ཟླ་7ཚེས་10ཉིན། རྒྱལ་ཁབ་བསྡོམས་རྩིས་ཅུས་དང་། རྒྱལ་ཁབ་སྦྲག་སྲིད་ཅུས། རང་བྱུང་ཐོན་ཁུངས་པུའུ། ཀྲུང་གོ་རླངས་འཁོར་བཟོ་ལས་མཐུན་ཚོགས་སོགས་ཀྱིས་རང་རྒྱལ་གྱི་དབྱར་འབྲུ་དང་། མྱུར་སྐྱེལ། གཏེར་ཁ། རླངས་འཁོར་སོགས་ཕྱོགས་མང་པོའི་གྲངས་གཞི་གསར་ཤོས་ཁྱབ་བསྒྲགས་བྱས་ཤིང་། གྲངས་གཞི་དེ་དག་ལས་རང་རྒྱལ་གྱི་དཔལ་འབྱོར་རྒྱུན་མཐུད་ལེགས་ཕྱོགས་སུ་འཕེལ་བའི་གསོན་ཤུགས་དང་མི་མངོན་པའི་སྟོབས་ཤུགས་མངོན་གྱི་ཡོད།

དབྱར་འབྲུ། ཐོན་ལས་བརྟན་པོ་དང་ལོ་ལེགས་བྱུང་བ།

རྒྱལ་ཁབ་བསྡོམས་རྩིས་ཅུས་ཀྱིས་ཟླ་7ཚེས་10ཉིན་ཁྱབ་བསྒྲགས་བྱས་པའི་གྲངས་གཞི་ལས་མངོན་པར། འདི་ལོ་རྒྱལ་ཡོངས་ཀྱི་དབྱར་འབྲུ་འདེབས་ཁྱོན་སྤྱིར་ན་བརྟན་པོ་བྱུང་བ་དང་མུའུ་རེའི་ཐོན་ཚད་ལོ་གོང་མ་དང་སྤྱིར་ན་མཚུངས་ཤིང་། དབྱར་འབྲུའི་སྤྱིའི་ཐོན་ཚད་ཏུན་ཁྲི་14973.8(རྒྱ་མ་དུང་ཕྱུར་2994.8)ཟིན་པ་དང་། དེའི་ནང་གྲོའི་ཐོན་ཚད་ཏུན་ཁྲི་13816.0(རྒྱ་མ་དུང་ཕྱུར་2763.2)ཟིན་པས། རྒྱལ་ཡོངས་ཀྱི་དབྱར་འབྲུའི་ཐོན་ཚད་བརྟན་པོ་དང་ལོ་ལེགས་བྱུང་ཡོད།

རྒྱལ་ཡོངས་ཀྱི་དབྱར་འབྲུའི་འདེབས་ཁྱོན་མུའུ་དུང་ཕྱུར་3.99ཟིན་པ་དང་ལོ་གོང་མ་དང་བསྡུར་ན་གཞི་རྩའི་ཆ་ནས་བརྟན་པོ་ཡོད་པ་རེད། དབྱར་འབྲུ་མུའུ་རེའི་ཐོན་ཚད་སྤྱི་རྒྱ་375.6ཟིན་པ་དང་ལོ་གོང་མ་དང་སྤྱིར་ན་མཚུངས་ཤིང་། དབྱར་འབྲུའི་ཐོན་ཚད་བརྟན་པོ་དང་ལོ་ལེགས་བྱུང་ནས་ལོ་ཧྲིལ་པོའི་འབྲུ་རིགས་ཐོན་སྐྱེད་བརྟན་པོ་ཡོང་བར་རྨང་གཞི་བརྟན་པོ་བཏིང་བ་མ་ཟད། རྙོག་འཛིང་ཆེ་ཞིང་ཛ་དྲག་པའི་རྒྱལ་སྤྱིའི་དུས་བབ་ལ་ཁ་གཏད་གཅོག་པ་དང་དཔལ་འབྱོར་རྒྱུན་མཐུད་ལེགས་ཕྱོགས་སུ་འཕེལ་བར་འདེགས་སྐྱོར་ནུས་ལྡན་ཡང་བྱས་ཡོད་པ་རེད།

