ཚེས་6ཉིན། རིག་གནས་དང་ཡུལ་སྐོར་པུའུ་ཡིས་གཙོ་གཉེར་བྱས་པའི་2025ལོའི་ཀྲུང་གོའི་གདོད་མའི་རྣམ་པའི་དམངས་གཞས་འདུ་ཚོགས་ནང་སོག་རང་སྐྱོང་ལྗོངས་ཧུའུ་ཧོ་ཧའོ་ཐེ་གྲོང་ཁྱེར་དུ་མཇུག་འགྲིལ་བ་རེད།

ཀྲུང་གོའི་གདོད་མའི་རྣམ་པའི་དམངས་གཞས་འདུ་ཚོགས་ལོ་གཉིས་རེ་ལ་སྐབས་རེ་གཉེར་གྱི་ཡོད། ད་ཐེངས་ཀྱི་དམངས་གཞས་འདུ་ཚོགས་ཀྱིས“གདོད་མའི་རང་བྱུང་གི་འགྱུར་ཁུག དམངས་གཞས་ལས་ཀྲུང་ཧྭའི་བརྩེ་སེམས་མངོན”ཞེས་པ་བརྗོད་དོན་གཙོ་བོར་བྱས་ཤིང་། རྒྱལ་ཡོངས་ཀྱི་རུ་ཁག་65ཡི་མི་400ཙམ་འཁྲབ་སྟོན་ལ་ཞུགས་ཡོད། ལེ་ཚན་ནང་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་ཁག་42དང་། ཞིང་ཆེན་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་ཁག་23ཚུད་ཡོད། དེའི་ནང་ཕུལ་བྱུང་དམངས་གཞས་ཡོད་ལ་གསར་གཏོད་དང་བསྐྱར་སྒྲིག་བྱས་པའི་ཁྱད་ལྡན་རོལ་དབྱངས་ཀྱང་ཡོད་པ་ལས། རང་རྒྱལ་གྱི་རོལ་དབྱངས་རིགས་ཀྱི་མངོན་མིན་རིག་གནས་ཤུལ་བཞག་རྒྱུན་འཛིན་དང་འཕེལ་རྒྱས་ཀྱི་གྲུབ་འབྲས་གསར་ཤོས་གསོན་ཉམས་དོད་པོས་མངོན་ཡོད་པ་རེད།

དམངས་གཞས་འདུ་ཚོགས་རིང་། ས་གནས་ཁག་གི་འཁྲབ་སྟོན་རུ་ཁག་དང་ས་གནས་དེ་གའི་ཝུའུ་ལན་མུའུ་ཆི་འཁྲབ་སྟོན་རུ་ཁག་གིས་ཡན་ལག་རུ་ཁག་ཆུང་ཆུང་བཙུགས་ནས། ཧུའུ་ཧོ་ཧའོ་ཐེ་གྲོང་ཁྱེར་དང་། ཝུའུ་ལན་ཁྲ་པུའུ་གྲོང་ཁྱེར། ཨེར་ཏུའོ་སི་གྲོང་ཁྱེར་བཅས་དང་། ས་གནས་དེ་གའི་ཐང་ཆེན་དང་། སློབ་གྲྭ འབྲོག་ཁུལ་སོགས་སུ་བསྐྱོད་དེ། གཅིག་སྡུད་འཁྲབ་སྟོན་ཐེངས་6དང་གཞི་རིམ་དུ་དམངས་ཕན་འཁྲབ་སྟོན་ཐེངས་8བྱས་ཡོད།