“སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀ་ལ་གྲོང་ཚོའི་ཡུལ་མིར་འཕྲིན་ལན་སྤྲིངས་པ་མཐོང་སྐབས། ང་ཚོར་ལྕག་སྐུལ་ཆེན་པོ་ཐེབས་བྱུང”ཞེས་མངའ་རིས་ས་ཁུལ་རུ་ཐོག་རྫོང་སྡེ་རུབ་གྲོང་ཚོའི་ལྟ་སྐུལ་ཨུ་ལྷན་གྱི་ཀྲུའུ་རེན་ཨོ་རྒྱན་ནོར་བུས་བཤད་པ་དང་། ཁོང་གིས་ཉེ་བའི་ལོ་ཤས་རིང་སྡེ་རུབ་གྲོང་ཚོས་ཐོག་མཐའ་བར་གསུམ་དུ་གྲོང་ཚོའི་མཉམ་ལས་ཁང་གི་ཐོན་ལས་དར་རྒྱས་གཏོང་བའི་ལམ་བུར་བློ་བརྟན་འགྱུར་མེད་ངང་བསྐྱོད་ཅིང་། རྒྱལ་ཁབ་ཀྱི་གཟིགས་སྐྱོང་སྲིད་ཇུས་རབ་དང་རིམ་པའི་འདེགས་སྐྱོར་ཤུགས་ཆེན་འོག གྲོང་ཚོར་ས་གནས་དེ་གའི་ཁྱད་ལྡན་ཁུ་ལུ་དཀར་པོའི་ར་གསོ་ཚགས་འཕེལ་རྒྱས་ཤུགས་ཆེན་བཏང་བ་མ་ཟད། མཚོ་མོ་ངང་ལྷའི་རྒྱ་ལྕང་སྡོང་ཕྲུག་རྟེན་གཞི་སོགས་ཁྱད་ལྡན་རྣམ་གྲངས་གསར་སྤེལ་ཡང་བྱས་ཡོད། ན་ནིང་ང་ཚོའི་གྲོང་ཚོར་སྒོར་ཁྲི་225བགོ་འགྲེམས་བརྒྱབ་པ་དེ་དག་ཏང་གི་སྲིད་ཇུས་བཟང་པོ་དང་ཁ་འབྲལ་ཐབས་མེད་པས། ཀ་ལ་གྲོང་ཚོའི་ཡུལ་མིས་བྱང་སྐར་སྤུན་བདུན་གྱི་ལམ་སྟོན་ཇི་བཞིན་བསྐྱོད་ན་ལམ་ནོར་ཐེབས་མི་སྲིད་པ་དང་། གུང་ཁྲན་ཏང་གི་རྗེས་སུ་འབྲངས་ན་བདེ་སྐྱིད་ཐོབ་ངེས་རེད་ཅེས་ཤོད་པ་ལྟར་རེད། རྗེས་མའི་ལས་དོན་ཁྲོད་ངས་ཡུལ་མི་ཚོ་དང་མཉམ་དུ་མུ་མཐུད་འབད་འཐབ་ལྷོད་མེད་བྱས་ཏེ་ལོ་མཇུག་ཏུ་ཡོང་འབབ་ལྡབ་གཅིག་འཕར་ཐུབ་པའི་བརྩོན་ལེན་བྱ་རྒྱུ་དང་ཆབས་ཅིག སྡོང་ཕྲུག་རྟེན་གཞི་ངེས་པར་དུ་ལྟ་སྐྱོང་ཡག་པོ་བྱས་ནས། ཕ་ཡུལ་གྱི་རང་བྱུང་ཁོར་ཡུག་ལ་རང་ཉིད་ཀྱི་སྟོབས་ཤུགས་ལེགས་སྐྱེས་སུ་འབུལ་གྱི་ཡིན་ཞེས་བཤད།

མངའ་རིས་ས་ཁུལ་སྒར་རྫོང་སེང་གེ་ཁ་འབབ་གྲོང་རྡལ་གཙང་པོ་སྡེ་ཁུལ་ཏང་སྤྱི་ཁྱབ་ཀྲི་པུའི་ཧྲུའུ་ཅི་ཕུན་ཚོགས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀ་ལ་གྲོང་ཚོའི་ཡུལ་མིར་འཕྲིན་ལན་སྤྲིངས་པའི་གནས་ཚུལ་ཐོས་སྐབས་སེམས་གཏིང་གི་དགའ་ཚོར་གནོན་མི་ཐུབ་པ་བྱུང་། ཁོང་གིས“ཉེ་བའི་ལོ་འགའི་རིང་། ཏང་གི་སྲིད་ཇུས་བཟང་པོར་བརྟེན་ནས་གཙང་པོ་སྡེ་ཁུལ་ལ་འགྱུར་ལྡོག་ཆེན་པོ་བྱུང་ཡོད། རྨང་གཞིའི་སྒྲིག་བཀོད་ཉིན་རེ་བཞིན་འཐུས་སྒོ་ཚང་དུ་ཕྱིན་པ་དང་། ཆུ་གློག་དྲོད་རླངས་མཁོ་སྤྲོད་བརྟན་པོ་བྱུང་བ། གཞི་རིམ་བཅོས་སྐྱོང་ཚད་ལྡན་དང་གོ་རིམ་ལྡན་པ་བཅས་མཉམ་བཅོས་མཉམ་སྤྱོད་ཀྱི་ཞི་མཐུན་རྣམ་པས་མི་སེམས་དྲོད་ནས་འཚོ་བ་ཉིན་རེ་བཞིན་ཡག་ཏུ་འགྲོ་བཞིན་ཡོད”ཅེས་བཤད།