མྱུར་སྐྱེལ། ལས་འབོར་དུང་ཕྱུར་སྟོང་ལས་བརྒལ་བ།

རྒྱལ་ཁབ་སྦྲག་སྲིད་ཅུས་ཀྱིས་ཟླ་7ཚེས་10ཉིན་ཁྱབ་བསྒྲགས་བྱས་པའི་ལྟ་ཞིབ་ཚད་ལེན་གྲངས་གཞི་ལས་མངོན་པར། ཟླ་7ཚེས་9ཉིན་བར། འདི་ལོ་རང་རྒྱལ་གྱི་མྱུར་སྐྱེལ་ལས་འབོར་དུང་ཕྱུར་1000ལས་བརྒལ་བ་དེ་2024ལོར་དུང་ཕྱུར་སྟོང་ཟིན་པ་དང་བསྡུར་ན་ཉིན་35སྔ་སྣུར་བྱུང་ཡོད། དེར་བརྟེན་རང་རྒྱལ་གྱི་མྱུར་སྐྱེལ་ལས་སྒོའི་གྲངས་འབོར་ལོ་ལྔ་བསྟུད་མར་དུང་ཕྱུར་1000ལས་བརྒལ་ཡོད་པ་རེད།

ད་ལོའི་མྱུར་སྐྱེལ་བསྐུར་མ་ཨང་དུང་ཕྱུར་1000པ་ནི་ཀོང་ཏུང་ཀྲུང་ཧྲན་ནས་ཅང་སུའུ་ཁྲང་ཀྲོའུ་རུ་བསྐུར་བའི“རྙིང་པ་གསར་བརྗེའི”ཁྱིམ་སྤྱོད་དྲོད་སྙོམས་ཡོ་ཆས་ཤིག་རེད། འདི་ལོ་མྱུར་སྐྱེལ་བསྐུར་མ་དུང་ཕྱུར་སྟོང་སྔར་ལས་མགྱོགས་པོ་ཐོན་པ་ལས་རང་རྒྱལ་གྱི་འཛད་སྤྱོད་ཁྲོམ་རའི་གཞི་ཁྱོན་རྒྱུན་ཆད་མེད་པར་ཆེ་རུ་ཕྱིན་པ་དང་དྲ་ཐོག་ཚོང་དོན་གྱི་ཁྱབ་ཚད་རྒྱུན་ཆད་མེད་པར་མང་དུ་ཕྱིན་པ་འབུར་དུ་མངོན་པ་མ་ཟད། མྱུར་སྐྱེལ་ལས་རིགས་དེ་འཛད་སྤྱོད་རིམ་སྤོར་དང་དཔལ་འབྱོར་འཕར་སྣོན་ཡོང་བར་སྐུལ་འདེད་གཏོང་བའི་འདེགས་སྐྱོར་ནུས་ལྡན་ཞིག་ཏུ་ཉིན་རེ་བཞིན་འགྱུར་བཞིན་ཡོད་པའང་མཚོན་གྱི་ཡོད་པ་རེད།

གཏེར་ཁ། གཏེར་ཁ་འཚོལ་བར་ཚད་བརྒལ་གསར་པ་བྱུང་བ།

རང་བྱུང་ཐོན་ཁུངས་པུའུ་ཡིས་ཟླ་7ཚེས་10ཉིན་ཁྱབ་བསྒྲགས་བྱས་པའི་གྲངས་གཞི་ལས་མངོན་པར། འདི་ལོའི་ལོ་སྟོད་དུ་རྒྱལ་ཡོངས་སུ་གཏེར་ཁུལ་38གསར་དུ་ཤེས་རྟོགས་བྱུང་བ་དེ་དུས་མཚུངས་ལས་31%འཕར་བ་དང་དེའི་ནང་གཏེར་ཁུལ་ཆེ་འབྲིང་25ཡོད་པ་རེད། ཡུ་དང་། རུ། ཁོབ། མོང་། གསེར་སོགས་གཏེར་རིགས་གལ་ཆེན་འཚོལ་བར་ཚད་བརྒལ་ཆེན་པོ་བྱུང་ཡོད། མིག་སྔའི་བར། གཏེར་རིགས་མང་ཆེ་བ་བཙལ་ཐུབ་ནས“ལོ་ལྔ་ཚན་བཅུ་བཞི་པའི”གཏེར་འཚོལ་དམིགས་ཚད་ལས་འགན་སྔ་སྣུར་དུ་ལེགས་གྲུབ་ཟིན་ཡོད།

