2023ལོའི་ཟླ་9པར། “ལེའོ་ཉིང་གི་ངོ་འཕྲད་གྲོས་མོལ་ཚོགས་འདུ”སྐབས་བཞི་པའི་བོད་ལྗོངས་ནག་ཆུ་གྲོང་ཁྱེར་གྱི་ཚོང་འགུགས་མ་འདྲེན་གྱི་འོས་སྦྱོར་ཚོགས་འདུ་དང་རྣམ་གྲངས་གན་འཇོག་མཛད་སྒོ་འཚོག་ཡུལ་ཡིན་པ།

2022ལོའི་ཟླ་7ཚེས་17ཉིན། “སེ་འབྲུའི་རྡོག་བཞིན་ཁྱིམ་ཚང་གཅིག་ལྟར་བརྩེ། ལེའོ་ཉིང་དང་། ཤིན་ཅང་། བོད་ལྗོངས་བཅས་ཀྱི་གཞོན་ནུ་ལོ་ཆུང་གི་དབྱར་སྒར”གྱི་འགོ་ཚུགས་མཛད་སྒོ་ཧྲེན་དབྱང་དུ་འཚོགས་པའི་རྣམ་པ་ཡིན་པ། (པར་འདི་དག་ནི་ལེའོ་ཉིང་ཞིང་ཆེན་གྱི་ཁ་གཏད་བོད་སྐྱོར་ལས་དོན་མདུན་ཕྱོགས་བཀོད་འདོམས་པུའུ་ཡིས་མཁོ་འདོན་བྱས)

ལས་གཏོད་ལས་དར་བྱས་ནས་འབབ་འཕར་ཐབས་ལམ་བཏོད་པ།

2003ལོར་ཀྲེ་ཅང་ཞིང་ཆེན་གྱིས“གྲོང་ཚོ་སྟོང་དཔེ་སྟོན་དང་གྲོང་ཚོ་ཁྲི་བཅོས་སྒྲིག”གི་ལས་གྲྭ་སྤེལ་འགོ་བཙུགས་ཤིང་། ལོ་20ལྷག་ཙམ་རིང་རྒྱུན་མཐུད་རིམ་འཇུག་བྱས་ནས་མཛེས་སྡུག་ལྡན་པའི་གྲོང་གསེབ་ཁྲི་སྟོང་བསྐྲུན་ཡོད། ད་ལྟ“ཁྲི་སྟོང་ལས་གྲྭའི”ཉམས་མྱོང་ས་མཐོ་དང་ནག་ཆུར་ཁྱབ་གདལ་བཏང་སྟེ། ཡུལ་བབ་དང་བསྟུན་པ་དང་བབ་བསྟུན་སྣེ་ཁྲིད་ཀྱིས་འབྲོག་ཁུལ་གྲོང་ཚོར“འགྱུར་ལྡོག་ཆེན་པོ”ཕྱིན་པའི་གཏམ་རྒྱུད་སླར་ཡང་བརྩམས་ཡོད།

འབྲོག་ཁུལ་དུ་གནས་པའི་ལྷ་རི་རྫོང་ཨར་རྩ་གྲོང་རྡལ་གསེར་སྟེང་ཁ་གྲོང་ཚོར་སྐྱོད་སྐབས། དེང་རབས་ཅན་གྱི་བོད་ཁང་གསར་རྐྱང་115མིག་ལམ་དུ་རིམ་བཞིན་མངོན་པ་དང་། སྲང་ལམ་གཙང་ཞིང་གྲལ་སྟར་སྒྲིག་ལ་སྤྲོ་གསེང་ལུས་སྦྱོང་སྒྲིག་ཆས་གང་དགོས་ཚང་མ་འཛོམས་འདུག 2024ལོར་ཀྲེ་ཅང་བོད་སྐྱོར་གྱིས་གསེར་སྟེང་ཁ་གྲོང་ཚོའི་གནས་འཕྲོད་མཛེས་མཐུན་གྲོང་ཚོ་འཛུགས་སྐྲུན་རྣམ་གྲངས་ལག་བསྟར་བྱས་པ་མ་ཟད། ས་འོག་ཆུ་འབུད་མ་ལག་དང་། མི་ཕྱུགས་ལོགས་དབྱེའི་ལས་གྲྭ རིག་གནས་ལུས་རྩལ་བྱེད་སྒོ་ཁུལ་སོགས་རྨང་གཞིའི་སྒྲིག་བཀོད་རིགས་12ཀྱི་ལྷན་སྦྱར་འཛུགས་སྐྲུན་བྱས་ཡོད།

