ཉེ་ཆར། “བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བའི”བརྗོད་དོན་གཙོ་བོའི་གསར་འགྱུར་ཡོངས་བསྒྲགས་ཚོགས་འདུ་ཐེངས་བཅུ་པ་འཚོགས་ཤིང་། ཚོགས་འདུའི་ཐོག་2025ལོའི་ལོ་སྟོད་ཀྱི་བོད་ཀྱི་དངོས་ཟོག་ཉོ་ཚོང་གི་ཕྱིར་གཏོང་ནང་འདྲེན་གནས་ཚུལ་ངོ་སྤྲོད་བྱས་ཤིང་། གྲངས་གཞི་ལས་མངོན་པ་ལྟར་ན། ལོ་སྟོད་དུ་བོད་ཀྱི་དངོས་ཟོག་ཉོ་ཚོང་གི་ཕྱིར་གཏོང་ནང་འདྲེན་གྱི་རིན་ཐང་བསྡོམས་འབོར་སྒོར་དུང་ཕྱུར་43.4ཟིན་ནས་དུས་མཚུངས་ལས་14.1%འཕར་བ་དང་། འཕར་ཚད་ཟླ་བ་དང་པོ་ནས་ལྔ་པའི་བར་དང་བསྡུར་ན་བརྒྱ་ཆའི་གྲངས་0.9མང་དུ་ཕྱིན་ནས་མུ་མཐུད་རྒྱལ་ཡོངས་ཀྱི་མདུན་གྲལ་དུ་སླེབས་ཡོད་པ་རེད། དེའི་ནང་ཕྱིར་གཏོང་བྱེད་ཚད་སྒོར་དུང་ཕྱུར་37ཟིན་ནས་15.4%འཕར་བ་དང་། ནང་འདྲེན་བྱེད་ཚད་སྒོར་དུང་ཕྱུར་6.4ཟིན་ནས་7%འཕར་ཡོད་པ་རེད།

ལྷ་ས་འགག་སྒོའི་ཀོན་ཀྲང་གཞོན་པ་ལི་སུང་གིས། ད་ལོ་ནི་བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བའི་ལོ་རེད་ལ། “ལོ་ལྔ་ཚན་བཅུ་བཞི་པའི”འཆར་འགོད་ཀྱི་མཇུག་བསྡུའི་ལོ་ཡང་རེད། ལོ་ངོ་60ཡི་རིང་། བོད་ཀྱི་ཕྱི་ཕྱོགས་ཚོང་དོན་ལ་ལོ་རྒྱུས་རང་བཞིན་གྱི་མཆོང་སྐྱོད་བྱུང་ཡོད། ཚོང་དོན་རིན་ཐང་བསྡོམས་འབོར་ཐད། 1965ལོའི་སྒོར་ཁྲི་693ནས་ཆ་སྙོམས་ལོ་རེར་སྒོར་དུང་ཕྱུར་བརྒྱ་ཡི་གཞི་ཁྱོན་བར་འཕར་བ་དང་། སྐྱེལ་འདྲེན་བྱེད་སྟངས་ཐད། མི་དང་ཁལ་མས་དབོར་བ་ནས“གཞུང་ལམ་དང་། ལྕགས་ལམ། མཁའ་ལམ། སྦྲག་སྲིད”བཅས་ཀྱི་ཕྱོགས་བསྡུས་འགྲིམ་འགྲུལ་མ་ལག་བར་འཕེལ་རྒྱས་བྱུང་བ། ཚོང་དོན་རོགས་ཟླ་གོ་ལ་ཧྲིལ་པོའི་རྒྱལ་ཁབ་དང་ས་ཁུལ་100ལྷག་ཙམ་ལ་ཁྱབ་ཡོད། མིག་སྔར། བོད་དུ་དངོས་སུ་སྒོ་ཕྱེ་བའི་རྒྱལ་ཁབ་རིམ་པའི་འགག་སྒོ་དང་། ཕྱོགས་བསྡུས་སྒོ་ཁྲལ་ཆག་ཡང་ཁུལ། རྒྱལ་སྤྱིའི་སྐམ་སའི་གྲུ་ཁ་སོགས་སྒོ་དབྱེའི་ལས་སྟེགས་ལིང་ཚེ་5གྲུབ་ནས། “ཀྲུང་གོའི་ཅ་ལག”ཨེ་ཤེ་ཡ་ལྷོ་མར་སྐྱོད་པའི་བགྲོད་ལམ་གལ་ཆེན་ཞིག་ཏུ་གྱུར་ཡོད་ཅེས་ངོ་སྤྲོད་བྱས་པ་རེད།

