འདི་ནི་2025ལོའི་ཟླ་4པར་དར་དམར་སྡེ་ཁུལ་དུ་བཙུགས་པའི་ཁྲེང་ཀོན་ཆུས་སྡེ་ཁུལ་ལས་དོན་མི་སྣའི་ནུས་འདོན་རྟེན་གཞི་ཡིན་པ།

འདི་ནི་དར་དམར་སྡེ་ཁུལ་གྱི་སྡེ་ཁུལ་ལས་དོན་པས་ནུས་འདོན་རྟེན་གཞིའི་ས་ཚིགས་སུ་མང་ཚོགས་ལ་སེམས་ཁམས་སློབ་གསོ་རྒྱག་བཞིན་པ།

ཉེ་བའི་ལོ་ཤས་རིང་། ལྷ་ས་གྲོང་ཁྱེར་ཁྲེང་ཀོན་ཆུས་ཀྱིས་དུས་བབ་གསར་པར་གཞི་ཚུགས་ནས་སྡེ་ཁུལ་ལས་དོན་པའི་ལས་རིགས་མ་ལག་འཛུགས་སྐྱོང་ཚད་བརྒལ་བྱ་གཞིར་བྱས་ཏེ། གནད་ལ་འཁེལ་པོས་བསྡུ་བ་དང་། མ་ལག་གིས་མཐུན་སྐྱེན་སྦྱོར་བ། ལམ་སྲོལ་གསར་གཏོད་བཅས་བྱས་པ་བརྒྱུད་ཆབ་སྲིད་ཀྱི་ལངས་ཕྱོགས་བརྟན་པ་དང་། བྱང་ཚད་མཐོ་བ། གྲུབ་ཆ་ལུགས་མཐུན་བཅས་ཀྱི་ཆེད་ལས་ཅན་གྱི་སྡེ་ཁུལ་ལས་དོན་པའི་དཔུང་ཁག་ཅིག་བཏོད་ཡོད།

རིགས་གཞུང་དང་ལག་ལེན་མཉམ་འདྲེས་ཡོང་བར་བྱས་པ།

ཁྲེང་ཀོན་ཆུས་ཀྱིས་རིག་གཞུང་དང་ལག་ལེན་གྱི་བཀག་རྒྱ་གཏོར་ནས་མཐོ་སློབ་ཀྱི་རིགས་པའི་གཞུང་ལུགས་ཐོན་ཁུངས་དང་སྡེ་ཁུལ་གྱི་ལག་ལེན་ལས་སྟེགས། དེ་བཞིན་རྟེན་གཞིའི་གསོ་སྦྱོང་ནུས་པ་བཅས་མཉམ་འདྲེས་གཏིང་ཟབ་ཡོང་བར་སྐུལ་འདེད་བཏང་བས། སྣ་མང་མཐུན་སྦྱོར་གྱི་ཁོར་ཡུག་ཅིག་བཏོད་ཡོད།

རིགས་པའི་གཞུང་ལུགས་ཀྱི་མཛུབ་ཁྲིད་ལ་ཤུགས་སྣོན་རྒྱག་པའི་ཐད། བོད་ལྗོངས་མི་རིགས་སློབ་ཆེན་སློབ་དཔྱོད་ཚོགས་པས“རྐང་འཛིན་དགེ་རྒན་བཅའ་སྡོད་དང་། རིགས་གཅིག་མཁས་ཅན་གྱིས་ཆེད་དོན་སློབ་ཚན་འཁྲིད་པ། ཞིབ་འཇུག་སློབ་མའི་ཞིབ་འཇུག་བྱ་གཞིའི་ལག་ལེན་བཅས་ཟུང་དུ་འབྲེལ་བའི”རྣམ་པ་གསར་གཏོད་བྱས་ཏེ། སྡེ་ཁུལ་ལས་དོན་པའི་རིགས་པའི་གཞུང་ལུགས་གསར་ཤོས《ཁྲེང་ཀོན་ཆུས་སྡེ་ཁུལ་ལས་དོན་པའི་ལས་དོན་གྱི་ཕྱོགས་སྟོན》སོགས་རང་ཡུལ་ཅན་གྱི་གྱོད་དཔེའི་མཛོད་དུ་བསྒྱུར་ནས་རྟེན་གཞིར་མ་ལག་རང་བཞིན་གྱི་རིགས་པའི་གཞུང་ལུགས་ཀྱི་རྒྱབ་སྐྱོར་བྱས་ཡོད།

