དང་ཀྲན་ཀྲང་ཝང་ཙི་ལེང་གིས་གཟའ་འཁོར་གྱི་སྤེལ་རེས་ཚོགས་འདུའི་ཐོག “གོས་དར་འདིས་ང་ཚོས་མུ་མཐུད་མང་ཚོགས་ཀྱི་ལས་དོན་བསྒྲུབ་རྒྱུར་སྐུལ་ལྕག་བྱེད་བཞིན་ཡོད། ང་ཚོས་མང་ཚོགས་ལ་འཐུང་ཆུ་ཏུན་300ལྷག་ཙམ་སྐྱེལ་རོགས་བྱེད་སྐབས་དང་སློབ་ཆུང་སློབ་མས་དཔེ་ཁུག་གསར་པ་ཁུར་ནས་དགའ་སྤྲོ་ཆེན་པོས་སློབ་གྲྭར་སྐྱོད་པ་མཐོང་སྐབས། ང་ཚོ་ཚང་མས‘མི་དམངས་སྤྱི་བདེས་མི་དམངས་ཀྱི་ཆེད་དུ’ཞེས་པ་དེ་ནམ་ཡང་འབོད་ཚིག་ཅིག་མིན་པ་ཤེས་ཐུབ”ཅེས་བཤད། ན་གཞོན་ཉེན་རྟོག་པ་ཚོས་གོས་དར་གྱི་འགྲམ་དུ་མཉམ་པར་བརྒྱབ་པ་དང་ཉེན་རྟོག་པ་གསར་པ་ཞུང་ཅི་ཆིང་གིས་ཟིན་བྲིས་དེབ་ཐོག“མཐའ་མཚམས་སུ་གངས་རི་དང་རྩྭ་ཐང་གི་མཛེས་ལྗོངས་འདུག་ལ། ཉེན་རྟོག་པ་དང་མི་དམངས་རྣམས་མཐུན་སྒྲིལ་ལག་གདང་སྦྲེལ་ནས་མཉམ་དུ་བདེ་སྐྱིད་འཚོ་བ་གཏོད་པའི་རྣམ་པ་ཡང་འདུག”ཅེས་བྲིས་ཡོད།

གསར་འགོད་པས་ཤེས་རྟོགས་བྱས་པར། ད་ལོ་ཚུན། ལེགས་རྩེ་རྒྱལ་མཚམས་འཛུལ་སྒྲོལ་མཐའ་མཚམས་ཞིབ་བཤེར་ས་ཚིགས་ཀྱིས་མང་ཚོགས་500ལྷག་ཙམ་གྱི་སྐྲ་བཞར་བ་དང་། མང་ཚོགས་ལ་འཐུང་ཆུ་སྒམ་120སྤྲད་པར་ཏུན་300ལྷག་ཙམ་ཟིན་པ། བོད་སྐད་གློག་བརྙན་ཐེངས་20བསྟན་པ། ཡག་ར་ཤང་སློབ་ཆུང་ལ་དཔེ་ཁུག་དང་ཡིག་ཆས་སོགས་ཁྱོན་200ལྷག་ཙམ་ཞལ་འདེབས་བརྒྱབ་ཡོད། སྔ་རྗེས་སུ་བོད་རང་སྐྱོང་ལྗོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ཚན་པ་ཁག་བཞི་པའི་ཞིབ་དཔྱད་རྩིས་ལེན་ཐུབ་པ་དང་། གུང་གཞོན་སྡེ་ཚོགས་བོད་རང་སྐྱོང་ལྗོངས་ཨུ་ཡོན་ལྷན་ཁང་གིས་རང་སྐྱོང་ལྗོངས་རིམ་པའི་དཔེ་སྟོན་རང་བཞིན་གྱི“གཞོན་ནུའི་ཁྱིམ་ཚང”ལ་བདམས་ཡོད།

གོས་དར་གཅིག་ནི་གདེང་འཇོག་ཅིག་ཡིན་ལ། སྐུལ་ལྕག་ཅིག་ཀྱང་ཡིན། ཝང་ཙི་ལེང་གིས་ལེགས་རྩེ་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་ཀྱིས་གོས་དར་སྒུལ་ཤུགས་སུ་བྱས་ནས་མུ་མཐུད་དམངས་ཆེད་ཀྱི་ཐོག་མའི་བསམ་འདུན་མཐའ་འཁྱོངས་བྱེད་པ་དང་། རང་འགུལ་ངང་བཅའ་སྡོད་མང་ཚོགས་ལ་བྱ་བ་བཟང་པོ་སྒྲུབ་པ། ལས་དོན་དངོས་སྒྲུབ་པ། དཀའ་ངལ་སེལ་བ་བཅས་བྱས་ཏེ་མཐའ་མཚམས་མང་ཚོགས་ཕྱུག་འགྱུར་དང་། འགག་སྒོ་མཛེས་སྡུག་ལྡན་པ། མཐའ་མཚམས་བརྟན་ལྷིང་། མཐའ་སྲུང་སྲ་བརྟན་བཅས་ལ་ཕྱོགས་ཡོངས་ནས་སྐུལ་འདེད་བཏང་ཡོད་ཅེས་བཤད།