ཉེ་ཆར། གསར་འགོད་པས་རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་ནས་ཤེས་རྟོགས་བྱས་པར་གཞིགས་ན། ཞིང་འབྲོག་པའི་འབབ་འཕར་གྱི་ལྟེ་བའི་དམིགས་ཚད་ལ་གཞིགས་ཏེ་རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་གིས་སྲིད་ཇུས་སྤྱི་འདོམས་དང་། ལས་ཞུགས་སྦྲེལ་མཐུད། རྩལ་ནུས་གསོ་སྦྱོང་བཅས་ཀྱི“བྱེད་ཐབས་གསུམ”མཉམ་འགུལ་བྱས་པ་བརྒྱུད། ཞིང་འབྲོག་པའི་ཕྱོགས་སྒྱུར་ལས་ཞུགས་དང་འབབ་འཕར་ལ་སྐུལ་འདེད་བཏང་བས་ཕན་འབྲས་མངོན་གསལ་དོད་པོ་ཐོན་ཡོད། ཟླ་བ་དྲུག་པའི་ཟླ་མཇུག་བར། ལྗོངས་ཡོངས་ཀྱི་སྡོད་ཁང་འཛུགས་སྐྲུན་ཁྱབ་ཁོངས་སུ་ཞིང་འབྲོག་པ་25448ཕྱོགས་སྒྱུར་ལས་ཞུགས་ཐུབ་ནས་ལོ་ཧྲིལ་པོའི་ལས་འགན་གྱི་63.62%ལེགས་གྲུབ་བྱུང་བ་དང་། ཡོང་འབབ་སྒོར་ཁྲི་53260ཟིན་ནས་ལོ་ཧྲིལ་པོའི་ལས་འགན་གྱི་110.96%ལེགས་གྲུབ་བྱུང་སྟེ། གྲོང་གསེབ་དར་རྒྱས་ཡོང་བར་སྒུལ་ཤུགས་ཆེན་པོ་བསྣན་ཡོད།

ཤེས་རྟོགས་བྱུང་བར་གཞིགས་ན། རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་གིས་སྲིད་ཇུས་ཀྱི་འདེགས་སྐྱོར་དང་སྣེ་ཁྲིད་ལ་ཤུགས་སྣོན་ཧུར་ཐག་བརྒྱབ་སྟེ། 《2025ལོའི་སྡོད་ཁང་འཛུགས་སྐྲུན་ཁྱབ་ཁོངས་ཀྱི་ཞིང་འབྲོག་པའི་ཕྱོགས་སྒྱུར་ལས་ཞུགས་ལས་དོན་གྱི་གཙོ་གནད》བཀྲམ་ནས། ལོ་ཧྲིལ་པོར་མི་ཁྲི་4ལས་ཞུགས་ཐུབ་པར་སྐུལ་ཁྲིད་དང་ངལ་རྩོལ་ཡོང་འབབ་སྒོར་དུང་ཕྱུར་4.8ཟིན་པའི་དམིགས་ཚད་ཁ་གསལ་བཟོས་པ་མ་ཟད། དུས་བཀག་ལྟར་ལྗོངས་ཡོངས་ཀྱི་བརྙན་ལམ་བཀོད་གཏོང་ཚོགས་འདུ་འཚོགས་པ་བརྒྱུད་ལག་བསྟར་ལྟ་སྐུལ་བྱེད་ཤུགས་ཆེ་རུ་བཏང་བ་རེད། ཞིང་འབྲོག་པའི་ལས་ཞུགས་ཆ་འཕྲིན་ག་མི་རྒྱག་པའི་གནད་དོན་ལ་དམིགས་ཏེ། རང་སྐྱོང་ལྗོངས་སྡོད་ཁང་འཛུགས་སྐྲུན་ཐིང་དང་རང་སྐྱོང་ལྗོངས་མི་སྤྱི་ཐིང་དབར་སྡེ་ཚན་བརྒལ་བའི་མཉམ་ལས་ལམ་སྲོལ་བཙུགས་པ་རེད། མིག་སྔར་ས་ཁུལ(གྲོང་ཁྱེར)7གྱི་ཁེ་ལས་106ལ་ལས་མི་5297མཁོ་བའི་ཆ་འཕྲིན་བསྡུ་རུབ་བྱས་པ་དེའི་ནང་ལྕགས་རྩིབས་བཟོ་པ་དང་། རྩི་གཏོང་མཁན། གྱང་རྩིག་མཁན་སོགས་ལས་རིགས་སྣ་ཚོགས་ཚུད་པ་དང་ཆ་འཕྲིན་དེ་དག་མི་སྤྱི་སྡེ་ཚན་ལ་མཁོ་འདོན་བྱས་པ་རེད།