ལོ་སྟོད་དུ་རྒྱལ་ཁབ་གློག་དྲས་གཏན་འཇགས་རྒྱུ་ནོར་ལ་མ་དངུལ་སྒོར་དུང་ཕྱུར་2700ལྷག་ཙམ་བཏང་ནས་ལོ་རྒྱུས་དུས་མཚུངས་ཀྱི་མཐོ་ཤོས་སུ་སླེབས་པ་དེ་དུས་མཚུངས་ལས་11.7%འཕར་ཡོད།

གསར་འགོད་པར་རྒྱལ་ཁབ་གློག་དྲ་ནས་ཤེས་རྟོགས་བྱུང་བར། ལོ་སྟོད་དུ་རྒྱལ་ཁབ་གློག་དྲས་གཏན་འཇགས་རྒྱུ་ནོར་ལ་མ་དངུལ་སྒོར་དུང་ཕྱུར་2700ལྷག་ཙམ་བཏང་ནས་ལོ་རྒྱུས་དུས་མཚུངས་ཀྱི་མཐོ་ཤོས་སུ་སླེབས་པ་དེ་དུས་མཚུངས་ལས་11.7%འཕར་ཡོད། གཉེར་སྐྱོང་ཁུལ་ཁོངས་ནང་རླུང་གློག་དང་འོད་ཤུགས་ནུས་རྒྱུ་གསར་པ་གསར་འཕར་བྱུང་ནས་དྲ་སྦྲེལ་ཤོང་ཚད་ཆན་ཝ་དུང་ཕྱུར་2.03ཟིན་པ་དེ་དུས་མཚུངས་ལས་108.7%འཕར་བ་དང་། རིམ་རྩིས་བརྒྱབ་ན་དྲ་སྦྲེལ་ཤོང་ཚད་ཆན་ཝ་དུང་ཕྱུར་13.4ཟིན་ཡོད།

ལུང་ཏུང་ནས་ཧྲན་ཏུང་དང་། ཧ་སྨི་ནས་ཁྲུང་ཆིང་སོགས་ཀྱི་ཆེས་མཐོ་གནོན་ལས་གྲྭ་གཅིག་རྗེས་གཉིས་མཐུད་དུ་གཉེར་འགོ་ཚུགས་ནས་གློག་བཏང་སྟེ། ནུས་རྒྱུ་གསར་པ་ཕྱིར་སྐྱེལ་འདྲེན་སྤྱོད་ལ་འདེགས་སྐྱོར་ནུས་ལྡན་བྱས་པ་དང་། ལེའོ་ཉིང་ཆིང་ཡོན་དང་ཀྲེ་ཅང་ཉིང་ཧའེ་ཡི་ཆུ་འཐེན་ནུས་གསོག་གློག་ཁང་གཉིས་ཕྱོགས་ཡོངས་ནས་གཉེར་འགོ་ཚུགས་ཏེ། ཆུ་འཐེན་ནུས་གསོག་གི་གསར་དུ་འཕར་བའི་གློག་འདོན་འཕྲུལ་འཁོར་ནས་གློག་གཏོང་ཚད་ཆན་ཝ་ཁྲི་257.5ཟིན་ཏེ་ལོ་འཁོར་གྱི་གཉེར་སྐྱོང་བྱེད་འགོ་ཚུགས་པའི་འཛུགས་སྐྲུན་ལས་འགན་གྱི་70%ལེགས་སྒྲུབ་ཟིན་ཡོད།

ཤེས་རྟོགས་བྱུང་བར་གཞིགས་ན། ལོ་སྨད་དུ་རྒྱལ་ཁབ་གློག་དྲས་ཅིན་ཧྲང་ནས་ཧུའུ་པེ་དང་། མོང་ཤིས་ནས་པེ་ཅིང་དང་། ཐེན་ཅིན། ཧོ་པེ་བཅས། བོད་ཤར་ལྷོ་དང་གཡོད་ཀང་ཨའོ་ཁུག་ཆེན་ཁུལ་བཅས་ཀྱི་ཆེས་མཐོ་གནོན་སོགས་གཙོ་གནད་ལས་གྲྭ་གལ་ཆེན་འཛུགས་སྐྲུན་ལ་གོ་རིམ་ལྡན་པའི་ངང་སྐུལ་འདེད་གཏོང་བ་དང་། ཉིང་ཞ་ནས་ཧུའུ་ནན་སོགས་ཀྱི་ཆེས་མཐོ་གནོན་ལས་གྲྭ་ཕྱོགས་ཡོངས་ནས་གཉེར་སྐྱོང་བྱེད་འགོ་ཚུགས་པ། ཆུ་འཐེན་ནུས་གསོག་འཕྲུལ་ཚན་4སྤྱོད་འགོ་ཚུགས་པ་བཅས་བྱས་ཏེ། སྔོན་དཔག་བྱས་ན་ལོ་མཇུག་ཏུ་འཁོར་སྐྱོད་བྱེད་བཞིན་པའི་ཆུ་འཐེན་ནུས་གསོག་དང་འགུལ་ཚད་ལེགས་སྒྲིག་བྱས་པའི་ཆུ་གློག་གློག་འདོན་འཕྲུལ་འཁོར་གྱི་གཞི་ཁྱོན་ཆན་ཝ་ཁྲི་5900ཡན་ཟིན་རྒྱུ་ཡིན་པ་དེ་འབྲི་ཆུའི་འགག་གསུམ་གློག་ཁང་གི་གློག་འདོན་འཕྲུལ་འཁོར་2.5ཡི་གཞི་ཁྱོན་ལས་བརྒལ་བ་དང་མཚུངས་ཀྱི་ཡོད།