ཀྲུང་གོའི་ཉམས་མྱོང་གིས་ཨ་ཧྥེ་རི་ཁའི་འཕེལ་རྒྱས་ལ་རམ་འདེགས་བྱས་པ།
ཙམ་པབ་ཝེ་ཡི་སྨྱན་སྦྱོར་མི་སྣས་ཀྲུང་གོ་དང་ཨ་ཧྥེ་རི་ཁའི་མཉམ་ལས་སྐོར་གླེང་བ།
འདི་ནི་ཙམ་པབ་ཝེ་ཡི་ཀྲུང་མ་ཧྲའོ་ནཱ་ལེན་ཞིང་ཆེན་དུ་གནས་པའི་ཀྲུང་གོ་དང་ཙམ་པབ་ཝེ་ཡི་ཞིང་ལས་མཉམ་ལས་དཔེ་སྟོན་གྲོང་ཚོར་ཀྲུང་གོ་ཕྱོགས་ཀྱི་ཞིང་ལས་རིགས་གཅིག་མཁས་ཅན(གཡས)གྱིས་ས་གནས་དེ་གའི་གྲོང་མིར་མཛུབ་ཁྲིད་བྱེད་བཞིན་པ།
ཉིན་ཤས་གོང་ཙམ་པབ་ཝེ་ཡི་སྨྱན་སྦྱོར་མི་སྣ་མང་པོ་ཞིག་གིས་ཙམ་པབ་ཝེ་ཡི་རྒྱལ་ས་ཧ་ར་རེ་རུ་གསར་འགོད་པའི་བཅར་འདྲི་དང་ལེན་བྱེད་སྐབས། ཀྲུང་གོའི་སྤུས་ཚད་མཐོ་བའི་འཕེལ་རྒྱས་ཀྱི་ཉམས་མྱོང་ནི་རང་རྟེན་འཕེལ་རྒྱས་ཀྱི་འགྲོ་ལམ་འཚོལ་ཞིབ་ཧུར་ཐག་བྱེད་མཁན་ཨ་ཧྥེ་རི་ཁའི་རྒྱལ་ཁབ་ཀྱིས་དཔྱད་གཞིར་འཛིན་པའི་དོན་སྙིང་གལ་ཆེན་ལྡན་ཡོད།
ད་ལོའི་ཟླ་བ་6པར་ཙམ་པབ་ཝེ་ཡི་སྨྱན་སྦྱོར་མི་སྣ་མང་པོ་ཀྲུང་གོའི་ཧུའུ་ནན་ཞིང་ཆེན་དུ་དུས་ཡུན་གཟའ་འཁོར་གཉིས་ཀྱི“ཙམ་པབ་ཝེ་ཡི་སྨྱན་སྦྱོར་མི་སྣའི་ཞིབ་སྦྱོང་འཛིན་གྲྭར”ཞུགས་པ་རེད། དེའི་རིང་ཁོང་ཚོས་ཧུའུ་ནན་ཞིང་ཆེན་གྱི་སྨྱན་སྦྱོར་དང་མཐོ་སློབ་སོགས་ནས་ཡོང་བའི་རིགས་གཅིག་མཁས་ཅན་དང་མདུན་ཕྱོགས་སྨྱན་སྦྱོར་གྱི་ཤེས་བྱ་དང་ལག་རྩལ་སློབ་སྦྱོང་དང་སྤེལ་རེས་བྱས་པ་མ་ཟད། ད་དུང་ཁྲང་ཧྲ་རུ་འཚོགས་པའི་ཀྲུང་གོ་དང་ཨ་ཧྥེ་རི་ཁའི་དཔལ་འབྱོར་ཚོང་དོན་འགྲེམས་ཚོགས་སྐབས་བཞི་པར་ཞུགས་ནས་ཀྲུང་གོ་དང་ཨ་ཧྥེ་རི་ཁའི་མཉམ་ལས་ཀྱི་གསོན་ཤུགས་ཐག་ཉེ་ས་ནས་ཚོར་བར་བྱས་པ་རེད།
ཙམ་པབ་ཝེ་རྒྱལ་ཁབ་རླུང་འཕྲིན་ཀུང་སིའི་རླུང་འཕྲིན་གསར་འགྱུར་པུའུ་ཡི་ཅིང་ལི་ཆའོ་ན་སན·མ་ལེར་ཝ་ཡིས་2013ལོར་ང་རང་ཁྲང་ཧྲ་ལ་འཚམས་འདྲིར་ཐེངས་དང་པོ་ཡོང་བ་དང་། ལོ་10ལྷག་ཙམ་སོང་རྗེས་སླར་ཡང་གྲོང་ཁྱེར་འདིར་སླེབས་དུས“འགྱུར་ལྡོག་ཆེན་པོ”ཕྱིན་པའི་ཚོར་སྣང་བྱུང་ཞེས་བརྗོད།
