“སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཁྲི་གྲོང་ཁྱེར་བྲག་ཡིབ་ཆུས་ཉིང་ཁྲི་གྲོང་རྡལ་ཀ་ལ་གྲོང་ཚོའི་ཡུལ་མི་ཡོངས་ལ་སྤྲིངས་པའི་འཕྲིན་ལན་གལ་ཆེན་ལས་ང་ཚོས་སྤྱི་ཁྱབ་ཧྲུའུ་ཅི་དང་ཏང་ཀྲུང་དབྱང་གིས་ང་ཚོར་ཐུགས་ཁུར་དང་བྱམས་སྐྱོང་གནང་ལུགས་དངོས་འབྲེལ་ཚོར་བྱུང”ཞེས་ལྷོ་ཁ་གྲོང་ཁྱེར་སྣ་དཀར་རྩེ་རྫོང་ཕུ་མ་བྱང་ཐང་ཤང་ཏང་ཨུད་ཀྱི་ཧྲུའུ་ཅི་རྡོ་རྗེ་དབང་ཕྱུག་གིས་ཤང་ཡོངས་ཀྱི་ལས་བྱེད་པ་དང་མང་ཚོགས་ཀྱི་སྣེ་ཁྲིད་དེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འཕྲིན་ལན་གལ་ཆེན་གྱི་དགོངས་དོན་སློབ་སྦྱོང་བྱས་རྗེས་སེམས་འགུལ་ཆེན་པོ་ཐེབས་བཞིན་བརྗོད་པ་དང་། ཁོང་གིས་ལོ་འདི་དག་རིང་ཤང་ལ་འགྱུར་ལྡོག་མགྱོགས་པོ་བྱུང་བ་དེ་ནི་ཏང་གི་འགོ་ཁྲིད་འོག་མཐའ་མཚམས་ས་ཁུལ་གྱི་སྤུས་ཚད་མཐོ་བའི་འཕེལ་རྒྱས་ཀྱི་གསོན་ཉམས་དོད་པའི་མཚོན་ཚུལ་ཞིག་རེད་ཅེས་བརྗོད།

ད་ཆ། ཕུ་མ་བྱང་ཐང་ཤང་གི་ཡུལ་མིའི་སྡོད་ཁང་དེ་སྔའི་ས་ཕག་གི་ཁང་པ་ནས་འབྱོར་འབྲིང་ཁང་པར་གྱུར་པ་དང་། ཆུ་དང་། གློག དྲོད་རླངས། གསོ་རླུང་བཅས་གང་དགོས་ཚང་མ་འཛོམས་པ། ཕྱི་རོལ་ཡུལ་དང་འབྲེལ་བ་ཆད་པ་ནས་རྒྱལ་ལམ་གང་སར་ཤར་གཏོང་ཐུབ་པ་མ་ཟད།

འཛམ་གླིང་ཐོག་ས་བབ་མཐོ་ཤོས་ཀྱི་སར་མཚོ་སྐོར་རྐང་འཁོར་འགྲན་བསྡུར་གཉེར་བ། སྨན་བཅོས་ཐོན་ཁུངས་ཚབས་ཆེན་མི་འདང་བ་ནས་གྲོང་ཚོའི་འཕྲོད་བསྟེན་ཁང་ཁྱོན་ཡོངས་ལ་ཁྱབ་པ། མི་རེའི་ཆ་སྙོམས་སྔོན་དཔག་ཚེ་ཚད་ཇེ་རིང་དུ་སོང་བ། སློབ་གསོའི་སློབ་ཞུགས་ཐུབ་ཚད་100%ཟིན་པ། བོད་ལྗོངས་འཛིན་གྲྭར་སློབ་མ་བསྡུ་བ། དཔལ་འབྱོར་ཐོན་ལས་ནི་ཕྱུགས་རྐྱང་པ་འཚོ་བ་ནས་སྣ་མང་ཅན་གྱི་འཕེལ་རྒྱས་འགྲོ་བའི་ཕྱོགས་སུ་སྐྱོད་པ། ཞིང་འབྲོག་པའི་ཡོང་འབབ་བརྟན་འཕར་བྱུང་བ། དམག་དམངས་ཀྱིས་མཐའ་མཚམས་སྲུང་བའི་འབད་འཐབ་ཀྱི་གཏམ་རྒྱུད་ལ་མི་རྣམས་སེམས་འགུལ་ཚད་མེད་ཐེབས་པ། ལས་བྱེད་པ་དང་མང་ཚོགས་ཡོངས་ཀྱིས་མཐའ་མཚམས་བདེ་འཇགས་མུ་མཐུད་སྲུང་སྐྱོང་བྱེད་པ་སོགས་རེད།

“སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀ་ལ་གྲོང་ཚོའི་ཡུལ་མི་ཡོངས་ལ་སྤྲིངས་པའི་འཕྲིན་ལན་གལ་ཆེན་གྱི་ཡིག་འབྲུ་རེ་རེ་དང་ཚིག་གྲུབ་རེ་རེའི་ནང་མཐའ་མཚམས་ས་ཁུལ་གྱི་འཕེལ་རྒྱས་ལ་ཐུགས་ཁུར་ཟབ་མོ་གནང་ལུགས་མཚོན་ཡོད་ལ། མི་རིགས་ཁག་གི་མང་ཚོགས་ལ་ཐུགས་རེ་ཟབ་མོ་བཅོལ་གནང་ལུགས་ཀྱང་འདུས་ཡོད”ཅེས་ལྷུན་རྩེ་རྫོང་ཡུལ་སྨད་ཤང་ཏང་ཨུད་ཀྱི་ཧྲུའུ་ཅི་ཝང་ཅེ་ཡིས་གསར་འགོད་པར་བརྗོད་པ་དང་། ཁོང་གིས་དེ་དང་འདྲ་བར་སྤྱི་ཁྱབ་ཧྲུའུ་ཅིའི་འཕྲིན་ལན་གལ་ཆེན་འབྱོར་བའི་ཡུལ་སྨད་ཤང་གིས་ཐོག་མཐའ་བར་གསུམ་དུ་སྤྱི་ཁྱབ་ཧྲུའུ་ཅིའི་མངགས་བཅོལ་ཟབ་མོ་བློ་ལ་བརྟན་པོར་ངེས་ནས་བློ་བརྟན་འགྱུར་མེད་ངང་བླ་ན་མེད་པའི་རྒྱལ་ཁོངས་སྲུང་མཁན་དང་བདེ་སྐྱིད་ལྡན་པའི་ཁྱིན་གཞིས་སྐྲུན་མཁན་བྱེད་ཀྱི་ཡིན་ཞེས་བརྗོད།

“ཡུལ་སྨད་ཤང་ནི་སྔོན་ཆད་མི་གསུམ་ལས་མེད་པའི‘མི་གསུམ་ཤང’ནས་ད་ཆའི‘འབྱོར་འབྲིང་ཤང’ལ་གྱུར་ཡོད། སྣུམ་ནག་གཞུང་ལམ་ཤར་གཏོང་ཐུབ་པས་ཁ་བ་ཆེན་པོ་བབས་སྐབས་ཤང་གི་རི་ལམ་འགག་ནས་འགྲོ་སྐྱོད་དཀའ་བའི་གནད་དོན་ཐག་གཅོད་ཐུབ་པ་དང་། གློག་ཁྲིད་པ་དེས་ཤང་ལ་བློས་འགེལ་ཆོག་པའི་གློག་ཤུགས་བརྟན་པོ་འགན་ལེན་ཐུབ་པ། ཕྱོགས་ཁག་གི་སྟོབས་ཤུགས་ཀྱིས་མུ་མཐུད་རོགས་སྐྱོར་དང་རྒྱབ་སྐྱོར་བྱས་པ་བརྒྱུད། ཡུལ་སྨད་དང་ཕྱི་ཕྱོགས་དབར་འབྲེལ་བ་ཟབ་ཏུ་ཕྱིན་པ་དང་ད་ལྟའི་ཡུལ་སྨད་ལ་སྐྱེ་སྟོབས་ཀྱིས་ཁེངས་བཞིན་ཡོད” ཝང་ཅེས“ཁྱིམ་ནི་ཡུལ་སྨད་དང་རྒྱལ་ཁབ་ནི་ཀྲུང་གོ་ཡིན། ང་ཚོས་རྒྱལ་ཁབ་ཀྱི་ས་ཆ་སྦར་མཐིལ་ཙམ་ཡང་བློས་མི་གཏོང་བའི་དད་སེམས་བརྟན་པོ་རྒྱུན་འཁྱོངས་བྱས་ཏེ། ཉིན་རེ་བཞིན་འཕེལ་རྒྱས་དང་ཡར་རྒྱས་འགྲོ་བར་བརྟེན་ནས་མེས་རྒྱལ་གྱི་མཐའ་མཚམས་དར་རྒྱས་བརྟན་ལྷིང་ཡོང་བར་སྟོབས་ཤུགས་ཡོད་ཚད་ལེགས་སྐྱེས་འབུལ་གྱི་ཡིན”ཞེས་བརྗོད།