མི་རྣམས་ལ་དེ་བས་སྐུལ་མ་ཐེབས་པ་ཞིག་ནི“ཁྲི་སྟོང་ལས་གྲྭའི”ཉམས་མྱོང་སློབ་སྦྱོང་དང་བེད་སྤྱོད་གཏིང་ཟབ་བྱས་པ་བརྒྱུད། གྲོང་ཚོར་གཅིག་གྱུར་གྱི་ཕྱུགས་ར་བསྐྲུན་པ་དང་། གྲོང་མི་ཚོས་དམངས་སྲོལ་གནས་ཚང་གཅིག་རྗེས་གཉིས་མཐུད་ངང་བཙུགས་པ་མ་ཟད། དབྱར་རྩྭ་དགུན་འབུ་དང་། འབྲི་མར། ཚགས་ཤ་སོགས་ས་གནས་དེ་གའི་དམིགས་བསལ་ཐོན་རྫས་བཙོངས་པར་བརྟེན། གྲོང་ཚོ་ཡོངས་ཀྱི་ཁྱིམ་ཚང་རེར་ལོ་རེར་ཆ་སྙོམས་ཡོང་འབབ་སྒོར་ཁྲི་20ལྷག་ཙམ་བྱུང་ཡོད།

གསེར་སྟེང་ཁ་གྲོང་ཚོའི་འཕེལ་རྒྱས་དང་འཕོ་འགྱུར་ནི་དཔེ་མཚོན་ཙམ་ཞིག་རེད། ལོ་གསུམ་རིང་། ཀྲེ་ཅང་གིས་རིམ་རྩིས་བརྒྱབ་ན། མ་དངུལ་སྒོར་དུང་ཕྱུར་17.7བཏང་སྟེ་རིགས་ཆེ་བ་5ཡི་རྣམ་གྲངས་ཁག་167ལག་བསྟར་བྱས་ནས། གྲོང་ཁྱེར་གྱི་དཔེ་ཁང་དང་། ཧང་ཅཱ་སྨན་ཁང་། གསའ་ཕུ་མཛེས་ལྗོངས་ཁུལ་གྱི་ཡུལ་སྐོར་ལྟེ་གནས་སོགས་མཚོན་རྟགས་རང་བཞིན་གྱི་ལས་གྲྭ་འབོར་ཆེན་བསྐྲུན་པ་དང་། ལྷག་པར་དུ། ཀྲེ་ཅང་ནུས་རྒྱུ་ཚོགས་པ་ཚད་ཡོད་ཀུང་སི་ལྷ་རི་རྫོང་འཚམས་ཁང་ཀྲའོ་ཝ་50ཡི་འོད་ཤུགས་ནུས་གསོག་དང་། ནག་ཆུའི་ཧྲེན་ལི་དུས་རབས་ཐང་ཆེན། ནག་ཆུའི་རྩེར་སོན་སྐྱེ་ཁམས་ཨར་ཁང་སོགས་ཀྱི་རྣམ་གྲངས་ལག་ལེན་བསྟར་ནས་ནག་ཆུའི་འཕེལ་རྒྱས་ལ་ཡུན་རིང་གི་སྒུལ་ཤུགས་གསར་པ་བསྣན་ཡོད།

ལོ་གསུམ་རིང་། ལེའོ་ཉིང་བོད་སྐྱོར་གྱིས་རིམ་རྩིས་བརྒྱབ་ན། བོད་སྐྱོར་མ་དངུལ་སྒོར་དུང་ཕྱུར་7.23དོན་འཁྱོལ་བྱས་ནས་བོད་སྐྱོར་རྣམ་གྲངས་ཁག་95ལག་བསྟར་བྱས་ཡོད།

