ཉིན་ཤས་གོང་དུ་མི་རིགས་ཡོངས་ཀྱི་རི་འགོག་དམག་འཁྲུག་ལངས་ནས་ལོ་ངོ་88འཁོར་བར་དྲན་གསོ་ཞུ་བའི་མཛད་སྒོ་དང《མི་རིགས་བཅིངས་འགྲོལ་དང་འཛམ་གླིང་ཞི་བདེའི་ཆེད་དུ》ཞེས་པའི་བརྗོད་དོན་གཙོ་བོའི་འགྲེམས་སྟོན་གྱི་འགོ་ཚུགས་མཛད་སྒོ་ཀྲུང་གོ་མི་དམངས་རི་འགོག་དམག་འཁྲུག་དྲན་གསོ་ཁང་དུ་འཚོགས་པ་རེད། ཟིལ་རླབས་དགུང་དུ་འཕྱུར་བའི་ལོ་ཟླར་དྲན་གསོ་ཞུས་པ་ནི་ལོ་རྒྱུས་བློ་ལ་བརྟན་པོར་ངེས་པའི་ཆེད་དུ་རེད་ལ། འབྱུང་འགྱུར་གསར་གཏོད་བྱེད་པའི་ཆེད་དུ་དེ་བས་ཀྱང་རེད། དེ་ཐོག་ནས་ཀྲུང་གོས་དྲང་བདེན་དང་ཞི་བདེར་སྲུང་སྐྱོང་བྱ་རྒྱུའི་འགྱུར་མེད་ཁས་ལེན་མཚོན་གྱི་ཡོད་ལ། ཞི་བདེ་འཕེལ་རྒྱས་ཀྱི་ལམ་བུར་བསྐྱོད་རྒྱུ་དང་འཛམ་གླིང་ཞི་བདེར་སྲུང་སྐྱོང་བྱ་རྒྱུ་ཡིན་ཞེས་གཟབ་ནན་ངང་བརྗོད་པའི་འགྱུར་མེད་ཆོད་སེམས་ཀྱང་མཚོན་གྱི་ཡོད།

ཀྲུང་གོ་མི་དམངས་ཀྱི་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བའི་སྐབས་སུ།《མི་རིགས་བཅིངས་འགྲོལ་དང་འཛམ་གླིང་ཞི་བདེའི་ཆེད་དུ》ཞེས་པའི་བརྗོད་དོན་གཙོ་བོའི་འགྲེམས་སྟོན་བྱས་ཏེ། ཀྲུང་གོ་མི་དམངས་ཀྱིས་ལོ་14ཡི་རིང་དཀའ་ཚེགས་ཆེན་པོས་རི་འགོག་དམག་འཁྲུག་བརྒྱབ་པའི་གཟི་བརྗིད་ལྡན་པའི་ལོ་རྒྱུས་ཀྱི་འཕེལ་རིམ་ཕྱོགས་ཡོངས་ནས་མངོན་པར་བྱས་པ་ནི་དཀའ་སྡུག་ཆེ་ལ་འོད་སྟོང་འཕྲོ་བའི་ལོ་རྒྱུས་ཀྱི་དྲན་ཤེས་ལ་ཐུན་མོང་ཐོག་སྲུང་སྐྱོང་བྱས་པ་ཞིག་རེད།

ཀྲུང་གོ་མི་དམངས་ཀྱི་རི་འགོག་དམག་འཁྲུག་ལ་འགོ་ཚུགས་མ་ཐག་ནས་མིའི་རིགས་ཀྱི་ཤེས་དཔལ་ལ་སྲུང་སྐྱོང་དང་འཛམ་གླིང་གི་ཞི་བདེར་སྲུང་སྐྱོང་བྱེད་པའི་དོན་སྙིང་གལ་ཆེན་ལྡན་ཡོད། དེ་ནི་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་གི་གྲུབ་ཆ་གལ་ཆེན་ཞིག་རེད། ཀྲུང་གོ་ནི་ཧྥ་ཤི་སིའི་སྟོབས་ཤུགས་དང་འཐབ་རྩོད་བྱེད་མཁན་རྒྱལ་ཁབ་སྔ་ཤོས་ཅིག་ཡིན་ལ། རི་པིན་དམག་རྒྱལ་རིང་ལུགས་ལ་འགོག་རྒོལ་བྱེད་མཁན་གཙོ་བོ་ཞིག་ཀྱང་ཡིན།

