གསར་འགོད་པར་འབྲེལ་ཡོད་སྡེ་ཚན་ནས་ཤེས་རྟོགས་བྱུང་བར། འདི་ལོའི་ལོ་སྟོད་དུ་བོད་ཀྱི་མཐོ་གསར་གྲངས་འཛིན་ཐོན་ལས་འཕེལ་རྒྱས་མངོན་གསལ་དོད་པོ་བྱུང་ནས། ལྗོངས་ཡོངས་ཀྱི་མཐོ་གསར་གྲངས་འཛིན་ཐོན་ལས་རྣམ་གྲངས་ལ་མ་འཇོག་སྒོར་དུང་ཕྱུར་15.87ལེགས་གྲུབ་བྱུང་བ་དེས་ལོ་འཁོར་དམིགས་ཚད་ཀྱི་58.7%བཟུང་ཡོད།

སྐུལ་འདེད་ལས་དོན་སྤེལ་རིང་། རང་ལྗོངས་ཀྱིས་འཆར་འགོད་ཁྲིད་སྟོན་དུ་བྱས་ཏེ་སྔོན་ལ་འཆར་གཞི་ཞིབ་ཚགས་འགོད་པ་དང་རྗེས་སུ་བྱ་སྤྱོད་སྤེལ་རྒྱུ་མཐའ་འཁྱོངས་ཀྱིས་སྔ་རྗེས་སུ་གྲངས་འཛིན་དཔལ་འབྱོར་འཕེལ་རྒྱས་ཀྱི་འབྲེལ་ཡོད་ཞིབ་འཇུག་སྙན་ཞུ་བཟོས་པ་མ་ཟད། “ལོ་ལྔ་ཚན་བཅོ་ལྔ་པའི”གྲངས་འཛིན་བོད་ལྗོངས་འཛུགས་སྐྲུན་འཆར་འགོད་རང་སྐྱོང་ལྗོངས་ཀྱི་གཙོ་གནད་འཆར་འགོད་ནང་བཅུག་པ་དང་།

《བོད་རང་སྐྱོང་ལྗོངས་ཀྱི་སྤྱི་པའི་གྲངས་གཞི་དོ་དམ་བྱེད་ཐབས(ཚོད་ལྟའི་ལག་བསྟར)》དང《བོད་རང་སྐྱོང་ལྗོངས་ཀྱི་གྲངས་འཛིན་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་ལག་བསྟར་ཇུས་གཞི(2025ལོ་ནས་2030ལོ་བར)》སོགས་ཇུས་གཞི་དང་བྱེད་ཐབས་མང་པོ་བཀྲམ་སྟེ། སྤྱི་པའི་གྲངས་གཞི་དོ་དམ་ལ་ཤུགས་སྣོན་བརྒྱབ་ནས་སྤྱི་པའི་གྲངས་གཞི་མཉམ་སྤྱོད་དང་། སྒོ་དབྱེ། གསར་སྤེལ་བེད་སྤྱོད་བཅས་ལ་སྐུལ་འདེད་བཏང་ཡོད།

དེ་དང་ཆབས་ཅིག་རྨང་གཞིའི་སྒྲིག་བཀོད་སྲ་བརྟན་དུ་གཏོང་བའི་ཐད། རང་ལྗོངས་ཀྱིས་གཏེར་འདོན་དང་ཨར་ལས་རྒྱུ་ཆ་སོགས་ཁྱབ་ཁོངས་ཀྱི་གཙོ་གནད་ཁེ་ལས་ཀྱི་ཐོན་སྐྱེད་སྒྲིག་ཆས་དང་དེ་བཞིན་གྲངས་གཞི་དག་རང་སྐྱོང་ལྗོངས་བཟོ་ལས་དྲ་སྦྲེལ་གྱི་སྤྱི་པའི་ཞབས་ཞུའི་ལས་སྟེགས་སུ་སྦྲེལ་རྒྱུར་སྐུལ་འདེད་བཏང་བ་དང་ཆབས་ཅིག སྒྲིག་ཆས་འཁོར་སྐྱོད་དང་། རིག་ལྡན་ཟོག་འགྲེམས། ཐོན་རྫས་ཁུངས་འདེད། བདེ་འཇགས་ལྟ་འདོམས་སོགས་ཉེར་སྤྱོད་ཡོད་པར་བྱས་ཤིང་། མིག་སྔར་ལས་སྟེཌ་དེར་སྤྱོད་མཁན་2000ལྷག་ཙམ་གྱིས་ཐོ་བཀོད་པ་དང་གྲངས་འཛིན་ཅན་གྱི་ཐོན་རྫས་ཞབས་ཞུ་400ལྷག་ཙམ་དྲ་ཐོག་ནས་སྤེལ་ཡོད།