མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཟླ་7ཚེས་15ཉིན་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཀྲོའུ་ཞིང་འབྲོག་ཅུས་ཞིང་འབྲོག་ལས་ཁོའོ་ཡི་ཁོའོ་ཀྲང་མཁའ་འགྲོ་སྐྱབས་ཀྱིས“ང་ཚོས་འདེབས་འཛུགས་ལས་རིགས་ཐད་གྲངས་ཚད་སྤོར་བ་དང་ཕན་འབྲས་ཆེ་རུ་གཏོང་བ་དང་། འབྲོག་ལས་ཀྱི་ཚད་གཞི་མཐོ་རུ་དང་གྲངས་འབོར་འཕར་སྣོན། ལས་ཞུགས་ལས་གནས་བརྟན་པོ་དང་ཚད་གཞི་དང་རིམ་པ་སྤོར་བ་སོགས་ཐད་མུ་མཐུད་འབད་བརྩོན་བྱེད་བཞིན་ཡོད། ལོ་སྟོད་དུ་ཀྲོའུ་ཡོངས་ཀྱི་ཐོན་ལས་དང་པོའི་ཐོན་ཚད་སྒོར་དུང་ཕྱུར་8.29ཟིན་ནས་དུས་མཚུངས་ལས་4.45%འཕར་ཏེ་ལོ་སྟོད་ཀྱི་ཞིང་འབྲོག་ལས་དཔལ་འབྱོར་བརྟན་པོའི་ངང་འཕར་ཡོད”ཅེས་ངོ་སྤྲོད་བྱས་པ་རེད།

རྨ་ལྷོ་ཀྲོའུ་ཡིས་ཞིང་ལས་ཕྱོགས་བསྡུས་ཐོན་སྐྱེད་ནུས་པ་ཕྱོགས་ཡོངས་ནས་ཆེ་རུ་བཏང་ཞིང་། འདེབས་འཛུགས་ལས་རིགས་ཀྱི་གྲངས་འབོར་དང་ཕན་འབྲས་ཆེ་རུ་གཏོང་བའི་ཐད། འབྲུ་རིགས་ལོ་ཏོག་འདེབས་ཁྱོན་མུའུ་ཁྲི་13.05(མུའུ་1དང་སྤྱི་ཆིང་0.0667མཚུངས་པ)ཟིན་པ་དང་སྣུམ་རྒྱུའི་ལོ་ཏོག་འདེབས་ཁྱོན་མུའུ་ཁྲི་7.74ཟིན་ཡོད་པ་རེད། རེབ་གོང་གྲོང་ཁྱེར་དང་གཅན་ཚ་རྫོང་གིས་འབྲུ་རིགས་དང་སྣུམ་ཐོན་ཚད་མཐོ་བའི་དཔེ་སྟོན་ཁུལ་2སོ་སོར་བཙུགས་པ་དང་འབྲུ་རིགས་དང་པད་ཁའི་མུའུ་རེའི་ཐོན་འབབ་མཐོར་གཏོང་དང་གྲོའི“སྨན་གཏོར་གཅིག་དང་སྔོན་འགོག་གསུམ”གྱི་རྣམ་གྲངས་ལག་ལེན་བསྟར་བ་བརྒྱུད་དཔེ་སྟོན་ཁུལ་གྱི་འབྲུ་རིགས་དང་པད་ཁའི་ཐོན་ཚད་3%ཡན་མཐོ་རུ་གཏོང་རྒྱུར་སྐུལ་ཁྲིད་ཐུབ་ནས་ཞིང་ལས་ཀྱི་ཐོན་ཚད་རིན་ཐང་སྒོར་དུང་ཕྱུར་2.7ཟིན་ཡོད།

ཞིང་ཆེན་ཡོངས་ཀྱི་ནོར་ལུག་དང་འོ་མའི་ཐོན་ལས་འཕེལ་རྒྱས་བརྟན་པོ་ཡོང་བའི་བྱེད་ཐབས་བཅུ་དོན་འཁྱོལ་ཧུར་ཐག་བྱས་ཏེ་གསོ་ཚགས་ལས་རིགས་འཕེལ་རྒྱས་གཏོང་བའི་སྟོབས་ཤུགས་དང་ནུས་པ་ཆེ་རུ་བཏང་ཡོད། མིག་སྔའི་བར་ཕྱུགས་རིགས་སྣ་ཚོགས་མགོ་གྲངས་ཁྲི་21.08བཤས་བཏང་བ་དང་ཤ་དང་། འོ་མ། སྒོ་ང་བཅས་ཀྱི་ཐོན་ཚད་ཏུན་ཁྲི་0.94དང་། ཏུན་ཁྲི་1.82 ཏུན་ཁྲི་0.32བཅས་སོ་སོར་ཟིན་ནས་འབྲོག་ལས་ཀྱི་ཐོན་ཚད་རིན་ཐང་སྒོར་དུང་ཕྱུར་4.79ཟིན་ཡོད།

ལས་ཞུགས་རོགས་རམ་དང་དབུལ་ལོག་སྔོན་འགོག་ལས་དོན་ལ་དུས་མཚུངས་སུ་སྐུལ་འདེད་བཏང་ཞིང་། ལོ་སྟོད་དུ་དབུལ་སྒྲོལ་མི་འབོར་དང་ཡུལ་གཞན་དུ་དབུལ་སྐྱོར་གནས་སྤོས་ཀྱི་དབུལ་སྒྲོལ་མི་འབོར་ལས་ཞུགས་ཐུབ་ཚད་ཁྲི་2.11དང་ཁྲི་1.04སོ་སོར་ཟིན་ཡོད། “སྦྲང་ཆར་འཆར་གཞི+”ཡི་ལས་ཞུགས་སྐུལ་འདེད་བྱ་སྤྱོད་ལག་ལེན་ཏན་ཏིག་བསྟར་ཏེ“སྦྲང་ཆར་འཆར་གཞིའི”སློབ་ཞུགས་ལས་ཞུགས་བརྟན་དུ་གཏོང་ཚད་90%ཟིན་ཡོད། དབུལ་ལོག་སྔོན་འགོག་ལྟ་ཞིབ་ཚད་ལེན་ཐད་ཀྲོའུ་ཡོངས་ཀྱི་དུད་ཚང་1264ཡི་ལྟ་ཞིབ་ཚད་ལེན་བྱ་ཡུལ་5240ཁྲོད་དུད་ཚང་821གི་མི་3385ཡི་ཉེན་ཁ་བསལ་ནས་ཞིང་འབྲོག་ལས་ཀྱི་དཔལ་འབྱོར་རྒྱུན་མཐུད་འཕེལ་རྒྱས་འགྲོ་བར་འགན་ལེན་བརྟན་པོ་བྱས་ཡོད།