ལས་འགན་ལྗིད་རྫོབ་ཆེ་བའི་ས་མཐོའི་འཐབ་ས་དང་པོའི་ལས་དོན་སྒྲུབ་པར་བུད་མེད་ཉེན་རྟོག་པ་ནི་མེད་དུ་མི་རུང་བའི་སྟོབས་ཤུགས་ཤིག་རེད།

2024ལོར་བོད་ལྗོངས་གཞིས་རྩེ་གྲོང་ཁྱེར་རྒྱལ་རྩེ་རྫོང་ནས་ཡིན་པའི་པ་སངས་བུ་ཁྲིད་དར་ཆེན་མཐའ་མཚམས་མངགས་གཏོང་ཁང་དུ་སླེབས་ནས་དེ་གའི་བུད་མེད་ཉེན་རྟོག་པ་ཁག་དང་པོའི་གྲས་སུ་གྱུར། “ཉེན་རྟོག་པའི་ལས་གོས་གྱོན་ན་དངོས་ནས་སྙིང་རྗེ་པོ་འདུག”ཅེས་པ་དེ་ནི་པ་སངས་བུ་ཁྲིད་ཉེན་རྟོག་པ་བྱེད་པའི་ཐོག་མའི་རྒྱུ་རྐྱེན་རེད། ད་ཆ་ཁོ་མོ་ནི་དེ་གའི་མི་ཚང་མས་རྒྱུས་མངའ་ཆེ་བའི“ཨ་ཅག་ཉེན་རྟོག་པར”གྱུར་ཡོད།

ཐེངས་ཤིག་བུད་མེད་ཡུལ་སྐོར་བ་ཞིག་གི་ཁ་པར་བརླགས་པའི་ཉེས་དོན་སྙན་སེང་འབྱོར་རྗེས། ཁོང་གིས་ཐལ་རླུང་དྲག་པོར་མ་འཛེམས་པར་གངས་རིན་པོ་ཆེའི་རི་ལམ་ཀྱག་ཀྱོག་བརྒྱུད་ཆུ་ཚོད་གཅིག་ལྷག་ཙམ་བསྐྱོད་མཐར། ཇ་ཁང་ཞིག་གི་གདན་བཀྱག་འོག་ནས་ཁ་པར་རྙེད། ཡུལ་སྐོར་བ་བུད་མེད་དེས་ཁ་པར་ལག་ཏུ་བཟུང་ནས་སེམས་འགུལ་ཐེབས་པའི་་མིག་ཆུ་གཏོང་བའི་ཚུལ་དེ་མཐོང་སྐབས་ཁོང་གིས“ངས་གཞི་ནས་མི་དམངས་ཉེན་རྟོག་པའི‘མི་དམངས’ཞེས་པའི་ཡིག་འབྲུ་གཉིས་ཀྱི་གལ་ཆེ་ཆུང་ཤེས་སོང”ཞེས་བཤད། ཁོ་མོས་གནས་ཚུལ་དེ་ད་ལྟ་ཡང་ཡེ་ནས་བརྗེད་ཐབས་བྲལ།

ཁག་དང་པོའི་བུད་མེད་ཉེན་རྟོག་པའི་གྲས་སུ་ད་དུང་ཀན་སུའུ་ནས་ཡིན་པའི་ཀྲའོ་ཡུས་ཡུས་ཀྱང་ཡོད་པ་དང་། ཁོང་དང་དར་ཆེན་མངགས་གཏོང་ཁང་གི་ལས་འབྲེལ་དེ་2021ལོའི་འགྲུལ་བཞུད་ཅིག་ལས་བྱུང་། ལོ་དེར་ཁོང་དང་གྲོགས་མོ་གངས་རིན་པོ་ཆེ་སྐོར་བར་ཡོང་སྐབས། གྲོགས་མོར་ལ་དུག་ཚབས་ཆེན་ཕོག་ནས་སྣ་ཁྲག་བར་མི་ཆད་པ་དོན། རོགས་སྐྱོབ་སྙན་སེང་འབྱོར་རྗེས་གངས་རིན་པོ་ཆེའི་འདབས་ཀྱི་ཉེན་རྟོག་པ་ཚོས་སེམས་ཁྲལ་ཆེན་པོས་རང་ཉིད་ཀྱི་ཕྱོགས་སུ་རྒྱུག་ཡོང་བའི་རྣམ་པ་དེ་མེ་སྟག་ཅིག་དང་ཀུན་ནས་མཚུངས་པར་ཁོང་གི་ལུས་སེམས་ལ་དྲོད་འཁོལ་སྦྱིན་ཏེ། ཕྱིས་སུ་རང་ཉིད་ཀྱང་ཁོང་ཚོ་དང་འདྲ་བའི་ཉེན་རྟོག་པ་ཞིག་བྱ་རྒྱུའི་འདུན་པ་དྲག་པོ་སྐྱེས།

