འདི་ནི་ཤར་ཁུལ་གྱི་མཛོད་ཉར་རྟེན་མཛོད་ཁང་ཡིན་པ།

དབྱིན་ཇིའི་ཝེ་ཏུའོ་ལི་ཡ་དང་ཨར་པོ་ཐེ་རྟེན་མཛོད་ཁང་གི་ཁོངས་གཏོགས་ཀྱི་རྟེན་མཛོད་ཁང་གསར་པ་སྟེ། ཤར་ཁུལ་གྱི་མཛོད་ཉར་རྟེན་མཛོད་ཁང་ཉིན་ཤས་གོང་དམངས་ཚོགས་ལ་དངོས་སུ་སྒོ་ཕྱེ་ཞིང་། རྟེན་མཛོད་ཁང་དེ་ནི་ལོན་ཏོན་ཤར་རྒྱུད་ཀྱི་རྒྱལ་མོ་དབྱི་ལི་ཧྲ་པའེ་ཨོ་ལིམ་ཕིག་སྤྱི་གླིང་དུ་གནས་པ་དང་གོ་ལ་ཧྲིལ་པོའི་སྒོ་དབྱེའི་རྣམ་པའི་མཛོད་ཉར་རྟེན་མཛོད་ཁང་དང་པོ་ཡིན་པ་རེད། དེས་འགྲེམས་སྟོན་དང་མཉམ་འགུལ་བྱེད་སྟངས་གསར་གཏོད་བྱས་པ་བརྒྱུད། རིག་དངོས་དག་འགྲེམས་སྒྲོམ་ནས་ཕྱིར་བཏོན་ཏེ་ལྟད་མོ་བས་ཐག་ཉེ་ས་ནས་ལྟ་ཐུབ་པར་བྱས་ཏེ་གོ་ལ་ཧྲིལ་པོའི་རྟེན་མཛོད་ཁང་འཕེལ་རྒྱས་གཏོང་ཆེད་ཐབས་ལམ་གསར་པ་ཞིག་འཚོལ་ཞིབ་བྱས་པ་རེད།

འདི་ག་ཚགས་པར་གྱི་གསར་འགོད་པས་ཉེ་ཆར་ཤར་ཁུལ་གྱི་མཛོད་ཉར་རྟེན་མཛོད་ཁང་གི་ས་ཆ་དངོས་སུ་རྩད་ཞིབ་བྱས་ཤིང་། རྟེན་མཛོད་ཁང་དེའི་འགྲེམས་ཁང་ནི་ཐོག་སོ་བཞི་རུ་དབྱེ་ཡོད་པ་དང་། མཐོ་ཚད་སྨི་20དང་རྒྱ་ཁྱོན་སྨི་ངོས་གྲུ་ཁྲི་1.6(ཚད་ལྡན་གྱི་ལན་ཆིའུ་སྤོ་ལོ་ར་བ་38དང་མཚུངས)ཡོད། འགྲེམས་སྟོན་ཚོམས་ཆེན་དབུས་ཀྱི་དཔེ་དུམ་རང་བཞིན་གྱི་འགྲེམས་སྟོན་སྒྲིག་ཆས་100ལྷག་ཙམ་ལ་སྤོ་རུང་འཁོར་ལམ་མ་ལག་སྤྱད་ཡོད་པས་བབ་བསྟུན་གྱི་ཟོག་སྒྲོམ་བཀོད་པ་ལས་སྣ་མང་ཅན་གྱི་འགྲེམས་སྟོན་གྱི་དགོས་མཁོ་གང་ལེགས་བསྐངས་ཡོད།

སྲོལ་རྒྱུན་གྱི་རྟེན་མཛོད་ཁང་དང་མི་འདྲ་བར་ཤར་ཁུལ་གྱི་མཛོད་ཉར་རྟེན་མཛོད་ཁང་གི་འགྲེམས་ཁུལ་དུ་ལྟ་སྐོར་བའི་རང་མོས་འཚོལ་ཞིབ་ཁུལ་ཡོད་པའི་ཁར། ད་དུང་ཁ་ཆད་ཞབས་ཞུ་བརྒྱུད་ཐག་ཉེ་ས་ནས་དམིགས་བསལ་གྱི་ཉར་ཚགས་ཅ་དངོས་ལ་མྱོང་རོལ་བྱས་ནས་སྒྱུ་རྩལ་བརྩམས་ཆོས་དང་མཉམ་འགུལ་གཏིང་ཟབ་ཀྱང་ཐུབ་ཅིང་། ལས་དོན་པས་ཤར་ཁུལ་གྱི་མཛོད་ཉར་རྟེན་མཛོད་ཁང་དུ་བཟོ་སྐྲུན་གྱི་ཞིག་རོ་དང་། རི་མོ། འཇིམ་བརྙན། གྱོན་གོས། ནོར་ཆས། བརྙན་པར་བརྩམས་ཆོས་སོགས་ཚུད་པའི་ཉར་ཚགས་ཅ་དངོས་རྩ་ཆེན་ཁྱོན་བསྡོམས་ཁྲི་25ཙམ་ཡོད་པ་དང་། ཉར་ཚགས་ཅ་དངོས་རྣམས་དུས་བཀག་ལྟར་བརྗེས་ནས་འགྲེམས་སྟོན་བྱེད་ཀྱི་ཡོད་ཅེས་གསར་འགོད་པར་བརྗོད།

རྟེན་མཛོད་ཁང་དེར་ད་དུང“འགྲེམས་དངོས་སྔོན་མངག”གི་ཞབས་ཞུ་ཡང་ཡོད་ཅིང་། དམངས་ཚོགས་ཀྱིས་གཞུང་ཕྱོགས་དྲ་ཚིགས་ནས་ལྟ་འདོད་པའི་ཉར་ཚགས་ཅ་དངོས་ལ་ཁ་ཆད་བྱས་ཆོག དུས་རབས་བར་མའི་གསེར་ཆུ་བྱུགས་པའི་ལག་བྲིས་ཀྱི་གསོལ་འདེབས་དཔེ་ཆའམ་ཡང་ན་སྐད་གྲགས་ཆེ་བའི་སྒྱུ་རྩལ་མཁས་ཅན་གྱིས་གྱོན་མྱོང་བའི་གར་སྟེགས་ཀྱི་གྱོན་གོས་གང་ཞིག་ཡིན་རུང་། དེ་དག་ཚང་མར་ཐག་ཉེ་ས་ནས་མྱོང་རོལ་བྱེད་པའི་གོ་སྐབས་ཡོད་པ་རེད། ཁ་ཆད་བྱས་པའི་དུས་ཚོད་ནང་དོ་དམ་པས་ཉར་ཚགས་ཅ་དངོས་རྣམས་མཛོད་ཁང་ནས་ཕྱིར་བཏོན་ཏེ་དམིགས་བཙུགས་ཀྱི་ཞིབ་འཇུག་ཁང་དུ་ཁ་ཆད་བྱེད་མཁན་ལ་རེ་རེ་བཞིན་འགྲེམས་སྟོན་དང་འགྲེལ་བཤད་རྒྱག་གི་ཡོད་པ་རེད།