ཟླ་བདུན་པའི་ཞོགས་པའི་ཉི་ཟེར་གསེར་མདོག་ཅན་གྱི་ཞིང་སར་འཕྲོས།

དིང་རི་རྫོང་གྲམ་མཚོ་ཤང་ཟིང་དཀར་གྲོང་ཚོའི་དྲིན་ཚོར་ཐང་ཆེན་དུ་སྔ་ས་ནས་མི་ཚོགས་ཀྱིས་ཁེངས་ཤིང་། ཨར་སྐྲུན་པ་ཚོས་ལས་གོས་གྱོན་ནས་བྲེལ་འཚུབ་ཀྱི་རྣམ་པ་དང་ཏང་ཡོན་ལས་བྱེད་པ་ཚོའི་བློ་རྩ་བརྟན་པོའི་རྣམ་འགྱུར་ལས་འགན་འཁྲི་འཁུར་སེམས་གསལ་པོར་མངོན་པ་དང་མང་ཚོགས་ཀྱི་འཐུས་མི་ཚོའི་ངོ་གདོང་ལས་རེ་བས་ཁེངས་པའི་རྣམ་འགྱུར་ཞིག་མངོན་བཞིན་ཚང་མ་དེ་གར་མཉམ་དུ་འཛོམས་ནས“ལོ་ངོ་60ཡི་རྟེན་འབྲེལ་ཆེ་མོ་བསུ། ཟིང་དཀར་གྲོང་ཚོའི་གེགས་རྗེས་བསྐྱར་སྐྲུན།‘བདུན་གཅིག’ཏང་འཛུགས་སྐྱོང་དང་མཉམ་སྐྲུན”གྱི་བྱེད་སྒོར་མཉམ་དུ་ཞུགས་པ་རེད།

ཟིང་དཀར་གྲོང་ཚོའི་ཏང་ཀྲི་པུའི་ཧྲུའུ་ཅི་པ་སངས་ཀྱིས་མྱོང་ཚོར་ཟབ་མོས“ལོ་ཕྱེད་ལ་ཉེ་བའི་རིང་། གྲོང་མི་ཚོས་ང་ལ་བརྗོད་མང་ཤོས་ནི་ཏང་གི་བཀའ་དྲིན་ཚེ་གང་བརྗེད་མི་སྲིད་པས། ནམ་ཡང་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་བྱེད་ཀྱི་ཡིན་ཞེས་པ་དེ་རེད། ལྷག་པར་དུ་དམིགས་བསལ་གྱི‘བདུན་གཅིག”གི་སྐབས་འདིར་སྤྱི་ཁྱབ་ཧྲུའུ་ཅིའི་འཕྲིན་ལན་མཐོང་བས་བསྐྱར་སྐྲུན་བྱེད་པའི་ང་ཚོའི་ངར་ཤུགས་སྔར་བས་ཆེ་རུ་ཕྱིན་པ་དང་དེ་བས་བདེ་སྐྱིད་དང་མཛེས་སྡུག་ལྡན་པའི་འཚོ་བ་གསར་གཏོད་བྱེད་པའི་ཐད་ཡིད་ཆེས་ཀྱིས་ཁེངས་སོང”ཞེས་བཤད།

ཟིང་དཀར་གྲོང་ཚོ་ནི་དིང་རིའི་ས་ཡོམ་རིམ་པ་6.8ཁྲོད་གནོད་འཚེ་ཕོག་ཚབས་ཆེ་བའི་གྲོང་ཚོ་ཡིན་པ་དང་དེ་སྔ་ཉམས་ཆག་ཆེན་པོ་བྱུང་ཡོད། འོན་ཀྱང་འདས་ཟིན་པའི་ཟླ་བ་འགའི་ནང་གཏོར་སྐྱོན་ཚབས་ཆེན་ཕོག་པའི་ས་ཆ་དེའི་ཐོག་ཏང་ཡོན་དང་ལས་བྱེད་པ་ཚོས་བྱ་སྤྱོད་དངོས་ལ་བརྟེན་ནས་ཐོག་མའི་བསམ་འདུན་དང་འགན་འཁྲི་ལག་ལེན་བསྟར་བ་དང་དཀའ་སྤྱད་ཀྱི་རྔུལ་ཆུར་བརྟེན་ནས་འགན་འཁྲི་འཁུར་ཐུབ་པར་བྱས་ཡོད།

