ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྷ་སར་ནེ་པ་ལའི་ཀན་ཏ་ཅི་ཞིང་ཆེན་གྱི་དབུ་བཞུཌ་པུའུ་ཀྲང་ཧྥན་ཏི་བཅས་པ་དང་མཇལ་འཛོམས་གནང་ཞིང་། འདི་ནི་མཇལ་འཛོམས་གནང་ཡུལ་ཡིན་པ།

ཉེ་ཆར། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ལྷ་སར་ནེ་པ་ལའི་ཀན་ཏ་ཅི་ཞིང་ཆེན་གྱི་དབུ་བཞུགས་པུའུ་ཀྲང་ཧྥན་ཏི་བཅས་པ་དང་མཇལ་འཛོམས་གནང་བ་རེད།

ཝང་ཅུན་ཀྲེང་གིས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ཧྥན་ཏི་བཅས་པར་དགའ་བསུ་ཞུས་གནང་ཤིང་། ཁོང་གིས་2019ལོར་ཀྲུའུ་ཞི་ཞི་ཅིན་ཕིང་གིས་ནེ་པ་ལར་རྒྱལ་དོན་འཚམས་འདྲི་གནང་བ་དང་། 2024ལོར་ནེ་པ་ལའི་ཙུང་ལི་ཨའོ་ལིས་ཀྲུང་གོར་དངོས་གཞིའི་འཚམས་འདྲིར་ཕེབས་ནས་རྒྱལ་ཁབ་གཉིས་པོའི་འགོ་ཁྲིད་པས་ཀྲུང་ནེའི་འབྲེལ་བ་འཕེལ་རྒྱས་གཏོང་རྒྱུར་ཐུན་མོང་གི་ངོས་འཛིན་གལ་ཆེན་བྱུང་བ་དང་། ཀྲུང་ནེའི་སྲོལ་རྒྱུན་མཛའ་གྲོགས་ཉིན་རེ་བཞིན་ཟབ་ཏུ་འགྲོ་རྒྱུར་སྐུལ་འདེད་བཏང་བ། ཀྲུང་ནེའི་མཉམ་ལས་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་བཏང་ཡོད། བོད་རང་སྐྱོང་ལྗོངས་ཀྱིས་ནེ་པ་ལ་ཕྱོགས་དང་མཉམ་དུ་རྒྱལ་ཁབ་གཉིས་ཀྱི་འགོ་ཁྲིད་ཀྱིས་བཞག་པའི་ཐུན་མོང་གི་ངོས་འཛིན་གལ་ཆེན་དོན་འཁྱོལ་ཡག་པོ་བྱས་ནས། དངོས་སྒྲུབ་མཉམ་ལས་གཏིང་ཟབ་ཏུ་གཏོང་བ་དང“རྒྱུད་གཅིག་ལམ་གཅིག”མཉམ་སྐྲུན་ལ་སླར་ཡང་འབྲས་བཟང་ཐོབ་རྒྱུར་ལག་གདང་སྦྲེལ་ནས་སྐུལ་འདེད་གཏོང་འདོད་ཡོད་ཅེས་གསུངས་པ་རེད།

ཝང་ཅུན་ཀྲེང་གིས་གསུངས་དོན། བོད་ལྗོངས་དང་ཀན་ཏ་ཅི་ཞིང་ཆེན་གཉིས་ནི་ཧི་མ་ལ་ཡའི་མཐའ་འཁོར་ས་ཁུལ་གྱི་ཁོངས་སུ་གཏོགས་པས་ས་བབ་དང་གནམ་གཤིས་འདྲ་ལ། ཡུལ་སྲོལ་གོམས་གཤིས་ཀྱང་འདྲ་པོ་ཡོད་པ་མ་ཟད། སྤེལ་རེས་མཉམ་ལས་ཀྱི་རྨང་གཞི་གཏིང་ཟབ་པ་དང་མངོན་མེད་སྟོབས་ཤུགས་ཧ་ཅང་ཆེན་པོ་ཡོད། 