ཚེས་25ཉིན། “བཀྲ་ཤིས་བདེ་ལེགས”ཞེས་པའི་བོད་ཀྱི་དྲ་རྒྱའི་བརྙན་པར་དུས་ཆེན་སྐབས་ལྔ་པའི་བྱ་དགའ་སྤྲོད་པའི་མཛད་སྒོ་ལྷ་སར་འཚོགས་པ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་མཛད་སྒོར་ཞུགས་ནས་ཤིས་ཚིག་གསུངས་པ་རེད།

དབང་ཧའེ་ཀྲོའུ་ཡིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་བྱེད་སྒོར་ཞུགས་མཁན་གྱི་སྐུ་མགྲོན་དང་བྱ་དགའ་ཐོབ་པའི་འཐུས་མིར་དགའ་བསུ་དང་ཐུགས་རྗེ་ཆེ་ཞུས་ཤིང་། ཁོང་གིས་སྐབས་འདིའི་བརྙན་པར་དུས་ཆེན་གྱིས“བརྙན་པར་ལ་བརྟེན་ནས་རླབས་ཆེན་གྱི་དུས་རབས་ཟིན་ཐོར་འགོད། འཛམ་གླིང་ལ་བོད་ལྗོངས་དེ་བས་དྲིལ་བསྒྲགས་ཡག་པོ་བྱེད་པ”བརྗོད་དོན་གཙོ་བོར་བྱས་ཡོད། གོ་ལ་ཧྲིལ་པོའི་བརྩམས་ཆོས་ཁག་ཁྲི་14ལྷག་ཙམ་འབྱོར་བ་དང་། རྒྱལ་ནང་གི་དྲ་རྒྱ་ཡོངས་སུ་ལྟ་ཀློག་དང་མཉམ་འགུལ་བྱེད་ཚད་དུང་ཕྱུར་30.25ཟིན་པ། ཕྱི་རྒྱལ་དུ་ཁྱབ་སྤེལ་བྱེད་ཚད་དུང་ཕྱུར་8ལྷག་ཙམ་ཟིན་པ། རྒྱལ་སྤྱིའི་སྨྱན་སྦྱོར་1000ལྷག་ཙམ་གྱིས་མཉམ་འབྲེལ་ཁྱབ་སྤེལ་བྱས་ནས་གྲངས་གཞི་ཁག་ལོ་རྒྱུས་ཀྱི་ཟིན་ཐོ་གསར་པ་བསྐྱར་དུ་བཏོད་ནས་མཛེས་སྡུག་དང་བདེ་སྐྱིད་ལྡན་པའི་བོད་ལྗོངས་གསར་པའི་མི་སེམས་འགུལ་བའི་གཏམ་རྒྱུད་རྣམས་དྲ་རྒྱ་སོགས་སྨྱན་སྦྱོར་ལ་བརྟེན་ནས་འཛམ་གླིང་ལ་བརྒྱུད་སྤྲོད་བྱེད་བཞིན་ཡོད་པ་རེད།

དབང་ཧའེ་ཀྲོའུ་ཡིས་ནན་བཤད་གནང་དོན། འདི་ལོ་ནི་བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བའི་ལོ་ཞིག་ཡིན། ལོ་ངོ་60ཡི་རིང་། ཀྲུང་གོ་གུང་ཁྲན་ཏང་གི་འགོ་ཁྲིད་འོག བོད་ལ་གནམ་ས་བླ་འོག་ལྟ་བུའི་འགྱུར་ལྡོག་བྱུང་ཡོད། རེ་བར་འབྲེལ་ཡོད་སྡེ་ཚན་གྱིས་ཞི་ཅིན་ཕིང་གི་རིག་གནས་ཀྱི་དགོངས་པ་སྣེ་ཁྲིད་དུ་བྱ་རྒྱུ་མཐའ་འཁྱོངས་བྱས་ནས་རིག་གནས་ཀྱི་གདེང་ཚོད་བརྟན་དུ་གཏོང་བ་དང་། ཀྲུང་ཧྭའི་རིག་རྒྱུན་མུ་མཐུད་སྐྱོང་བ། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་ཕུན་སུམ་ཚོགས་པའི་ནང་དོན་དང་དུས་རབས་ཀྱི་རིན་ཐང་ལ་འགྲེལ་བཤད་དེ་བས་གཏིང་ཟབ་རྒྱག་པ་བཅས་བྱས་ཏེ། རྒྱལ་ཁབ་ཕྱི་ནང་གི་གྲོགས་པོ་དེ་བས་མང་པོས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པའི་སྐྱེ་སྟོབས་གསོན་ཤུགས་དང་མཛེས་སྡུག་ལྡན་པའི་མདུན་ལྗོངས་ཤེས་རྟོགས་ཐུབ་པར་བྱེད་དགོས།