ལེའོ་ཉིང་བོད་སྐྱོར་གྱིས་གཙོ་བོ་རིག་གནས་ཡུལ་སྐོར་དང་། ས་མཐོའི་བཟའ་བཅའ་ལས་སྣོན། ནུས་རྒྱུ་གཙང་མ་གསར་སྤེལ་སོགས་ཐད་ཚོང་འགུགས་མ་འདྲེན་བྱེད་ཤུགས་ཆེ་རུ་བཏང་ནས་ཁེ་ལས་ནག་ཆུར་རྟོག་ཞིབ་བྱེད་པར་གདན་དྲངས་པ་དང་ཆབས་ཅིག འདོད་མོས་ཡོད་པའི་རྣམ་གྲངས་འབྲེལ་མཐུད་བྱས་ཤིང་། རིམ་རྩིས་བརྒྱབ་ན། ཚོང་འགུགས་མ་འདྲེན་གྱི་བྱེད་སྒོ་ཐེངས་33སྤེལ་ཡོད། 2023ལོར་ལེའོ་ཉིང་བོད་སྐྱོར་གྱི་ཚོང་འགུགས་མ་འདྲེན་རྣམ་གྲངས་ཁག་7ཡོད་པ་དང་མ་དངུལ་སྒོར་དུང་ཕྱུར་2.55དམིགས་སར་འབྱོར་ནས་ལོ་འཁོར་གྱི་དམིགས་ཚད་ལས་འགན་གྱི་209.56%ལེགས་གྲུབ་བྱུང་བ་དང་། 2024ལོར་ལེའོ་ཉིང་བོད་སྐྱོར་གྱི་ཚོང་འགུགས་མ་འདྲེན་ལས་འགན་སྒོར་དུང་ཕྱུར་4.8ཡིན་པ་ལས་སྒོར་དུང་ཕྱུར་6.88ལེགས་གྲུབ་ཟིན་ཏེ། ལེགས་གྲུབ་བྱུང་ཚད143.3%གྱི་ཐོག་ནས་བོད་སྐྱོར་ཞིང་ཆེན་དང་གྲོང་ཁྱེར་17ནང་ནས་ཨང་དང་པོར་བརྟན་པོར་གནས་ཡོད།

ལྟ་རེས་སྐྱོང་རེས་བྱས་ནས་དམངས་འཚོའི་རྨང་གཞི་བརྟན་དུ་བཏང་བ།

ལོ་གསུམ་རིང་། མི་དམངས་མང་ཚོགས་ཀྱི་བདེ་ཐང་གི་རེ་སྒུག་གསར་པར་དམིགས་ཏེ། ལེའོ་ཉིང་བོད་སྐྱོར་གྱིས་ལེའོ་ཉིང་རྒྱབ་ཕྱོགས་ཆེན་པོའི་རྒྱབ་སྐྱོར་བརྩོན་ལེན་ཧུར་ཐག་བྱས་ཏེ། ས་བབ་མཐོ་བའི་ས་ཁུལ་གྱི་སྨན་བཅོས་ཀྱི་སྟོང་ཆ་རེ་རེ་བཞིན་བསྐངས་ནས་ཚེ་སྲོག་གི་ངོ་མཚར་གྲངས་མེད་བཏོད་ཡོད།

དུས་ཀྱི་མཚམས་ཚིགས་རེ་རེར་ལེའོ་ཉིང་བོད་སྐྱོར་གྱིས་ནག་ཆུ་གྲོང་ཁྱེར་མི་དམངས་སྨན་ཁང་གི“ལྟེ་གནས་ལྔ”འཛུགས་སྐྲུན་ལ་སྐུལ་འདེད་ཤུགས་ཆེན་བཏང་བའི་བྱས་རྗེས་རླབས་པོ་ཆེའི་བདེན་དཔང་བྱས་ཤིང་། 2023ལོའི་ཟླ་6པར་ནག་ཆུ་གྲོང་ཁྱེར་གྱི་ཕྲུ་གུ་དམར་འབྱར་སྐྱོབ་བཅོས་ལྟེ་གནས་བསྐྲུན་པ་དང་། 2024ལོའི་ཟླ་10པར“ཀྲུང་གོའི་རྨས་སྐྱོན་སྐྱོབ་བཅོས་མནའ་འབྲེལ་གྱི་ཁོངས་མིའི་ཚན་པར”གྱུར་ནས་སྒོ་བྱང་བཀལ་བ་མ་ཟད། ལོ་དེར་ནག་ཆུ་གྲོང་ཁྱེར་རྨས་སྐྱོན་སྐྱོབ་བཅོས་ལྟེ་གནས་བསྐྲུན་པ། 2024ལོའི་ཟླ་12པར་ནག་ཆུ་གྲོང་ཁྱེར་གྱི་གཟའ་གྲིབ་ལྟེ་གནས(ས་མཐོའི་ཁུལ་གྱི་རིམ་པ་གཉིས་པའི་གཟའ་གྲིབ་ལྟེ་གནས)བསྐྲུན་པ། 2025ལོའི་ཟླ་4པར་རྒྱལ་ཁབ་བྲང་གཟེར་ལྟེ་གནས(གཞི་རིམ་པར་གཞི)ཀྱི་ཞིབ་དཔྱད་ཁས་ལེན་ཐོབ་པ་བརྒྱུད་ནག་ཆུ་གྲོང་ཁྱེར་བྲང་གཟེར་ལྟེ་གནས་བསྐྲུན་པ་རེད།