2023ལོར་ངེད་ནས་བོད་རང་སྐྱོང་ལྗོངས་ཀྱི་འཐུས་མི་ཚོགས་པའི་སྣེ་ཁྲིད་དེ་ནེ་པ་ལར་འཚམས་འདྲི་བྱས་པ་ཡིན། སྐབས་དེ་དུས་ཀན་ཏ་ཅི་ཞིང་ཆེན་དུ་རྟོག་ཞིབ་བྱས་ནས་ཕྱོགས་གཉིས་པོའི་དངོས་སྒྲུབ་མཉམ་ལས་ལ་སྐུལ་འདེད་གཏོང་བའི་སྐོར་ལ་བསམ་འཆར་བརྗེ་རེས་གཏིང་ཟབ་བྱས་པས། མིག་སྔར་འཐབ་ཇུས་རང་བཞིན་གྱི་མཉམ་ལས་ཀྱི་གྲུབ་འབྲས་རིམ་བཞིན་མངོན་ཡོད། ཀྲུང་ནེའི་འབྲེལ་བ་ཟམ་མི་ཆད་པར་གཏིང་ཟབ་ཏུ་འགྲོ་བའི་རྒྱབ་ལྗོངས་ཆེན་པོའི་འོག བོད་རང་སྐྱོང་ལྗོངས་དང་ཀན་ཏ་ཅི་ཞིང་ཆེན་ལ་འགོ་འཛུགས་ས་གསར་པའི་ཐོག་སྤེལ་རེས་མཉམ་ལས་མུ་མཐུད་གཏིང་ཟབ་ཏུ་བཏང་སྟེ། གཉིས་ཁེ་གཉིས་ཕན་ཡོང་བའི་ཆ་རྐྱེན་ཡོད། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་གཙོ་རྐང་དུ་བྱས་ཏེ། མཉམ་ལས་ཀྱི་ཁྱབ་ཁོངས་རྒྱུན་ཆད་མེད་པར་རྒྱ་སྐྱེད་གཏོང་བ་དང་། འགག་སྒོ་འཛུགས་སྐྲུན་དང་། རིག་གནས་ཡུལ་སྐོར། མཁའ་འགྲུལ། དཔལ་འབྱོར་ཚོང་དོན་སོགས་ཀྱི་སྤེལ་རེས་མཉམ་ལས་ལ་མཉམ་དུ་སྐུལ་འདེད་གཏོང་བ། རྨང་གཞིའི་སྒྲིག་བཀོད་ཕན་ཚུན་སྦྲེལ་མཐུད་ལ་ཤུགས་སྣོན་རྒྱག་པ། ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་ཀྱི་གོམ་སྟབས་དེ་བས་ཆེ་བ་སྤོ་རྒྱུར་སྐུལ་འདེད་གཏོང་བ། ཕྱོགས་གཉིས་པོའི་ཚོང་དོན་རྒྱུན་མཐུད་དང་སྐྱོན་བྲལ་ངང་འཕེལ་རྒྱས་འགྲོ་བར་སྐུལ་འདེད་གཏོང་བ་བཅས་བྱེད་དགོས། ནེ་པ་ལའི་མི་དམངས་བོད་དུ་ཡུལ་སྐོར་སྤྲོ་གསེང་དང་སྤེལ་རེས་མཉམ་ལས་བྱེད་པར་ཡོང་རྒྱུར་དགའ་བསུ་ཞུ་བ་དང་། ས་གནས་གཉིས་ཀྱི་དཔལ་འབྱོར་འཕེལ་རྒྱས་དང་མི་དམངས་འགྲོ་འོང་སྤེལ་རེས་ལ་སྐུལ་འདེད་གཏོང་བའི་འབྲེལ་ཟམ་སྐྲུན་པ། མཛའ་གྲོགས་གྲོང་ཁྱེར་དང་མཛའ་གྲོགས་མཐུན་ཚོགས་ཀྱི་འབྲེལ་བ་དེ་བས་མང་བ་འཛུགས་པ། ས་གནས་གཉིས་ཀྱི་མཛའ་མཐུན་སྲ་བརྟན་དུ་གཏོང་བ། ས་གནས་གཉིས་ཀྱི་འབྲེལ་བ་བརྟན་བགྲོད་རྒྱང་འཁྱོལ་དང་ཡག་ཐོག་ཡག་བརྩེགས་ཡོང་བར་སྐུལ་འདེད་གཏོང་བ་བཅས་བྱས་ཏེ། ཐུན་མོང་ཐོག་དེ་བས་མཛེས་སྡུག་ལྡན་པའི་འབྱུང་འགྱུར་ཕྱོགས་སུ་སྐྱོད་ཀྱི་ཡིན།