ནུས་རྒྱུ་གསར་པའི་རླངས་འཁོར་དང་འོད་ཤུགས་ཐོན་རྫས་སོགས“ཐོན་གསར་གསུམ”ཕྱིར་གཏོང་བྱེད་ཚད་སྒོར་དུང་ཕྱུར་9.1དང་། ཁྱད་ལྡན་ཞིང་ལས་ཐོན་རྫས་ཕྱིར་གཏོང་བྱེད་ཚད་སྒོར་ཁྲི་3000ཙམ་ཟིན་ཡོད། ལོ་སྟོད་དུ་རང་ལྗོངས་ཀྱིས་ནེ་པ་ལར་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་21.9ཟིན་ནས་22.1%འཕར་བ་དེས་ཀྲུང་ནེའི་ཉོ་ཚོང་བསྡོམས་འབོར་གྱི་25.9%བཟུང་ཡོད་པ་རེད།

གསར་འགྱུར་ཡོངས་བསྒྲགས་ཚོཌ་འདུའི་ཐོག ལྷ་ས་འགག་སྒོས་ད་དུང“བོད་ལྗོངས་མིང་ཅན”གྱི་ཐོན་རྫས་ཕྱིར་གཏོང་ལ་རོགས་རམ་བྱས་པའི་ཕན་འབྲས་ཏེ། ཞིབ་དཔྱད་ཚད་ལེན་དུས་འཁོར་30%ཐུང་དུ་བཏང་བ་དང་། ལས་རིགས་ཀྱི་ཚད་གཞི་ཁག་28བཟོས་པ། རྒྱལ་ཁབ་ཀྱི་ས་ཁམས་མཚོན་རྟགས་ཐོན་རྫས་27སྐྱེད་སྲིང་བཅས་བྱས་པ་བརྒྱུད། བོད་ཀྱི་ཀུ་ཤུ་ཕྱིར་གཏོང་བྱེད་ཚད་དུས་མཚུངས་ལས་ལྡབ་4.5འཕར་བ་དང་། བལ་དང་། ཁུ་ལུ། སྤོས་སོགས་ཁྱད་ལྡན་ཐོན་རྫས་ཀྱང་རྒྱལ་སྤྱིའི་ཁྲོམ་རར་བསྐྱོད་ཐུབ་ཡོད་ཅེས་གཙོ་གནད་ཐོག་ངོ་སྤྲོད་བྱས་པ་རེད།

གསར་འགོད་པར་ཚོགས་འདུའི་ཐོག་ནས་ཤེས་རྟོགས་བྱུང་བར་གཞིགས་ན། དམངས་གཉེར་ཁེ་ལས་རང་ལྗོངས་ཀྱི་ཕྱི་ཕྱོགས་ཚོང་དོན་གྱི་གཙོ་ཤུགས་སུ་གྱུར་བ་དང་། ལོ་སྟོད་དུ་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་42.5ཟིན་པའི་ནང་དམངས་གཉེར་ཁེ་ལས་ཀྱི་ཕྱིར་གཏོང་ནང་འདྲེན་བསྡུར་ཚད་97.9%བཟུང་བ་དང་། སྤྱིར་བཏང་གི་ཉོ་ཚོང་འཕར་ཚད་18.1%ཟིན་ཡོད། “ལོ་ལྔ་ཚན་བཅུ་བཞི་པའི”ཚུན་གྱི་རིམ་རྩིས་བསྡུར་ཚད་93.2%ཟིན་པ་དེ“ལོ་ལྔ་ཚན་བཅུ་གསུམ་པ”དང་བསྡུར་ན་བརྒྱ་ཆའི་གྲངས་23.6འཕར་ཡོད་པ་རེད།