ཉེ་ཆར། རང་སྐྱོང་ལྗོངས་རིག་གནས་དང་ཡུལ་སྐོར་ཐིང་གིས་གཙོ་གཉེར་བྱས་པའི“ས་མཐོའི་སྙན་དབྱངས། དུས་རབས་ཀྱི་གསར་ལེན”ཞེས་པའི་བོད་ཀྱི་དམངས་གཞས་གསར་ལེན་གྱི་བརྩམས་ཆོས་སྙན་ཞུའི་རོལ་དབྱངས་འདུ་ཚོགས་རང་སྐྱོང་ལྗོངས་མང་ཚོགས་སྒྱུ་རྩལ་ཁང་དུ་འགོ་ཚུགས་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་དམངས་གཞས་གསར་ལེན་རྣམ་གྲངས་དེ་བོད་ལྗོངས་སློབ་ཆེན་སྒྱུ་རྩལ་སློབ་གླིང་གི་དགེ་རྒན་ཆེ་མོ་བ་རྡོ་རྗེ་ཚེ་རིང་གིས་ལྗོངས་ཕྱི་ནང་གི་གྲགས་ཅན་གཞས་གདངས་རྩོམ་པ་པོ་དང་གཞས་ཚིག་རྩོམ་པ་པོ་འདུ་འཛོམས་བྱས་ནས་བོད་ཀྱི་ས་གནས་ཁག་ཏུ་ཁྱབ་པའི་ཕུལ་བྱུང་དམངས་གཞས་15གསར་རྩོམ་དང་བསྐྱར་སྒྲིག་བྱས་པ་རེད། རོལ་དབྱངས་འདུ་ཚོགས་ཐོག་ཕུལ་བྱུང་གཞོན་ནུ་གླུ་དབྱངས་མཁས་པ་ཆེད་མངགས་གདན་ཞུ་བྱས་ནས་ལེགས་འདེམས་བྱས་པའི་དམངས་གཞས་གསར་ལེན་གྱི་བརྩམས་ཆོས་10བརྩེ་བ་ཟབ་མོས་བླངས་ནས་ལྟད་མོ་བར་སྲོལ་རྒྱུན་དང་དེང་རབས་མཉམ་འདྲེས་ཀྱི་སྙན་དབང་གི་སྟོན་མོ་གཟབ་རྒྱས་ཤིག་བཤམས་ཡོད།