ཉེ་ཆར། གསར་འགོད་པར་བོད་རང་སྐྱོང་ལྗོངས་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་ཐིང་ནས་ཤེས་རྟོགས་བྱུང་བར། 2025ལོའི་ཟླ་བ་དང་པོ་ནས་དྲུག་པའི་བར། ལྗོངས་ཡོངས་ཀྱི་སྡོད་ཁང་འཛུགས་སྐྲུན་ཁྱབ་ཁོངས་སུ་གཏན་འཇགས་རྒྱུ་ནོར་ལ་མ་འཇོག་བྱེད་ཚད་སྒོར་དུང་ཕྱུར་85.15ཟིན་པ་དེ་དུས་མཚུངས་ལས་9.45%འཕར་ནས་ལོ་འཁོར་འཆར་གཞིའི་59%ལེགས་གྲུབ་བྱུང་ནས“གཉིས་ཕྱེད་བརྒལ”མངོན་འགྱུར་བྱུང་ཡོད། དེའི་ནང་ནས་གྲོང་ཁྱེར་དང་གྲོང་གསེབ་ཀྱི་རྨང་གཞིའི་སྒྲིག་བཀོད་ལ་སྒོར་དུང་ཕྱུར་48.96བཏང་བ་དང་། འགན་ལེན་རང་བཞིན་གྱི་བདེ་སྡོད་ལས་གྲྭར་སྒོར་དུང་ཕྱུར་7.6བཏང་བ། ས་ཁང་བདག་ཁོངས་གསར་སྤེལ་ལ་སྒོར་དུང་ཕྱུར་12.92བཏང་བ། ནུས་རྒྱུ་གཙང་མའི་དྲོད་རླངས་དང་གསོ་རླུང་གཅིག་སྡུད་མཁོ་འདོན་ལ་སྒོར་དུང་ཕྱུར་8.34བཏང་བ། ལྗོངས་ཡོངས་ཀྱི་གྲོང་ཁྱེར་དོ་དམ་ཁྱབ་ཁོངས་ཀྱི་གྲོང་ཁྱེར་གྱི་ཁོར་ཡུག་བཅོས་སྐྱོང་སོགས་རྣམ་གྲངས་གཞན་དག་ལ་སྒོར་དུང་ཕྱུར་7.33བཏང་ཡོད།

ཤེས་རྟོགས་བྱུང་བར་གཞིགས་ན། 2025ལོ་ཚུན་དུ་བོད་ཀྱིས་དམངས་འཚོའི་དགོས་མཁོ་སྟོན་ཕྱོགས་སུ་བྱས་ཏེ་གྲོང་ཁྱེར་དང་གྲོང་རྡལ་གྱི་རྨང་གཞིའི་སྒྲིག་བཀོད་དང་། དྲོད་རླངས་དང་གསོ་རླུང་མཁོ་འདོན། འགན་ལེན་རང་བཞིན་གྱི་སྡོད་ཁང་དང་ས་ཁང་བདག་ཁོངས་ཀྱི་ཁྲོམ་ར་འཕེལ་རྒྱས་སོགས་གཙོ་གནད་ཀྱི་དམངས་འཚོའི་ཁྱབ་ཁོངས་ལ་དམིགས་ཏེ། རྣམ་གྲངས་ལ་དོ་དམ་བྱེད་ཤུགས་ཆེ་རུ་དང་སྐུལ་འདེད་གཏོང་ཤུགས་ཆེ་རུ་བཏང་བ་བརྒྱུད། ལྗོངས་ཡོངས་ཀྱི་སྡོད་ཁང་འཛུགས་སྐྲུན་ཁྱབ་ཁོངས་ཀྱི་གཏན་འཇགས་རྒྱུ་ནོར་ལ་མ་འཇོག་བྱེད་ཚད་བརྟན་པོ་འཕར་རྒྱུར་སྐུལ་འདེད་བཏང་ཡོད། ད་ཐེངས“གཉིས་ཕྱེད་བརྒལ”གྱི་དམིགས་ཚད་མངོན་འགྱུར་བྱུང་བ་ལས་ལོ་ཧྲིལ་པོའི་མ་འཇོག་ལས་འགན་ལེགས་གྲུབ་དང“ལོ་ལྔ་ཚན་བཅུ་བཞི་པའི”འཆར་འགོད་ཀྱི་མཇུག་བདེ་བླག་ངང་འགྲིལ་རྒྱུར་རྨང་གཞི་བརྟན་པོ་ཞིག་བཏིང་ཡོད།

བོད་རང་སྐྱོང་ལྗོངས་སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་ཐིང་གི་འབྲེལ་ཡོད་ཁྲུའུ་ཡི་འགན་འཁུར་བས། ད་ལོའི་ལོ་སྟོད་དུ་སྡོད་ཁང་འཛུགས་སྐྲུན་ཁྱབ་ཁོངས་ཀྱིས་དམངས་འཚོ་ལེགས་གཏོང་དང་གྲོང་ཁྱེར་དང་གྲོང་གསེབ་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བའི་ཁྲོད“གྲུ་རྡོའི”ནུས་པ་ཐོན་ཡོད། གོམ་སྟབས་རྗེས་མར། དུས་བཅད་བཀོད་གཏོང་དང་ལྟ་སྐུལ་མཛུབ་ཁྲིད་ལམ་སྲོལ་འཛུགས་པ་དང་རྣམ་གྲངས་ཀྱི་འཕེལ་རིམ་ལ་སྟབས་བསྟུན་རྗེས་སྙེག་བྱ་རྒྱུ་མ་ཟད། མ་དངུལ་གཏོང་བ་དང་དུས་འགོར་ཞིབ་མཆན་འགོད་པ་སོགས་ཀྱི་ལྷུ་ཚིགས་ལ་དམིགས་ནས་ཞབས་ཞུ་ལེགས་སུ་བཏང་སྟེ་གཙོ་གནད་ལས་གྲྭར་དུས་བཀག་ལྟར་སྐུལ་འདེད་གཏོང་ཐུབ་པའི་འགན་ལེན་བྱ་རྒྱུ་ཡིན་ཞེས་བརྗོད།