རི་པིན་གྱི་དབུ་བཞུགས་བློན་ཆེན་ཟུར་པ་ཅིའུ་ཧྲན་ཡིའུ་ཅི་ཧྥུའུ་ཡིས་དབུ་བཞུགས་བློན་ཆེན་གྱི་འགན་འཁུར་རིང་ཀྲུང་གོ་དང་འབྲེལ་བ་འཕེལ་རྒྱས་གཏོང་རྒྱུར་མཐོང་ཆེན་བྱས་པ་དང་། ལས་གནས་ལས་བབས་རྗེས་ཐོག་མཐའ་བར་གསུམ་དུ་ཀྲུང་རིའི་མཛའ་གྲོགས་དང་སྤེལ་རེས་མཉམ་ལས་ལ་སྐུལ་འདེད་གཏོང་བཞིན་ཡོད། ཉིན་ཤས་གོང་། རི་པིན་གྱི་རྒྱལ་ས་ཐོ་ཁེའུ་རུ་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས། ཀྲུའུ་ཞི་ཞི་ཅིན་ཕིང་དང་མཇལ་འཛོམས་ཐེངས་དང་པོ་གནང་སྐབས་ཀྱི་གནས་ཚུལ་དག་ཕྱིར་དྲན་བྱེད་བཞིན་ཅིའུ་ཧྲན་ཡིའུ་ཅི་ཧྥུའུ་ཡིས“ཀྲུའུ་ཞི་ཞི་ཅིན་ཕིང་ནི་བློ་བག་ཡངས་ལ་བློ་གཤོགས་ཆེན་པོ་ཡོད་ཅིང་། ཁོང་ནི་མཁྱེན་དཔྱོད་ཡངས་པའི་རྒྱལ་ཁབ་ཆེན་པོའི་འགོ་ཁྲིད་པ་ཞིག་རེད”ཅེས་བརྗོད།

2009ལོའི་ཟླ་12ཚེས་14ཉིན། སྐབས་དེར་ཀྲུང་གོའི་རྒྱལ་ཁབ་ཀྱི་ཀྲུའུ་ཞི་གཞོན་པ་ཡིན་པའི་ཞི་ཅིན་ཕིང་རི་པིན་དུ་འཚམས་འདྲིར་ཕེབས་ནས་རི་པིན་གྱི་དབུ་བཞུགས་བློན་ཆེན་གྱི་འགན་འཁུར་ནས་ཡུན་རིང་མ་སོང་བའི་ཅིའུ་ཧྲན་ཡིའུ་ཅི་ཧྥུའུ་དང་མཇལ་འཛོམས་ཐེངས་དང་པོ་གནང་ཞིང་། “མཇལ་འཛོམས་སྐབས་སུ། ང་ཚོས་རྒྱལ་ཁབ་གཉིས་པོའི་འབྲེལ་བ་དང་ཐུན་མོང་ཐོག་དོ་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་གནད་དོན་གཞན་དག་ཐད་ཟོལ་མེད་ངང་བསམ་འཆར་བརྗེ་རེས་གཏིང་ཟབ་བྱས་ནས་ཐུན་མོང་གི་ངོས་འཛིན་རྒྱ་ཁྱབ་བྱུང་ཡོད”ཅེས་ཅིའུ་ཧྲན་ཡིའུ་ཅི་ཧྥུའུ་ཡིས་བརྗོད་པ་དང་། ཁོང་གིས་གཟབ་གཟབ་ངང་ལོ་མང་ཉར་ཚགས་བྱས་པའི་མཉམ་པར་བཏོན་ནས“བརྒྱུད་རིམ་དེ་ངའི་ངོས་ནས་བརྗོད་ན་ཧ་ཅང་རྩ་ཆེན་ཞིག་ཡིན”ཞེས་བརྗོད།

