སྒྱུར་བཅོས་སྒོ་དབྱེ་བྱས་ཚུན། ཀྲུང་གོའི་དཔལ་འབྱོར་མི་རྣམས་ཧང་སངས་དགོས་པའི་འཕེལ་རྒྱས་མྱུར་པོ་བྱུང་ཡོད། ད་ཆ་ཀྲུང་གོ་ནི་གོ་ལ་ཧྲིལ་པོའི་དཔལ་འབྱོར་དངོས་ཚན་ཆེ་གྲས་གཉིས་པ་དང་རྒྱལ་སྤྱིའི་དཔལ་འབྱོར་མཉམ་ལས་ནང་ཞུགས་མཁན་གལ་ཆེན་ཞིག་ཡིན་པས། གོ་ལ་ཧྲིལ་པོའི་བཅོས་སྐྱོང་ཁྲོད་ནུས་པ་གལ་ཆེན་འདོན་བཞིན་ཡོད། འཕེལ་རྒྱས་འགྲོ་བཞིན་པའི་རྒྱ་ཆེའི་རྒྱལ་ཁབ་ཀྱི་ངོས་ནས་བརྗོད་ན། ཀྲུང་གོའི་འཕེལ་རྒྱས་ཀྱིས་ཉམས་མྱོང་མཁོ་འདོན་དང་རེ་བ་སྦྱིན་ཡོད་པས་རྒྱལ་ཁབ་མང་པོ་ཞིག་གིས་དཔྱད་གཞིར་འཛིན་རིན་ཡོད་པའི་དཔེ་མཚོན་ཞིག་ཏུ་བརྩི་གི་ཡོད།

ནུས་པ་འཛུགས་སྐྱོང་ནི་ཨ་ཧྥེ་རི་ཁ་དང་ཀྲུང་གོའི་མཉམ་ལས་ཀྱི་ནང་དོན་གལ་ཆེན་ཞིག་ཡིན། 2000ལོར་བཙུགས་པའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱིས་ཨ་ཧྥེ་རི་ཁའི་རྒྱལ་ཁབ་དང་ཀྲུང་གོ་དབར་ཕན་ཚུན་བརྩི་འཇོག་དང་འདྲ་མཉམ་གཉིས་ཕན་གྱི་རྨང་གཞིའི་ཐོག་གླེང་མོལ་དང་མཉམ་ལས་བྱེད་རྒྱ་ཆེ་རུ་བཏང་ཡོད། དེ་ནི་ཕྱོགས་གཉིས་པོས་རང་རང་སོ་སོའི་འཕེལ་རིམ་ཁྲོད་ཕན་ཚུན་རྒྱབ་སྐྱོར་ལ་སྐུལ་འདེད་གཏོང་བའི་མཉམ་ལས་ལམ་སྲོལ་གལ་ཆེན་ཞིག་རེད། ལོ་མང་རིང་ཀྲུང་གོ་སྲིད་གཞུང་གིས་ཨ་ཧྥེ་རི་ཁའི་རྒྱལ་ཁབ་ཀྱི་དཔོན་རིགས་དང་གཞོན་ནུ་སོགས་ཀྲུང་གོར་རྟོག་ཞིབ་དང་འཚམས་འདྲིར་ཐེངས་མང་གདན་དྲངས་ནས་ཁོང་ཚོར་ཀྲུང་གོ་དང་ཀྲུང་གོའི་འཕེལ་རྒྱས་ཀྱི་བརྒྱུད་རིམ་ཤེས་རྟོགས་ཐུབ་པར་བྱས་ཡོད། ནུས་པ་འཛུགས་སྐྱོང་གི་རྣམ་གྲངས་དེ་དག་ཤེས་བྱ་མཉམ་སྤྱོད་དང་། ཉམས་མྱོང་སྤེལ་རེས། ལག་རྩལ་ཁྱབ་གདལ་བཅས་ཀྱི་ངོས་ནས་བརྗོད་ན་གལ་འགངས་ཤིན་ཏུ་ཆེན་པོ་ཡོད།