དེ་དང་འདྲ་བར་མཐའ་མཚམས་ཀྱི་འཐབ་ས་དང་པོར་གནས་པའི་ལྷོ་བྲག་རྫོང་གིས་ཉེ་བའི་ལོ་ཤས་རིང་རྒྱལ་ཁབ་ཀྱི་འབོད་སྐུལ་དང་ལེན་ཧུར་ཐག་ཞུས་ཏེ། ཆུ་གློག་དང་། འོད་ཤུགས། རླུང་ཤུགས་སོགས་ནུས་རྒྱུ་གཙང་མ་གསར་སྤེལ་ཤུགས་ཆེན་བྱས་ནས་ལྗང་མདོག་འཕེལ་རྒྱས་ཀྱི་ལམ་བུར་གོམ་སྟབས་བརྟན་པོ་སྤོས་ཡོད།

ལྷོ་བྲག་རྫོང་འཕེལ་སྒྱུར་ཨུ་ལྷན་གྱི་ཀྲུའུ་རེན་བཀྲ་ཤིས་དར་རྒྱས་ཀྱིས་གསར་འགོད་པའི་བཅར་འདྲི་དང་ལེན་བྱེད་སྐབས་ངོ་སྤྲོད་བྱས་པར་གཞིགས་ན། ད་ཆ་ལྷོ་བྲག་རྫོང་གི་ཐོན་ལས་རྣམ་པ་སྣ་མང་ཡིན་པ་དང་སྲོལ་རྒྱུན་གྱི་ཞིང་འབྲོག་ལས་ཕུད། ནུས་རྒྱུ་གཙང་མའི་ཐོན་ལས་ཀྱང་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ནས་དཔལ་འབྱོར་འཕར་གཞི་གསར་པར་གྱུར་ཡོད། དེ་དང་ཆབས་ཅིག་ལྷོ་བྲག་རྫོང་གིས་ཡུལ་སྐོར་ཞབས་ཞུའི་སྤུས་ཚད་མཐོ་རུ་གཏོང་ཆེད། ས་གནས་དེ་གས་སྔ་རྗེས་སུ་མ་དངུལ་བཏང་ནས་དམངས་སྲོལ་གནས་ཚང་ལེགས་གཏོང་གི་སྒྱུར་བཀོད་རྣམ་གྲངས་ལག་བསྟར་བྱས་པ་དང་། ཡུལ་སྐོར་ལས་གཉེར་མི་སྣའི་གསོ་སྦྱོང་འཛིན་གྲྭ་ཞིབ་ཚགས་གཉེར་ནས་ཡུལ་སྐོར་ལས་གཉེར་མི་སྣའི་ཆེད་ལས་བྱང་ཚད་དང་ཞབས་ཞུའི་ཆུ་ཚད་ཕྱོགས་ཡོངས་ནས་མཐོ་རུ་བཏང་ཡོད། མིག་སྔའི་བར་རྫོང་ཡོངས་སུ་ཁྱོན་བསྡོམས་དམངས་སྲོལ་གནས་ཚང་71གཉེར་འགོ་ཚུགས་པ་དང་། 2025ལོའི་ལོ་སྟོད་དུ་ལྷོ་བྲག་རྫོང་གིས་ཡུལ་སྐོར་བ་མི་ཐེངས་ཁྲི་8.55ལ་སྣེ་ལེན་ཞུས་པ་དང་ཡུལ་སྐོར་གྱི་ཡོང་འབབ་སྒོར་ཁྲི་763.11བྱུང་བ་དེ་དུས་མཚུངས་ལས་58.86%དང་33.07%སོ་སོར་འཕར་ཡོད།