དམངས་ཁྲོད་ཀྱི་སྤེལ་རེས་ནི་རྒྱལ་ཁབ་དང་རྒྱལ་ཁབ་དབར་འགྲོ་འོང་བྱེད་པའི་གྲུབ་ཆ་གལ་ཆེན་ཞིག་ཡིན་ལ། རྒྱལ་ཁབ་མི་འདྲ་བའི་མི་དམངས་དབར་ཤེས་རྟོགས་ཟབ་ཏུ་གཏོང་བ་དང་ཕན་ཚུན་ཡིད་ཆེས་ཟབ་ཏུ་གཏོང་བའི་བྱ་ཐབས་ནུས་ལྡན་ཞིག་ཀྱང་རེད། དབུ་བཞུགས་བློན་ཆེན་གྱི་ལས་གནས་ནས་ཁ་གྱེས་རྗེས། ཅིའུ་ཧྲན་ཡིའུ་ཅི་ཧྥུའུ་ཡིས་ཐོབ་ཐང་མི་འདྲ་བའི་ཐོག་ནས་ཀྲུང་གོར་འཚམས་འདྲི་བྱེད་པར་ཐེངས་མང་ཡོང་ནས་རྒྱལ་ཁབ་གཉིས་པོའི་དམངས་ཁྲོད་ཀྱི་སྤེལ་རེས་ལ་སྐུལ་འདེད་གཏོང་ཆེད་གང་སར་ནུས་པ་ཧུར་ཐག་བཏོན་པ་མ་ཟད། ཀྲུའུ་ཞི་ཞི་ཅིན་ཕིང་དང་མཇལ་འཕྲད་ཀྱང་ཐེངས་མང་བྱས་ཡོད། ཅིའུ་ཧྲན་ཡིའུ་ཅི་ཧྥུའུ་ཡིས“གླེང་མོལ་ཐེངས་མང་བྱེད་རིང་། ཀྲུའུ་ཞི་ཞི་ཅིན་ཕིང་གིས་རྒྱལ་སྤྱི་དང་ས་ཁུལ་གྱི་གནས་བབ་དང་རི་ཀྲུང་འབྲེལ་བའི་གལ་ཆེའི་རང་བཞིན་ཐད་ཐུན་མོང་མ་ཡིན་པའི་གཟིགས་ཚུལ་ཡོད་པ་ངས་དངོས་སུ་ཚོར་བྱུང”ཞེས་བརྗོད།

དེང་སྐབས་འཛམ་གླིང་ལ་ལོ་བརྒྱའི་འགྱུར་ལྡོག་མགྱོགས་མྱུར་འབྱུང་བཞིན་ཡོད་པས། རྒྱལ་ཁབ་ཁག་དབར་སྐྱིད་སྡུག་མཉམ་མྱོང་དང་ལས་དབང་མཉམ་འབྲེལ་རེད་ལ། མཉམ་ལས་གཉིས་ཕན་ནི་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་པར་བརྒྱུད་དགོས་ངེས་ཀྱི་ལམ་བུ་འབའ་ཞིག་དེའང་རེད། “ཀྲུའུ་ཞི་ཞི་ཅིན་ཕིང་དང་གླེང་མོལ་གནང་རིང་། ཁོང་གིས་ཕྱོགས་མང་མཉམ་ལས་ལ་མཐོང་ཧ་ཅང་ཆེན་པོ་བྱེད་ཀྱི་ཡོད་ཅེས་ཐེངས་མང་གསུངས་བྱུང་ལ། ཀྲུང་གོས་ཁྱིམ་མཚེས་རྒྱལ་ཁབ་དང་མཛའ་གྲོགས་འབྲེལ་བ་ཡག་པོ་འཛུགས་འདོད་ཡོད་པ་ལས་རྒྱལ་ཁབ་སྟོབས་ཆེན་གྱི་བཙན་དབང་བྱེད་ངེས་པའི་ལམ་ནོར་དུ་གཏན་ནས་སྐྱོད་མི་སྲིད་ཅེས་དམིགས་སུ་གསུངས་བྱུང་། ཀྲུའུ་ཞི་ཞི་ཅིན་ཕིང་གིས་ཐོག་མཐའ་བར་གསུམ་དུ་དར་སྤེལ་གཏོང་བའི་མིའི་རིགས་ཀྱི་ལས་དབང་གཅིག་མཐུན་ཚོགས་པའི་འདུ་ཤེས་དེ་ངས་ཐོག་མཐའ་བར་གསུམ་དུ་འབོད་སྐུལ་བྱེད་པའི་ཨེ་ཤེ་ཡ་ཤར་མའི་གཅིག་མཐུན་ཚོགས་པའི་བསམ་བཀོད་དང་འབྲེལ་བ་ཡོད་པའི་ཆ་ལྡན་པས། ངས་ནུས་པས་ལྕོགས་ཚོད་ཀྱིས་རྒྱབ་སྐྱོར་ཤུགས་ཆེན་བྱ་རྒྱུ་ཡིན”ཞེས་ཅིའུ་ཧྲན་ཡིའུ་ཅི་ཧྥུའུ་ཡིས་བརྗོད།

ཐོ་ཁེའུ་རུ་གནས་པའི་ཅིའུ་ཧྲན་ཚོགས་ཁང་ལ་ལོ་བརྒྱའི་ལོ་རྒྱུས་ལྡན་ཞིང་། ཚོགས་ཁང་གི་ཉིས་ཐོག་མགྲོན་བསུའི་ཚོམས་ཆེན་གྱང་སྟེང་གི་མངོན་གསལ་དོད་སར“ཞི་མཐུན་ནི་རྩ་ཆེན་ཡིན”ཞེས་པའི་ཡིག་གཟུགས་བརྩམས་ཆོས་ཤིག་བཀལ་ཡོད། ཅིའུ་ཧྲན་ཡིའུ་ཅི་ཧྥུའུ་ཡིས། གནའ་སྔ་མོ་ཀྲུང་གོར“ཞི་མཐུན་ནི་རྩ་ཆེན་ཡིན”ཞེས་པའི་བསམ་བློ་ཡོད་ལ། “བསྟུན་ཡང་གཅིག་མཚུངས་མི་བྱེད་པའི”འདུ་ཤེས་ཀྱང་ཡོད་པས། ཕན་ཚུན་མི་འདྲ་ནའང་མཉམ་གནས་དང་མཉམ་ལས་བྱེད་ཆོག་པ་ནན་བཤད་བྱས་ཡོད།