གནས་སྤོ་བཀོད་སྒྲིག་དང་བར་བརྒལ་བཀོད་སྒྲིག་གི་དུས་མཚམས་སུ། གྲོང་པ་ཁྱིམ་མཚེས་དབར་སྐབས་རེ་འཚོ་བའི་དོན་དག་ཆུང་ཆུང་གི་ཆེད་དུ་འགལ་བ་ཐོན་སྲིད་པས་ཏང་ཡོན་ཚོས“འདུམ་འགྲིག་པ”བྱས་ཏེ་ངང་རྒྱུད་རིང་པོས་ཕྱོགས་གཉིས་པོའི་བསམ་འཆར་ཉན་པ་དང་། ལྷག་བསམ་རྣམ་དག་དང་བློ་གྲོས་ལ་བརྟེན་ནས་འགལ་བ་ཐག་གཅོད་བྱས་ནས་གྲོང་པ་ཁྱིམ་མཚེས་དབར་འཆམ་མཐུན་ཡོང་བར་སྐུལ་འདེད་གཏོང་གི་ཡོད། དཔྱིད་རྨོ་དཔྱིད་འདེབས་ཀྱི་འགག་རྩའི་དུས་སུ་ཏང་ཡོན་ཚོས་རང་འགུལ་ངང་མདུན་ཕྱོགས་སུ་ཞབས་འདེགས་ཞུ་བ་དང་ཞིང་ནང་དང་མུ་ཁར་བསྐྱོད་དེ་ཡུལ་མིར་གནད་དོན་དངོས་ཐག་གཅོད་བྱེད་རོགས་ཀྱིས་ཞིང་ལས་དུས་ཚིགས་འཐུས་ཤོར་མི་འགྲོ་བར་འགན་ལེན་བྱེད་ཀྱི་ཡོད། རྒྱུན་གཏན་གྱི་འཚོ་བའི་ཁྲོད་དུའང་ཏང་ཡོན་ཚོས་མི་རིགས་མཐུན་སྒྲིལ་དང་གྲོང་པ་ཁྱིམ་མཚེས་དབར་ཕན་ཚུན་རོགས་རམ་བྱེད་པའི་སྲིད་ཇུས་སྒྲོག་འགྲེལ་བྱེད་མཚམས་གཏན་ནས་མ་བཞག་པར་ཏང་གི་གསུང་སྒྲ་གྲོང་ཚོའི་ས་ཆ་གང་སར་ཁྱབ་པར་བྱེད་ཀྱི་ཡོད།

ཧྲང་ཧའེ་འཛུགས་སྐྲུན་བཟོ་ལས་ཀུང་སི་བོད་ལྗོངས་དིང་རི་རྫོང་གེགས་རྗེས་རོགས་སྐྲུན་ལས་གྲྭའི་གནས་སྐབས་ཏང་ཀྲི་པུའི་ཧྲུའུ་ཅི་དབྱང་ཆི་ཧྥན་གྱིས། ལོ་འགོར་གནས་སྐབས་ཏང་ཀྲི་པུའུ་དང་ཟིང་དཀར་གྲོང་ཚོའི་ཏང་ཀྲི་པུས་མཉམ་འབྲེལ་ཐོག“ས་མཐོའི་གདོང་ལེན་བཙན་རྫོང”གི་ཏང་འཛུགས་སྐྱོང་དང་མཉམ་སྐྲུན་བྱེད་སྒོ་སྤེལ་བ་མ་ཟད། ཏང་འཛུགས་སྐྱོང་དང་མཉམ་སྐྲུན་གྱི་གྲོས་མཐུན་ཡང་བཞག་ཡོད་ཅེས་བཤད།

དབྱང་ཆི་ཧྥན་གྱིས་སྔར་བཞིན་བློ་ལ་ངེས་གསལ། ཏང་ཡོན་ཚོ་མཉམ་དུ་བསྡད་དེ་མང་ཚོགས་ཀྱི་རེ་སྒུག་ལ་དམིགས་ནས་བསྐྱར་སྐྲུན་གྱི་འཆར་གཞིར་གྲོས་བསྡུར་ཚ་ཚ་འུར་འུར་བྱས་པ་དང་། ཏང་ཡོན་འཕྲལ་སྒྲུབ་རུ་ཁག་གིས་རུས་ཟུག་རྒྱག་པའི་གྲང་རླུང་ཁྲོད་ཐེ་ཚོམ་སྤུ་ཙམ་ཡང་མེད་པར་འཁྱགས་ཆུའི་ནང་འཛུལ་ཏེ་འཁྱགས་ནས་གས་པའི་ཆུ་སྦུག་མྱུར་བཟོ་བྱས་པས། གྲང་རླུང་ཁྲོད་ཁོང་ཚོའི་གཟུགས་བརྙན་དེ་བས་མངོན་གསལ་དོད་པར་གྱུར། ཏང་ཡོན་ཚོས་ལས་ཞོར་གྱི་དུས་ཚོད་སྤྱད་དེ་རང་འགུལ་ངང་ཡུལ་མིར་མངོན་མེད་ཉེན་ཁ་ལྡན་པའི་ཤིང་ཆ་དང་རྩྭ་སོགས་བསྡུ་གསོག་རྒྱག་རོགས་བྱེད་པ་སོགས་སླ་བཅོས་གཏན་ནས་མེད་པའི་རྣམ་འགྱུར་ལས་གྲོང་མི་ཚོས་ཏང་རྩ་འཛུགས་ཀྱི་ཐུགས་ཁུར་དང་དྲོ་སྐྱིད་ཚོར་ཐུབ་པ་བྱུང་ཡོད།

གེགས་རྗེས་བསྐྱར་སྐྲུན་ཕྱོགས་ཡོངས་ནས་འགོ་ཚུགས་རྗེས། གནོད་འཚེ་ཕོག་པའི་མང་ཚོགས་མི་གྲངས་མང་བ་དང་། དུད་ཚང་མང་བ། བསྐྱར་སྐྲུན་གྱི་གཞི་ཁྱོན་ཆེ་བ་བཅས་དང་འབྲེལ་བ་ཡོད་པའི་གནས་ཚུལ་དངོས་ཀྱི་མདུན་དུ་ཟིང་དཀར་གྲོང་ཚོའི་ཏང་ཡོན་ལས་བྱེད་པ་30ལས་གྲུབ་པའི“ཏང་ཡོན་ཞབས་ཞུའི་རུ་ཁག”གིས་སླར་ཡང་བསྐྱར་སྐྲུན་གྱི་འཐབ་ས་མདུན་ཤོས་སུ་སྐྱོད།

བྱ་སྤྱོད་ནི་ནུས་པ་ལྡན་ཤོས་ཀྱི་སྐུལ་ཁྲིད་ཡིན་པ་དང་དཔེ་སྟོན་ནི་མངོན་གསལ་དོད་ཤོས་ཀྱི་མིག་དཔེ་ཞིག་རེད། ཡུལ་མི་ཚེ་རིང་གིས“སྒེར་སེམས་མེད་པའི་ཏང་ཡོན་ལས་བྱེད་པ་ཁོང་ཚོ་ཡོད་པས་ཐམས་ཅད་ཇེ་ཡག་ཏུ་འགྲོ་ངེས་ཡིན་པ་ང་ཚོས་ཤེས་ཀྱི་འདུག”ཅེས་བཤད།

བྱེད་སྒོ་མཇུག་འགྲིལ་ལ་ཉེ་བའི་སྐབས་སུ་ཉིན་མཚན་མེད་པར་བསྐྱར་སྐྲུན་གྱི་འཐབ་ས་དང་པོར་འབད་འཐབ་བྱེད་མཁན་ཏང་ཡོན་ལས་བྱེད་པ་དང་། ལས་གྲྭ་འཛུགས་སྐྲུན་པ། མེ་ཟོན་གྱི་བཀོད་འཐབ་པ། མི་དམངས་ཉེན་རྟོག་པ། སྨན་དོན་ལས་དོན་པ་བཅས་ལ་གྲོང་ཚོའི་རྒན་རྒོན་ཚོས་སྨོན་འདུན་བཟང་པོ་མཚོན་པའི་དཀར་གཙང་ཁ་བཏགས་གཡོག་པ་དང་། ཡུལ་མི་ཚོས་ཚ་སོབ་སོབ་ཀྱི་ཇ་མངར་མོ་བླུགས་ཏེ་སེམས་གཏིང་ནས་ཐུགས་རྗེ་ཆེ་ཞུ་ལུགས་མཚོན་པར་བྱས་པ་རེད།

མི་རིང་བའི་སར་ཟིང་དཀར་གྲོང་ཚོའི་བསྐྱར་སྐྲུན་སྡོད་ཁང་གསར་པ་འགྱིང་ངེར་གནས་པ་དང་ཁང་པ་གསར་རྐྱང་སྟར་པ་མང་པོ་གྲལ་སྟར་འགྲིག་པོར་གནས་ཏེ་ཉི་འོད་འོག་དེ་བས་མངོན་གསལ་དོད་པར་གྱུར། འཛུགས་སྐྲུན་གྱི་ལས་དོན་ཁག་ཚ་ཚ་འུར་འུར་ངང་སྤེལ་བཞིན་ཡོད་པ་དང་སྔོན་གཏན་འཁེལ་བའི་དམིགས་ཚད་ཕྱོགས་སུ་འབད་བརྩོན་བྱེད་བཞིན་ཡོད།

རེ་བས་ཁེངས་པའི་ས་གཞི་དེའི་ཐོག་ཏང་གི་རྟགས་མའི་འོད་ཟེར་ཐོག་མའི་བསམ་འདུན་ལ་འཕྲོས་པ་དང་ལྷབ་ལྷུབ་ཏུ་གཡོ་བའི་ཏང་དར་གྱིས་ཁ་ཕྱོགས་ལ་སྣེ་ཁྲིད་བྱེད་བཞིན་ཡོད། ཟིང་དཀར་གྲོང་ཚོའི་ཏང་ཡོན་ལས་བྱེད་པ་དང་མང་ཚོགས་ཚོས་ལག་གདང་དཔུང་སྦྲེལ་བྱས་ནས་དེ་བས་མཛེས་སྡུག་ལྡན་པའི་འབྱུང་འགྱུར་ཕྱོགས་སུ་དཔའ་ངར་ཆེན་པོས་མདུན་སྐྱོད་བྱེད་བཞིན་མཆིས།