དིང་རིར་ས་ཡོམ་རིམ་པ་6.8བརྒྱབ་པ་ནས་བཟུང་། གཞིས་རྩེ་གྲོང་ཁྱེར་ས་སྐྱ་རྫོང་རྨ་བྱ་ཤང་ཏང་ཨུད་ཀྱིས་ཤང་ཡོངས་ཀྱི་ལས་བྱེད་པ་དང་མང་ཚོགས་4500ལྷག་ཙམ་ལ་མཐུན་སྒྲིལ་དང་སྣེ་ཁྲིད་བྱས་ཏེ། གེགས་རྗེས་སླར་གསོ་བསྐྱར་སྐྲུན་གྱི་སྲིད་ཇུས་སྒྲོག་འགྲེལ་དང་། གྲངས་གཞི་བསྡོམས་རྩིས། མངོན་མེད་རྐྱེན་ངན་ཞིབ་བཤེར། རྩོད་གཞི་འདུམ་འགྲིག སྤུས་ཚད་ལ་ལྟ་སྐུལ་སོགས་ཀྱི་ལས་དོན་ནུས་ཤུགས་ཡོད་རྒུས་ལེགས་པར་བསྒྲུབས་ནས་གེགས་རྗེས་སླར་གསོ་བསྐྱར་སྐྲུན་གྱི་ལས་དོན་ཁག་ལ་སྐུལ་འདེད་བརྟན་པོ་བཏང་བ་རེད།

རྨ་བྱ་ཤང་ཏང་ཨུད་ཀྱིས་བྱེད་པོའི་འགན་འཁྲི་མཐའ་གཅིག་ཏུ་ཁུར་ནས་མང་ཚོགས་ལ་མཐུན་སྒྲིལ་དང་། མང་ཚོགས་སྒྲིག་འཛུགས། མང་ཚོགས་ལ་དྲིལ་བསྒྲགས། མང་ཚོགས་གཅིག་འདུས། མང་ཚོགས་ལ་ཞབས་འདེགས་ཞུ་བ་བཅས་ཀྱི་ཁྲོད“སྣེ་ཁྲིད་པའི”ནུས་པ་བཏོན་ནས། ཏང་རྩ་འཛུགས་ལྟེ་བ་དང་ཏང་ཡོན་ལས་བྱེད་པ་རྐང་འཛིན་དུ་བྱས་ཏེ། རོགས་སྐྱོར་ལས་བྱེད་པ་དང་། མང་ཚོགས། དང་བླངས་པ་སོགས་ཕྱོགས་མང་པོའི་སྟོབས་ཤུགས་སྐུལ་སློང་དང་། གེགས་རྗེས་སླར་གསོ་བསྐྱར་སྐྲུན་གྱི་སྲིད་ཇུས་དྲིལ་བསྒྲགས་ཤུགས་ཆེན་བྱས་ནས་བསྐྱར་སྐྲུན་སྲིད་ཇུས་མི་ཚང་མས་ཤེས་པ་དང་ཁྱིམ་ཚང་ཚང་མས་ཤེས་པར་འགན་ལེན་བྱས་པ་རེད།

དེ་དང་ཆབས་ཅིག“གནོད་འཚེར་གཞིགས་ནས་གྱོང་གུན་གཏན་འཁེལ་དང་གྱོང་གུན་ལ་གཞིགས་ནས་དཔྱད་གཞི་གཏན་འཁེལ་བྱེད་པའི”བླང་བྱ་གཞིར་བཟུང་། གནོད་འཚེ་ཕོག་པའི་མང་ཚོགས་ཀྱི་རྒྱུ་ནོར་གྱི་གྱོང་གུན་དང་། མི་སྣར་རྨས་སྐྱོན་ཕོག་པ། ཁང་པ་རྡིབ་པ་སོགས་ཀྱི་གནས་ཚུལ་ལ་གནད་ལ་འཁེལ་པོས་བསྡོམས་རྩིས་བརྒྱབ་ནས་སྙན་སེང་ཞུས་པ་དང་། སྐྱིན་ཚབ་སྤྲོད་དགོས་རིགས་ཚང་མར་སྐྱིན་ཚབ་སྤྲད་དེ་འགན་བཅོལ་གྱི་སྐྱིན་ཚབ་མ་དངུལ་སྒོར་ཁྲི་261.65བརྩོན་ལེན་བྱས་པ་དང་། གནོད་འཚེ་ཕོག་པའི་མང་ཚོགས་ཀྱི་ནང་མི་མང་ཉུང་དང་མང་ཚོགས་ཀྱི་སྡོད་ཁང་འཛུགས་སྐྲུན་སོགས་ཀྱི་གནས་ཚུལ་ལ་བསྡོམས་རྩིས་ནན་ཏན་བརྒྱབ་སྟེ། དུད་ཚང་150གཅིག་གྱུར་འཆར་འགོད་དང་གཅིག་གྱུར་འཛུགས་སྐྲུན་དང་། དུད་ཚང་388གཅིག་གྱུར་འཆར་འགོད་དང་ལོགས་སུ་འཛུགས་སྐྲུན། དུད་ཚང་341ཉམས་གསོ་བརྟན་གཏོང་བཅས་བྱས་ནས་བསྡོམས་རྩིས་གྲངས་གཞིའི་ནང་དུད་ཚང་གཅིག་དང་མི་གཅིག་ཀྱང་མི་ལུས་པ་བྱས་པ་རེད།