ཧྥན་ཏི་ཡིས་ནེ་ཀྲུང་རྒྱལ་ཁབ་གཉིས་ཀྱི་ཡུན་རིང་གི་དམངས་ཁྲོད་འབྲེལ་བ་དང་། རིག་གནས་སྤེལ་རེས། ཤེས་དཔལ་འགྲོ་འོང་བཅས་ཀྱི་ལོ་རྒྱུས་ལ་བརྩེ་སེམས་ཟབ་མོས་ཕྱིར་དྲན་གནང་ཞིང་། ཀྲུང་གོ་སྲིད་གཞུང་དང་ཀྲུང་གོ་མི་དམངས་ཀྱིས་དུས་ཡུན་རིང་པོའི་ནང་ནེ་པ་ལའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རྒྱབ་སྐྱོར་བྱས་པར་སྙིང་ཐག་པ་ནས་ཐུགས་རྗེ་ཆེ་ཞུས་པ་རེད། ཁོང་གིས། ནེ་ཀྲུང་གི་སྲོལ་རྒྱུན་མཛའ་གྲོགས་ཟབ་པ་དང་ཕན་ཚུན་གཅིག་ལ་གཅིག་བརྟེན་ཡིན་པས། ཐོག་མཐའ་བར་གསུམ་དུ་ཕན་ཚུན་བརྩི་འཇོག་དང་ཕན་ཚུན་རྒྱབ་སྐྱོར་བྱེད་ཀྱི་ཡོད། ནེ་པ་ལ་ཕྱོགས་ཀྱིས་ཀྲུང་གོ་གཅིག་གི་རྩ་དོན་ལ་བློ་བརྟན་འགྱུར་མེད་ངང་བརྩི་སྲུང་ཞུ་བ་དང་། ཀྲུང་གོ་དང་མཛའ་གྲོགས་མཉམ་ལས་ཀྱི་འབྲེལ་བ་འཕེལ་རྒྱས་གཏོང་བར་ཚད་མཐོའི་མཐོང་ཆེན་བྱེད་པ། ཀྲུང་གོའི་ས་ཁུལ་ཁག་དང་སྤེལ་རེས་དང་འགྲོ་འོང་ལ་མཐོང་ཆེན་བྱེད་ཀྱི་ཡོད། ཀན་ཏ་ཅི་ཞིང་ཆེན་དང་བོད་རང་སྐྱོང་ལྗོངས་ནི་ཁྱིམ་མཚེས་ཡག་པོ་དང་། གྲོགས་པོ་བློས་ཐུབ། རོགས་ཟླ་ཡག་པོ་བཅས་རེད། ད་ཐེངས་ཀྱི་རྟོག་ཞིབ་དེ་གོ་སྐབས་སུ་བརྩིས་ནས་ས་གནས་གཉིས་ཀྱི་དཔལ་འབྱོར་ཚོང་དོན་དང་། མི་ཆོས་རིག་གནས། ཡུལ་སྐོར། རྨང་གཞིའི་སྒྲིག་བཀོད། འགག་སྒོ་འཛུགས་སྐྲུན་སོགས་ཁྱབ་ཁོངས་ཀྱི་སྤེལ་རེས་མཉམ་ལས་ལ་ཤུགས་སྣོན་བརྒྱབ་ནས་མཛའ་གྲོགས་འགྲོ་འོང་སྔར་བས་གཏིང་ཟབ་ཏུ་གཏོང་བ་དང་ཐུན་མོང་འཕེལ་རྒྱས་ལ་སྐུལ་འདེད་བཏང་སྟེ། ས་གནས་གཉིས་ཀྱི་མཛའ་གྲོགས་ཇི་སྲིད་བར་གནས་ཐུབ་པའི་རེ་བ་ཡོད་ཅེས་གསུངས་པ་རེད།