ནག་ཆུ་གྲོང་ཁྱེར་གྱི་ལས་བྱེད་པ་དང་མང་ཚོགས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འཕྲིན་ལན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ།
ཁྱད་ལྡན་ཐོན་ཁུངས་སྔོག་འདོན་གྱིས་ས་མཐོའི་མཛེས་མཐུན་གྲོང་གསེབ་སྐྲུན་པ།
“ཏང་གི་སྲིད་ཇུས་བཟང་པོའི་འོག་ང་ཚོའི་གྲོང་ཚོས་ས་ཆ་འདིའི་སྤུས་ལེགས་ཀྱི་ཆུའི་ཐོན་ཁུངས་བེད་སྤྱད་དེ་ཆུའི་བཟོ་གྲྭ་བཙུགས་པས། ཐོན་ལས་མགྱོགས་མྱུར་འཕེལ་རྒྱས་འགྲོ་བཞིན་ཡོད” བྱ་མང་ཤང་རྡོ་འབུམ་ཐང་གྲོང་ཚོའི་གཏེར་ཆུ་བཟོ་གྲྭ་ནི་ནག་ཆུ་གྲོང་ཁྱེར་སྦྲ་ཆེན་རྫོང་གི་ཁྱད་ལྡན་ཐོན་ལས་རྣམ་གྲངས་ཤིག་ཡིན་པ་དང་། འཁོར་སྐྱོད་བྱས་ནས་ལོ་ལྔ་ལྷག་ཙམ་རིང་། ས་གནས་དེ་གའི་མང་ཚོགས་ཀྱི་ལས་ཞུགས་དང་འབབ་འཕར་ལ་སྐུལ་འདེད་ནུས་ལྡན་བཏང་ཡོད། གཏེར་ཆུ་བཟོ་གྲྭའི་འགན་འཁུར་བ་དབྱངས་ཅན་གྱིས“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འཕྲིན་ལན་གལ་ཆེན་གྱིས་ང་ཚོར་སེམས་འགུལ་དང་སྐུལ་ལྕག་ཆེན་པོ་ཐེབས་བྱུང་ལ། ང་ཚོས་གཏེར་ཆུ་བཟོ་གྲྭ་ཡག་པོ་གཉེར་ནས་བདེ་སྐྱིད་ཀྱི་ཁྱིམ་གཞིས་བསྐྲུན་པར་རང་ནུས་སྐྱེས་སུ་འབུལ་བའི་གདེང་ཚོད་ཀྱང་སྔར་བས་ཆེ་རུ་ཕྱིན་སོང་”ཞེས་བཤད།
ཉེ་ཆར། རྡོ་འབུམ་ཐང་གྲོང་ཚོའི་གྲོང་ཚོ་ཨུ་ལྷན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འཕྲིན་ལན་གལ་ཆེན་གྱི་དགོངས་དོན་ནན་ཏན་ངང་བརྒྱུད་བསྒྲགས་དང་སློབ་སྦྱོང་བྱས་ཏེ། གྲོང་ཚོ་དེ་གའི་དོན་དངོས་དང་ཟུང་འབྲེལ་གྱིས་གྲོས་བསྡུར་གཏིང་ཟབ་བྱས་ནས་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་གཏོང་ཆེད་བསམ་འཆར་དང་གྲོས་འགོ་ཧུར་ཐག་བཏོན་ཞིང་། ལ་ལས་ཀ་ལ་གྲོང་ཚོའི“ཁམ་བུའི་མེ་ཏོག་གྲོང་ཚོའི”སྤུས་རྟགས་ཀྱི་ཉམས་མྱོང་དཔྱད་གཞིར་བཟུང་ནས་ས་གནས་འདི་གའི་ཁྱད་ལྡན་ཐོན་ཁུངས་སྔོག་འདོན་དང་ཁྱད་ལྡན་ཡུལ་སྐོར་སྤུས་རྟགས་བཏོད་དེ་གྲོང་གསེབ་ཀྱི་ཡུལ་སྐོར་འཕེལ་རྒྱས་གཏོང་དགོས་ཞེས་བརྗོད་པ་དང་། ལ་ལས་ཞིང་འབྲོག་ཐོན་ལས་ལ་མ་དངུལ་གཏོང་ཤུགས་ཆེ་རུ་གཏོང་བ་དང་། ཁྱད་ལྡན་མི་རིགས་གྱོན་ཆས་དང་ལག་ཤེས་བཟོ་རྩལ་སོགས་འཕེལ་རྒྱས་བཏང་ནས་འབབ་འཕར་གྱི་ཐབས་ལམ་རྒྱ་ཆེར་གཏོང་དགོས་པའི་གྲོས་འགོ་བཏོན་པ་རེད། གྲོང་ཚོའི་ཏང་ཀྲི་པུའི་ཧྲུའུ་ཅི་ཚེ་རིང་ལྷ་བཟང་གིས“ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་ངེས་ནས་སྤྲོ་སེམས་ཆེན་པོས་གྲོང་གསེབ་འཛུགས་སྐྲུན་ནང་ཞུགས་ཏེ། གྲོང་ཚོ་སྔར་བས་མཛེས་སྡུག་ལྡན་པ་དང་མང་ཚོགས་ཀྱི་འཚོ་བ་སྔར་བས་བདེ་སྐྱིད་དང་མཛེས་སྡུག་ལྡན་པར་བྱེད་ཀྱི་ཡིན”ཞེས་བཤད།
ལྷ་རི་རྫོང་སྙེའུ་ཤང་ནི་ནག་ཆུ་གྲོང་ཁྱེར་དང་། ཉིང་ཁྲི་གྲོང་ཁྱེར། ཆབ་མདོ་གྲོང་ཁྱེར་བཅས་དང་ས་འབྲེལ་ཡིན་ཞིང་། གནམ་གཤིས་དྲོ་ལ་ནགས་ཚལ་སྟུག་པོ་ཡོད་པས“བོད་བྱང་ཐང་གི་འབྲི་ཆུའི་ལྷོ་རྒྱུད་ཆུང་ཆུང”ཞེས་བརྗོད་སྲོལ་ཡོད། ཉེ་བའི་ལོ་ཤས་རིང་སྙེའུ་ཤང་གིས་ཁམ་བུའི་མེ་ཏོག་དུས་ཆེན་དེ་ཉིད་དམ་འཛིན་བྱ་གཞིར་བྱས་ཏེ་བོད་ཕག་གསོ་ཚགས་དང་། གྲོང་གསེབ་ཡུལ་སྐོར། ཁྱད་ལྡན་ཆང་ལས་སོགས་ཐོན་ལས་འཕེལ་རྒྱས་ཤུགས་ཆེན་བཏང་ནས། གྲོང་གསེབ་ཀྱི་ཞིང་ལས་རིག་གནས་ཡུལ་སྐོར་ཐོན་ལས་མཉམ་འདྲེས་འཕེལ་རྒྱས་ཁྲོད་གོམ་སྟབས་གསར་པ་རྒྱུན་ཆད་མེད་པར་སྤོས་ཡོད།
འབྲི་རུ་རྫོང་གིས་རང་བྱུང་མཛེས་ལྗོངས་ཐོན་ཁུངས་དང་ལོ་རྒྱུས་རིག་གནས་ཀྱི་རྨང་གཞི་སྔོག་འདོན་གཏིང་ཟབ་བྱས་ནས་ཁྱད་ལྡན་རིག་གནས་ཡུལ་སྐོར་འཕེལ་རྒྱས་ཤུགས་ཆེན་བཏང་བས། གསའ་ཕུ་མཛེས་ལྗོངས་ཁུལ་གྱི་མིང་གྲགས་ཇེ་ཆེར་སོང་བ་དང་གསར་བརྗེའི་ཡུལ་སྐོར་ལ་སྐུལ་སྤེལ་ཧུར་ཐག་ཐེབས་ནས། གྲོང་གསེབ་དར་རྒྱས་ལ་སྒུལ་ནུས་གསར་པ་བསྣན་ཡོད། “ང་ཚོས“ཁམ་བུའི་མེ་ཏོག་གྲོང་ཚོའི”སྤུས་རྟགས་བཏོད་པའི་ཉམས་མྱོང་ལ་ནན་ཏན་གྱིས་སློབ་སྦྱོང་དང་དཔྱད་གཞིར་བཟུང་ནས་ས་གནས་དེ་གའི་ཁྱད་ལྡན་ཐོན་ཁུངས་སྔོག་འདོན་བྱས་ཏེ། རིག་གནས་ཡུལ་སྐོར་ཐོན་ལས་སྤུས་འབྲས་ལེགས་གཉེར་ཡོང་བར་སྐུལ་འདེད་བཏང་ནས་ཞིང་འབྲོག་པའི་འབབ་འཕར་ལ་རམ་འདེགས་བྱེད་ཀྱི་ཡིན”ཞེས་འབྲི་རུ་རྫོང་རིག་གནས་དང་ཡུལ་སྐོར་ཅུས་ཀྱི་ཅུས་ཀྲང་འཇམ་དབྱངས་བསྟན་པས་བཤད།
འབྲེལ་ཡོད་གསར་འགྱུར།