ལག་ལེན་སྦྱོང་བརྡར་ཐད། ཁྲེང་ཀོན་ཆུས་སྡེ་ཁུལ་ལས་དོན་མི་སྣའི་ནུས་འདོན་རྟེན་གཞིས་སྡེ་ཁུལ་འདི་ཉིད་སྦྱོང་བརྡར་བྱེད་སར་བརྩིས་ཏེ“ལས་མི་རྙིང་པས་གསར་པ་ཁྲིད་པ”དང“འཇོན་པས་ཞན་པ་ཁྲིད་པའི”དགེ་རྒན་དང་དགེ་ཕྲུག་ཆ་སྒྲིག་ལམ་སྲོལ་ཁྱབ་གདལ་བཏང་བ་དང་། དགེ་རྒན་དང་དགེ་ཕྲུག་ཆ་800ལྷག་ཙམ་གྱིས་བྱེད་སྟངས་ལད་མོ་དང་། གྱོད་དཔེར་གྲོས་བསྡུར། ཡུལ་དངོས་སུ་ལྟ་སྦྱོང་སོགས་ཀྱི་བྱ་ཐབས་བརྒྱུད་སྡེ་ཁུལ་ལས་དོན་པའི་ཉམས་མྱོང་དག་ལག་ལེན་གྱི་ནུས་པར་བསྒྱུར་ཡོད།

ཁྱད་ཆོས་ལ་གཞིགས་ནས་འཇོན་ཐང་ཆེ་རུ་བཏང་བ།

ཁྲེང་ཀོན་ཆུས་ཀྱིས་AIབློ་རིག་ལད་ཟློས་ཁུལ་དང་XRའདྲ་བཟོའི་ཉམས་ལེན་ཁུལ་བརྒྱུད། སྡེ་ཁུལ་གྱི་ཞབས་ཞུ་འདྲ་བཟོའི་རྣམ་པ་བཏོད་ཅིང་། སྡེ་ཁུལ་གྱི་ཐོལ་བྱུང་སྤྱི་པའི་འཕྲོད་བསྟེན་དོན་རྐྱེན་ལ་ཁ་གཏད་གཅོག་པ་དང་། ཁྱིམ་མཚེས་དབར་གྱི་འགལ་བ་དང་རྩོད་གཞི་ཛ་དྲག་ཏུ་འགྲོ་བ། ཁུལ་ཆུང་རྙིང་པའི་སྒྲིག་བཀོད་ལ་སྐྱོན་ཤོར་ནས་ཚང་མས་རེ་ཞུ་བྱེད་པ་སོགས་རྙོག་འཛིང་ཆེ་བའི་གནས་ཚུལ་རིགས་དྲུག་བཀོད་སྒྲིག་བྱས་ཏེ། སྡེ་ཁུལ་ལས་དོན་པར་ལད་ཟློས་ཀྱི་ཁོར་ཡུག་ཁྲོད་གནད་དོན་ཐག་གཅོད་བྱེད་པའི་འཇོན་ཐང་དང་འབྲེལ་གཏུག་བྱེད་ཐབས་སྦྱོང་བརྡར་བྱེད་དུ་བཅུག་ཡོད།

ཁྲེང་ཀོན་ཆུས་ཀྱིས་སྡེ་ཁུལ་ལས་དོན་པ་སྒྲིག་འཛུགས་བྱས་ནས་སྡེ་ཁུལ་དུ་ཞབས་འདེགས་དངོས་ཞུས་ཏེ། ལད་ཟློས་བྱེད་སྟངས་ཁྲོད་སྦྱངས་པ་དག་སྡེ་ཁུལ་གྱི་ལས་དོན་དངོས་ནང་སྤྱད་ནས་ལག་ལེན་ཁྲོད་ཉམས་མྱོང་བསགས་པ་དང་ཆེད་ལས་ཀྱི་བྱང་ཚད་མཐོ་རུ་བཏང་ཡོད།