ཞིང་ལས་འཕེལ་རྒྱས་དང་གྲོང་ཁྱེར་འཛུགས་སྐྲུན་སོགས་སྲོལ་རྒྱུན་ཁྱབ་ཁོངས་ནས་5Gའཕྲིན་གཏོང་དང་། སྲུང་སྐར་ཕྱོགས་སྟོན། མི་ཐབས་རིག་ནུས་སོགས་ཚན་རྩལ་འདུས་ཚད་མཐོ་བའི་ཁྱབ་ཁོངས་བར། ཨ་ཧྥེ་རི་ཁ་དང་ཀྲུང་གོའི་མི་ཤུགས་ཐོན་ཁུངས་མཉམ་ལས་རྣམ་གྲངས་ཀྱིས་སྣ་མང་རང་བཞིན་དང་བསྟུན་མཁས་རང་བཞིན་རྒྱ་ཆེར་བཏང་སྟེ། སྤུས་ཚད་མཐོ་བ་དང་ཆུ་ཚད་མཐོ་བ་མངོན་ཡོད་ལ་ཨ་ཧྥེ་རི་ཁ་ཕྱོགས་ཀྱི་དགོས་མཁོ་དངོས་དང་ཡང་མཐུན་ཡོད། ཀྲུང་གོ་སྲིད་གཞུང་གིས་མཁོ་འདོན་བྱས་པའི་སློབ་གསོའི་གསོ་སྦྱོང་རྣམ་གྲངས་ཁྲོད་ནས་མ་ཏ་ཀ་སི་ཁར་ལ་ཕན་པ་ཐོབ་པ་དང་མ་ཏ་ཀ་སི་ཁར་གྱི་ཁྱབ་ཁོངས་ཁག་ནས་ཡོང་བའི་མི་སྣ་འབོར་ཆེན་ལ་ཀྲུང་གོར་སྦྱོང་བརྡར་བྱེད་པའི་གོ་སྐབས་ཐོབ་ཡོད། ན་ནིང་ཟླ་བ་9པར་འཚོགས་པའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་པེ་ཅིང་དབུ་ཚོགས་ཐོག《ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས——པེ་ཅིང་གི་བྱ་སྤྱོད་འཆར་གཞི(2025ལོ་ནས་2027ལོ་བར)》ལ་གྲོས་འཆམ་བྱུང་ནས་སློབ་གསོའི་མཉམ་ལས་དེ་ཀྲུང་གོ་དང་ཨ་ཧྥེ་རི་ཁའི་མཉམ་ལས་རྒྱུན་མཐུད་འཕེལ་རྒྱས་གཏོང་བའི་འགག་རྩ་ཡིན་པ་སླར་ཡང་ནན་བཤད་བྱས་ཡོད། ཀྲུང་གོ་ཕྱོགས་ཀྱིས་ཨ་ཧྥེ་རི་ཁའི་རྒྱལ་ཁབ་ཀྱི་ཤེས་ལྡན་པ་གསོ་སྐྱོང་བྱེད་པར་མུ་མཐུད་རྒྱབ་སྐྱོར་བྱ་རྒྱུ་དང་མཉམ་ལས་ཀྱི་འཆར་གཞི་མང་པོ་ཁྱབ་བསྒྲགས་བྱས་ཏེ་ཨ་ཧྥེ་རི་ཁའི་རྒྱལ་ཁབ་ལ་དེང་རབས་ཅན་འཕེལ་རྒྱས་ཀྱི་སྒུལ་ནུས་ཆེ་རུ་གཏོང་རོགས་བྱས་ནས་ཨ་ཧྥེ་རི་ཁའི་རྒྱལ་ཁབ་ཀྱི་འཕེལ་རྒྱས་དགོས་མཁོར་ཀྲུང་གོའི་དངོས་སྒྲུབ་ཀྱི་ལན་རྒྱག་གི་ཡིན་ཞེས་བརྗོད་ཡོད།

ཨ་ཧྥེ་རི་ཁ་དང་ཀྲུང་གོའི་སློབ་གསོ་དང་གསོ་སྦྱོང་མཉམ་ལས་ཀྱི་ཕན་པ་ཐོབ་མཁན་ཡིན་པའི་ཐ་དབྱི་ཤིས་སྨི་ཡཱ་ཁཱ་ཏ་ཀྲ་ངོས་ནས་བརྗོད་ན། མི་ཤུགས་ཐོན་ཁུངས་གསར་སྤེལ་ཁྱབ་ཁོངས་ཀྱི་ཕྱོགས་གཉིས་པོའི་མཉམ་ལས་དང་འཕེལ་རྒྱས་ཀྱིས་ཕྱོགས་གཉིས་པོའི་དེང་རབས་ཅན་འཛུགས་སྐྲུན་ལ་སྐུལ་འདེད་ནུས་ལྡན་གཏོང་ངེས་ཡིན་པ་ངར་ཡིད་ཆེས་ཆེན་པོ་ཡོད། 