ཟླ་7ཚེས་27ཉིན། ཀྲུང་དབྱང་གི་ཁག་བཅུ་གཅིག་པའི་བོད་སྐྱོར་ལས་བྱེད་ཤེས་ལྡན་པ་རི་ཀླུང་མང་པོ་བརྒལ་ནས་གངས་ལྗོངས་ས་མཐོར་འབྱོར། ཁོང་ཚོས་དུས་ཡུན་ལོ་གསུམ་རིང་སེམས་རྩ་འཁོལ་པོ་དང་འགན་འཁྲི་འཁུར་སེམས་ཆེན་པོར་བརྟེན་ནས་དུས་རབས་གསར་པའི་བོད་སྐྱོར་ལས་དོན་གྱི་ལེའུ་གསར་པ་མུ་མཐུད་རྩོམ་རྒྱུ་ཡིན་པ་རེད།

ངོ་སྤྲོད་བྱས་པར་གཞིགས་ན། ཁག་བཅུ་གཅིག་པའི་བོད་སྐྱོར་ལ་ཞུགས་མཁན་ནང་ཁྱོན་ཞིང་ཆེན་དང་གྲོང་ཁྱེར་17དང་། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་པུའུ་ཨུད་དང་དེ་བཞིན་མི་དམངས་ཚོགས་པ་76 ཀྲུང་དབྱང་དོ་དམ་དངུལ་རྩའི་ཁེ་ལས་1 ཀྲུང་དབྱང་དོ་དམ་ཁེ་ལས་27བཅས་ཡོད་པ་དང་། ལས་བྱེད་ཤེས་ལྡན་པ་2156འདེམས་གཏོང་བྱས་ཡོད་པ་རེད། རོགས་སྐྱོར་ཁྱབ་ཁོངས་ནང་སློབ་གསོ་དང་། སྨན་བཅོས། ཚན་རྩལ།ཞིང་འབྲོག ཐོན་ལས་སོགས་ཁྱབ་ཁོངས་མང་པོ་ཚུད་ཡོད་པ་དང་། རོགས་སྐྱོར་ཐོབ་མཁན་ཚན་པ་ལྗོངས་ཡོངས་ཀྱི་རྫོང(ཆུས་དང་གྲོང་ཁྱེར)74དང་རང་སྐྱོང་ལྗོངས(ཀྲུང་དབྱང)ཐད་གཏོགས་ཚན་པ་མང་ཆེ་བར་ཁྱབ་ཡོད།

བོད་སྐྱོར་ལས་བྱེད་པ་བོད་དུ་འབྱོར་ནས་ཐོ་བཀོད་རྗེས་དུས་ཡུན་ཉིན་ལྔའི་ལས་གནས་གོང་གི་གསོ་སྦྱོང་བྱ་རྒྱུ་ཡིན་ཞིང་། ནང་དོན་གཙོ་བོ་ནི་བོད་ཀྱི་ས་ཁུལ་གྱི་གནས་ཚུལ་དང་། སྤྱི་ཚོགས་ཀྱི་གནས་ཚུལ། དམངས་ཀྱི་གནས་ཚུལ་བཅས་དང་དེ་བཞིན་ལས་བྱེད་ཤེས་ལྡན་པའི་བོད་སྐྱོར་ལས་དོན་དང་། དཔལ་འབྱོར་འཕེལ་རྒྱས། ས་མཐོའི་བདེ་ཐང་བདེ་སྲུང་སོགས་ཡིན་པ་རེད།

རྒྱལ་ཁབ་ཆུ་བེད་པུའི་བོད་སྐྱོར་ལས་བྱེད་པ་ཚུའེ་ཞའོ་ཡུས་ནི་བོད་དུ་ཡོང་ཐེངས་གཉིས་པ་ཡིན་ཞིང་། དེ་སྔ་ནག་ཆུར་བརྟག་དཔྱད་ཞིབ་འཇུག་གི་ལས་དོན་ནང་ཟླ་བ་གསུམ་ཞུགས་མྱོང་ཡོད་པས་བོད་ལ་བརྩེ་དུང་ཆེན་པོ་ཡོད། ད་ཐེངས་རང་འགུལ་ངང་བོད་སྐྱོར་ལས་དོན་ནང་ཞུགས་རྒྱུར་མིང་ཐོ་བཀོད་ཡོད། ཚུའེ་ཞའོ་ཡུས་ཀྱིས“ཆུ་བེད་བ་ཞིག་ཡིན་པའི་ངོས་ནས་བོད་ཀྱི་ཆུའི་ཐོན་ཁུངས་གསར་སྤེལ་དང་ཆུའི་ཁོར་ཡུག་སྲུང་སྐྱོང་ཐད་རང་ཉིད་ཀྱིས་ལེགས་སྐྱེས་འབུལ་རྒྱུ་བྱུང་བ་གཟི་བརྗིད་ཡིན་སྙམ་གྱི་འདུག”ཅེས་བཤད།

རྒྱལ་ཁབ་འཕེལ་སྒྱུར་ཨུ་ལྷན་ནས་ཡོང་བའི་བོད་སྐྱོར་ལས་བྱེད་པ་ཆིན་ཁུན་གྱིས“ད་ཆ་བོད་སྐྱོར་ལས་དོན་ལ་འགྱུར་ལྡོག་ཧ་ཅང་ཆེན་པོ་བྱུང་འདུག སྔོན་ཆད་རྨང་གཞིའི་སྒྲིག་བཀོད་འཛུགས་སྐྲུན་དང་དམངས་འཚོ་ཐ་སྐྱོང་འགན་སྲུང་གཙོ་བོར་འཛིན་པ་དེ་ད་ཆའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་སུ་བསྒྱུར་ཡོད། དུས་རབས་གསར་པའི་བོད་སྐྱོར་ལས་དོན་ཐད་ངས་བོད་སྐྱོད་པ་རྒན་གྲས་ཀྱི་སྙིང་སྟོབས་མུ་མཐུད་དར་སྤེལ་བཏང་ནས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྟོབས་ཤུགས་སྐྱེས་སུ་འབུལ་རྒྱུ་ཡིན”ཞེས་བཤད།