གཙང་པོ་སྡེ་ཁུལ་ནི་མི་རིགས་མང་པོ་འདུས་སྡོད་ཀྱི་སྡེ་ཁུལ་ཞིག་ཡིན་པ་དང་། དེར་རྒྱ་རིགས་དང་། བོད་རིགས། ཡུ་གུར་རིགས་སོགས་མི་རིགས་ཁག་15ཡོད། དེར་མི་རིགས་ཚང་མ་ཁྱིམ་ཚང་གཅིག་ལྟར་འཆམ་མཐུན་དང་། ཕན་ཚུན་རོགས་རེས་ཀྱིས་མཉམ་དུ་འཕེལ་རྒྱས་གཏོང་བཞིན་ཡོད། “སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མི་རིགས་མཐུན་སྒྲིལ་སྲུང་སྐྱོང་ཏན་ཏིག་དང་ཡག་པོ་བྱས་ནས་དེ་བས་བདེ་སྐྱིད་དང་མཛེས་སྡུག་ལྡན་པའི་འཚོ་བ་གཏོད་དགོས་པའི་ནན་བཤད་གནང་ཡོད། དེ་ནི་ང་ཚོ་གཙང་པོ་སྡེ་ཁུལ་གྱིས་སྔ་བར་ཕྱི་གསུམ་དུ་འབད་བརྩོན་བྱ་ཡུལ་ཞིག་ཡིན། སྡེ་ཁུལ་གྱིས་མི་རིགས་མཐུན་སྒྲིལ་གྱི་བྱེད་སྒོ་ཡང་ཡང་སྒྲིག་འཛུགས་བྱས་ནས་མཉམ་དུ་གླུ་ལེན་གར་འཁྲབ་དང་ཞིམ་ཟས་ལ་རོལ་ཏེ་བྱེད་སྒོའི་ཁྲོད་ནས་ཕན་ཚུན་དབར་གྱི་བརྩེ་བ་ཟབ་ཏུ་གཏོང་གི་ཡོད”ཅེས་ཕུན་ཚོགས་ཀྱིས་ངོ་སྤྲོད་བྱས།

མཐའ་མཚམས་གྲོང་ཚོ་ཡིན་པའི་སྒར་རྫོང་བཀྲ་ཤིས་སྒང་ཤང་བདེ་མཆོག་གྲོང་ཚོར་མཐའ་སྲུང་མཐའ་བརྟན་གྱི་དད་སེམས་ཡུལ་མི་ཚོའི་སེམས་སུ་གཏིང་ཟབ་ཟུག་ཡོད། “སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གནང་བའི་འཕྲིན་ལན་གལ་ཆེན་གྱིས་ང་ཚོའི་སེམས་ཤུགས་སྔར་བས་ཆེ་རུ་ཕྱིན་སོང་། གྲོང་ཚོའི་རྣམ་པ་གསར་པར་གྱུར་པ་ནི་ཏང་རྩ་འཛུགས་ཀྱིས་ང་ཚོའི་སྣེ་ཁྲིད་དེ་ལས་དོན་བསྒྲུབས་པ་ལས་བྱུང་བ་ཞིག་ཡིན་པས། མཐའ་སྲུང་མཐའ་བརྟན་གྱི་ལམ་བུར་ང་ཚོས་ཕྱིར་འཐེན་རྩ་བ་ནས་བྱེད་མི་སྲིད”ཅེས་བདེ་མཆོག་གྲོང་ཚོའི་གྲོང་གསེབ་དར་རྒྱས་ཀྱི་ཆེད་བསྐོས་པ་ཚེ་རིང་གཡང་འཛོམས་ཀྱིས་བློ་རྩ་བརྟན་པོའི་ངང་བཤད།

ཏང་དང་སྲིད་གཞུང་གི་ཐུགས་ཁུར་འོག ད་ཆ་བདེ་མཆོག་གྲོང་ཚོ་སྔོན་མའི་དབུལ་ཕོངས་དང་རྗེས་ལུས་ཀྱི་གནས་ལས་བྲལ་ཏེ། ཡུལ་མི་རྣམས་རྡོ་རྩིག་ཁང་པ་ནས་ཉིས་ཐོག་ཅན་གྱི་ཁང་གསར་དུ་སྤོས་པ་དང་འཚོ་བར་གནམ་ས་བླ་འོག་ཏུ་གྱུར་བ་ལྟ་བུའི་འགྱུར་ལྡོག་བྱུང་སྟེ། གྲོང་ཚོར་ཆུ་གློག་དྲ་རྒྱ་ཤར་གཏོང་ཐུབ་ནས་རྨང་གཞིའི་སྒྲིག་བཀོད་ཆ་ཚང་བ་ཡོད་པ་རེད།