རང་སྐྱོང་ལྗོངས་རིམ་པའི་གསར་རྩོམ་རྟེན་གཞི་ཤན་རྩ་རྫོང་དུ་བཙུགས་པ།
ཉེ་ཆར། ནག་ཆུ་གྲོང་ཁྱེར་ཤན་རྩ་རྫོང་ཨུད་དྲིལ་བསྒྲགས་པུའུ་དང་ཤན་རྩ་རྫོང་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་ཀྱིས་རིག་གནས་འཛུགས་སྐྱོང་གི་ལམ་ཚད་རྡོ་རིང་གལ་ཆེན་བསུས་ཤིང་། རང་སྐྱོང་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་ཀྱིས་ཤན་རྩ་རྫོང་ལ“ཡང་རྩེའི་ནག་ཆུ། ནག་ཚང་ཤན་རྩ། —བོད་རང་སྐྱོང་ལྗོངས་ཀྱི་པར་ལེན་མཁས་ཅན་མཐུན་ཚོགས་ཀྱི་གསར་རྩོམ་རྟེན་གཞི”དང“ནག་ཆུ་གྲོང་ཁྱེར་ཤན་རྩ་རྫོང་དུ་བཅའ་སྡོད་བོད་ལྗོངས་རྩོམ་པ་པོའི་མཐུན་ཚོགས་ཀྱི་གསར་རྩོམ་རྟེན་གཞིའི”མཚན་སྙན་སྤྲད་པ་དང་འབྲེལ། སྒོ་བྱང་སྤྲོད་པའི་མཛད་སྒོའང་འཚོགས་པ་རེད།
“འདི་ནི་རང་སྐྱོང་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་ཀྱིས་ཤན་རྩ་རྫོང་གི་རིག་གནས་ཀྱི་རྨང་གཞི་དང་འཕེལ་རྒྱས་ཀྱི་གཏིང་ཤུགས་ལ་ཚད་མཐོའི་ཁས་ལེན་བྱས་པ་ཞིག་ཡིན་ལ། ཤན་རྩ་རྫོང་གི་རིག་གནས་བྱ་གཞག་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་ཤན་རྩ་རྫོང་གི་རྩོམ་རིག་སྒྱུ་རྩལ་སྤུས་འབྲས་ལེགས་གཉེར་ལ་རམ་འདེགས་བྱེད་པའི་བྱེད་ཐབས་གལ་ཆེན་ཞིག་དེ་བས་ཀྱང་ཡིན་པས། ‘ནག་ཚང’གི་རིག་གནས་ལ་བཀྲག་མདངས་གསར་པ་འཚེར་བར་སྐུལ་འདེད་ཐེབས་ངེས་རེད”ཅེས་ཤན་རྩ་རྫོང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་ལིའུ་ཡན་ཞང་གིས་བཤད།
བོད་བྱང་ཐང་ས་མཐོར་གནས་པའི་ཤན་རྩ་རྫོང་ལ་ཐུན་མོང་མ་ཡིན་པའི་རང་བྱུང་སྐྱེ་ཁམས་དང་། མི་ཆོས་རིག་གནས་ཀྱི་ནང་དོན་གཏིང་ཟབ། ས་ཁོངས་ཀྱི་ཁྱད་ཆོས་མངོན་གསལ་དོད་པོ་བཅས་ལྡན་པས། “ནག་ཚང”རིག་གནས་ལ་ལོ་རྒྱུས་ཡུན་རིང་ལྡན་པ་དང་ཡང་རྩེའི་མཛེས་ལྗོངས་ཀྱིས་མི་སེམས་ལ་སྐུལ་མ་ཐེབས་དགོས་པ་ཞིག་ཡོད། གསར་རྩོམ་རྟེན་གཞི་ཆེན་པོ་གཉིས་བཙུགས་པ་ནི་ཤན་རྩའི་རང་བྱུང་མཛེས་པ་དང་མི་ཆོས་རིག་གནས་ཀྱི་ཉམས་འགྱུར་ལྗོངས་ཡོངས་ཀྱི་རིག་གནས་གསར་རྩོམ་གྱི་མཐོང་རྒྱའི་ནང་བཅུག་པའི་གོ་སྐབས་གལ་ཆེན་ཞིག་ཡིན་ལ། ཤན་རྩ་རྫོང་གིས་ལས་སྟེགས་རྩེ་གྲ་བརྒྱུད་ཤན་རྩའི་གཏམ་རྒྱུད་ཡག་པོ་བརྗོད་པ་དང་ཤན་རྩའི་གསུང་སྒྲ་ཁྱབ་སྤེལ་བྱེད་པའི་འགག་རྩའི་དམ་འཛིན་བྱ་གཞི་ཞིག་ཀྱང་ཡིན། རྟེན་གཞི་འདི་ཉིད་ལྗོངས་ཕྱི་ནང་གི་རིག་རྩལ་ལས་དོན་པ་དང་ཤན་རྩ་འབྲེལ་མཐུད་བྱེད་པའི་འབྲེལ་ཟམ་ཞིག་ཏུ་གྱུར་ནས། གསར་རྩོམ་བྱེད་མཁན་དེ་བས་མང་བ་གཞི་རིམ་དུ་ཟབ་སྐྱོད་དང་མང་ཚོགས་ཁྲོད་གཞི་ཚུགས་རྒྱུའི་ཡིད་དབང་བཀུག་པ་དང་། པར་ཆས་ལ་བརྟེན་ནས་ཡང་རྩེའི་རྣམ་པ་ཕབ་ལེན་དང་པིར་རྩལ་ལ་བརྟེན་ནས་འཕེལ་རྒྱས་དང་འཕོ་འགྱུར་བྲིས་ཏེ། ཏང་གི་འགོ་ཁྲིད་འོག་ཤན་རྩར་ཐོབ་པའི་འོད་སྟོང་འཕྲོ་བའི་གྲུབ་འབྲས་གསོན་ཉམས་དོད་པོས་མངོན་ཏེ། བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བར་ཤན་རྩའི་ཁྱད་ཆོས་ལྡན་པའི་རིག་གནས་ཀྱི་ཕྱག་རྟགས་ཆེན་པོ་ཞིག་འབུལ་རྒྱུ་རེད།
འབྲེལ་ཡོད་གསར་འགྱུར།