དེ་དག་གི་ཁར་2021ལོའི་ཟླ་12པར་བསྐྲུན་པའི་ནག་ཆུ་གྲོང་ཁྱེར་གྱི་ཉེན་ཆེའི་སྦྲུམ་མ་སྐྱོབ་བཅོས་ལྟེ་གནས་བསྣན་ན་ནག་ཆུ་གྲོང་ཁྱེར་མི་དམངས་སྨན་ཁང་གི“ལྟེ་གནས་ལྔ”འཛུགས་སྐྲུན་གྱི་ལས་འགན་ཚང་མ་ལེགས་གྲུབ་ཟིན་ཡོད། དེ་དང་ཆབས་ཅིག་ལེའོ་ཉིང་བོད་སྐྱོར་སྨན་བཅོས་ཤེས་ལྡན་པས“དགེ་རྒན་གྱིས་དགེ་ཕྲུག་ཁྲིད་པ”དང“རིགས་གཅིག་མཁས་ཅན་གྱིས་རྐང་འཛིན་པ་ཁྲིད་པའི”བྱ་ཐབས་བརྒྱུད་ནམ་ཡང་གནས་ཐུབ་པའི་སྨན་བཅོས་རིགས་གཅིག་མཁས་ཅན་ཚོགས་པ་ཞིག་བཙུགས་ཡོད།

“བདེ་ཐང་གི་མཚོན་ཐིག”ཡག་པོ་བསྲུངས་པས་ཀྲེ་ཅང་གི་བོད་སྐྱོར་ལ་བཀྲག་མདངས་འཚེར་ས་མང་པོ་ཐོན་ཞིང་། ཀྲེ་ཅང་ཞིང་ཆེན་ནང་ཁུལ་གྱི་སྨན་ཁང་གིས་ནག་ཆུར་ཆ་སྒྲིག་རོགས་སྐྱོར་གནད་སྨིན་བྱེད་པར་སྐུལ་འདེད་བཏང་ནས་ས་མཐོའི་གསོ་རིག་ཞིབ་འཇུག་གི་མཉམ་ལས་བྱས་པ་དང་། ནག་ཆུ་གྲོང་ཁྱེར་ལ་ས་མཐོའི་གསོ་རིག་ཞིབ་འཇུག་དང་བདེ་ཐང་དོ་དམ་ལྟེ་གནས་ལོགས་སུ་འཛུགས་པར་མཛུབ་ཁྲིད་བྱས་པ་དེ་རྒྱལ་ཡོངས་ཀྱི་གྲོང་ཁྱེར་རིམ་པའི་ལྟེ་གནས་འབའ་ཞིག་ཏུ་གྱུར་པ། ནག་ཆུ་གྲོང་ཁྱེར་གྱི་2025ལོའི་ཀྲུང་དབྱང་ནོར་སྲིད་ཀྱིས་གཞུང་བཙུགས་སྨན་ཁང་སྒྱུར་བཅོས་དང་སྤུས་ཚད་མཐོ་བའི་འཕེལ་རྒྱས་ལ་རྒྱབ་སྐྱོར་བྱེད་པའི་དཔེ་སྟོན་རྣམ་གྲངས་རེ་ཞུའི་ལས་དོན་ལ་སྣེ་ཁྲིད་བྱས་ཏེ། ནག་ཆུ་གྲོང་ཁྱེར་གྱི་མྱུར་སྐྱོབ་གྲངས་འཛིན་ཅན་འཛུགས་སྐྲུན་བྱེད་འགོ་ཚུགས་པ། ཀྲེ་ཅང་སློབ་ཆེན་སྨན་ཁང་གཉིས་པའི་དྲ་སྦྲེལ་སྨན་ཁང་ནག་ཆུ་གྲོང་ཁྱེར་སྨན་རྩིས་ཁང་གི་ཡན་ལག་སྨན་ཁང་འཛུགས་པར་སྐུལ་འདེད་བཏང་བ། ས་བབ་མཐོ་ཚད་སྨི་4700ལྷག་ཙམ་ཡོད་པའི་དཔལ་མགོན་རྫོང་དུ་སྨན་བཅོས་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་བྱེད་ཐེངས་དང་པོར་ཕན་འབྲས་མངོན་གསལ་དོད་པོ་ཐོན་པ། མི་ཐེངས་1200ལྷག་ཙམ་ལ་སེམས་ཁམས་ནད་རྒྱང་བསྟེན་སྨན་བཅོས་བྱས་པ་དང“དྲ་ཐོག་སེམས་ཁམས”བྱེད་སྒོའི་སྤུས་རྟགས་ལ་ཁས་ལེན་ཐོབ་པ། སྤུས་ལེགས་སྨན་བཅོས་ཐོན་ཁུངས་སྤྱི་ཕན་རང་བཞིན་གྱི་སྒོ་ནས་གཞི་རིམ་ལ་ཕྱོགས་རྒྱུར་སྐུལ་འདེད་བཏང་སྟེ“མགོ་བཀྱག་སྐེད་འདྲོང”དང“བོད་དུ་འོད་སྣང་སྦྱིན”སོགས་ཀྱི་བརྗོད་དོན་གཙོ་བོའི་སྨན་བཅོས་བྱེད་སྒོ་སྤེལ་ནས་སྒལ་ཚིགས་ཡ་མ་གཟུགས་དང་ལྷན་སྐྱེས་སྙིང་ནད་སོགས་ཀྱི་ནད་པ་1000ལྷག་ཙམ་ལ་སྐྱོབ་བཅོས་བྱས་ཡོད།