དེ་ལྟར་བགྲང་བྱ་གསུམ་འདས་རྗེས་ཁོང་སློབ་ཆེན་མཐར་ཕྱིན་ཏེ། དྲན་པའི་ངོས་ནས་ནམ་ཡང་ཟུབ་ཐབས་བྲལ་བའི་ཕུགས་བསམ་དེ་ཁྱེར་ནས་ལམ་ཐག་སྤྱི་ལེ་ཉིས་སྟོང་ལྷག་ཙམ་ཆོད་པའི་གངས་རིན་པོ་ཆེའི་འདབས་སུ་ཡོང་སྟེ། དར་ཆེན་མཐའ་མཚམས་མངགས་གཏོང་ཁང་གི་ཉེན་རྟོག་པ་ཞིག་བྱས།

2024ལོའི་ཟླ་7པར། གངས་རིན་པོ་ཆེའི་ཁུལ་དུ་གློ་བུར་དུ་གངས་ཆེན་པོ་བབས་ནས་ཉེས་དོན་སྙན་སེང་གི་ཁ་པར་མང་པོ་འབྱོར་བས། མངགས་གཏོང་ཁང་གི་ཉེན་རྟོག་པ་ཚང་མ་ལས་སྒྲུབ་ལ་ཐོན། ཀྲའོ་ཡུས་ཡུས་ཀྱིས་ཀྱང་ལས་རོགས་ཚོ་དང་མཉམ་དུ་མཚན་གང་ལ་ཀླུང་མང་པོ་བརྒལ་ནས་ཉེན་ཁར་གྱར་བའི་ཡུལ་སྐོར་བ་ཚོའི་ཚེ་སྲོག་བསྐྱབས། “དེ་དུས་འཛམ་གླིང་ས་ཕྱོགས་ཁག་ནས་ཡོང་བའི་ཡུལ་སྐོར་བ་ཚོས་གྲང་རླུང་འུར་འུར་ཁྲོད་ངའི་ལག་པ་ནས་འཇུས་ཏེ་སྐད་རིགས་སྣ་ཚོགས་ཐོག་ནས‘ཐུགས་རྗེ་ཆེ’ཞུས་བྱུང”ཞེས་ཁོང་གིས་བཤད།

དར་ཆེན་དུ་བུད་མེད་ཉེན་རྟོག་པའི་ལས་ཀ་ནི་འཚེམ་བཟོ་བ་ཞིག་དང་འདྲ་བར་ཞིབ་ཚགས་ལ་ནན་པོ་དགོས་ཤིང་། དེ་ལྟར་བྱས་ན་ད་གཟོད་མི་རྣམས་ཀྱི་བདེ་འཇགས་ལ་འགན་ལེན་ཐུབ་ལ། ཁོ་ཚོའི་ཡིད་ཆེས་ཀྱང་ཐོབ་ཐུབ། ཀྲའོ་ཡུས་ཡུས་ཀྱིས་རྣམ་ཀུན་ནས་བུད་མེད་ཉེན་རྟོག་པར“སེམས་རྩ་འཁོལ་བ་དང་བློ་རྩ་བརྟན་པ”ཞེས་མཚན་ཉིད་འཇོག་གི་ཡོད།

