ཤིན་ཧྭ་གསར་འགྱུར་ཁང་ཏ་ལེན་ནས་གློག་འཕྲིན་འབྱོར་གསལ། ལུས་ལ“སྐར་ཚོགས”རྐང་རྩེད་སྤོ་ལོའི་གོས་གྱོན་པའི་རུ་མི་རྣམས་གངས་ལྗོངས་ས་མཐོ་ནས“རྐང་རྩེད་སྤོ་ལོའི་གྲོང་ཁྱེར”ཏ་ལེན་དུ་སྦྱོང་བརྡར་དང་། སྤོ་ལོར་ལྟ་བ། འགྲན་བསྡུར་བཅས་བྱེད་པར་བསྐྱོད་ཅིང་། ཁོང་ཚོའི་མིག་ནང་ཡ་མཚན་དང་། སྤྲོ་སེམས། ཡིད་སྨོན་བཅས་ཀྱིས་ཁེངས་ཡོད།

ནག་ཆུ་གྲོང་ཁྱེར་ནས་ཡིན་པའི“སྐར་ཚོགས”རུ་ཁག་ནི་སྐབས་འཕྲལ་བཙུགས་པའི་སྤོ་ལོའི་རུ་ཁག་གཉིས་ཡིན་ཞིང་། དེར་རུ་མི་30(བུ་15དང་བུ་མོ་15ཡོད་པ)ཡོད་པ་ནི་ནག་ཆུ་གྲོང་ཁྱེར་གྱི་མཐོ་འབྲིང་དཀྱུས་མ་5དང་ལས་རིགས་སློབ་གྲྭ་1ནས་ཡོང་བ་ཤ་སྟག་རེད། ཉེ་ཆར། སྤོ་ལོའི་རུ་ཁག་གཉིས་ཀྱིས་ཏ་ལེན་སློབ་འབྲིང་བཅུ་གཉིས་པའི་བུ་མོའི་རྐང་རྩེད་སྤོ་ལོའི་རུ་ཁག་དང་ཏ་ལེན་ཡུས་མིང་མཐོ་འབྲིང་གི་བུའི་རྐང་རྩེད་སྤོ་ལོའི་རུ་ཁག་དང་མཛའ་གྲོགས་འགྲན་བསྡུར་སོ་སོར་བྱས་པ་རེད། འགྲན་རའི་ཐོག་ཁོང་ཚོ་འགྲན་ཡ་ཡིན་ཡང་འགྲན་བསྡུར་ཚར་རྗེས་ནག་ཆུའི་བུ་མོའི་རུ་ཁག་གི་རུ་མི་ཚོས་ཏ་ལེན་སྤོ་ལོའི་རུ་ཁག་གི་སྤོ་ལོར་མཁས་པ་ཚོ་བཙལ་ནས་གཅིག་རྗེས་གཉིས་མཐུད་ངང་མཉམ་པར་རྒྱག་པ་དང་མིང་རྟགས་འགོད་རོགས་ཞུས་ཡོད།

སྤོ་ལོའི་རུ་ཁག་གི་རུ་སྣེ་ཁྲིད་མཁན་ལྷག་པ་དོན་གྲུབ་ཀྱིས། ས་མཐོའི་ཕྲུ་གུ་རྣམས་ཀྱི་དགའ་ཤོས་ནི་རྐང་རྩེད་སྤོ་ལོ་ཡིན་ལ། རྐང་རྩེད་སྤོ་ལོ་རྒྱག་མཁན་ཡང་ཧ་ཅང་མང་པོ་ཡོད། ད་ཆ་ས་མཐོར་རྐང་རྩེད་སྤོ་ལོའི་འགྲན་བསྡུར་མང་པོ་བྱེད་ཀྱི་ཡོད། ད་ཐེངས་ཁོང་ཚོ་ཏ་ལེན་དུ་ཡོང་ནས་ཏ་ལེན་གྱི་རྐང་རྩེད་སྤོ་ལོའི་གཞོན་ནུའི་སྦྱོང་བརྡར་རྟེན་གཞིར་སྦྱོང་བརྡར་བྱེད་པ་དང་། ཏ་ལེན་གྱི་སློབ་ཆེན་གཉིས་ལ་ལྟ་སྐོར་བྱེད་པ། ཏ་ལེན་ཁུན་ཁྲེང་རུ་ཁག་གི་ཀྲུང་གོ་རྐང་རྩེད་སྤོ་ལོའི་ཀ་པ་རིམ་པའི་རིམ་མཚུངས་མཉམ་འགྲན་ལ་ལྟ་བ། ལོ་མཉམ་སྤོ་ལོའི་རུ་ཁག་དང་འགྲན་བསྡུར་བཅས་བྱས་པས་མཐོང་རྒྱ་ཆེ་རུ་ཕྱིན་ཡོད།

ནག་ཆུ་གྲོང་ཁྱེར་ནི་ལེའོ་ཉིང་ཞིང་ཆེན་གྱི་ཁ་གཏད་རོགས་སྐྱོར་ས་ཁུལ་ཞིག་ཡིན་ཞིང་། ཏ་ལེན་གྲོང་ཁྱེར་སློབ་གསོ་ཅུས་དང་ནག་ཆུ་གྲོང་ཁྱེར་སློབ་གསོ་ཅུས་དབར་མཉམ་སྐྲུན་རོགས་སྐྱོར་སྒྲོམ་གཞིའི་གྲོས་མཐུན་བཞག་ནས། ཕྱོགས་གཉིས་པོས་སློབ་གཉེར་ཉམས་མྱོང་དང་། རིག་ཚན་འཛུགས་སྐྱོང་། དགེ་རྒན་གསོ་སྦྱོང་། སློབ་མ་ཕན་ཚུན་འཚམས་འདྲི། སློབ་ཁྲིད་ཐོན་ཁུངས་མཉམ་སྤྱོད། ལུས་རྩལ་འགྲན་བསྡུར་སོགས་ཐད་ཀྱི་སྤེལ་རེས་ལ་སྔར་བས་ཤུགས་སྣོན་རྒྱག་རྒྱུ་རེད།