ཀྲུང་གོ་གུང་ཁྲན་ཏང་གིས་ཐོག་མཐའ་བར་གསུམ་དུ་མིའི་རིགས་ཡར་ཐོན་ཡོང་བའི་ཕྱོགས་སུ་ལངས་ཏེ། འཛམ་གླིང་ཐོག་གི་ཞི་བདེར་དགའ་བའི་རྒྱལ་ཁབ་དང་མི་དམངས་ཡོད་ཚད་ཐམས་ཅད་དང་དཔུང་པ་མཉམ་གཤིབ་ཀྱིས་འབད་འཐབ་བྱེད་ཀྱི་ཡོད། ཀྲུང་གོའི་གཡུལ་སར་རྒྱུན་ཆད་མེད་པར་འགོག་རྒོལ་ནུས་ལྡན་བྱས་ཏེ། རི་པིན་གྱིས་ཤིས་པོ་ལི་ཡར་བཙན་འཛུལ་བྱ་རྒྱུའི“བྱང་སྐྱོད”འཆར་གཞིར་བཀག་འགོག་བྱས་པ་མ་ཟད། རི་པིན་གྱིས་ལྷོ་ཕྱོགས་མཚོ་རྒྱུད་ས་ཁུལ་ལ་ཕར་རྒོལ་བྱ་རྒྱུའི“ལྷོ་སྐྱོད”གོམ་སྟབས་ཚོད་འཛིན་དང་ནར་འགྱངས་ཀྱང་བྱས་ཡོད། ཀྲུང་གོ་མི་དམངས་ཀྱི་རི་འགོག་དམག་འཁྲུག་དེ་ལས་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་སྟོབས་ཤུགས་ལ་ཡིད་ཆེས་བྱེད་སེམས་བརྟན་དུ་སོང་ནས། འཛམ་གླིང་ཞི་བདེ་བརྩོན་ལེན་བྱེད་པའི་རླབས་ཆེན་བྱ་གཞག་ལ་མཛད་རྗེས་ལོ་རྒྱུས་ཐོག་འཁོད་པའི་ལེགས་སྐྱེས་ཕུལ་ཡོད།

ལོ་རྒྱུས་དུམ་བུ་དེ་མ་བརྗེད་པར་བྱས་ན། གཞི་ནས་དྲང་བདེན་ལ་སྲུང་སྐྱོང་ཐུབ་སྟེ་ཡང་དག་པའི་ལོ་རྒྱུས་ལྟ་བར་བརྟེན་ནས་འབྱུང་འགྱུར་གསར་གཏོད་བྱེད་ཐུབ། འཛམ་གླིང་དམག་ཆེན་གཉིས་པའི་ལོ་རྒྱུས་ལྟ་བ་ཡང་དག་མཐའ་འཁྱོངས་དང་། ཡང་དག་པའི་སྒོ་ནས་ལོ་རྒྱུས་འབྲི་འགོད། བློ་བརྟན་འགྱུར་མེད་ངང་ལོ་རྒྱུས་ལ་སྲུང་སྐྱོང་བཅས་བྱས་ན་གཞི་ནས་འཛམ་གླིང་ཞི་བདེ་དང་རྒྱལ་སྤྱིའི་སྒྲིག་ལམ་གྱི་རྨང་གཞི་སྲ་བརྟན་དུ་གཏོང་ཐུབ། ལོ་རྒྱུས་བརྗེད་ན་མདུན་སྐྱོད་ཀྱི་ཁ་ཕྱོགས་འཛོལ་རྒྱུ་རེད། རྒྱལ་སྤྱིའི་སྤྱི་ཚོགས་ཀྱིས་ལོ་རྒྱུས་ཀྱི་དྲང་བདེན་ལ་ཐུན་མོང་ཐོག་སྲུང་སྐྱོང་དང་། དམག་འཁྲུག་རྗེས་ཀྱི་རྒྱལ་སྤྱིའི་སྒྲིག་ལམ་ལ་ཐུན་མོང་ཐོག་སྲུང་སྐྱོང་། བཙན་འཛུལ་བྱས་པའི་ལོ་རྒྱུས་ཁས་མི་ལེན་པ་དང་ཐ་ན་བཙན་འཛུལ་དམག་འཁྲུག་དང་མི་སེར་སྤེལ་བའི་དབང་སྒྱུར་མཛེས་བཟོ་བྱེད་པའི་གཏམ་སྤྱོད་གང་ཞིག་ཡིན་རུང་ཚང་མར་མཐའ་གཅིག་ཏུ་ངོ་རྒོལ། འཛམ་གླིང་དམག་ཆེན་གཉིས་པའི་ལོ་རྒྱུས་ཀྱི་གནས་ཚུལ་ངོ་མ་འཁྱོག་བཤད་དང་འཛམ་གླིང་དམག་ཆེན་གཉིས་པའི་རྒྱལ་ཁ་ཐོབ་པའི་གྲུབ་འབྲས་ཁས་མི་ལེན་པའི་ལྐོག་ཇུས་མཐའ་དག་ལ་མཐའ་གཅིག་ཏུ་ངོ་རྒོལ་བཅས་བྱེད་དགོས། བློས་གཏོང་ཤིན་ཏུ་ཆེན་པོ་བྱས་པའི་ཀྲུང་གོ་མི་དམངས་ཀྱིས་ཁྲག་དྲོན་དང་ཚེ་སྲོག་བློས་བཏང་ནས་བྲིས་པའི་ལོ་རྒྱུས་ལ་བློ་བརྟན་འགྱུར་མེད་ངང་སྲུང་སྐྱོང་བྱ་རྒྱུ་ཡིན།