“སེམས་རྩ་འཁོལ་བ”ནི་ཁོང་དང་པ་སངས་བུ་ཁྲིད་མཉམ་དུ་ལས་དོན་སྒྲུབ་པར་སྐྱོད་སྐབས་རྟག་ཏུ་ཆུ་འཁོལ་མང་ཙམ་དང་ཀམ་པ་ལི་ཐོལ་པ་རེ་འཁྱེར་གྱི་ཡོད། གང་ལགས་ཤེ་ན། ཁོང་གིས་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་10ཡི་མཚན་མོར་ཀམ་པ་ལི་ཞིག་གིས་ཕན་ག་ཚོད་ཐོགས་མིན་ཤེས་ཀྱི་ཡོད་ལ། ཡུལ་སྐོར་བར་ལ་དུག་ཕོག་སྐབས་གསོ་རླུང་རྔུབ་པ་ཕུད་ཇ་མངར་མོ་ཚ་པོ་ཕོར་པ་གང་གིས་ནུས་པ་ཇི་ལྟར་ཐོན་མིན་ཡང་ཤེས་ཀྱི་ཡོད་པས་རེད།

“བློ་རྩ་བརྟན་པ”ནི་ས་བབ་མཐོ་ཚད་སྨི་4800ལྷག་ཙམ་གྱི་སར་ལས་ཀ་བྱེད་སྐབས་རྟག་ཏུ་མགོ་ན་བ་དང་། གཉིད་མི་ཁུག་པ། སྙིང་ཁ་འཕར་ཤུགས་ཆེ་བ་བཅས་ཀྱི་དཀའ་ངལ་འཕྲད་ཀྱི་ཡོད་མོད། འོན་ཀྱང་སུ་ལའང་ཕྱིར་བཤོལ་གྱི་བསམ་བློ་མེད་ཅིང་། སྐྱེས་པ་ཉེན་རྟོག་པ་དང་བསྡུར་ན་བུད་མེད་ཉེན་རྟོག་པར་ལུས་ཁམས་ཐད་དམིགས་བསལ་གྱི་དཀའ་ངལ་ཡོད་རུང་། སྐོར་གཡེང་དང་རོགས་སྐྱོབ་ཀྱི་ལས་འགན་ལྕི་པོ་དེ་དག་སྒྲུབ་སྐབས་ཁོ་ཚོ་ཡེ་ནས་ཆད་མྱོང་མེད།

“ལང་ཚོ་གངས་རིར་སྐྱེས་སུ་འབུལ་རིན་ཡོད་དམ”ཞེས་པའི་གནད་དོན་དེར་2001ལོར་སྐྱེས་པའི་བུད་མེད་ཉེན་རྟོག་པ་ཁྲེན་ཞའོ་ཧན་གྱིས“ཕུལ་རིན་ཡོད། མེས་རྒྱལ་གྱི་མཐའ་མཚམས་ལ་སྲུང་སྐྱོང་བྱེད་དགོས་པས། ངས་འགན་འཁྲི་དེ་ཕྲག་ཏུ་འཁུར་འདོད་ཡོད”ཅེས་ལན་བཏབ།

ཁྲེན་ཞའོ་ཧན་ནི་ད་ལོའི་ཟླ་2པར་དར་ཆེན་མཐའ་མཚམས་མངགས་གཏོང་ཁང་དུ་སླེབས་པའི་བུད་མེད་ཉེན་རྟོག་པ་ཁག་གཉིས་པའི་གྲས་རེད་ལ། ད་ལྟའི་ཚུན་དུ་མངགས་གཏོང་ཁང་དེར་ལོ་ཆུང་ཤོས་ཀྱི་ཉེན་རྟོག་པ་ཞིག་ཀྱང་རེད། ད་ཆ་ཁག་གསུམ་པའི་བུད་མེད་ཉེན་རྟོག་པའང་འབྱོར་གྲབས་ཡོད་པས“ཨ་ཅག་ཉེན་རྟོག་པ”དེ་བས་མང་བའི་གཏམ་རྒྱུད་ས་མཐོའི་བསིལ་རླུང་དང་འགྲོགས་ཏེ་གང་སར་ཁྱབ་དང་ཁྱབ་མུས་རེད།