“རིག་སྟོབས་ཆེར་གཏོང”ནི་ཀྲེ་ཅང་གི་སློབ་གསོའི་བོད་སྐྱོར་གྱི་ཤུགས་རྒྱག་ས་དང་ཚད་བརྒལ་བྱེད་ས་ཞིག་རེད། “གསེར་གྱི་སེ་འབྲུའི”ཕུལ་བྱུང་གསོ་སྐྱོང་བྱ་སྤྱོད་དང་།“ཚོགས་སྒྲིག་རྣམ་པའི”བོད་སྐྱོར། སློབ་གསོ་མཉམ་ལས་འཕེལ་རྒྱས་ཀྱི་གཅིག་མཐུན་ཚོགས་པ་སོགས“གསེར་གྱི་མིང་བྱང་གསུམ”བཏོད་པ་དང་། བྱང་ཐང་གི་གཤོག་པ་ཆག་པའི་ཕོ་ཉའི་མངགས་བཅོལ་གསོ་སྐྱོང་འཆར་གཞི་ལག་བསྟར་དང་། ཀྲེ་ཅང་དང་ནག་ཆུའི་དམིགས་བསལ་སློབ་གསོ་འཕེལ་རྒྱས་མནའ་འབྲེལ་བཙུགས་པ། “ཚོགས་སྒྲིག་རྣམ་པའི”སློབ་གསོའི་བོད་སྐྱོར་ལ་རྒྱབ་སྐྱོར་བཅས་བྱས་པ་བརྒྱུད། ལྷ་སའི་ནག་ཆུ་མཐོ་འབྲིང་དང་པོའི་མཐོ་རྒྱུགས་སྦྱངས་འབྲས་ཀྱིས་ལོ་རྒྱུས་ཀྱི་ཟིན་ཐོ་བསྟུད་མར་བཏོད་ནས་2024ལོར་རྒྱུགས་འཕྲོད་ཚད་100%ཟིན་ཡོད།

ཟིན་ཐོ་བསྟུད་མར་གཏོད་མཁན་གྲས་སུ་ད་དུང་ལྷ་སའི་ནག་ཆུ་མཐོ་འབྲིང་གཉིས་པའང་ཡོད། ལེའོ་ཉིང་བོད་སྐྱོར་དགེ་རྒན་གྱི་མཛུབ་ཁྲིད་འོག་ལེའོ་ཉིང་ཞིང་ཆེན་གྱིས་ཁ་གཏད་རོགས་སྐྱོར་བྱ་ཡུལ་ལྷ་སའི་ནག་ཆུ་མཐོ་འབྲིང་གཉིས་པར“2023ལོའི་ལོ་འཁོར་གྱི་ནག་ཆུ་གྲོང་ཁྱེར་མཐོ་འབྲིང་དུས་རིམ་གྱི་སློབ་ཁྲིད་སྤུས་ཚད་ཨང་དང་པོ”དང་རང་སྐྱོང་ལྗོངས་མི་རིགས་མཐུན་སྒྲིལ་ཡར་ཐོན་དཔེ་བཟང་སློབ་གྲྭའི་གཟི་བརྗིད་མཚན་སྙན་ཐོབ་ཡོད།