ཏང་འཛུགས་སྐྱོང་གིས་ཁྲིད་སྟོན་བྱེད་པ།

ཁྲེང་ཀོན་ཆུས་ཀྱིས་ཏང་འཛུགས་སྐྱོང་ཁྲིད་སྟོན་དུ་བྱས་ཏེ་ཁ་ཕྱོགས་གཏན་འཁེལ་བཟོ་རྒྱུ་མཐའ་འཁྱོངས་ཀྱིས་ཆབ་སྲིད་འཛུགས་སྐྱོང་དེ་སྡེ་ཁུལ་ལས་དོན་པ་གསོ་སྐྱོང་གི་ལས་དོན་ཨང་དང་པོར་བཞག་ནས་ཆབ་སྲིད་རང་བཞིན་དང་། མང་ཚོགས་རང་བཞིན། ས་ཁོངས་རང་བཞིན་བཅས་གཅིག་གྱུར་དམ་ཟབ་བྱས་ཏེ་རྒན་གསོ་དང་། བུ་བཅོལ། ལས་ཞུགས། འདུམ་འགྲིག རིག་གནས་སོགས་ཁྱབ་ཁོངས་ཚུད་པའི་གྲོང་མིའི“དགོས་མཁོའི་གསལ་ཐོ”1200ལྷག་ཙམ་བཟོས་པ་དང་འབྲེལ་སྟབས་བསྟུན་གསར་བརྗེས་ཀྱང་བྱས་ཡོད།

ཁྲེང་ཀོན་ཆུས་ཨུད་རྩ་འཛུགས་པུའི་འགན་འཁུར་བས། “ཁྲེང་ཀོན་ཆུས་ཀྱིས་ད་དུང་མཐོ་སློབ་དང་ཚན་ཞིབ་ལས་ཁུངས། སྡེ་ཁུལ་ཤེས་ལྡན་པའི་ལས་དོན་ཁང་བཅས་མཉམ་དུ་སྐྲུན་པ་དང་། འདུ་ཤེས་གསར་ཤོས་དང་ལག་ལེན་གྱི་ཉམས་མྱོང་ཕུན་སུམ་ཚོགས་པོ་ནང་འདྲེན་བྱེད་པ། ཕུལ་བྱུང་སྡེ་ཁུལ་ལས་བྱེད་པ་དང་། སྡེ་ཁུལ་གྱི་ཤེས་ལྡན་ལས་དོན་པ། རིགས་གཅིག་མཁས་ཅན་བཅས་800ལྷག་ཙམ་སྟབས་བསྟུན་ངང་གདན་དྲངས་པ། ཞོར་ལས་དང་། བློ་འདྲི་བ། རྣམ་གྲངས་མཉམ་ལས། ལག་ལེན་བེད་སྤྱོད་སོགས་ཀྱི་བྱ་ཐབས་ལ་བརྟེན་ནས་རྟེན་གཞིའི་ལས་དོན་ནང་ཞུགས་པ། དེ་བས་ཡིད་དབང་འཕྲོག་པ་དང་ཕན་ནུས་ལྡན་པའི་སློབ་ཁྲིད་ལག་ལེན་འཚོལ་ཞིབ་བྱེད་པ། སྡེ་ཁུལ་ལས་དོན་པའི་དཔུང་ཁག་འཛུགས་སྐྱོང་གི་རྣམ་པ་གསར་པ་རྒྱ་སྐྱེད་གཏོང་བ་བཅས་བྱས་ཏེ། རྟེན་གཞིར་གསར་གཏོད་ཀྱི་གསོན་ཤུགས་ཆེན་པོ་བསྣན་ནས་དཔུང་ཁག་འཛུགས་སྐྱོང་དང་ཆེད་ལས་འཕེལ་རྒྱས་ཀྱི་བསམ་བློའི་གོ་རྟོགས་ཆེ་རུ་ཕྱིན་ཡོད”ཅེས་བཤད།