2008ལོའི་ཟླ་བ་10པར་ཆིང་ཧྭ་སློབ་ཆེན་གྱི་སྤྱི་པའི་དོ་དམ་སློབ་གླིང་དུ་སློབ་སྦྱོང་བྱེད་པར་སླེབས་མ་ཐག་པའི་གནས་ཚུལ་ངས་ད་ལྟའང་གསལ་པོར་དྲན་གྱི་ཡོད། སློབ་གཉེར་བྱེད་རིང་སློབ་གྲྭའི་ཕུལ་དུ་བྱུང་བའི་སློབ་ཁྲིད་སྤུས་ཚད་དང་། ཕུན་སུམ་ཚོགས་པའི་སློབ་ཚན་མ་ལག དེང་རབས་ཅན་གྱི་རྨང་གཞིའི་སྒྲིག་བཀོད་བཅས་ལས་ང་ལ་བག་ཆགས་ཟབ་མོ་བཞག་བྱུང་། ང་ཚོའི་འཛིན་གྲྭར་ཨ་ཧྥེ་རི་ཁ་དང་ཨེ་ཤེ་ཡའི་འཕེལ་རྒྱས་འགྲོ་བཞིན་པའི་རྒྱལ་ཁབ་ནས་ཡོང་བའི་གཞུང་ཞབས་པ་20ལྷག་ཙམ་ཡོད་ཅིང་། དེ་དག་གིས་རྨང་གཞིའི་རིགས་པའི་གཞུང་ལུགས་སློབ་སྦྱོང་བྱེད་པ་མ་ཟད། ད་དུང་ཀྲུང་གོའི་ཞིང་ཆེན་ཁག་ལ་རྟོག་ཞིབ་བྱས་ནས་ཀྲུང་གོའི་འཕེལ་རྒྱས་ཀྱི་ལག་ལེན་དང་ཀྲུང་གོའི་དེང་རབས་ཅན་འཛུགས་སྐྲུན་གྱི་ཉམས་མྱོང་ཤེས་རྟོགས་བྱེད་ཀྱི་ཡོད། བརྒྱུད་རིམ་དེས་ང་ཚོར་གོ་སྐབས་ཤིག་བསྐྲུན་ནས་རྒྱལ་སྤྱིའི་གཙོ་རྒྱུན་འཕེལ་རྒྱས་ཀྱི་དཔེ་དབྱིབས་དང་རང་སོ་སོའི་རྒྱལ་ཁབ་ཀྱི་འཕེལ་རྒྱས་གཏོང་སྟངས་ལ་ཞིབ་བསྡུར་དང་ཞིབ་འཇུག་བྱས་པ་མ་ཟད། ད་དུང་གོ་ལ་ཧྲིལ་པོའི་བཅོས་སྐྱོང་གི་གནད་དོན་གལ་ཆེན་ལ་ང་ཚོས་ཤེས་རྟོགས་སྔར་ལས་གཏིང་ཟབ་ཐུབ་བྱུང་།

ད་ཐེངས་ཀྱི་སློབ་སྦྱོང་བརྒྱུད་རིམ་གྱིས་ཐ་དབྱི་ཤིས་སྨི་ཡཱ་ཁཱ་ཏ་ཀྲ་ཡི་ལས་རིགས་ཀྱི་ལམ་བུར་དགེ་མཚན་ལྡན་པའི་ཤུགས་རྐྱེན་ཐེབས་ཡོད། མཉམ་ལས་རྣམ་གྲངས་བརྒྱུད་མ་ཏ་ཀ་སི་ཁར་དང་ཀྲུང་གོའི་ཕྱོགས་གཉིས་པོའི་འབྲེལ་བ་འཕེལ་རྒྱས་འགྲོ་རྒྱུར་ངས་ལེགས་སྐྱེས་འབུལ་ཐུབ་པ་འདུག ངས“རྒྱུད་གཅིག་ལམ་གཅིག”མཉམ་སྐྲུན་གྱི་བསམ་ཤེས་དྲན་ཐོ་ཚུད་པའི་ཕྱོགས་གཉིས་པོའི་མཉམ་ལས་གྲོས་མཐུན་མང་པོ་ཞིག་གཙོ་སྐྱོང་དང་གྲོས་མོལ་བྱས་པ་ཡིན། མ་ཏ་ཀ་སི་ཁར་འདི་ཉིད་ཀྲུང་གོ་དང“རྒྱུད་གཅིག་ལམ་གཅིག”མཉམ་སྐྲུན་གྱི་མཉམ་ལས་ཡིག་ཆར་མིང་རྟགས་འགོད་མཁན་སྔ་ཤོས་ཀྱི་ཨ་ཧྥེ་རི་ཁའི་རྒྱལ་ཁབ་ཀྱི་གྲས་ཤིག་ཏུ་གྱུར་ཡོད། འཐབ་ཇུས་དབྱེ་ཞིབ་ལས་དོན་སྤེལ་རིང་། ངས་ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་འབྲེལ་ཡོད་གནས་ཚུལ་ལ་གཙོ་གནད་ཐོག་དོ་ཁུར་བྱས་ཏེ། ཀྲུང་གོའི་སྒྱུར་བཅོས་སྒོ་དབྱེའི་སྲིད་ཇུས་ཀྱི་ནང་སྙིང་དང་འཕེལ་རྒྱས་འགྲོ་ལམ་ལ་ངོས་འཛིན་སྔར་ལས་གཏིང་ཟབ་བྱུང་བ་མ་ཟད། དེས་རྒྱལ་སྤྱིའི་རིམ་ངོས་ལ་བྱུང་བའི་དཔལ་འབྱོར་དང་ཆབ་སྲིད་ཀྱི་ཤུགས་རྐྱེན་དང་ལྷག་པར་དུ་ཀྲུང་གོ་དང་མ་ཏ་ཀ་སི་ཁར་སོགས་འཕེལ་རྒྱས་འགྲོ་བཞིན་པའི་རྒྱལ་ཁབ་དབར་མཉམ་ལས་བྱེད་པར་ཤུགས་རྐྱེན་གཏིང་ཟབ་ཐེབས་པར་གོ་རིམ་ལྡན་པའི་སྒོ་ནས་དབྱེ་ཞིབ་བྱས་པ་ཡིན།

ངེས་གཏན་མེད་པའི་རང་བཞིན་གྱིས་ཁེངས་པའི་རྒྱལ་སྤྱིའི་ཁོར་ཡུག་ཁྲོད་ཀྲུང་གོས་ཆུ་ཚད་མཐོ་བའི་སྒོ་ནས་ཕྱི་ཕྱོགས་སྒོ་དབྱེ་མཐའ་འཁྱོངས་དང་། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་ལ་སྐུལ་འདེད་གཏོང་བ། གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་། གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཅས་དོན་འཁྱོལ་ལ་སྐུལ་འདེད་གཏོང་ཤུགས་ཆེ་རུ་བཏང་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་མུ་མཐུད་སྐུལ་འདེད་གཏོང་གི་ཡོད། མགོ་བོ་རྒྱུན་ཆད་མེད་པར་འདེགས་བཞིན་པའི་སྲུང་སྐྱོང་རིང་ལུགས་དང་ཕྱོགས་རྐྱང་རིང་ལུགས་ཀྱི་མདུན་དུ། ཀྲུང་གོས་སྒོ་མོ་འབྱེད་རྒྱ་སྔར་བས་ཆེ་རུ་བཏང་ནས་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་འཕེལ་རྒྱས་ཀྱི་གོ་སྐབས་དང་ཀྲུང་གོའི་ཁྲོམ་རར་ཞུགས་པའི་གོ་སྐབས་བསྐྲུན་ཡོད། འབྱུང་འགྱུར་ལ་རྒྱང་ལྟ་བྱེད་སྐབས། ཨ་ཧྥེ་རི་ཁ་དང་ཀྲུང་གོས་དངོས་སྒྲུབ་མཉམ་ལས་ལ་སྔར་བས་ཤུགས་སྣོན་བརྒྱབ་ནས་ཕྱོགས་གཉིས་པོའི་མི་དམངས་ལ་བདེ་སྐྱིད་བསྐྲུན་ཚེ་མཛེས་སྡུག་ལྡན་པའི་འབྱུང་འགྱུར་བསུ་ཐུབ་ངེས་རེད།

(རྩོམ་པ་པོ་ནི་མ་ཏ་ཀ་སི་ཁར་ཕྱི་འབྲེལ་པུའི་དྲུང་ཆེ་ཟུར་པ་ཡིན་པ)