ལེའོ་ཉིང་བོད་སྐྱོར་གྱིས“ཚོགས་སྒྲིག་རྣམ་པའི”བོད་སྐྱོར་དགེ་རྒན་གྱི“རྒན་པས་གཞོན་པ་ཁྲིད་པའི་འདུ་འགོད”ཀྱི་དགེ་རྒན་དང་དགེ་ཕྲུག་ཆ་སྒྲིག་རོགས་སྐྱོར་མཛད་སྒོ་འཚོགས་ཏེ། ས་གནས་དེ་གའི་ན་གཞོན་དགེ་རྒན་འཚར་ལོངས་མགྱོགས་པོ་ཡོང་བར་རམ་འདེགས་བྱས་པ་དང་། ལེའོ་ཉིང་ཞིང་ཆེན་གྱི་མཐོ་རིམ་ལས་རིགས་སློབ་གྲྭ་12ལ་2025ལོར་བོད་ནས་མཐོ་རིམ་ལས་རིགས་སློབ་གྲྭར་སློབ་མ་300བསྡུ་བའི་འཆར་གཞི་ལག་ལེན་བསྟར་བར་མཐུན་སྦྱོར་བྱས་ཏེ། བོད་ཀྱི་འབྲིང་རིམ་ལས་རིགས་སློབ་གྲྭའི་སློབ་མ་ལོ་རིམ་འཕར་བའི་འགྲོ་ལམ་ཤར་གཏོང་བྱས་པ། ལེའོ་ཉིང་ཞིང་ལས་ལས་རིགས་ལག་རྩལ་སློབ་གླིང་དང་ལེའོ་ཉིང་གསོ་རིག་སྨན་རྫས་ལས་རིགས་སློབ་གླིང་དང་མཐུན་སྦྱོར་བྱས་ཏེ། ནག་ཆུ་གྲོང་ཁྱེར་ལས་རིགས་ལག་རྩལ་སློབ་གྲྭ་དང“3+3”གྱི་འབྲིང་རིམ་དང་མཐོ་རིམ་ལས་རིགས་སློབ་གྲྭ་མཉམ་འབྲེལ་གསོ་སྐྱོང་ཚོད་ལྟ་བྱས་ནས་རོགས་སྐྱོར་བྱ་ཡུལ་གྱི་འབྲིང་རིམ་ལས་རིགས་སློབ་གྲྭའི་སློབ་གཉེར་ཆུ་ཚད་མཐོ་རུ་གཏོང་བར་སྐུལ་ཁྲིད་བྱས་ཡོད།

བརྗེ་རེས་དུས་ཚིགས་འཆར། ལོག་པའི་དུས་ལ་སླེབས། རྒྱ་ཆེའི་བོད་སྐྱོར་ལས་བྱེད་ཤེས་ལྡན་པས། ཐོག་མཐའ་བར་གསུམ་དུ་བོད་སྐྱོད་པ་རྒན་གྲས་ཀྱི་སྙིང་སྟོབས་དང་བོད་སྐྱོར་གྱི་སྙིང་སྟོབས་རྒྱུན་འཛིན་དང་དར་སྤེལ་བཏང་སྟེ། དངོས་སྒྲུབ་སྐྱེས་འབུལ་དང་། རང་འགན་གཙང་སྒྲུབ། མགོ་ཡོད་མཇུག་ཡོད། ལས་དོན་སྒྲུབ་མཁས་པ། མཛའ་བརྩེ་ཟབ་མོ། ལྷད་མེད་བརྩེ་སེམས་བཅས་ལ་བརྟེན་ནས་ནག་ཆུ་གྲོང་ཁྱེར་གྱི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་བློ་གྲོས་དང་སྟོབས་ཤུགས་མུ་མཐུད་སྐྱེས་སུ་འབུལ་གྱི་ཡིན་ཞེས་མགྲིན་གཅིག་ཏུ་བརྗོད་པ་རེད།