ཁོང་གིས“ཁྲང་ཧྲ་ཡི་འཛུགས་སྐྲུན་དང་གཞུང་ལམ་དྲ་བ་སོགས་གྲོང་ཁྱེར་གྱི་རྨང་གཞིའི་སྒྲིག་བཀོད་ཀྱི་འགྱུར་ལྡོག་ནི་མི་རྣམས་ཧང་སངས་དགོས་པ་ཞིག་འདུག ལོ་10ཡི་གོང་ང་རང་སྡོད་སའི་ས་ཆ་དེ་ད་ཆ་རྙེད་ཀྱི་མི་འདུག འཐུས་སྒོ་ཚང་བའི་རྨང་གཞིའི་སྒྲིག་བཀོད་ནས་དབྱར་མཚོ་རྒྱས་པ་ལྟར་གྱི་ཚན་རྩལ་འདུས་ཚད་མཐོ་བའི་ཐོན་ལས་བར་ཁྲང་ཧྲ་ཡི་འགྱུར་ལྡོག་ལས་ཀྲུང་གོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གྲུབ་འབྲས་ཆེན་པོ་དངོས་གནས་ཚོར་བྱུང”ཞེས་བརྗོད།
མ་ལེར་ཝ་ཡིས་ཀྲུང་གོ་སྤུས་ཚད་མཐོ་བའི་འཕེལ་རྒྱས་ཀྱི་ཕྱོགས་སུ་བསྐྱོད་པའི་རྣམ་པ་དེས་མིག་སྔར་རང་རྟེན་འཕེལ་རྒྱས་འགྲོ་ལམ་དོན་གཉེར་བྱེད་བཞིན་པའི་ཨ་ཧྥེ་རི་ཁའི་རྒྱལ་ཁབ་ལ་བློ་སྒོ་འབྱེད་པའི་དོན་སྙིང་ཆེན་པོ་ལྡན་ཡོད་ལ། དཔལ་འབྱོར་འཕེལ་རྒྱས་འཛུགས་སྐྲུན་ཁྲོད་མངོན་པའི་ཀྲུང་གོའི་མི་དམངས་ཀྱི་ཕན་ནུས་ཆེ་ཞིང་འབད་འཐབ་ཀྱི་སྙིང་སྟོབས་ཀྱང་ཨ་ཧྥེ་རི་ཁ་རྒྱལ་ཁབ་ཀྱིས་སློབ་སྦྱོང་བྱེད་རིན་ཡོད་པའི་ངོས་འཛིན་བྱས།
ཙམ་པབ་ཝེ་ཨ་ཧྥེ་རི་ཁའི་གཅིག་གྱུར་རྩ་འཛུགས་ཀྱི་གསར་འགྱུར་ཁང་གི་སྤྱི་ཁྱབ་རྩོམ་སྒྲིག་པ་ལན་ཅ་ལི་ལ་དབྱི·ཧྲའོ་ཁོས་ལོ་མང་རིང་ཨ་ཧྥེ་རི་ཁའི་སྐམ་ས་ཆེན་པོར་ཀྲུང་གོའི་ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་དང་སྤུས་ཚད་མཐོ་བའི་འཕེལ་རྒྱས་ཀྱི་གྲུབ་འབྲས་ཁྲོད་ནས་རྒྱུན་མཐུད་ཕན་པ་ཐོབ་ཡོད། “མིག་སྔར་ཨ་ཧྥེ་རི་ཁས་ཨ་ཧྥེ་རི་ཁ་མནའ་འབྲེལ་གྱི《2063ལོའི་གྲོས་རིམ》ནང་བཀོད་པའི་མདུན་ལམ་ཕྱོགས་སུ་མགྱོགས་མྱུར་སྐྱོད་བཞིན་ཡོད། ཀྲུང་གོའི་འཕེལ་རྒྱས་གཏོང་སྟངས་དང་ཕན་ཡོད་ཀྱི་ཉམས་མྱོང་གིས་ཨ་ཧྥེ་རི་ཁས་དམིགས་ཚད་དེ་མངོན་འགྱུར་བྱེད་པར་རམ་འདེགས་ཤུགས་ཆེན་ཐུབ་ཀྱི་རེད”ཅེས་བརྗོད།
(ཤིན་ཧྭ་གསར་འགྱུར་ཁང་ནས་འབྱོར་བའི་གློག་འཕྲིན་གཞིར་བཟུང་། གསར་འགོད་པ་ཞུས་ཀྲེང)
འབྲེལ་ཡོད་གསར་འགྱུར།