“ཀྲུའུ་ཞི་ཞི་ཅིན་ཕིང་གིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་རྒྱུས་མངའ་ཟབ་མོ་ཡོད་པས། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་བརྟན་སྲུང་བྱེད་པ་དང་ཆབས་ཅིག དེའི་ནང་གི་འདུ་ཤེས་དེང་རབས་ཆབ་སྲིད་ནང་བེད་སྤྱོད་བྱས་པ་དེ་ནི་བརྩི་བཀུར་ཆེན་པོ་བྱེད་འོས་པ་ཞིག་རེད”ཅེས་ཅིའུ་ཧྲན་ཡིའུ་ཅི་ཧྥུའུ་ཡིས་བརྗོད་པ་དང་། ཁོང་གིས“ང་ཚོས་ཤར་ཕྱོགས་ཀྱི་བསམ་བློ་དང་ལྷག་པར་དུ་ཀྲུང་གོའི་མཚན་ཉིད་རིག་པའི་བསམ་བློའི་ཁྲོད་ནས་བློ་གྲོས་དེ་བས་མང་བ་བསྡུ་ལེན་བྱེད་དགོས། བསམ་བློ་དེ་དག་འཛམ་གླིང་ལ་ཁྱབ་སྤེལ་དེ་བས་རྒྱ་ཁྱབ་བྱས་ཏེ་བསམ་ཤེས་དང་མཉམ་ལས་དེ་བས་མང་བ་ཐོབ་པར་སྐུལ་འདེད་གཏོང་རྒྱུའི་རེ་བ་ཡོད”ཅེས་བརྗོད།

ཅིའུ་ཧྲན་ཡིའུ་ཅི་ཧྥུའུ་ཡིས“ཀྲུའུ་ཞི་ཞི་ཅིན་ཕིང་ནི་གཞི་རིམ་གྱི་ལས་བྱེད་པ་ནས་རིམ་བཞིན་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་ཀྲུང་གོ་མི་དམངས་ཀྱི་གཙོ་འཛིན་དུ་གྱུར་བ་རེད། ལས་ཀའི་ཉམས་མྱོང་ཕུན་སུམ་ཚོགས་པོ་ལས་ཁོང་གིས་མི་དམངས་ཀྱི་དགོས་མཁོར་རྒྱུས་མངའ་ཟབ་མོ་ཡོད་པ་དང་འཛམ་གླིང་གི་དུས་བབ་ལ་ངོས་འཛིན་གཏིང་ཟབ་ཡོད། ཉམས་མྱོང་དེ་ལས་ཀྲུའུ་ཞི་ཞི་ཅིན་ཕིང་གི་རླབས་ཆེན་གྲུབ་ཡོད”ཅེས་བརྗོད།

ཀྲུང་གོས་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་བླངས་པ་དེས་ཅིའུ་ཧྲན་ཡིའུ་ཅི་ཧྥུའུ་ལ་བག་ཆགས་ཟབ་མོ་བཞག་ཡོད། “ཀྲུའུ་ཞི་ཞི་ཅིན་ཕིང་གིས་ཐག་རིང་ལུང་ཁུག་ཏུ་འཚོ་བ་སྐྱེལ་བཞིན་པའི་དམངས་ཚོགས་ལ་དོ་ཁུར་གནང་གི་ཡོད་ལ། མི་དམངས་ལ་བཅངས་པའི་བརྩེ་བ་ཟབ་མོ་དེ་མི་རྣམས་སེམས་འགུལ་ཐེབས་པ་ཞིག་ཡོད། ཐོག་མཐའ་བར་གསུམ་དུ་མི་དམངས་དང་མཉམ་དུ་གནས་པ་དེ་ནི་ཀྲུང་གོ་གུང་ཁྲན་ཏང་ལ་ལོ་རྒྱུས་དེབ་ཐེར་དུ་འཁོད་པའི་མཛད་རྗེས་རླབས་པོ་ཆེ་ཐོབ་པའི་ཐབས་མཆོག་དེ་རེད”ཅེས་ཅིའུ་ཧྲན་ཡིའུ་ཅི་ཧྥུའུ་ཡིས་བརྗོད།