“དེ་རིང་། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཉིང་ཁྲི་གྲོང་ཁྱེར་བྲག་ཡིབ་ཆུས་ཉིང་ཁྲི་གྲོང་རྡལ་ཀ་ལ་གྲོང་ཚོའི་ཡུལ་མི་ཡོངས་ལ་སྤྲིངས་པའི་འཕྲིན་ལན་གལ་ཆེན་གྱི་དགོངས་དོན་མཉམ་དུ་སློབ་སྦྱོང་བྱས་པ་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཕྲིན་ལན་ནང་ང་ཚོར་མི་རིགས་མཐུན་སྒྲིལ་ལ་སྲུང་སྐྱོང་ཡག་པོ་དང་དེ་བས་བདེ་སྐྱིད་དང་མཛེས་སྡུག་ལྡན་པའི་འཚོ་བ་གཏོད་དགོས་པ”སོགས་ཀྱི་སྐུལ་ལྕག་གནང་ཡོད་ཅེས་ཡེ་བྱང་གྲོང་ཚོའི་གེགས་རྗེས་བསྐྱར་སྐྲུན་གྱི་རྣམ་གྲངས་ཚང་མ་ཐོག་འགེབ་པའི་མཛད་སྒོར་གཞིས་རྩེ་གྲོང་ཁྱེར་དིང་རི་རྫོང་མཚོ་སྒང་ཤང་ཏང་ཨུད་ཀྱི་ཧྲུའུ་ཅི་གཞོན་པ་མིག་དམར་སྒྲོལ་མས་དེ་གར་ཡོད་པའི་མང་ཚོགས་ལ་སྐད་ཤུགས་ཆེན་པོས་བཤད།

“བྱང་སྐར་སྤུན་བདུན་གྱི་ལམ་སྟོན་ཇི་བཞིན་བསྐྱོད་ན་ལམ་ནོར་ཐེབས་མི་སྲིད་པ་དང་གུང་ཁྲན་ཏང་གི་རྗེས་སུ་འབྲངས་ན་བདེ་སྐྱིད་ཐོབ་ངེས་རེད” “ས་ཡོམ་བརྒྱབ་རྗེས། གུང་ཁྲན་ཏང་གི་བཀའ་དྲིན་ང་ཚོས་མིག་མཐོང་ལག་འཛིན་བྱུང་ལ། ཚེ་འདིར་གཏན་ནས་བརྗེད་མི་སྲིད”“ང་ཚོས་ངེས་པར་དུ་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་དྲན་པ། ཏང་གི་རྗེས་སུ་འབྲང་གི་ཡིན”ཞེས་པ་ལ་སོགས་སྡིངས་ཆའི་སྟེང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀ་ལ་གྲོང་ཚོའི་ཡུལ་མི་ཡོངས་ལ་སྤྲིངས་པའི་འཕྲིན་ལན་གལ་ཆེན་གྱི་ནང་དོན་སྒྲོག་སྦྱངས་བྱས་རྗེས། སྡིངས་ཆའི་གཤམ་དུ་ཡོད་པའི་ཏང་ཡོན་དང་མང་ཚོགས་ཀྱིས་ཕན་ཚུན་བསམ་ཚུལ་གླེང་རེས་འཁྲུག་པོ་བྱས་པ་རེད།