འདི་ལོའི་ལོ་སྟོད་དུ་རྒྱལ་ཡོངས་སུ་སྣུམ་རླངས་མིན་པའི་གཏེར་ཁ་རྩད་ཞིབ་ལ་མ་དངུལ་སྒོར་དུང་ཕྱུར་69.93བཏང་བ་དེ་དུས་མཚུངས་ལས་23.9%འཕར་ནས་མགྱོགས་མྱུར་འཕར་བའི་རྣམ་པ་རྒྱུན་འཁྱོངས་བྱས་པ་དང་དུས་མཚུངས་ལས་འཕར་ཚད་མུ་མཐུད་མཐོ་རུ་ཕྱིན་ཡོད་པ་རེད། དེའི་ནང་ནས་སྤྱི་ཚོགས་ཀྱི་མ་དངུལ་སྒོར་དུང་ཕྱུར་33.59ཟིན་པ་དེ་དུས་མཚུངས་ལས་28.2%འཕར་བ་དང་དེས་གཏེར་ཁ་རྩད་ཞིབ་ལ་བཏང་བའི་མ་དངུལ་བསྡོམས་འབོར་གྱི་48.0%བཟུང་བ་དང་། ཁེ་ལས་ཀྱིས་གཏེར་ཁ་རྩད་ཞིབ་ལ་མ་དངུལ་གཏོང་བའི་ཧུར་བརྩོན་རང་བཞིན་རྒྱུན་ཆད་མེད་པར་ཆེ་རུ་ཕྱིན་ཡོད། ཀྲུང་དབྱང་དང་ས་གནས་ཀྱི་ནོར་སྲིད་མ་དངུལ་སྒོར་དུང་ཕྱུར་36.34ཟིན་པ་དེ་དུས་མཚུངས་ལས་20.1%འཕར་ཡོད།

རླངས་འཁོར། ཐོན་སྐྱེད་དང་ཕྱིར་ཚོང་མགྱོགས་མྱུར་འཕར་བ།

ཀྲུང་གོ་རླངས་འཁོར་བཟོ་ལས་མཐུན་ཚོགས་ཀྱིས་ཟླ་7ཚེས་10ཉིན་ཁྱབ་བསྒྲགས་བྱས་པའི་གྲངས་གཞི་གསར་ཤོས་ལས་མངོན་པར། འདི་ལོའི་ལོ་སྟོད་དུ་རླངས་འཁོར་ཁྲོམ་རའི་རྣམ་པ་བཟང་པོ་རྒྱུན་མཐུད་བྱུང་བ་དང་། རླངས་འཁོར་ཐོན་སྐྱེད་དང་ཕྱིར་ཚོང་གཉིས་ཀ་ཁྲི་1500ལས་ཐོག་མར་བརྒལ་བ་དང་། དུས་མཚུངས་ལས་གྲངས་གནས་གཉིས་འཕར་ཞིང་། རླངས་འཁོར་ཐོན་ལས་ཀྱི་གསོན་ཤུགས་མུ་མཐུད་ཆེ་རུ་ཕྱིན་ཡོད་པ་རེད།

འདི་ལོའི་ལོ་སྟོད་དུ་རླངས་འཁོར་ཐོན་སྐྱེད་དང་ཕྱིར་ཚོང་བྱེད་ཚད་ཁྲི་1562.1དང་ཁྲི་1565.3སོ་སོར་ཟིན་ནས་དུས་མཚུངས་ལས་12.5%དང་11.4%སོ་སོར་འཕར་ཡོད། དེའི་ནང་ནས་ནུས་གསར་རླངས་འཁོར་ཐོན་སྐྱེད་དང་ཕྱིར་ཚོང་བྱེད་ཚད་ཁྲི་696.8དང་ཁྲི་693.7སོ་སོར་ཟིན་ནས་དུས་མཚུངས་ལས་41.4%དང་40.3%སོ་སོར་འཕར་ཡོད། རླངས་འཁོར་ཕྱིར་གཏོང་བྱེད་ཚད་ཁྲི་308.3ཟིན་པ་དེ་དུས་མཚུངས་ལས་10.4%འཕར་བ་དང་དེའི་ནང་ནས་ནུས་གསར་རླངས་འཁོར་ཕྱིར་གཏོང་བྱེད་ཚད་ཁྲི་106ཟིན་པ་དེ་དུས་མཚུངས་ལས་75.2%འཕར་ཡོད་པ་རེད།