ལོ་རྒྱུས་དུམ་བུ་དེ་མ་བརྗེད་པར་བྱས་ན། གཞི་ནས་འབྱུང་འགྱུར་ལ་བློ་སྒོ་ཕྱེ་ནས་ཡུན་རིང་ཞི་བདེའི་འཛམ་གླིང་སྐྲུན་ཐུབ། འཛམ་གླིང་གི་ལོ་རྒྱུས་ལ་ཕྱོགས་ཡོངས་ནས་བལྟས་ན། དྲག་ཤུགས་ལ་བརྟེན་ནས་ཕྱི་ཕྱོགས་ལ་བཙན་འཛུལ་གྱིས་རྒྱ་བསྐྱེད་གཏོང་རིགས་ཚང་མ་མཐར་ཕམ་ངེས་རེད། འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ཁྲོད་དུ་གཏུམ་དྲག་དང་། མུན་ནག ལོག་སྤྱོད་བཅས་ཀྱི་སྟོབས་ཤུགས་མདུན་དུ་སྤྱི་ཚོགས་ཀྱི་ལམ་ལུགས་མི་འདྲ་བ་དང་། འདུ་ཤེས་འཛིན་སྟངས་མི་འདྲ་བ། ལོ་རྒྱུས་རིག་གནས་མི་འདྲ་བ། འཕེལ་རྒྱས་ཀྱི་ཆུ་ཚད་མི་འདྲ་བ་བཅས་ཀྱི་རྒྱལ་ཁབ་ཁག་གིས་ཁྱད་པར་ལ་མི་བལྟོས་པར་ཞི་བདེར་སྲུང་སྐྱོང་བྱེད་པའི་སྟོབས་ཤུགས་ཆེན་པོ་གཅིག་ཏུ་བསྡུས་ཡོད།

དེང་དུས་ཀྱི་འཛམ་གླིང་ཞི་བདེ་དེ་ཙམ་མིན། ཕྱོགས་རྐྱང་རིང་ལུགས་དང་བཙན་པོ་དབང་ཡོད་བཤད་པའི་གནོད་འཚེ་ཆེན་པོ་ཕོག་ཅིང་། མིའི་རིགས་སླར་ཡང་མཐུན་སྒྲིལ་ལམ་ཡང་ན་ཁ་བྲལ་དང་། གླེང་མོལ་ལམ་ཡང་ན་འགྲན་རྒོལ། གཉིས་ཕན་ནམ་ཡང་ན་རྒྱལ་ཕམ་བཅས་ཀྱི་ལམ་བཞི་མདོ་ཁར་སླེབས་ཡོད། མིའི་རིགས་ཀྱི་ཐུན་མོང་གི་འབྱུང་འགྱུར་ཆེད་དུ་ཕྱོགས་ཁག་གིས་མཐུན་སྒྲིལ་རོགས་ལས་བྱ་རྒྱུ་མཐའ་འཁྱོངས་བྱེད་པ་དང་། གླེང་མོལ་བྱེད་པ་ལས་འགྲན་རྒོལ་མི་བྱེད་པ་དང་། རོགས་ཟླ་བྱེད་པ་ལས་མནའ་འབྲེལ་མི་འཛུགས་པ། གཉིས་ཕན་ལས་རྒྱལ་ཕམ་མིན་པ་བཅས་བྱེད་རྒྱུ་མཐའ་འཁྱོངས་བྱེད་པ། ཕྱོགས་མང་རིང་ལུགས་ངོ་མ་ལག་བསྟར་བཅས་བྱས་ཏེ། ལག་གདང་སྦྲེལ་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་དགོས།

ལོ་རྒྱུས་ཀྱི་དྲན་ཤེས་དང་གནས་ཚུལ་ངོ་མ་ལོ་ཟླ་འདས་པ་དང་ཆབས་ཅིག་ཉམས་འགྲོ་མི་སྲིད། ཀྲུང་གོ་མི་དམངས་ཀྱི་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ་80འཁོར་བའི་དྲན་གསོའི་བྱེད་སྒོ་གཟབ་རྒྱས་ངང་སྤེལ་བ་ནི་ལོ་རྒྱུས་ཀྱི་དྲན་ཤེས་ལ་བརྩི་འཇོག་བྱེད་པ་ཞིག་རེད་ལ། མིའི་རིགས་ཀྱི་མདུན་ལམ་དང་ལས་དབང་ལ་སེམས་ཁུར་བྱེད་པ་ཞིག་དེ་བས་ཀྱང་རེད། ཀྲུང་གོས་བློ་བརྟན་འགྱུར་མེད་ངང་ཕྱོགས་ཁག་དང་ལག་གདང་སྦྲེལ་ནས་ཞི་བདེ་འཕེལ་རྒྱས་ཀྱི་བགྲོད་ལམ་དུ་ཐུན་མོང་ཐོག་བསྐྱོད་དེ། ཞི་བདེའི་ཉི་འོད་མིའི་རིགས་འཚོ་སའི་སྐར་མའི་གོ་ལར་ནམ་ཡང་འཕྲོ་བར་བྱ་རྒྱུ་ཡིན།