ལོ་30ལ་སླེབས་པའི་རྒྱགས་ལོད་ནི་ཡེ་བྱང་གྲོང་ཚོའི་ཡུལ་མི་ཡིན་པ་དང་ཡེ་བྱང་གྲོང་ཚོའི་གེགས་རྗེས་བསྐྱར་སྐྲུན་རྣམ་གྲངས་ཀྱི་ཨར་ལས་ནང་ཞུགས་པས་ཉིན་གླ་སྒོར་260ཡོད་པ་རེད། ཁོང་གིས“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འཕྲིན་ལན་ནང་ང་ཚོར་དེ་བས་བདེ་སྐྱིད་དང་མཛེས་སྡུག་ལྡན་པའི་འཚོ་བ་གཏོད་དགོས་པའི་སྐུལ་ལྕག་གནང་ཡོད། གནོད་འཚེ་དང་དཀའ་ངལ་ཆེན་པོའི་མདུན་དུ་ཏང་དང་རྒྱལ་ཁབ་ཀྱིས་ང་ཚོར་ཟ་རྒྱུ་དང་འཐུང་རྒྱུ་གནང་བྱུང་ལ། ང་ཚོ་གུར་དང་སྟབས་བདེའི་ཁང་པ་བརྒྱབ་ནས་དཀའ་ངལ་གྱི་གནས་ལས་སྒྲོལ་རོགས་དང་ཁང་པ་གསར་པ་ཡང་བརྒྱབ་བྱུང་། ཏང་དང་རྒྱལ་ཁབ་ཀྱི་ཐུགས་ཁུར་དང་རོགས་རམ་འོག ང་ཚོའི་འཚོ་བ་དེ་བས་བདེ་སྐྱིད་དང་མཛེས་སྡུག་ལྡན་པ་ཞིག་ཡོང་བའི་ཡིད་ཆེས་བརྟན་པོ་ཡོད”ཅེས་བརྗོད།

དུས་ཐུང་ཟླ་བ་གཅིག་ཀྱང་མ་འགོར་བར་མི་སེར་གྱི་སྡོད་ཁང་རེ་རེ་བཞིན་བསྐྱར་སྐྲུན་བྱས་པ་དེས་ཡེ་བྱང་གྲོང་ཚོའི་མང་ཚོགས་ལ་ཏང་གི་གོང་བུ་སྒྲིལ་ཤུགས་དང་མེས་རྒྱལ་གྱི་སྟོབས་ཤུགས་དངོས་ཚོར་ཡོད། “རང་ཉིད་ཏང་ཡོན་ཞིག་ཡིན་པར་སྤོབས་པ་ཆེན་པོ་སྐྱེ་གི་འདུག འདི་དག་ནི་ང་ཚོའི་ཁང་པ་རེད། གཟིགས་དང་། སྤུས་ཚད་ཡག་པོ་གང་འདྲ་མིན་འདུག་གམ། ད་ལྟ་ང་ཚོ་ས་ཡོམ་གྱི་དཀའ་གནད་ལས་བསྒྲལ་ནས་ལས་ལ་བརྩོན་པའི་ལག་གཉིས་ལ་བརྟེན་ཏེ་འཚོ་བ་དེ་བས་ཡག་པ་གཏོད་བཞིན་ཡོད”ཅེས་རྒྱགས་ལོད་ཀྱིས་གསར་དུ་བརྒྱབ་པའི་ཁང་པར་ལྟ་བཞིན་མྱོང་བ་ཟབ་མོས་བརྗོད།

“སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀ་ལ་གྲོང་ཚོའི་ཡུལ་མི་ཡོངས་ལ་སྤྲིངས་པའི་འཕྲིན་ལན་གལ་ཆེན་ནང་མཐའ་མཚམས་ས་ཁུལ་འཕེལ་རྒྱས་གཏོང་བར་ཐུགས་རེ་ཟབ་མོ་བཅོལ་གནང་ཡོད། ཇོ་མོ་གླང་མའི་འདབས་སུ་རྩ་བ་ཚུགས་པ་དང་ཡོམ་འགོག་གེགས་སེལ་གྱི་འཐབ་ཕྱོགས་དང་པོར་འབད་བརྩོན་བྱེད་པའི་གཞི་རིམ་གྱི་ལས་དོན་པ་ཞིག་ཡིན་པའི་ངོས་ནས། ངས་འགན་འཁྲི་ཕྲག་ཐོག་ཏུ་འཁུར་བ་དང་མང་ཚོགས་སེམས་ལ་བཅངས་ནས་ཨར་ལས་བྱ་ཡུལ་གྱི་མཐུན་སྦྱོར་པ་དང་། འབྲེལ་གཏུག་པ། ལྟ་སྐུལ་པ་བཅས་ཡག་པོ་བྱས་ཏེ་གེགས་རྗེས་བསྐྱར་སྐྲུན་གྱི་ལས་འགན་ཁག་དུས་བཀག་ལྟར་ལེགས་སྒྲུབ་ཡོང་བའི་འགན་ལེན་བྱེད་ཀྱི་ཡིན”ཞེས་མིག་དམར་སྒྲོལ་མས་བརྗོད་པ་རེད།